Brahman

অবধূত গীতা

(Avadhuta Gita in Bengali)

(ঈশ্বরানুগ্রহাদেব পুংসামদ্বৈতবাসনা)

Sage Dattatreya

Language:Sanskrit
Translation:English

1. Background of the TextThe Avadhuta Gita is a text of radical non-dualism (Advaita Vedānta). Unlike texts that employ a step-by-step pedagogical approach or those that debate opposing views, the Avadhuta Gita starts directly at the absolute summit.It completely bypasses dualistic concepts, ritualistic injunctions, and even traditional stages of meditation. Instead, it serves as a direct declaration of the nature of the Self (Ātman) as already free, unattached, and unstained by the world. It is traditionally studied by those who have already purified the mind and possess a strong intellectual grasp of Vedanta, serving as a means to plunge directly into direct experience.2.

Read In:
DevanagariGujaratiBengaliAssameseOdiaTeluguTamilKannadaMalayalamEnglish (IAST)
Reading depth
Lyrics
#of 271
অথ প্রথমোঽধ্যাযঃ
ঈশ্বরানুগ্রহাদেব পুংসামদ্বৈতবাসনা ।
মহদ্ভযপরিত্রাণাদ্বিপ্রাণামুপজাযতে ॥ ১-১॥
যেনেদং পূরিতং সর্বমাত্মনৈবাত্মনাত্মনি ।
নিরাকারং কথং বন্দে হ্যভিন্নং শিবমব্যযম্ ॥ ১-২॥
পঞ্চভূতাত্মকং বিশ্বং মরীচিজলসন্নিভম্ ।
কস্যাপ্যহো নমস্কুর্যামহমেকো নিরঞ্জনঃ ॥ ১-৩॥
আত্মৈব কেবলং সর্বং ভেদাভেদো ন বিদ্যতে ।
অস্তি নাস্তি কথং ব্রূযাং বিস্মযঃ প্রতিভাতি মে ॥ ১-৪॥
বেদান্তসারসর্বস্বং জ্ঞানং বিজ্ঞানমেব চ ।
অহমাত্মা নিরাকারঃ সর্বব্যাপী স্বভাবতঃ ॥ ১-৫॥
যো বৈ সর্বাত্মকো দেবো নিষ্কলো গগনোপমঃ ।
স্বভাবনির্মলঃ শুদ্ধঃ স এবাযং ন সংশযঃ ॥ ১-৬॥
অহমেবাব্যযোঽনন্তঃ শুদ্ধবিজ্ঞানবিগ্রহঃ ।
সুখং দুঃখং ন জানামি কথং কস্যাপি বর্ততে ॥ ১-৭॥
ন মানসং কর্ম শুভাশুভং মে
ন কাযিকং কর্ম শুভাশুভং মে ।
ন বাচিকং কর্ম শুভাশুভং মে
জ্ঞানামৃতং শুদ্ধমতীন্দ্রিযোঽহম্ ॥ ১-৮॥
মনো বৈ গগনাকারং মনো বৈ সর্বতোমুখম্ ।
মনোঽতীতং মনঃ সর্বং ন মনঃ পরমার্থতঃ ॥ ১-৯॥
