What is Aparokshanubhuti?

Read Aparokshanubhuti in Bengali script — full lyrics with English meaning and transliteration. Aparokshanubhuti, or Direct Experience of the Absolute is an introductory work by Adi Shankaracharya that expounds Advaita Vedanta philosophy. Aparoksha refers to the ‘nearest of the near’, one’s Self. Anubhuti means to realize, to experience. So the word means "Self-realization." Such realization, unlike the knowledge of objects through sense-perception or inference, is an immediate and direct perception of one’s own Self, which is here indicated by the word Aparoksha.

Which deity is Aparokshanubhuti dedicated to?

Aparokshanubhuti is a Sanskrit hymn dedicated to Brahman.

Aparokshanubhuti in Bengali – Meaning & Word-by-Word

অপরোক্ষানুভূতিঃ।।
শ্রীহরিং পরমানন্দমুপদেষ্টারমীশ্বরম্।
ব্যাপকং সর্বলোকানাং কারণং তং নমাম্যহম্।।1।।

অপরোক্ষানুভূতির্বৈ প্রোচ্যতে মোক্ষসিদ্ধযে।
সদ্ভিরেষা প্রযত্নেন বীক্ষণীযা মুহুর্মুহুঃ।।2।।

স্ববর্ণাশ্রমধর্মেণ তপসা হরিতোষণাত্।
সাধনং প্রভবেত্পুংসাং বৈরাগ্যাদিচতুষ্টযম্।।3।।

ব্রহ্মাদিস্থাবরান্তেষু বৈরাগ্যং বিষযেষ্বনু।
যথৈব কাকবিষ্ঠাযাং বৈরাগ্যং তদ্ধি নির্মলম্।।4।।

নিত্যমাত্মস্বরূপং হি দৃশ্যং তদ্বিপরীতগম্।
এবং যো নিশ্চযঃ সম্যগ্বিবেকো বস্তুনঃ স বৈ।।5।।

সদৈব বাসনাত্যাগঃ শমোঽযমিতি শব্দিতঃ।
নিগ্রহো বাহ্যবৃত্তীনাং দম ইত্যভিধীযতে।।6।।

বিষযেভ্যঃ পরাবৃত্তিঃ পরমোপরতির্হি সা।
সহনং সর্বদুঃখানাং তিতিক্ষা সা শুভা মতা।।7।।

নিগমাচার্যবাক্যেষু ভক্তিঃ শ্রদ্ধেতি বিশ্রুতা।
চিত্তৈকাগ্র্যং তু সল্লক্ষ্যে সমাধানমিতি স্মৃতম্।।8।।

সংসারবন্ধনির্মুক্তিঃ কথং স্যান্মে দযানিধে।
ইতি যা সুদৃঢা বুদ্ধির্বক্তব্যা সা মুমুক্ষুতা।।9।।

উক্তসাধনযুক্তেন বিচারঃ পুরুষেণ হি।
কর্তব্যো জ্ঞানসিদ্ধ্যর্থমাত্মনঃ শুভমিচ্ছতা।।10।।

নোত্পদ্যতে বিনা জ্ঞানং বিচারেণান্যসাধনৈঃ।
যথা পদার্থভানং হি প্রকাশেন বিনা ক্বচিত্।।11।।

কোঽহং কথমিদং জাতং কো বা কর্তাস্য বিদ্যতে।
উপাদানং কিমস্তীহ বিচারঃ সোঽযমীদৃশঃ।।12।।

নাহং ভূতগণো দেহো নাহং চাক্ষগণস্তথা।
এতদ্বিলক্ষণঃ কশ্চিদ্বিচারঃ সোঽযমীদৃশঃ।।13।।

অজ্ঞানপ্রভবং সর্বং জ্ঞানেন প্রবিলীযতে।
সংকল্পো বিবিধঃ কর্তা বিচারঃ সোঽযমীদৃশঃ।।14।।

এতযোর্যদুপাদানমেকং সূক্ষ্মং সদব্যযম্।
যথৈব মৃদ্ধটাদীনাং বিচারঃ সোঽযমীদৃশঃ।।15।।

অহমেকোঽপি সূক্ষ্মশ্চ জ্ঞাতা সাক্ষী সদব্যযঃ।
তদহং নাত্র সংদেহো বিচারঃ সোঽযমীদৃশঃ।।16।।

