শ্রীমদ্ভাগবতম্ ১০.৩০

শ্রীশুক উবাচ
অন্তর্হিতে ভগবতি সহসৈব ব্রজাঙ্গনাঃ ।
অতপ্যংস্তমচক্ষাণাঃ করিণ্য ইব যূথপম্ ॥ ১ ॥

গত্যানুরাগস্মিতবিভ্রমেক্ষিতৈ-
র্মনোরমালাপবিহারবিভ্রমৈঃ ।
আক্ষিপ্তচিত্তাঃ প্রমদা রমাপতে-
স্তাস্তা বিচেষ্টা জগৃহুস্তদাত্মিকাঃ ॥ ২ ॥

গতিস্মিতপ্রেক্ষণভাষণাদিষু
প্রিযাঃ প্রিযস্য প্রতিরূঢমূর্তযঃ ।
অসাবহং ত্বিত্যবলাস্তদাত্মিকা
ন্যবেদিষুঃ কৃষ্ণবিহারবিভ্রমাঃ ॥ ৩ ॥

গাযন্ত্য উচ্চৈরমুমেব সংহতা
বিচিক্যুরুন্মত্তকবদ্ বনাদ্ বনম্ ।
পপ্রচ্ছুরাকাশবদন্তরং বহি-
র্ভূতেষু সন্তং পুরুষং বনস্পতীন্ ॥ ৪ ॥

দৃষ্টো বঃ কচ্চিদশ্বত্থ প্লক্ষ ন্যগ্রোধ নো মনঃ ।
নন্দসূনুর্গতো হৃত্বা প্রেমহাসাবলোকনৈঃ ॥ ৫ ॥

কচ্চিত্ কুরবকাশোকনাগপুন্নাগচম্পকাঃ ।
রামানুজো মানিনীনামিতো দর্পহরস্মিতঃ ॥ ৬ ॥

কচ্চিত্তুলসি কল্যাণি গোবিন্দচরণপ্রিযে ।
সহ ত্বালিকুলৈর্বিভ্রদ্ দৃষ্টস্তেঽতিপ্রিযোঽচ্যুতঃ ॥ ৭ ॥

মালত্যদর্শি বঃ কচ্চিন্মল্লিকে জাতি যূথিকে ।
প্রীতিং বো জনযন্ যাতঃ করস্পর্শেন মাধবঃ ॥ ৮ ॥

চূতপ্রিযালপনসাসনকোবিদার-
জম্ব্বর্কবিল্ববকুলাম্রকদম্বনীপাঃ ।
যেঽন্যে পরার্থভবকা যমুনোপকূলাঃ
শংসন্তু কৃষ্ণপদবীং রহিতাত্মনাং নঃ ॥ ৯ ॥

কিং তে কৃতং ক্ষিতি তপো বত কেশবাঙ্ঘ্রি-
স্পর্শোত্সবোত্পুলকিতাঙ্গরুহৈর্বিভাসি ।
অপ্যঙ্ঘ্রিসম্ভব উরুক্রমবিক্রমাদ্ বা
আহো বরাহবপুষঃ পরিরম্ভণেন ॥ ১০ ॥

অপ্যেণপত্ন্যুপগতঃ প্রিযযেহ গাত্রৈ-
স্তন্বন্ দৃশাং সখি সুনির্বৃতিমচ্যুতো বঃ ।
কান্তাঙ্গসঙ্গকুচকুঙ্কুমরঞ্জিতাযাঃ
কুন্দস্রজঃ কুলপতেরিহ বাতি গন্ধঃ ॥ ১১ ॥

বাহুং প্রিযাংস উপধায গৃহীতপদ্মো
রামানুজস্তুলসিকালিকুলৈর্মদান্ধৈঃ ।
অন্বীযমান ইহ বস্তরবঃ প্রণামং
কিং বাভিনন্দতি চরন্ প্রণযাবলোকৈঃ ॥ ১২ ॥

পৃচ্ছতেমা লতা বাহূনপ্যাশ্লিষ্টা বনস্পতেঃ ।
নূনং তত্করজস্পৃষ্টা বিভ্রত্যুত্পুলকান্যহো ॥ ১৩ ॥