অহমেকমিদং সর্বং ব্যোমাতীতং নিরন্তরম্ ।
পশ্যামি কথমাত্মানং প্রত্যক্ষং বা তিরোহিতম্ ॥ ১-১০॥
ত্বমেবমেকং হি কথং ন বুধ্যসে
সমং হি সর্বেষু বিমৃষ্টমব্যযম্ ।
সদোদিতোঽসি ত্বমখণ্ডিতঃ প্রভো
দিবা চ নক্তং চ কথং হি মন্যসে ॥ ১-১১॥
আত্মানং সততং বিদ্ধি সর্বত্রৈকং নিরন্তরম্ ।
অহং ধ্যাতা পরং ধ্যেযমখণ্ডং খণ্ড্যতে কথম্ ॥ ১-১২॥
ন জাতো ন মৃতোঽসি ত্বং ন তে দেহঃ কদাচন ।
সর্বং ব্রহ্মেতি বিখ্যাতং ব্রবীতি বহুধা শ্রুতিঃ ॥ ১-১৩॥
স বাহ্যাভ্যন্তরোঽসি ত্বং শিবঃ সর্বত্র সর্বদা ।
ইতস্ততঃ কথং ভ্রান্তঃ প্রধাবসি পিশাচবত্ ॥ ১-১৪॥
সংযোগশ্চ বিযোগশ্চ বর্ততে ন চ তে ন মে ।
ন ত্বং নাহং জগন্নেদং সর্বমাত্মৈব কেবলম্ ॥ ১-১৫॥
শব্দাদিপঞ্চকস্যাস্য নৈবাসি ত্বং ন তে পুনঃ ।
ত্বমেব পরমং তত্ত্বমতঃ কিং পরিতপ্যসে ॥ ১-১৬॥
জন্ম মৃত্যুর্ন তে চিত্তং বন্ধমোক্ষৌ শুভাশুভৌ ।
কথং রোদিষি রে বত্স নামরূপং ন তে ন মে ॥ ১-১৭॥
অহো চিত্ত কথং ভ্রান্তঃ প্রধাবসি পিশাচবত্ ।
অভিন্নং পশ্য চাত্মানং রাগত্যাগাত্সুখী ভব ॥ ১-১৮॥
ত্বমেব তত্ত্বং হি বিকারবর্জিতং
নিষ্কম্পমেকং হি বিমোক্ষবিগ্রহম্ ।
ন তে চ রাগো হ্যথবা বিরাগঃ
কথং হি সন্তপ্যসি কামকামতঃ ॥ ১-১৯॥
বদন্তি শ্রুতযঃ সর্বাঃ নির্গুণং শুদ্ধমব্যযম্ ।
অশরীরং সমং তত্ত্বং তন্মাং বিদ্ধি ন সংশযঃ ॥ ১-২০॥
সাকারমনৃতং বিদ্ধি নিরাকারং নিরন্তরম্ ।
এতত্তত্ত্বোপদেশেন ন পুনর্ভবসম্ভবঃ ॥ ১-২১॥
একমেব সমং তত্ত্বং বদন্তি হি বিপশ্চিতঃ ।
রাগত্যাগাত্পুনশ্চিত্তমেকানেকং ন বিদ্যতে ॥ ১-২২॥
অনাত্মরূপং চ কথং সমাধি-
রাত্মস্বরূপং চ কথং সমাধিঃ ।
অস্তীতি নাস্তীতি কথং সমাধি-
র্মোক্ষস্বরূপং যদি সর্বমেকম্ ॥ ১-২৩॥
বিশুদ্ধোঽসি সমং তত্ত্বং বিদেহস্ত্বমজোঽব্যযঃ ।
জানামীহ ন জানামীত্যাত্মানং মন্যসে কথম্ ॥ ১-২৪॥
তত্ত্বমস্যাদিবাক্যেন স্বাত্মা হি প্রতিপাদিতঃ ।
নেতি নেতি শ্রুতির্ব্রূযাদনৃতং পাঞ্চভৌতিকম্ ॥ ১-২৫॥
আত্মন্যেবাত্মনা সর্বং ত্বযা পূর্ণং নিরন্তরম্ ।
ধ্যাতা ধ্যানং ন তে চিত্তং নির্লজ্জং ধ্যাযতে কথম্ ॥ ১-২৬॥
শিবং ন জানামি কথং বদামি
শিবং ন জানামি কথং ভজামি ।
অহং শিবশ্চেত্পরমার্থতত্ত্বং