আত্মা বিনিষ্কলো হ্যেকো দেহো বহুভিরাবৃতঃ।
তযোরৈক্যং প্রপশ্যন্তি কিমজ্ঞানমতঃ পরম্।।17।।

আত্মা নিযামকশ্চান্তর্দেহো নিযম্যবাহ্যকঃ।
তযোরৈক্যং প্রপশ্যন্তি কিমজ্ঞানমতঃ পরম্।।18।।

আত্মা জ্ঞানমযঃ পুণ্যো দেহো মাংসমযোঽশুচিঃ।
তযোরৈক্যং প্রপশ্যন্তি কিমজ্ঞানমতঃ পরম্।।19।।

আত্মা প্রকাশকঃ স্বচ্ছো দেহস্তামস উচ্যতে।
তযোরৈক্যং প্রপশ্যন্তি কিমজ্ঞানমতঃ পরম্।।20।।

আত্মা নিত্যো হি সদ্রূপো দেহোঽনিত্যো হ্যসন্মযঃ।
তযোরৈক্যং প্রপশ্যন্তি কিমজ্ঞানমতঃ পরম্।।21।।

আত্মনস্তত্প্রকাশত্বং যত্পদার্থাবভাসনম্।
নাগ্ন্যাদিদীপ্তিবদ্দীপ্তির্ভবত্যান্ধ্যং যতো নিশি।।22।।

দেহোঽহমিত্যযং মূঢো মত্বা তিষ্ঠত্যহো জনঃ।
মমাযমিত্যপি জ্ঞাত্বা ঘটদ্রষ্টেব সর্বদা।।23।।

ব্রহ্মৈবাহং সমঃ শান্তঃ সচ্চিদানন্দলক্ষণঃ।
নাহং দেহো হ্যসদ্রূপো জ্ঞানমিত্যুচ্যতে বুধৈঃ।।24।।

নির্বিকারো নিরাকারো নিরবদ্যোঽহমব্যযঃ।
নাহং দেহো হ্যসদ্রূপো জ্ঞানমিত্যুচ্যতে বুধৈঃ।।25।।

নিরামযো নিরাভাসো নির্বিকল্পোঽহমাততঃ।
নাহং দেহো হ্যসদ্রূপো জ্ঞানমিত্যুচ্যতে বুধৈঃ।।26।।

নির্গুণো নিষ্ক্রিযো নিত্যো নিত্যমুক্তোঽহমচ্যুতঃ।
নাহং দেহো হ্যসদ্রূপো জ্ঞানমিত্যুচ্যতে বুধৈঃ।।27।।

নির্মলো নিশ্চলোঽনন্তঃ শুদ্ধোঽহমজরোঽমরঃ।
নাহং দেহো হ্যসদ্রূপো জ্ঞানমিত্যুচ্যতে বুধৈঃ।।28।।

স্বদেহং শোভনং ত্যক্ত্বা পুরুষাখ্যং চ সংমতম্।
কিং মূর্খ শূন্যমাত্মানং দেহাতীতং করোষি ভো।।29।।

স্বাত্মানং শ্রৃণু মূর্খ ত্বং শ্রুত্যা যুক্ত্যা চ পূরুষম্।
দেহাতীতং সদাকারং সুদুর্দর্শং ভবাদৃশাম্।।30।।

অহংশব্দেন বিখ্যাত এক এব স্থিতঃ পরঃ।
স্থূলত্বান্নৈকতাং প্রাপ্তঃ কথং স্যাদ্দেহকঃ পুমান্।।31।।

অহং দ্রষ্টৃতযা সিদ্ধো দেহো দৃশ্যতযা স্থিতঃ।
মমাযমিতি নির্দেশাত্কথং স্যাদ্দেহকঃ পুমান্।।32।।

অহং বিকারহীনস্তু দেহো নিত্যং বিকারবান্।
ইতি প্রতীযতে সাক্ষাত্কথং স্যাদ্দেহকঃ পুমান্।।33।।

যস্মাত্পরমিতি শ্রুত্যা তযা পুরুষলক্ষণম্।
বিনির্ণীতং বিশুদ্ধেন কথং স্যাদ্দেহকঃ পুমান্।।34।।