ইত্যুন্মত্তবচোগোপ্যঃ কৃষ্ণান্বেষণকাতরাঃ ।
লীলা ভগবতস্তাস্তা হ্যনুচক্রুস্তদাত্মিকাঃ ॥ ১৪ ॥

কস্যাচিত্ পূতনাযন্ত্যাঃ কৃষ্ণাযন্ত্যপিবত্ স্তনম্ ।
তোকযিত্বা রুদত্যন্যা পদাহন্ শকটাযতীম্ ॥ ১৫ ॥

দৈত্যাযিত্বা জহারান্যামেকো কৃষ্ণার্ভভাবনাম্ ।
রিঙ্গযামাস কাপ্যঙ্ঘ্রী কর্ষন্তী ঘোষনিঃস্বনৈঃ ॥ ১৬ ॥

কৃষ্ণরামাযিতে দ্বে তু গোপাযন্ত্যশ্চ কাশ্চন ।
বত্সাযতীং হন্তি চান্যা তত্রৈকা তু বকাযতীম্ ॥ ১৭ ॥

আহূয দূরগা যদ্বত্ কৃষ্ণস্তমনুবর্ততীম্ ।
বেণুং ক্বণন্তীং ক্রীডন্তীমন্যাঃ শংসন্তি সাধ্বিতি ॥ ১৮ ॥

কস্যাঞ্চিত্ স্বভুজং ন্যস্য
চলন্ত্যাহাপরা ননু ।
কৃষ্ণোঽহং পশ্যত গতিং
ললিতামিতি তন্মনাঃ ॥ ১৯ ॥

মা ভৈষ্ট বাতবর্ষাভ্যাং তত্ত্রাণং বিহিতং মযা ।
ইত্যুক্ত্বৈকেন হস্তেন যতন্ত্যুন্নিদধেঽম্বরম্ ॥ ২০ ॥

আরুহ্যৈকা পদাক্রম্য শিরস্যাহাপরাং নৃপ ।
দুষ্টাহে গচ্ছ জাতোঽহং খলানাং ননু দণ্ডকৃত্ ॥ ২১ ॥

তত্রৈকোবাচ হে গোপা দাবাগ্নিং পশ্যতোল্বণম্ ।
চক্ষূংষ্যাশ্বপিদধ্বং বো বিধাস্যে ক্ষেমমঞ্জসা ॥ ২২ ॥

বদ্ধান্যযা স্রজা কাচিত্তন্বী তত্র উলূখলে ।
বধ্নামি ভাণ্ডভেত্তারং হৈযঙ্গবমুষং ত্বিতি ।
ভীতা সুদৃক্ পিধাযাস্যং ভেজে ভীতিবিডম্বনম্ ॥ ২৩ ॥

এবং কৃষ্ণং পৃচ্ছমানা গণ্দাবনলতাস্তরূন্ ।
ব্যচক্ষত বনোদ্দেশে পদানি পরমাত্মনঃ ॥ ২৪ ॥

পদানি ব্যক্তমেতানি নন্দসূনোর্মহাত্মনঃ ।
লক্ষ্যন্তে হি ধ্বজাম্ভোজবজ্রাঙ্কুশযবাদিভিঃ ॥ ২৫ ॥

তৈস্তৈঃ পদৈস্তত্পদবীমন্বিচ্ছন্ত্যোঽগ্রতোঽবলাঃ ।
বধ্বাঃ পদৈঃ সুপৃক্তানি বিলোক্যার্তাঃ সমব্রুবন্ ॥ ২৬ ॥

কস্যাঃ পদানি চৈতানি যাতাযা নন্দসূনুনা ।
অংসন্যস্তপ্রকোষ্ঠাযাঃ করেণোঃ করিণা যথা ॥ ২৭ ॥

অনযারাধিতো নূনং ভগবান্ হরিরীশ্বরঃ ।
যন্নো বিহায গোবিন্দঃ প্রীতো যামনযদ্ রহঃ ॥ ২৮ ॥

ধন্যা অহো অমী আল্যো গোবিন্দাঙ্ঘ্য্রব্জরেণবঃ ।
যান্ ব্রহ্মেশৌ রমা দেবী দধুর্মূধ্র্ন্যঘনুত্তযে ॥ ২৯ ॥

