শ্রীমদ্ভাগবতম্ ১০.৯০

শ্রীশুক উবাচ
সুখং স্বপুর্যাং নিবসন্ দ্বারকাযাং শ্রিযঃ পতিঃ ।
সর্বসম্পত্সমৃদ্ধাযাং জুষ্টাযাং বৃষ্ণিপুঙ্গবৈঃ ॥ ১ ॥

স্ত্রীভিশ্চোত্তমবেষাভির্নবযৌবনকান্তিভিঃ ।
কন্দুকাদিভির্হর্ম্যেষু ক্রীডন্তীভিস্তডিদ্দ্যুভিঃ ॥ ২ ॥

নিত্যং সঙ্কুলমার্গাযাং মদচ্যুদ্ভির্মতঙ্গজৈঃ ।
স্বলঙ্কৃতৈর্ভটৈরশ্বৈ রথৈশ্চ কনকোজ্জ্বলৈঃ ॥ ৩ ॥

উদ্যানোপবনাঢ্যাযাং পুষ্পিতদ্রুমরাজিষু ।
নির্বিশদ্ ভৃঙ্গবিহগৈর্নাদিতাযাং সমন্ততঃ ॥ ৪ ॥

রেমে ষোডশসাহস্রপত্নীনামেকবল্লভঃ ।
তাবদ্বিচিত্ররূপোঽসৌ তদ্গেহেষু মহর্দ্ধিষু ॥ ৫ ॥

প্রোত্ফুল্লোত্পলকহ্লারকুমুদাম্ভোজরেণুভিঃ ।
বাসিতামলতোযেষু কূজদ্দ্বিজকুলেষু চ ॥ ৬ ॥

বিজহার বিগাহ্যাম্ভো হ্রদিনীষু মহোদযঃ ।
কুচকুঙ্কুমলিপ্তাঙ্গঃ পরিরব্ধশ্চ যোষিতাম্ ॥ ৭ ॥

উপগীযমানো গন্ধর্বৈর্মৃদঙ্গপণবানকান্ ।
বাদযদ্ভির্মুদা বীণাং সূতমাগধবন্দিভিঃ ॥ ৮ ॥

সিচ্যমানোঽচ্যুতস্তাভির্হসন্তীভিঃ স্ম রেচকৈঃ ।
প্রতিষিঞ্চন্ বিচিক্রীডে যক্ষীভির্যক্ষরাডিব ॥ ৯ ॥

তাঃ ক্লিন্নবস্ত্রবিবৃতোরুকুচপ্রদেশাঃ
সিঞ্চন্ত্য উদ্ধৃতবৃহত্কবরপ্রসূনাঃ ।
কান্তং স্ম রেচকজিহীর্ষযযোপগুহ্য
জাতস্মরোত্স্মযলসদ্বদনা বিরেজুঃ ॥ ১০ ॥

কৃষ্ণস্তু তত্স্তনবিষজ্জিতকুঙ্কুমস্রক্
ক্রীডাভিষঙ্গধুতকুন্তলবৃন্দবন্ধঃ ।
সিঞ্চন্ মুহুর্যুবতিভিঃ প্রতিষিচ্যমানো
রেমে করেণুভিরিবেভপতিঃ পরীতঃ ॥ ১১ ॥

নটানাং নর্তকীনাং চ গীতবাদ্যোপজীবিনাম্ ।
ক্রীডালঙ্কারবাসাংসি কৃষ্ণোঽদাত্তস্য চ স্ত্রিযঃ ॥ ১২ ॥

কৃষ্ণস্যৈবং বিহরতো গত্যালাপেক্ষিতস্মিতৈঃ ।
নর্মক্ষ্বেলিপরিষ্বঙ্গৈঃ স্ত্রীণাং কিল হৃতা ধিযঃ ॥ ১৩ ॥

ঊচুর্মুকুন্দৈকধিযো গির উন্মত্তবজ্জডম্ ।
চিন্তযন্ত্যোঽরবিন্দাক্ষং তানি মে গদতঃ শৃণু ॥ ১৪ ॥

মহিষ্য ঊচুঃ
কুররি বিলপসি ত্বং বীতনিদ্রা ন শেষে
স্বপিতি জগতি রাত্র্যামীশ্বরো গুপ্তবোধঃ ।
বযমিব সখি কচ্চিদ্ গাঢনির্বিদ্ধচেতা
নলিননযনহাসোদারলীলেক্ষিতেন ॥ ১৫ ॥

নেত্রে নিমীলযসি নক্তমদৃষ্টবন্ধু-
স্ত্বং রোরবীষি করুণং বত চক্রবাকি ।
দাস্যং গত বযমিবাচ্যুতপাদজুষ্টাং
কিং বা স্রজং স্পৃহযসে কবরেণ বোঢুম্ ॥ ১৬ ॥

ভো ভোঃ সদা নিষ্টনসে উদন্ব-
ন্নলব্ধনিদ্রোঽধিগতপ্রজাগরঃ ।
কিং বা মুকুন্দাপহৃতাত্মলাঞ্ছনঃ
প্রাপ্তাং দশাং ত্বং চ গতো দুরত্যযাম্ ॥ ১৭ ॥