সর্বং পুরুষ এবেতি সূক্তে পুরুষসংজ্ঞিতে।
অপ্যুচ্যতে যতঃ শ্রুত্যা কথং স্যাদ্দেহকঃ পুমান্।।35।।

অসঙ্গঃ পুরুষঃ প্রোক্তো বৃহদারণ্যকেঽপি চ।
অনন্তমলসংসৃষ্টঃ কথং স্যাদ্দেহকঃ পুমান্।।36।।

তত্রৈব চ সমাখ্যাতঃ স্বযংজ্যোতির্হি পূরুষঃ।
জডঃ পরপ্রকাশ্যোঽযং কথং স্যাদ্দেহকঃ পুমান্।।37।।

প্রোক্তোঽপি কর্মকাণ্ডেন হ্যাত্মা দেহাদ্বিলক্ষণঃ।
নিত্যশ্চ তত্ফলং ভুঙ্ক্তে দেহপাতাদনন্তরম্।।38।।

লিঙ্গং চানেকসংযুক্তং চলং দৃশ্যং বিকারি চ।
অব্যাপকমসদ্রূপং তত্কথং স্যাত্পুমানযম্।।39।।

এবং দেহদ্বযাদন্য আত্মা পুরুষ ঈশ্বরঃ।
সর্বাত্মা সর্বরূপশ্চ সর্বাতীতোঽহমব্যযঃ।।40।।

ইত্যাত্মদেহভানেন প্রপঞ্চস্যৈব সত্যতা।
যথোক্তা তর্কশাস্ত্রেণ ততঃ কিং পুরুষার্থতা।।41।।

ইত্যাত্মদেহভেদেন দেহাত্মত্বং নিবারিতম্।
ইদানীং দেহভেদস্য হ্যসত্ত্বং স্ফুটমুচ্যতে।।42।।

চৈতন্যস্যৈকরূপত্বাদ্ভেদো যুক্তো ন কর্হিচিত্।
জীবত্বং চ মৃষা জ্ঞেযং রজ্জ্বাং সর্পগ্রহো যথা।।43।।

রজ্জ্বজ্ঞানাত্ক্ষণেনৈব যদ্বদ্রজ্জুর্হি সর্পিণী।
ভাতি তদ্বচ্চিতিঃ সাক্ষাদ্বিশ্বাকারেণ কেবলা।।44।।

উপাদানং প্রপঞ্চস্য ব্রহ্মণোঽন্যন্ন বিদ্যতে।
তস্মাত্সর্বপ্রপঞ্চোঽযং ব্রহ্মৈবাস্তি ন চেতরত্।।45।।

ব্যাপ্যব্যাপকতা মিথ্যা সর্বমাত্মেতি শাসনাত্।
ইতি জ্ঞাতে পরে তত্ত্বে ভেদস্যাবসরঃ কুতঃ।।46।।

শ্রুত্যা নিবারিতং নূনং নানাত্বং স্বমুখেন হি।
কথং ভাসো ভবেদন্যঃ স্থিতে চাদ্বযকারণে।।47।।

দোষোঽপি বিহিতঃ শ্রুত্যা মৃত্যোর্মৃত্যুং স গচ্ছতি।
ইহ পশ্যতি নানাত্বং মাযযা বঞ্চিতো নরঃ।।48।।

ব্রহ্মণঃ সর্বভূতানি জাযন্তে পরমাত্মনঃ।
তস্মাদেতানি ব্রহ্মৈব ভবন্তীত্যবধারযেত্।।49।।

ব্রহ্মৈব সর্বনামানি রূপাণি বিবিধানি চ।
কর্মাণ্যপি সমগ্রাণি বিভর্তীতি শ্রুতির্জগৌ।।50।।

সুবর্ণাজ্জাযমানস্য সুবর্ণত্বং চ শাশ্বতম্।
ব্রহ্মণো জাযমানস্য ব্রহ্মত্বং চ তথা ভবেত্।।51।।

স্বল্পমপ্যন্তরং কৃত্বা জীবাত্মপরমাত্মনোঃ।
যোঽবতিষ্ঠতি মূঢাত্মা ভযং তস্যাভিভাষিতম্।।52।।