সমস্বরূপং গগনোপমং চ ॥ ১-২৭॥
নাহং তত্ত্বং সমং তত্ত্বং কল্পনাহেতুবর্জিতম্ ।
গ্রাহ্যগ্রাহকনির্মুক্তং স্বসংবেদ্যং কথং ভবেত্ ॥ ১-২৮॥
অনন্তরূপং ন হি বস্তু কিঞ্চি-
ত্তত্ত্বস্বরূপং ন হি বস্তু কিঞ্চিত্ ।
আত্মৈকরূপং পরমার্থতত্ত্বং
ন হিংসকো বাপি ন চাপ্যহিংসা ॥ ১-২৯॥
বিশুদ্ধোঽসি সমং তত্ত্বং বিদেহমজমব্যযম্ ।
বিভ্রমং কথমাত্মার্থে বিভ্রান্তোঽহং কথং পুনঃ ॥ ১-৩০॥
ঘটে ভিন্নে ঘটাকাশং সুলীনং ভেদবর্জিতম্ ।
শিবেন মনসা শুদ্ধো ন ভেদঃ প্রতিভাতি মে ॥ ১-৩১॥
ন ঘটো ন ঘটাকাশো ন জীবো জীববিগ্রহঃ ।
কেবলং ব্রহ্ম সংবিদ্ধি বেদ্যবেদকবর্জিতম্ ॥ ১-৩২॥
সর্বত্র সর্বদা সর্বমাত্মানং সততং ধ্রুবম্ ।
সর্বং শূন্যমশূন্যং চ তন্মাং বিদ্ধি ন সংশযঃ ॥ ১-৩৩॥
বেদা ন লোকা ন সুরা ন যজ্ঞা
বর্ণাশ্রমো নৈব কুলং ন জাতিঃ ।
ন ধূমমার্গো ন চ দীপ্তিমার্গো
ব্রহ্মৈকরূপং পরমার্থতত্ত্বম্ ॥ ১-৩৪॥
ব্যাপ্যব্যাপকনির্মুক্তঃ ত্বমেকঃ সফলং যদি ।
প্রত্যক্ষং চাপরোক্ষং চ হ্যাত্মানং মন্যসে কথম্ ॥ ১-৩৫॥
অদ্বৈতং কেচিদিচ্ছন্তি দ্বৈতমিচ্ছন্তি চাপরে ।
সমং তত্ত্বং ন বিন্দন্তি দ্বৈতাদ্বৈতবিবর্জিতম্ ॥ ১-৩৬॥
শ্বেতাদিবর্ণরহিতং শব্দাদিগুণবর্জিতম্ ।
কথযন্তি কথং তত্ত্বং মনোবাচামগোচরম্ ॥ ১-৩৭॥
যদাঽনৃতমিদং সর্বং দেহাদিগগনোপমম্ ।
তদা হি ব্রহ্ম সংবেত্তি ন তে দ্বৈতপরম্পরা ॥ ১-৩৮॥
পরেণ সহজাত্মাপি হ্যভিন্নঃ প্রতিভাতি মে ।
ব্যোমাকারং তথৈবৈকং ধ্যাতা ধ্যানং কথং ভবেত্ ॥ ১-৩৯॥
যত্করোমি যদশ্নামি যজ্জুহোমি দদামি যত্ ।
এতত্সর্বং ন মে কিঞ্চিদ্বিশুদ্ধোঽহমজোঽব্যযঃ ॥ ১-৪০॥
সর্বং জগদ্বিদ্ধি নিরাকৃতীদং
সর্বং জগদ্বিদ্ধি বিকারহীনম্ ।
সর্বং জগদ্বিদ্ধি বিশুদ্ধদেহং
সর্বং জগদ্বিদ্ধি শিবৈকরূপম্ ॥ ১-৪১॥
তত্ত্বং ত্বং ন হি সন্দেহঃ কিং জানাম্যথবা পুনঃ ।
অসংবেদ্যং স্বসংবেদ্যমাত্মানং মন্যসে কথম্ ॥ ১-৪২॥
মাযাঽমাযা কথং তাত ছাযাঽছাযা ন বিদ্যতে ।
তত্ত্বমেকমিদং সর্বং ব্যোমাকারং নিরঞ্জনম্ ॥ ১-৪৩॥
আদিমধ্যান্তমুক্তোঽহং ন বদ্ধোঽহং কদাচন ।
স্বভাবনির্মলঃ শুদ্ধ ইতি মে নিশ্চিতা মতিঃ ॥ ১-৪৪॥
মহদাদি জগত্সর্বং ন কিঞ্চিত্প্রতিভাতি মে ।
ব্রহ্মৈব কেবলং সর্বং কথং বর্ণাশ্রমস্থিতিঃ ॥ ১-৪৫॥
