॥ ശ്രീ രങ്ഗ ഗദ്യമ് ॥
ചിദചിത്പരതത്ത്വാനാം തത്ത്വായാഥാര്ഥ്യവേദിനേ ।
രാമാനുജായ മുനയേ നമോ മമ ഗരീയസേ ॥
രാമാനുജായ മുനയേ നമോ മമ ഗരീയസേ ॥
॥ ഗദ്യമ് ॥
സ്വാധീനത്രിവിധചേതനാഽചേതന സ്വരൂപസ്ഥിതി പ്രവൃത്തിഭേദം, ക്ലേശകര്മാദ്യശേഷദോഷാസംസ്പൃഷ്ടം, സ്വാഭാവികാനവധികാതിശയ ജ്ഞാനബലൈശ്വര്യ വീര്യശക്തിതേജസ്സൌശീല്യ വാത്സല്യ മാര്ദവാര്ജവ സൌഹാര്ദ സാമ്യ കാരുണ്യ മാധുര്യ ഗാമ്ഭീര്യ ഔദാര്യ ചാതുര്യ സ്ഥൈര്യ ധൈര്യ ശൌര്യ പരാക്രമ സത്യകാമ സത്യസങ്കല്പ കൃതിത്വ കൃതജ്ഞതാദ്യസങ്ഖ്യേയ കല്യാണഗുണ ഗണൌഘ മഹാര്ണവം, പരബ്രഹ്മഭൂതം, പുരുഷോത്തമം, ശ്രീരങ്ഗശായിനം, അസ്മത്സ്വാമിനം, പ്രബുദ്ധനിത്യനിയാമ്യ നിത്യദാസ്യൈകരസാത്മസ്വഭാവോഽഹം, തദേകാനുഭവഃ തദേകപ്രിയഃ, പരിപൂര്ണം ഭഗവന്തം വിശദതമാനുഭവേന നിരന്തരമനുഭൂയ, തദനുഭവജനിതാനവധികാതിശയ പ്രീതികാരിതാശേഷാവസ്ഥോചിത അശേഷശേഷതൈകരതിരൂപ നിത്യകിങ്കരോ ഭവാനി ।
സ്വാത്മനിത്യ നിയാമ്യ നിത്യദാസ്യൈകരസാത്മ സ്വഭാവാനുസന്ധാനപൂര്വക ഭഗവദനവധികാതിശയ സ്വാമ്യാദ്യഖില ഗുണഗണാനുഭവ ജനിതാനവധികാതിശയ പ്രീതികാരിതാശേഷാവസ്ഥോചിതാശേഷ ശേഷതൈകരതിരൂപ നിത്യകൈങ്കര്യ പ്രാപ്ത്യുപായഭൂതഭക്തി തദുപായ സമ്യഗ് ജ്ഞാനതദുപായ സമീചീനക്രിയാ തദനുഗുണസാത്ത്വികതാഽഽസ്തിക്യാദി സമസ്താത്മഗുണവിഹീനഃ, ദുരുത്തരാനന്ത തദ്വിപര്യയ ജ്ഞാനക്രിയാനുഗുണാനാദി പാപവാസനാ മഹാര്ണവാന്തര്നിമഗ്നഃ, തിലതൈലവദ്ദാരുവഹ്നിവദ്ദുര്വിവേച ത്രിഗുണ ക്ഷണക്ഷരണ സ്വഭാവാചേതന പ്രകൃതിവ്യാപ്തിരൂപ ദുരത്യയ ഭഗവന്മായാ തിരോഹിത സ്വപ്രകാശഃ, അനാദ്യവിദ്യാസഞ്ചിതാനന്താശക്യ വിസ്രംസന കര്മപാശ പ്രഗ്രഥിതഃ, അനാഗതാനന്തകാല സമീക്ഷയാഽപ്യദൃഷ്ടസന്താരോപായഃ, നിഖിലജന്തുജാതശരണ്യ, ശ്രീമന്നാരായണ, തവ ചരണാരവിന്ദയുഗലം ശരണമഹം പ്രപദ്യേ ॥
ഏവമവസ്ഥിതസ്യാപ്യര്ഥിത്വമാത്രേണ, പരമകാരുണികോ ഭഗവാന്, സ്വാനുഭവ പ്രീത്യോപനീതൈകാന്തികാത്യന്തിക നിത്യകൈങ്കര്യൈകരതിരൂപ നിത്യദാസ്യം ദാസ്യതീതി വിശ്വാസപൂര്വകം ഭഗവന്തം നിത്യകിങ്കരതാം പ്രാര്ഥയേ ॥
തവാനുഭൂതിസമ്ഭൂതപ്രീതികാരിത ദാസതാമ് ।
ദേഹി മേ കൃപയാ നാഥ ന ജാനേ ഗതിമന്യഥാ ॥
ദേഹി മേ കൃപയാ നാഥ ന ജാനേ ഗതിമന്യഥാ ॥
സര്വാവസ്ഥോചിതാശേഷ ശേഷതൈകരതിസ്തവ ।
ഭവേയം പുണ്ഡരീകാക്ഷ ത്വമേവൈവം കുരുഷ്വ മാമ് ॥
ഭവേയം പുണ്ഡരീകാക്ഷ ത്വമേവൈവം കുരുഷ്വ മാമ് ॥
ഏവമ്ഭൂത തത്ത്വ യാഥാത്മ്യവബോധ തദിച്ഛാരഹിതസ്യാപി, ഏതദുച്ചാരണമാത്രാവലമ്ബനേന, ഉച്യമാനാര്ഥ പരമാര്ഥനിഷ്ഠം മേ മനസ്ത്വമേവാദ്യൈവ കാരയ ॥
അപാര കരുണാമ്ബുധേ, അനാലോചിത വിശേഷാശേഷ ലോകശരണ്യ, പ്രണതാര്തിഹര, ആശ്രിതവാത്സല്യൈക മഹോദധേ, അനവരതവിദിത നിഖിലഭൂതജാത യാഥാത്മ്യ, സത്യകാമ, സത്യസങ്കല്പ, ആപത്സഖ, കാകുത്സ്ഥ, ശ്രീമന്, നാരായണ, പുരുഷോത്തമ, ശ്രീരങ്ഗനാഥ, മമ നാഥ, നമോഽസ്തു തേ ॥
॥ ഇതി ശ്രീഭഗവദ്രാമാനുജ വിരചിതം ശ്രീ രങ്ഗ ഗദ്യമ് സമ്പൂര്ണമ് ॥