যত্রাজ্ঞানাদ্ভবেদ্দ্বৈতমিতরস্তত্র পশ্যতি।
আত্মত্বেন যদা সর্বং নেতরস্তত্র চাণ্বপি।।53।।

যস্মিন্সর্বাণি ভূতানি হ্যাত্মত্বেন বিজানতঃ।
ন বৈ তস্য ভবেন্মোহো ন চ শোকোঽদ্বিতীযতঃ।।54।।

অযমাত্মা হি ব্রহ্মৈব সর্বাত্মকতযা স্থিতঃ।
ইতি নির্ধারিতং শ্রুত্যা বৃহদারণ্যসংস্থযা।।55।।

অনুভূতোঽপ্যযং লোকো ব্যবহারক্ষমোঽপি সন্।
অসদ্রূপো যথা স্বপ্ন উত্তরক্ষণবাধতঃ।।56।।

স্বপ্নো জাগরণেঽলীকঃ স্বপ্নেঽপি ন হি জাগরঃ।
দ্বযমেব লযে নাস্তি লযোঽপি হ্যুভযোর্ন চ।।57।।

ত্রযমেবং ভবেন্মিথ্যা গুণত্রযবিনির্মিতম্।
অস্য দ্রষ্টা গুণাতীতো নিত্যো হ্যেকশ্চিদাত্মকঃ।।58।।

যদ্বন্মৃদি ঘটভ্রান্তিং শুক্তৌ বা রজতস্থিতিম্।
তদ্বদ্ব্রহ্মণি জীবত্বং ভ্রান্ত্যা পশ্যতি ন স্বতঃ।।59।।

যথা মৃদি ঘটো নাম কনকে কুণ্ডলাভিধা।
শুক্তৌ হি রজতখ্যাতির্জীবশব্দস্তথা পরে।।60।।

যথৈব ব্যোম্নি নীলত্বং যথা নীরং মরুস্থলে।
পুরুষত্বং যথা স্থাণৌ তদ্বদ্বিশ্বং চিদাত্মনি।।61।।

যথৈব শূন্যে বেতালো গন্ধর্বাণাং পুরং যথা।
যথাকাশে দ্বিচন্দ্রত্বং তদ্বত্সত্যে জগত্স্থিতিঃ।।62।।

যথা তরঙ্গকল্লোলৈর্জলমেব স্ফুরত্যলম্।
পাত্ররূপেণ তাম্রং হি ব্রহ্মাণ্ডৌঘৈস্তথাত্মতা।।63।।

ঘটনাম্না যথা পৃথ্বী পটনাম্না হি তন্তবঃ।
জগন্নাম্না চিদাভাতি জ্ঞেযং তত্তদভাবতঃ।।64।।

সর্বোঽপি ব্যবহারস্তু ব্রহ্মণা ক্রিযতে জনৈঃ।
অজ্ঞানান্ন বিজানন্তি মৃদেব হি ঘটাদিকম্।।65।।

কার্যকারণতা নিত্যমাস্তে ঘটমৃদোর্যথা।
তথৈব শ্রুতিযুক্তিভ্যাং প্রপঞ্চব্রহ্মণোরিহ।।66।।

গৃহ্যমাণে ঘটে যদ্বন্মৃত্তিকা ভাতি বৈ বলাত্।
বীক্ষ্যমাণে প্রপঞ্চেঽপি ব্রহ্মৈবাভাতি ভাসুরম্।।67।।

সদৈবাত্মা বিশুদ্ধোঽপি হ্যশুদ্ধো ভাতি বৈ সদা।
যথৈব দ্বিবিধা রজ্জুর্জ্ঞানিনোঽজ্ঞানিনোঽনিশম্।।68।।

যথৈব মৃন্মযঃ কুম্ভস্তদ্বদ্দেহোঽপি চিন্মযঃ।
আত্মানাত্মবিভাগোঽযং মুধৈব ক্রিযতে বুধৈঃ।।69।।

সর্পত্বেন যথা রজ্জূ রজতত্বেন শুক্তিকা।
বিনির্ণীতা বিমূঢেন দেহত্বেন তথাত্মতা।।70।।