জানামি সর্বথা সর্বমহমেকো নিরন্তরম্ ।
নিরালম্বমশূন্যং চ শূন্যং ব্যোমাদিপঞ্চকম্ ॥ ১-৪৬॥
ন ষণ্ঢো ন পুমান্ন স্ত্রী ন বোধো নৈব কল্পনা ।
সানন্দো বা নিরানন্দমাত্মানং মন্যসে কথম্ ॥ ১-৪৭॥
ষডঙ্গযোগান্ন তু নৈব শুদ্ধং
মনোবিনাশান্ন তু নৈব শুদ্ধম্ ।
গুরূপদেশান্ন তু নৈব শুদ্ধং
স্বযং চ তত্ত্বং স্বযমেব বুদ্ধম্ ॥ ১-৪৮॥
ন হি পঞ্চাত্মকো দেহো বিদেহো বর্ততে ন হি ।
আত্মৈব কেবলং সর্বং তুরীযং চ ত্রযং কথম্ ॥ ১-৪৯॥
ন বদ্ধো নৈব মুক্তোঽহং ন চাহং ব্রহ্মণঃ পৃথক্ ।
ন কর্তা ন চ ভোক্তাহং ব্যাপ্যব্যাপকবর্জিতঃ ॥ ১-৫০॥
যথা জলং জলে ন্যস্তং সলিলং ভেদবর্জিতম্ ।
প্রকৃতিং পুরুষং তদ্বদভিন্নং প্রতিভাতি মে ॥ ১-৫১॥
যদি নাম ন মুক্তোঽসি ন বদ্ধোঽসি কদাচন ।
সাকারং চ নিরাকারমাত্মানং মন্যসে কথম্ ॥ ১-৫২॥
জানামি তে পরং রূপং প্রত্যক্ষং গগনোপমম্ ।
যথা পরং হি রূপং যন্মরীচিজলসন্নিভম্ ॥ ১-৫৩॥
ন গুরুর্নোপদেশশ্চ ন চোপাধির্ন মে ক্রিযা ।
বিদেহং গগনং বিদ্ধি বিশুদ্ধোঽহং স্বভাবতঃ ॥ ১-৫৪॥
বিশুদ্ধোঽস্য শরীরোঽসি ন তে চিত্তং পরাত্পরম্ ।
অহং চাত্মা পরং তত্ত্বমিতি বক্তুং ন লজ্জসে ॥ ১-৫৫॥
কথং রোদিষি রে চিত্ত হ্যাত্মৈবাত্মাত্মনা ভব ।
পিব বত্স কলাতীতমদ্বৈতং পরমামৃতম্ ॥ ১-৫৬॥
নৈব বোধো ন চাবোধো ন বোধাবোধ এব চ ।
যস্যেদৃশঃ সদা বোধঃ স বোধো নান্যথা ভবেত্ ॥ ১-৫৭॥
জ্ঞানং ন তর্কো ন সমাধিযোগো
ন দেশকালৌ ন গুরূপদেশঃ ।
স্বভাবসংবিত্তরহং চ তত্ত্ব-
মাকাশকল্পং সহজং ধ্রুবং চ ॥ ১-৫৮॥
ন জাতোঽহং মৃতো বাপি ন মে কর্ম শুভাশুভম্ ।
বিশুদ্ধং নির্গুণং ব্রহ্ম বন্ধো মুক্তিঃ কথং মম ॥ ১-৫৯॥
যদি সর্বগতো দেবঃ স্থিরঃ পূর্ণো নিরন্তরঃ ।
অন্তরং হি ন পশ্যামি স বাহ্যাভ্যন্তরঃ কথম্ ॥ ১-৬০॥
স্ফুরত্যেব জগত্কৃত্স্নমখণ্ডিতনিরন্তরম্ ।
অহো মাযামহামোহো দ্বৈতাদ্বৈতবিকল্পনা ॥ ১-৬১॥
সাকারং চ নিরাকারং নেতি নেতীতি সর্বদা ।
ভেদাভেদবিনির্মুক্তো বর্ততে কেবলঃ শিবঃ ॥ ১-৬২॥
ন তে চ মাতা চ পিতা চ বন্ধুঃ
ন তে চ পত্নী ন সুতশ্চ মিত্রম্ ।
ন পক্ষপাতী ন বিপক্ষপাতঃ
কথং হি সন্তপ্তিরিযং হি চিত্তে ॥ ১-৬৩॥
দিবা নক্তং ন তে চিত্তং উদযাস্তমযৌ ন হি ।
