॥ শ্রী রঙ্গ গদ্যম্ ॥
চিদচিত্পরতত্ত্বানাং তত্ত্বাযাথার্থ্যবেদিনে ।
রামানুজায মুনযে নমো মম গরীযসে ॥
রামানুজায মুনযে নমো মম গরীযসে ॥
॥ গদ্যম্ ॥
স্বাধীনত্রিবিধচেতনাঽচেতন স্বরূপস্থিতি প্রবৃত্তিভেদং, ক্লেশকর্মাদ্যশেষদোষাসংস্পৃষ্টং, স্বাভাবিকানবধিকাতিশয জ্ঞানবলৈশ্বর্য বীর্যশক্তিতেজস্সৌশীল্য বাত্সল্য মার্দবার্জব সৌহার্দ সাম্য কারুণ্য মাধুর্য গাম্ভীর্য ঔদার্য চাতুর্য স্থৈর্য ধৈর্য শৌর্য পরাক্রম সত্যকাম সত্যসঙ্কল্প কৃতিত্ব কৃতজ্ঞতাদ্যসঙ্খ্যেয কল্যাণগুণ গণৌঘ মহার্ণবং, পরব্রহ্মভূতং, পুরুষোত্তমং, শ্রীরঙ্গশাযিনং, অস্মত্স্বামিনং, প্রবুদ্ধনিত্যনিযাম্য নিত্যদাস্যৈকরসাত্মস্বভাবোঽহং, তদেকানুভবঃ তদেকপ্রিযঃ, পরিপূর্ণং ভগবন্তং বিশদতমানুভবেন নিরন্তরমনুভূয, তদনুভবজনিতানবধিকাতিশয প্রীতিকারিতাশেষাবস্থোচিত অশেষশেষতৈকরতিরূপ নিত্যকিঙ্করো ভবানি ।
স্বাত্মনিত্য নিযাম্য নিত্যদাস্যৈকরসাত্ম স্বভাবানুসন্ধানপূর্বক ভগবদনবধিকাতিশয স্বাম্যাদ্যখিল গুণগণানুভব জনিতানবধিকাতিশয প্রীতিকারিতাশেষাবস্থোচিতাশেষ শেষতৈকরতিরূপ নিত্যকৈঙ্কর্য প্রাপ্ত্যুপাযভূতভক্তি তদুপায সম্যগ্ জ্ঞানতদুপায সমীচীনক্রিযা তদনুগুণসাত্ত্বিকতাঽঽস্তিক্যাদি সমস্তাত্মগুণবিহীনঃ, দুরুত্তরানন্ত তদ্বিপর্যয জ্ঞানক্রিযানুগুণানাদি পাপবাসনা মহার্ণবান্তর্নিমগ্নঃ, তিলতৈলবদ্দারুবহ্নিবদ্দুর্বিবেচ ত্রিগুণ ক্ষণক্ষরণ স্বভাবাচেতন প্রকৃতিব্যাপ্তিরূপ দুরত্যয ভগবন্মাযা তিরোহিত স্বপ্রকাশঃ, অনাদ্যবিদ্যাসঞ্চিতানন্তাশক্য বিস্রংসন কর্মপাশ প্রগ্রথিতঃ, অনাগতানন্তকাল সমীক্ষযাঽপ্যদৃষ্টসন্তারোপাযঃ, নিখিলজন্তুজাতশরণ্য, শ্রীমন্নারাযণ, তব চরণারবিন্দযুগলং শরণমহং প্রপদ্যে ॥
এবমবস্থিতস্যাপ্যর্থিত্বমাত্রেণ, পরমকারুণিকো ভগবান্, স্বানুভব প্রীত্যোপনীতৈকান্তিকাত্যন্তিক নিত্যকৈঙ্কর্যৈকরতিরূপ নিত্যদাস্যং দাস্যতীতি বিশ্বাসপূর্বকং ভগবন্তং নিত্যকিঙ্করতাং প্রার্থযে ॥
তবানুভূতিসম্ভূতপ্রীতিকারিত দাসতাম্ ।
দেহি মে কৃপযা নাথ ন জানে গতিমন্যথা ॥
দেহি মে কৃপযা নাথ ন জানে গতিমন্যথা ॥
সর্বাবস্থোচিতাশেষ শেষতৈকরতিস্তব ।
ভবেযং পুণ্ডরীকাক্ষ ত্বমেবৈবং কুরুষ্ব মাম্ ॥
ভবেযং পুণ্ডরীকাক্ষ ত্বমেবৈবং কুরুষ্ব মাম্ ॥
এবম্ভূত তত্ত্ব যাথাত্ম্যববোধ তদিচ্ছারহিতস্যাপি, এতদুচ্চারণমাত্রাবলম্বনেন, উচ্যমানার্থ পরমার্থনিষ্ঠং মে মনস্ত্বমেবাদ্যৈব কারয ॥
অপার করুণাম্বুধে, অনালোচিত বিশেষাশেষ লোকশরণ্য, প্রণতার্তিহর, আশ্রিতবাত্সল্যৈক মহোদধে, অনবরতবিদিত নিখিলভূতজাত যাথাত্ম্য, সত্যকাম, সত্যসঙ্কল্প, আপত্সখ, কাকুত্স্থ, শ্রীমন্, নারাযণ, পুরুষোত্তম, শ্রীরঙ্গনাথ, মম নাথ, নমোঽস্তু তে ॥
॥ ইতি শ্রীভগবদ্রামানুজ বিরচিতং শ্রী রঙ্গ গদ্যম্ সম্পূর্ণম্ ॥