ঘটত্বেন যথা পৃথ্বী পটত্বেনৈব তন্তবঃ।
বিনির্ণীতা বিমূঢেন দেহত্বেন তথাত্মতা।।71।।

কনকং কুণ্ডলত্বেন তরঙ্গত্বেন বৈ জলম্।
বিনির্ণীতা বিমূঢেন দেহত্বেন তথাত্মতা।।72।।

পুরুষত্বেন বৈ স্থাণুর্জলত্বেন মরীচিকা।
বিনির্ণীতা বিমূঢেন দেহত্বেন তথাত্মতা।।73।।

গৃহত্বেনৈব কাষ্ঠানি খঙ্গত্বেনৈব লোহতা।
বিনির্ণীতা বিমূঢেন দেহত্বেন তথাত্মতা।।74।।

যথা বৃক্ষবিপর্যাসো জলাদ্ভবতি কস্যচিত্।
তদ্বদাত্মনি দেহত্বং পশ্যত্যজ্ঞানযোগতঃ।।75।।

পোতেন গচ্ছতঃ পুংসঃ সর্বং ভাতীব চঞ্চলম্।
তদ্বদাত্মনি দেহত্বং পশ্যত্যজ্ঞানযোগতঃ।।76।।

পীতত্বং হি যথা শুভ্রে দোষাদ্ভবতি কস্যচিত্।
তদ্বদাত্মনি দেহত্বং পশ্যত্যজ্ঞানযোগতঃ।।77।।

চক্ষুর্ভ্যাং ভ্রমশীলাভ্যাং সর্বং ভাতি ভ্রমাত্মকম্।
তদ্বদাত্মনি দেহত্বং পশ্যত্যজ্ঞানযোগতঃ।।78।।

অলাতং ভ্রমণেনৈব বর্তুলং ভাতি সূর্যবত্।
তদ্বদাত্মনি দেহত্বং পশ্যত্যজ্ঞানযোগতঃ।।79।।

মহত্ত্বে সর্ববস্তূনামণুত্বং হ্যতিদূরতঃ।
তদ্বদাত্মনি দেহত্বং পশ্যত্যজ্ঞানযোগতঃ।।80।।

সূক্ষ্মত্বে সর্ববস্তূনাং স্থূলত্বং চোপনেত্রতঃ।
তদ্বদাত্মনি দেহত্বং পশ্যত্যজ্ঞানযোগতঃ।।81।।

কাচভূমৌ জলত্বং বা জলভূমৌ হি কাচতা।
তদ্বদাত্মনি দেহত্বং পশ্যত্যজ্ঞানযোগতঃ।।82।।

যদ্বদগ্নৌ মণিত্বং হি মণৌ বা বহ্নিতা পুমান্।
তদ্বদাত্মনি দেহত্বং পশ্যত্যজ্ঞানযোগতঃ।।83।।

অভ্রেষু সত্সু ধাবত্সু ধাবন্নিব যথা শশী।
তদ্বদাত্মনি দেহত্বং পশ্যত্যজ্ঞানযোগতঃ।।84।।

যথৈব দিগ্বিপর্যাসো মোহাদ্ভবতি কস্যচিত্।
তদ্বদাত্মনি দেহত্বং পশ্যত্যজ্ঞানযোগতঃ।।85।।

যথা শশী জলে ভাতি চঞ্চলত্বেন কস্যচিত্।
তদ্বদাত্মনি দেহত্বং পশ্যত্যজ্ঞানযোগতঃ।।86।।

এবমাত্মনি নজ্ঞাতে দেহাধ্যাসো হি জাযতে।
স এবাত্মা পরিজ্ঞাতো লীযতে চ পরাত্মনি।।87।।

সর্বমাত্মতযা জ্ঞাতং জগত্স্থাবরজঙ্গমম্।
অভাবাত্সর্বভাবানাং দেহানাং চাত্মতা কুতঃ।।88।।

আত্মানং সততং জানন্কালং নয মহামতে।
প্রারব্ধমখিলং ভুঞ্জন্নোদ্বেগং কর্তুমর্হসি।।89।।

উত্পন্নেঽপ্যাত্মবিজ্ঞানে প্রারব্ধং নৈব মুঞ্চতি।
ইতি যচ্ছ্রূযতে শাস্ত্রাত্তন্নিরাক্রিযতেঽধুনা।।90।।