বিদেহস্য শরীরত্বং কল্পযন্তি কথং বুধাঃ ॥ ১-৬৪॥
নাবিভক্তং বিভক্তং চ ন হি দুঃখসুখাদি চ ।
ন হি সর্বমসর্বং চ বিদ্ধি চাত্মানমব্যযম্ ॥ ১-৬৫॥
নাহং কর্তা ন ভোক্তা চ ন মে কর্ম পুরাঽধুনা ।
ন মে দেহো বিদেহো বা নির্মমেতি মমেতি কিম্ ॥ ১-৬৬॥
ন মে রাগাদিকো দোষো দুঃখং দেহাদিকং ন মে ।
আত্মানং বিদ্ধি মামেকং বিশালং গগনোপমম্ ॥ ১-৬৭॥
সখে মনঃ কিং বহুজল্পিতেন
সখে মনঃ সর্বমিদং বিতর্ক্যম্ ।
যত্সারভূতং কথিতং মযা তে
ত্বমেব তত্ত্বং গগনোপমোঽসি ॥ ১-৬৮॥
যেন কেনাপি ভাবেন যত্র কুত্র মৃতা অপি ।
যোগিনস্তত্র লীযন্তে ঘটাকাশমিবাম্বরে ॥ ১-৬৯॥
তীর্থে চান্ত্যজগেহে বা নষ্টস্মৃতিরপি ত্যজন্ ।
সমকালে তনুং মুক্তঃ কৈবল্যব্যাপকো ভবেত্ ॥ ১-৭০॥
ধর্মার্থকামমোক্ষাংশ্চ দ্বিপদাদিচরাচরম্ ।
মন্যন্তে যোগিনঃ সর্বং মরীচিজলসন্নিভম্ ॥ ১-৭১॥
অতীতানাগতং কর্ম বর্তমানং তথৈব চ ।
ন করোমি ন ভুঞ্জামি ইতি মে নিশ্চলা মতিঃ ॥ ১-৭২॥
শূন্যাগারে সমরসপূত-
স্তিষ্ঠন্নেকঃ সুখমবধূতঃ ।
চরতি হি নগ্নস্ত্যক্ত্বা গর্বং
বিন্দতি কেবলমাত্মনি সর্বম্ ॥ ১-৭৩॥
ত্রিতযতুরীযং ন হি নহি যত্র
বিন্দতি কেবলমাত্মনি তত্র ।
ধর্মাধর্মৌ ন হি নহি যত্র
বদ্ধো মুক্তঃ কথমিহ তত্র ॥ ১-৭৪॥
বিন্দতি বিন্দতি ন হি নহি মন্ত্রং
ছন্দোলক্ষণং ন হি নহি তন্ত্রম্ ।
সমরসমগ্নো ভাবিতপূতঃ
প্রলপিতমেতত্পরমবধূতঃ ॥ ১-৭৫॥
সর্বশূন্যমশূন্যং চ সত্যাসত্যং ন বিদ্যতে ।
স্বভাবভাবতঃ প্রোক্তং শাস্ত্রসংবিত্তিপূর্বকম্ ॥ ১-৭৬॥
অথ দ্বিতীযোঽধ্যাযঃ
বালস্য বা বিষযভোগরতস্য বাপি
মূর্খস্য সেবকজনস্য গৃহস্থিতস্য ।
এতদ্গুরোঃ কিমপি নৈব ন চিন্তনীযং
রত্নং কথং ত্যজতি কোঽপ্যশুচৌ প্রবিষ্টম্ ॥ ২-১॥
নৈবাত্র কাব্যগুণ এব তু চিন্তনীযো
গ্রাহ্যঃ পরং গুণবতা খলু সার এব ।
সিন্দূরচিত্ররহিতা ভুবি রূপশূন্যা
পারং ন কিং নযতি নৌরিহ গন্তুকামান্ ॥ ২-২॥
প্রযত্নেন বিনা যেন নিশ্চলেন চলাচলম্ ।
গ্রস্তং স্বভাবতঃ শান্তং চৈতন্যং গগনোপমম্ ॥ ২-৩॥
অযত্নাছালযেদ্যস্তু একমেব চরাচরম্ ।
সর্বগং তত্কথং ভিন্নমদ্বৈতং বর্ততে মম ॥ ২-৪॥
অহমেব পরং যস্মাত্সারাত্সারতরং শিবম্ ।
গমাগমবিনির্মুক্তং নির্বিকল্পং নিরাকুলম্ ॥ ২-৫॥