ত্বং যক্ষ্মণা বলবতাসি গৃহীত ইন্দো
ক্ষীণস্তমো ন নিজদীধিতিভিঃ ক্ষিণোষি ।
কচ্চিন্মুকুন্দগদিতানি যথা বযং ত্বং
বিস্মৃত্য ভোঃ স্থগিতগীরুপলক্ষ্যসে নঃ ॥ ১৮ ॥

কিং ন্বাচরিতমস্মাভির্মলযানিল তেঽপ্রিযম্ ।
গোবিন্দাপাঙ্গনির্ভিন্নে হৃদীরযসি নঃ স্মরম্ ॥ ১৯ ॥

মেঘ শ্রীমংস্ত্বমসি দযিতো যাদবেন্দ্রস্য নূনং
শ্রীবত্সাঙ্কং বযমিব ভবান্ ধ্যাযতি প্রেমবদ্ধঃ ।
অত্যুত্কণ্ঠঃ শবলহৃদযোঽস্মদ্বিধো বাষ্পধারাঃ
স্মৃত্বা স্মৃত্বা বিসৃজসি মুহুর্দুঃখদস্তত্প্রসঙ্গঃ ॥ ২০ ॥

প্রিযরাবপদানি ভাষসে মৃত-
সঞ্জীবিকযানযা গিরা ।
করবাণি কিমদ্য তে প্রিযং
বদ মে বল্গিতকণ্ঠ কোকিল ॥ ২১ ॥

ন চলসি ন বদস্যুদারবুদ্ধে
ক্ষিতিধর চিন্তযসে মহান্তমর্থম্ ।
অপি বত বসুদেবনন্দনাঙ্ঘ্রি
বযমিব কামযসে স্তনৈর্বিধর্তুম্ ॥ ২২ ॥

শুষ্যদ্ধ্রদাঃ করশিতা বত সিন্ধুপত্ন্যঃ
সম্প্রত্যপাস্তকমলশ্রিয ইষ্টভর্তুঃ ।
যদ্বদ্ বযং মধুপতেঃ প্রণযাবলোক-
মপ্রাপ্য মুষ্টহৃদযাঃ পুরুকর্শিতাঃ স্ম ॥ ২৩ ॥

হংস স্বাগতমাস্যতাং পিব পযো ব্রূহ্যঙ্গ শৌরেঃ কথাং
দূতং ত্বাং নু বিদাম কচ্চিদজিতঃ স্বস্ত্যাস্ত উক্তং পুরা ।
কিং বা নশ্চলসৌহৃদঃ স্মরতি তং কস্মাদ্ ভজামো বযং
ক্ষৌদ্রালাপয কামদং শ্রিযমৃতে সৈবৈকনিষ্ঠা স্ত্রিযাম্ ॥ ২৪ ॥

শ্রীশুক উবাচ
ইতীদৃশেন ভাবেন কৃষ্ণে যোগেশ্বরেশ্বরে ।
ক্রিযমাণেন মাধব্যো লেভিরে পরমাং গতিম্ ॥ ২৫ ॥

শ্রুতমাত্রোঽপি যঃ স্ত্রীণাং প্রসহ্যাকর্ষতে মনঃ ।
উরুগাযোরুগীতো বা পশ্যন্তীনাং চ কিং পুনঃ ॥ ২৬ ॥

যাঃ সম্পর্যচরন্প্রেম্ণা পাদসংবাহনাদিভিঃ ।
জগদ্গুরুং ভর্তৃবুদ্ধ্যা তাসাং কিং বর্ণ্যতে তপঃ ॥ ২৭ ॥

এবং বেদোদিতং ধর্মমনুতিষ্ঠন্ সতাং গতিঃ ।
গৃহং ধর্মার্থকামানাং মুহুশ্চাদর্শযত্ পদম্ ॥ ২৮ ॥

আস্থিতস্য পরং ধর্মং কৃষ্ণস্য গৃহমেধিনাম্ ।
আসন্ ষোডশসাহস্রং মহিষ্যশ্চ শতাধিকম্ ॥ ২৯ ॥

তাসাং স্ত্রীরত্নভূতানামষ্টৌ যাঃ প্রাগুদাহৃতাঃ ।
রুক্মিণীপ্রমুখা রাজংস্তত্পুত্রাশ্চানুপূর্বশঃ ॥ ৩০ ॥

একৈকস্যাং দশ দশ কৃষ্ণোঽজীজনদাত্মজান্ ।
যাবত্য আত্মনো ভার্যা অমোঘগতিরীশ্বরঃ ॥ ৩১ ॥

তেষামুদ্দামবীর্যাণামষ্টাদশ মহারথাঃ ।
আসন্নুদারযশসস্তেষাং নামানি মে শৃণু ॥ ৩২ ॥

প্রদ্যুম্নশ্চানিরুদ্ধশ্চ দীপ্তিমান্ ভানুরেব চ ।
সাম্বো মধুর্বৃহদ্ভানুশ্চিত্রভানুর্বৃকোঽরুণঃ ॥ ৩৩ ॥