তত্ত্বজ্ঞানোদযাদূর্ধ্বং প্রারব্ধং নৈব বিদ্যতে।
দেহাদীনামসত্যত্বাদ্যথা স্বপ্নঃ প্রবোধতঃ।।91।।

কর্ম জন্মান্তরকৃতং প্রারব্ধমিতি কীর্তিতম্।
তত্তু জন্মান্তরাভাবাত্পুংসো নৈবাস্তি কর্হিচিত্।।92।।

স্বপ্নদেহো যথাধ্যস্তস্তথৈবাযং হি দেহকঃ।।
অধ্যস্তস্য কুতো জন্ম জন্মাভাবে স্থিতিঃ কুতঃ।।93।।

উপাদানং প্রপঞ্চস্য মৃদ্ভাণ্ডস্যেব কথ্যতে।
অজ্ঞানং চৈব বেদান্তৈস্তস্মিন্নষ্টে ক্ব বিশ্বতা।।94।।

যথা রজ্জুং পরিত্যজ্য সর্প গৃহ্ণাতি বৈ ভ্রমাত্।
তদ্বত্সত্যমবিজ্ঞায জগত্পশ্যতি মূঢধীঃ।।95।।

রজ্জুরূপে পরিজ্ঞাতে সর্পভ্রান্তির্ন তিষ্ঠতি।
অধিষ্ঠানে তথা জ্ঞাতে প্রপঞ্চঃ শূন্যতাং ব্রজেত্।।96।।

দেহস্যাপি প্রপঞ্চত্বাত্প্রারব্ধাবস্থিতিঃ কুতঃ।
অজ্ঞানিজনবোধার্থং প্রারব্ধং বক্তি বৈ শ্রুতিঃ।।97।।

ক্ষীযন্তে চাস্য কর্মাণি তস্মিন্দৃষ্টে পরাবরে।
বহুত্বং তন্নিষেধার্থং শ্রুত্যা গীতং চ বৈ স্ফুটম্।।98।।

উচ্যতেঽজ্ঞৈর্বলাচ্চৈতত্তদানর্থদ্বযাগমঃ।
বেদান্তমতহানং চ যতো জ্ঞানমিতি শ্রুতিঃ।।99।।

ত্রিপঞ্চাঙ্গান্যথো বক্ষ্যে পূর্বোক্তস্যৈব সিদ্ধযে।
তৈশ্চ সর্বৈঃ সদা কার্যং নিদিধ্যাসনমেব তু।।100।।

নিত্যাভ্যাসাদৃতে প্রাপ্তির্ন ভবেত্সচ্চিদাত্মনঃ।
তস্মাদ্ব্রহ্ম নিদিধ্যাসেজ্জিজ্ঞাসুঃ শ্রেযসে চিরম্।।101।।

যমো হি নিযমস্ত্যাগো মৌনং দেশশ্চ কালতঃ।
আসনং মূলবন্ধশ্চ দেহসাম্যং চ দৃক্স্থিতিঃ।।102।।

প্রাণসংযমনং চৈব প্রত্যাহারশ্চ ধারণা।
আত্মধ্যানং সমাধিশ্চ প্রোক্তান্যঙ্গানি বৈ ক্রমাত্।।103।।

সর্বং ব্রহ্মেতি বিজ্ঞানাদিন্দ্রিযগ্রামসংযমঃ।
যমোঽযমিতি সংপ্রোক্তোঽভ্যসনীযো মুহুর্মুহুঃ।।104।।

সজাতীযপ্রবাহশ্চ বিজাতীযতিরস্কৃতিঃ।
নিযমো হি পরানন্দো নিযমাত্ক্রিযতে বুধৈঃ।।105।।

ত্যাগঃ প্রপঞ্চরূপস্য চিদাত্মত্বাবলোকনাত্।
ত্যাগো হি মহতাং পূজ্যঃ সদ্যো মোক্ষমযো যতঃ।।106।।

যতো বাচো নিবর্তন্তে অপ্রাপ্য মনসা সহ।
যন্মৌনং যোগিভির্গম্যং তদ্ভজেত্সর্বদা বুধঃ।।107।।

বাচো যস্মান্নিবর্তন্তে তদ্বক্তুং কেন শক্যতে।
প্রপঞ্চো যদি বক্তব্যঃ সোঽপি শব্দবিবর্জিতঃ।।108।।