সর্বাবযবনির্মুক্তং তথাহং ত্রিদশার্চিতম্ ।
সম্পূর্ণত্বান্ন গৃহ্ণামি বিভাগং ত্রিদশাদিকম্ ॥ ২-৬॥
প্রমাদেন ন সন্দেহঃ কিং করিষ্যামি বৃত্তিমান্ ।
উত্পদ্যন্তে বিলীযন্তে বুদ্বুদাশ্চ যথা জলে ॥ ২-৭॥
মহদাদীনি ভূতানি সমাপ্যৈবং সদৈব হি ।
মৃদুদ্রব্যেষু তীক্ষ্ণেষু গুডেষু কটুকেষু চ ॥ ২-৮॥
কটুত্বং চৈব শৈত্যত্বং মৃদুত্বং চ যথা জলে ।
প্রকৃতিঃ পুরুষস্তদ্বদভিন্নং প্রতিভাতি মে ॥ ২-৯॥
সর্বাখ্যারহিতং যদ্যত্সূক্ষ্মাত্সূক্ষ্মতরং পরম্ ।
মনোবুদ্ধীন্দ্রিযাতীতমকলঙ্কং জগত্পতিম্ ॥ ২-১০॥
ঈদৃশং সহজং যত্র অহং তত্র কথং ভবেত্ ।
ত্বমেব হি কথং তত্র কথং তত্র চরাচরম্ ॥ ২-১১॥
গগনোপমং তু যত্প্রোক্তং তদেব গগনোপমম্ ।
চৈতন্যং দোষহীনং চ সর্বজ্ঞং পূর্ণমেব চ ॥ ২-১২॥
পৃথিব্যাং চরিতং নৈব মারুতেন চ বাহিতম্ ।
বরিণা পিহিতং নৈব তেজোমধ্যে ব্যবস্থিতম্ ॥ ২-১৩॥
আকাশং তেন সংব্যাপ্তং ন তদ্ব্যাপ্তং চ কেনচিত্ ।
স বাহ্যাভ্যন্তরং তিষ্ঠত্যবচ্ছিন্নং নিরন্তরম্ ॥ ২-১৪॥
সূক্ষ্মত্বাত্তদদৃশ্যত্বান্নির্গুণত্বাচ্চ যোগিভিঃ ।
আলম্বনাদি যত্প্রোক্তং ক্রমাদালম্বনং ভবেত্ ॥ ২-১৫॥
সততাঽভ্যাসযুক্তস্তু নিরালম্বো যদা ভবেত্ ।
তল্লযাল্লীযতে নান্তর্গুণদোষবিবর্জিতঃ ॥ ২-১৬॥
বিষবিশ্বস্য রৌদ্রস্য মোহমূর্চ্ছাপ্রদস্য চ ।
একমেব বিনাশায হ্যমোঘং সহজামৃতম্ ॥ ২-১৭॥
ভাবগম্যং নিরাকারং সাকারং দৃষ্টিগোচরম্ ।
ভাবাভাববিনির্মুক্তমন্তরালং তদুচ্যতে ॥ ২-১৮॥
বাহ্যভাবং ভবেদ্বিশ্বমন্তঃ প্রকৃতিরুচ্যতে ।
অন্তরাদন্তরং জ্ঞেযং নারিকেলফলাম্বুবত্ ॥ ২-১৯॥
ভ্রান্তিজ্ঞানং স্থিতং বাহ্যং সম্যগ্জ্ঞানং চ মধ্যগম্ ।
মধ্যান্মধ্যতরং জ্ঞেযং নারিকেলফলাম্বুবত্ ॥ ২-২০॥
পৌর্ণমাস্যাং যথা চন্দ্র এক এবাতিনির্মলঃ ।
তেন তত্সদৃশং পশ্যেদ্দ্বিধাদৃষ্টির্বিপর্যযঃ ॥ ২-২১॥
অনেনৈব প্রকারেণ বুদ্ধিভেদো ন সর্বগঃ ।
দাতা চ ধীরতামেতি গীযতে নামকোটিভিঃ ॥ ২-২২॥
গুরুপ্রজ্ঞাপ্রসাদেন মূর্খো বা যদি পণ্ডিতঃ ।
যস্তু সম্বুধ্যতে তত্ত্বং বিরক্তো ভবসাগরাত্ ॥ ২-২৩॥
রাগদ্বেষবিনির্মুক্তঃ সর্বভূতহিতে রতঃ ।
দৃঢবোধশ্চ ধীরশ্চ স গচ্ছেত্পরমং পদম্ ॥ ২-২৪॥
ঘটে ভিন্নে ঘটাকাশ আকাশে লীযতে যথা ।