পুষ্করো বেদবাহুশ্চ শ্রুতদেবঃ সুনন্দনঃ ।
চিত্রবাহুর্বিরূপশ্চ কবির্ন্যগ্রোধ এব চ ॥ ৩৪ ॥

এতেষামপি রাজেন্দ্র তনুজানাং মধুদ্বিষঃ ।
প্রদ্যুম্ন আসীত্ প্রথমঃ পিতৃবদ্ রুক্মিণীসুতঃ ॥ ৩৫ ॥

স রুক্মিণো দুহিতরমুপযেমে মহারথঃ ।
তস্যাং ততোঽনিরুদ্ধোঽভূত্নাগাযতবলান্বিতঃ ॥ ৩৬ ॥

স চাপি রুক্মিণঃ পৌত্রীং দৌহিত্রো জগৃহে ততঃ ।
বজ্রস্তস্যাভবদ্ যস্তু মৌষলাদবশেষিতঃ ॥ ৩৭ ॥

প্রতিবাহুরভূত্তস্মাত্ সুবাহুস্তস্য চাত্মজঃ ।
সুবাহোঃ শান্তসেনোঽভূচ্ছতসেনস্তু তত্সুতঃ ॥ ৩৮ ॥

ন হ্যেতস্মিন্ কুলে জাতা অধনা অবহুপ্রজাঃ ।
অল্পাযুষোঽল্পবীর্যাশ্চ অব্রহ্মণ্যাশ্চ জজ্ঞিরে ॥ ৩৯ ॥

যদুবংশপ্রসূতানাং পুংসাং বিখ্যাতকর্মণাম্ ।
সঙ্খ্যা ন শক্যতে কর্তুমপি বর্ষাযুতৈর্নৃপ ॥ ৪০ ॥

তিস্রঃ কোট্যঃ সহস্রাণামষ্টাশীতিশতানি চ ।
আসন্ যদুকুলাচার্যাঃ কুমারাণামিতি শ্রুতম্ ॥ ৪১ ॥

সঙ্খ্যানং যাদবানাং কঃ করিষ্যতি মহাত্মনাম্ ।
যত্রাযুতানামযুতলক্ষেণাস্তে স আহুকঃ ॥ ৪২ ॥

দেবাসুরাহবহতা দৈতেযা যে সুদারুণাঃ ।
তে চোত্পন্না মনুষ্যেষু প্রজা দৃপ্তা ববাধিরে ॥ ৪৩ ॥

তন্নিগ্রহায হরিণা প্রোক্তা দেবা যদোঃ কুলে ।
অবতীর্ণাঃ কুলশতং তেষামেকাধিকং নৃপ ॥ ৪৪ ॥

তেষাং প্রমাণং ভগবান্ প্রভুত্বেনাভবদ্ধরিঃ ।
যে চানুবর্তিনস্তস্য ববৃধুঃ সর্বযাদবাঃ ॥ ৪৫ ॥

শয্যাসনাটনালাপক্রীডাস্নানাদিকর্মসু ।
ন বিদুঃ সন্তমাত্মানং বৃষ্ণযঃ কৃষ্ণচেতসঃ ॥ ৪৬ ॥

তীর্থং চক্রে নৃপোনং যদজনি যদুষু স্বঃসরিত্পাদশৌচং
বিদ্বিট্স্নিগ্ধাঃ স্বরূপং যযুরজিতপরা শ্রীর্যদর্থেঽন্যযত্নঃ ।
যন্নামামঙ্গলঘ্নং শ্রুতমথ গদিতং যত্কৃতো গোত্রধর্মঃ
কৃষ্ণস্যৈতন্ন চিত্রং ক্ষিতিভরহরণং কালচক্রাযুধস্য ॥ ৪৭ ॥

জযতি জননিবাসো দেবকীজন্মবাদো
যদুবরপরিষত্স্বৈর্দোর্ভিরস্যন্নধর্মম্ ।
স্থিরচরবৃজিনঘ্নঃ সুস্মিতশ্রীমুখেন
ব্রজপুরবনিতানাং বর্ধযন্ কামদেবম্ ॥ ৪৮ ॥

ইত্থং পরস্য নিজবর্ত্মরিরক্ষযাত্ত-
লীলাতনোস্তদনুরূপবিডম্বনানি ।
কর্মাণি কর্মকষণানি যদূত্তমস্য
শ্রূযাদমুষ্য পদযোরনুবৃত্তিমিচ্ছন্ ॥ ৪৯ ॥

মর্ত্যস্তযানুসবমেধিতযা মুকুন্দ-
শ্রীমত্কথাশ্রবণকীর্তনচিন্তযৈতি ।
তদ্ধাম দুস্তরকৃতান্তজবাপবর্গং
গ্রামাদ্ বনং ক্ষিতিভুজোঽপি যযুর্যদর্থাঃ ॥ ৫০ ॥