ইতি বা তদ্ভবেন্মৌনং সতাং সহজসংজ্ঞিতম্।
গিরা মৌনং তু বালানাং প্রযুক্তং ব্রহ্মবাদিভিঃ।।109।।

আদাবন্তে চ মধ্যে চ জনো যস্মিন্ন বিদ্যতে।
যেনেদং সততং ব্যাপ্তং স দেশো বিজনঃ স্মৃতঃ।।110।।

কলনাত্সর্বভূতানাং ব্রহ্মাদীনাং নিমেষতঃ।
কালশব্দেন নির্দিষ্টো হ্যখণ্ডানন্দ অদ্বযঃ।।111।।

সুখেনৈব ভবেদ্যস্মিন্নজস্রং ব্রহ্মচিন্তনম্।
আসনং তদ্বিজানীযান্নেতরত্সুখনাশনম্।।112।।

সিদ্ধং যত্সর্বভূতাদি বিশ্বাধিষ্ঠানমব্যযম্।
যস্মিন্সিদ্ধাঃ সমাবিষ্টাস্তদ্বৈ সিদ্ধাসনং বিদুঃ।।113।।

যন্মূলং সর্বভূতানাং যন্মূলং চিত্তবন্ধনম্।
মূলবন্ধঃ সদা সেব্যো যোগোঽসৌ রাজযোগিনাম্।।114।।

অঙ্গানাং সমতাং বিদ্যাত্সমে ব্রহ্মণি লীযতে।
নো চেন্নৈব সমানত্বমৃজুত্বং শুষ্কবৃক্ষবত্।।115।।

দৃষ্টিং জ্ঞানমযীং কৃত্বা পশ্যেদ্ব্রহ্মমযং জগত্।
সা দৃষ্টিঃ পরমোদারা ন নাসাগ্রাবলোকনী।।116।।

দ্রষ্টৃদর্শনদৃশ্যানাং বিরামো যত্র বা ভবেত্।
দৃষ্টিস্তত্রৈব কর্তব্যা ন নাসাগ্রাবলোকনী।।117।।

চিত্তাদিসর্বভাবেষু ব্রহ্মত্বেনৈব ভাবনাত্।
নিরোধঃ সর্ববৃত্তীনাং প্রাণাযামঃ স উচ্যতে।।118।।

নিষেধনং প্রপঞ্চস্য রেচকাখ্যঃ সমীরণঃ।
ব্রহ্মৈবাস্মীতি যা বৃত্তিঃ পূরকো বাযুরীরিতঃ।।119।।

ততস্তদ্বৃত্তিনৈশ্চল্যং কুম্ভকঃ প্রাণসংযমঃ।
অযং চাপি প্রবুদ্ধানামজ্ঞানাং ঘ্রাণপীডনম্।।120।।

বিষযেষ্বাত্মতাং দৃষ্ট্বা মনসশ্চিতি মজ্জনম্।
প্রত্যাহারঃ স বিজ্ঞেযোঽভ্যসনীযো মুমুক্ষুভিঃ।।121।।

যত্র যত্র মনো যাতি ব্রহ্মণস্তত্র দর্শনাত্।
মনসো ধারণাযৈব ধারণা সা পরা মতা।।122।।

ব্রহ্মৈবাস্মীতি সদ্বৃত্ত্যা নিরালম্বতযা স্থিতিঃ।
ধ্যানশব্দেন বিখ্যাতা পরমানন্দদাযিনী।।123।।

নির্বিকারতযা বৃত্ত্যা ব্রহ্মাকারতযা পুনঃ।
বৃত্তিবিস্মরণং সম্যক্সমাধির্জ্ঞানসংজ্ঞকঃ।।124।।

এবং চাকৃত্রিমানন্দং তাবত্সাধু সমভ্যসেত্।
বশ্যো যাবত্ক্ষণাত্পুংসঃ প্রযুক্তঃ স ভেবত্স্বযম্।।125।।

ততঃ সাধননির্মুক্তঃ সিদ্ধো ভবতি যোগিরাট্।
তত্স্বরূপং ন চৈকস্য বিষযো মনসো গিরাম্।।126।।