দেহাভাবে তথা যোগী স্বরূপে পরমাত্মনি ॥ ২-২৫॥
উক্তেযং কর্মযুক্তানাং মতির্যান্তেঽপি সা গতিঃ ।
ন চোক্তা যোগযুক্তানাং মতির্যান্তেঽপি সা গতিঃ ॥ ২-২৬॥
যা গতিঃ কর্মযুক্তানাং সা চ বাগিন্দ্রিযাদ্বদেত্ ।
যোগিনাং যা গতিঃ ক্বাপি হ্যকথ্যা ভবতোর্জিতা ॥ ২-২৭॥
এবং জ্ঞাত্বা ত্বমুং মার্গং যোগিনাং নৈব কল্পিতম্ ।
বিকল্পবর্জনং তেষাং স্বযং সিদ্ধিঃ প্রবর্ততে ॥ ২-২৮॥
তীর্থে বান্ত্যজগেহে বা যত্র কুত্র মৃতোঽপি বা ।
ন যোগী পশ্যতে গর্ভং পরে ব্রহ্মণি লীযতে ॥ ২-২৯॥
সহজমজমচিন্ত্যং যস্তু পশ্যেত্স্বরূপং
ঘটতি যদি যথেষ্টং লিপ্যতে নৈব দোষৈঃ ।
সকৃদপি তদভাবাত্কর্ম কিঞ্চিন্নকুর্যাত্
তদপি ন চ বিবদ্ধঃ সংযমী বা তপস্বী ॥ ২-৩০॥
নিরামযং নিষ্প্রতিমং নিরাকৃতিং
নিরাশ্রযং নির্বপুষং নিরাশিষম্ ।
নির্দ্বন্দ্বনির্মোহমলুপ্তশক্তিকং
তমীশমাত্মানমুপৈতি শাশ্বতম্ ॥ ২-৩১॥
বেদো ন দীক্ষা ন চ মুণ্ডনক্রিযা
গুরুর্ন শিষ্যো ন চ যন্ত্রসম্পদঃ ।
মুদ্রাদিকং চাপি ন যত্র ভাসতে
তমীশমাত্মানমুপৈতি শাশ্বতম্ ॥ ২-৩২॥
ন শাম্ভবং শাক্তিকমানবং ন বা
পিণ্ডং চ রূপং চ পদাদিকং ন বা ।
আরম্ভনিষ্পত্তিঘটাদিকং চ নো
তমীশমাত্মানমুপৈতি শাশ্বতম্ ॥ ২-৩৩॥
যস্য স্বরূপাত্সচরাচরং জগ-
দুত্পদ্যতে তিষ্ঠতি লীযতেঽপি বা ।
পযোবিকারাদিব ফেনবুদ্বুদা-
স্তমীশমাত্মানমুপৈতি শাশ্বতম্ ॥ ২-৩৪॥
নাসানিরোধো ন চ দৃষ্টিরাসনং
বোধোঽপ্যবোধোঽপি ন যত্র ভাসতে ।
নাডীপ্রচারোঽপি ন যত্র কিঞ্চি-
ত্তমীশমাত্মানমুপৈতি শাশ্বতম্ ॥ ২-৩৫॥
নানাত্বমেকত্বমুভত্বমন্যতা
অণুত্বদীর্ঘত্বমহত্ত্বশূন্যতা ।
মানত্বমেযত্বসমত্ববর্জিতং
তমীশমাত্মানমুপৈতি শাশ্বতম্ ॥ ২-৩৬॥
সুসংযমী বা যদি বা ন সংযমী
সুসঙ্গ্রহী বা যদি বা ন সঙ্গ্রহী ।
নিষ্কর্মকো বা যদি বা সকর্মক-
স্তমীশমাত্মানমুপৈতি শাশ্বতম্ ॥ ২-৩৭॥
মনো ন বুদ্ধির্ন শরীরমিন্দ্রিযং
তন্মাত্রভূতানি ন ভূতপঞ্চকম্ ।
অহঙ্কৃতিশ্চাপি বিযত্স্বরূপকং
তমীশমাত্মানমুপৈতি শাশ্বতম্ ॥ ২-৩৮॥
বিধৌ নিরোধে পরমাত্মতাং গতে
ন যোগিনশ্চেতসি ভেদবর্জিতে ।
শৌচং ন বাশৌচমলিঙ্গভাবনা
সর্বং বিধেযং যদি বা নিষিধ্যতে ॥ ২-৩৯॥
মনো বচো যত্র ন শক্তমীরিতুং
নূনং কথং তত্র গুরূপদেশতা ।