তস্যা অমূনি নঃ ক্ষোভং কুর্বন্ত্যুচ্চৈঃ পদানি যত্
যৈকাপহৃত্য গোপীনাং রহো ভুঙ্ক্তেঽচ্যুতাধরম্ ।
ন লক্ষ্যন্তে পদান্যত্র তস্যা নূনং তৃণাঙ্কুরৈঃ
খিদ্যত্সুজাতাঙ্ঘ্রিতলামুন্নিন্যে প্রেযসীং প্রিযঃ ॥ ৩০ ॥

ইমান্যধিকমগ্নানি পদানি বহতো বধূম্ ।
গোপ্যঃ পশ্যত কৃষ্ণস্য ভারাক্রান্তস্য কামিনঃ ।
অত্রাবরোপিতা কান্তা পুষ্পহেতোর্মহাত্মনা ॥ ৩১ ॥

অত্র প্রসূনাবচযঃ প্রিযার্থে প্রেযসা কৃতঃ ।
প্রপদাক্রমণ এতে পশ্যতাসকলে পদে ॥ ৩২ ॥

কেশপ্রসাধনং ত্বত্র কামিন্যাঃ কামিনা কৃতম্ ।
তানি চূডযতা কান্তামুপবিষ্টমিহ ধ্রুবম্ ॥ ৩৩ ॥

রেমে তযা চাত্মরত আত্মারামোঽপ্যখণ্ডিতঃ ।
কামিনাং দর্শযন্ দৈন্যং স্ত্রীণাং চৈব দুরাত্মতাম্ ॥ ৩৪ ॥

ইত্যেবং দর্শযন্ত্যস্তাশ্চেরুর্গোপ্যো বিচেতসঃ ।
যাং গোপীমনযত্কৃষ্ণো বিহাযান্যাঃ স্ত্রিযো বনে ॥ ৩৫ ॥

সা চ মেনে তদাত্মানং বরিষ্ঠং সর্বযোষিতাম্ ।
হিত্বা গোপীঃ কামযানা মামসৌ ভজতে প্রিযঃ ॥ ৩৬ ॥

ততো গত্বা বনোদ্দেশং দৃপ্তা কেশবমব্রবীত্ ।
ন পারযেঽহং চলিতুং নয মাং যত্র তে মনঃ ॥ ৩৭ ॥

এবমুক্তঃ প্রিযামাহ স্কন্ধ আরুহ্যতামিতি ।
ততশ্চান্তর্দধে কৃষ্ণঃ সা বধূরন্বতপ্যত ॥ ৩৮ ॥

হা নাথ রমণ প্রেষ্ঠ ক্বাসি ক্বাসি মহাভুজ ।
দাস্যাস্তে কৃপণাযা মে সখে দর্শয সন্নিধিম্ ॥ ৩৯ ॥

শ্রীশুক উবাচ
অন্বিচ্ছন্ত্যো ভগবতো মার্গং গোপ্যোঽবিদূরিতঃ ।
দদৃশুঃ প্রিযবিশ্লেষান্মোহিতাং দুঃখিতাং সখীম্ ॥ ৪০ ॥

তযা কথিতমাকর্ণ্য মানপ্রাপ্তিং চ মাধবাত্ ।
অবমানং চ দৌরাত্ম্যাদ্ বিস্মযং পরমং যযুঃ ॥ ৪১ ॥

ততোঽবিশন্বনং চন্দ্রজ্যোত্স্না যাবদ্ বিভাব্যতে ।
তমঃ প্রবিষ্টমালক্ষ্য ততো নিববৃতুঃ স্ত্রিযঃ ॥ ৪২ ॥

তন্মনস্কাস্তদালাপাস্তদ্বিচেষ্টাস্তদাত্মিকাঃ ।
তদ্গুণানেব গাযন্ত্যো নাত্মগারাণি সস্মরুঃ ॥ ৪৩ ॥

পুনঃ পুলিনমাগত্য কালিন্দ্যাঃ কৃষ্ণভাবনাঃ ।
সমবেতা জগুঃ কৃষ্ণং তদাগমনকাঙ্ক্ষিতাঃ ॥ ৪৪ ॥

পুনঃ পুলিনমাগত্য কালিন্দ্যাঃ কৃষ্ণভাবনাঃ ।
সমবেতা জগুঃ কৃষ্ণং তদাগমনকাঙ্ক্ষিতাঃ