সমাধৌ ক্রিযমাণে তু বিঘ্না আযান্তি বৈ বলাত্।
অনুসংধানরাহিত্যমালস্যং ভোগলালসম্।।127।।

লযস্তমশ্চ বিক্ষেপো রসাস্বাদশ্চ শূন্যতা।
এবং যদ্বিঘ্নবাহুল্যং ত্যাজ্যং ব্রহ্মবিদা শনৈঃ।।128।।

ভাববৃত্ত্যা হি ভাবত্বং শূন্যবৃত্ত্যা হি শূন্যতা।
ব্রহ্মবৃত্ত্যা হি পূর্ণত্বং তথা পূর্ণত্বমভ্যসেত্।।129।।

যে হি বৃত্তিং জহত্যেনাং ব্রহ্মাখ্যাং পাবনীং পরাম্।
বৃথৈব তে তু জীবন্তি পশুভিশ্চ সমা নরাঃ।।130।।

যে হি বৃত্তিং বিজানন্তি যে জ্ঞাত্বা বর্ধযন্ত্যপি।
তে বৈ সত্পুরুষা ধন্যা বন্দ্যাস্তে ভুবনত্রযে।।131।।

যেষাং বৃত্তিঃ সমাবৃদ্ধা পরিপক্বা চ সা পুনঃ।
তে বৈ সদ্ব্রহ্মতাং প্রাপ্তা নেতরে শব্দবাদিনঃ।।132।।

কুশলা ব্রহ্মবার্তাযাং বৃত্তিহীনাঃ সুরাগিণঃ।
তেঽপ্যজ্ঞানিতমা নূনং পুনরাযান্তি যান্তি চ।।133।।

নিমেষার্ধং ন তিষ্ঠন্তি বৃত্তিং ব্রহ্মমযীং বিনা।
যথা তিষ্ঠন্তি ব্রহ্মাদ্যাঃ সনকাদ্যাঃ শুকাদযঃ।।134।।

কার্যে কারণতাযাতা কারণে ন হি কার্যতা।
কারণত্বং স্বতো গচ্ছেত্কার্যাভাবে বিচারতঃ।।135।।

অথ শুদ্ধং ভবেদ্বস্তু যদ্বৈ বাচামগোচরঃ।
দ্রষ্টব্যং মৃদ্ধটেনৈব দৃষ্টান্তেন পুনঃ পুনঃ।।136।।

অনেনৈব প্রকারেণ বৃত্তির্ব্রহ্মাত্মিকা ভবেত্।
উদেতি শুদ্ধচিত্তানাং বৃত্তিজ্ঞানং ততঃ পরম্।।137।।

কারণং ব্যতিরেকেণ পুমানাদৌ বিলোকযেত্।
অন্বযেন পুনস্তদ্ধি কার্যে নিত্যং প্রপশ্যতি।।138।।

কার্যে হি কারণং পশ্যেত্পশ্চাত্কার্যং বিসর্জযেত্।
কারণত্বং স্বতো নশ্যেদবশিষ্টং ভবেন্মুনিঃ।।139।।

ভাবিতং তীব্রবেগেণ বস্তু যন্নিশ্চযাত্মনা।
পুমাংস্তদ্ধি ভবেচ্ছীঘ্রং জ্ঞেযং ভ্রমরকীটবত্।।140।।

অদৃশ্যং ভাবরূপং চ সর্বমেতচ্চিদাত্মকম্।
সাবধানতযা নিত্যং স্বাত্মানং ভাবযেদ্বুধঃ।।141।।

দৃশ্যং হ্যদৃশ্যতাং নীত্বা ব্রহ্মাকারেণ চিন্তযেত্।
বিদ্বান্নিত্যসুখে তিষ্ঠেদ্ধিযা চিদ্রসপূর্ণযা।।142।।

এভিরঙ্গৈঃ সমাযুক্তো রাজযোগ উদাহৃতঃ।
কিংচিত্পক্বকষাযাণাং হঠযোগেন সংযুতঃ।।143।।

পরিপক্বং মনো যেষাং কেবলোঽযং চ সিদ্ধিদঃ।
গুরুদৈবতভক্তানাং সর্বেষাং সুলভো জবাত্।।144।।

ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ
অপরোক্ষানুভূতিঃ সমাপ্তা।।

More Brahman Stotras

Explore More