ইমাং কথামুক্তবতো গুরোস্ত-
দ্যুক্তস্য তত্ত্বং হি সমং প্রকাশতে ॥ ২-৪০॥
অথ তৃতীযোঽধ্যাযঃ
গুণবিগুণবিভাগো বর্ততে নৈব কিঞ্চিত্
রতিবিরতিবিহীনং নির্মলং নিষ্প্রপঞ্চম্ ।
গুণবিগুণবিহীনং ব্যাপকং বিশ্বরূপং
কথমহমিহ বন্দে ব্যোমরূপং শিবং বৈ ॥ ৩-১॥
শ্বেতাদিবর্ণরহিতো নিযতং শিবশ্চ
কার্যং হি কারণমিদং হি পরং শিবশ্চ ।
এবং বিকল্পরহিতোঽহমলং শিবশ্চ
স্বাত্মানমাত্মনি সুমিত্র কথং নমামি ॥ ৩-২॥
নির্মূলমূলরহিতো হি সদোদিতোঽহং
নির্ধূমধূমরহিতো হি সদোদিতোঽহম্ ।
নির্দীপদীপরহিতো হি সদোদিতোঽহং
জ্ঞানামৃতং সমরসং গগনোপমোঽহম্ ॥ ৩-৩॥
নিষ্কামকামমিহ নাম কথং বদামি
নিঃসঙ্গসঙ্গমিহ নাম কথং বদামি ।
নিঃসারসাররহিতং চ কথং বদামি
জ্ঞানামৃতং সমরসং গগনোপমোঽহম্ ॥ ৩-৪॥
অদ্বৈতরূপমখিলং হি কথং বদামি
দ্বৈতস্বরূপমখিলং হি কথং বদামি ।
নিত্যং ত্বনিত্যমখিলং হি কথং বদামি
জ্ঞানামৃতং সমরসং গগনোপমোঽহম্ ॥ ৩-৫॥
স্থূলং হি নো ন হি কৃশং ন গতাগতং হি
আদ্যন্তমধ্যরহিতং ন পরাপরং হি ।
সত্যং বদামি খলু বৈ পরমার্থতত্ত্বং
জ্ঞানামৃতং সমরসং গগনোপমোঽহম্ ॥ ৩-৬॥
সংবিদ্ধি সর্বকরণানি নভোনিভানি
সংবিদ্ধি সর্ববিষযাংশ্চ নভোনিভাংশ্চ ।
সংবিদ্ধি চৈকমমলং ন হি বন্ধমুক্তং
জ্ঞানামৃতং সমরসং গগনোপমোঽহম্ ॥ ৩-৭॥
দুর্বোধবোধগহনো ন ভবামি তাত
দুর্লক্ষ্যলক্ষ্যগহনো ন ভবামি তাত ।
আসন্নরূপগহনো ন ভবামি তাত
জ্ঞানামৃতং সমরসং গগনোপমোঽহম্ ॥ ৩-৮॥
নিষ্কর্মকর্মদহনো জ্বলনো ভবামি
নির্দুঃখদুঃখদহনো জ্বলনো ভবামি ।
নির্দেহদেহদহনো জ্বলনো ভবামি
জ্ঞানামৃতং সমরসং গগনোপমোঽহম্ ॥ ৩-৯॥
নিষ্পাপপাপদহনো হি হুতাশনোঽহং
নির্ধর্মধর্মদহনো হি হুতাশনোঽহম্ ।
নির্বন্ধবন্ধদহনো হি হুতাশনোঽহং
জ্ঞানামৃতং সমরসং গগনোপমোঽহম্ ॥ ৩-১০॥
নির্ভাবভাবরহিতো ন ভবামি বত্স
নির্যোগযোগরহিতো ন ভবামি বত্স ।
নিশ্চিত্তচিত্তরহিতো ন ভবামি বত্স
জ্ঞানামৃতং সমরসং গগনোপমোঽহম্ ॥ ৩-১১॥
নির্মোহমোহপদবীতি ন মে বিকল্পো
নিঃশোকশোকপদবীতি ন মে বিকল্পঃ ।
নির্লোভলোভপদবীতি ন মে বিকল্পো
জ্ঞানামৃতং সমরসং গগনোপমোঽহম্ ॥ ৩-১২॥
সংসারসন্ততিলতা ন চ মে কদাচিত্
সন্তোষসন্ততিসুখো ন চ মে কদাচিত্ ।
অজ্ঞানবন্ধনমিদং ন চ মে কদাচিত্
জ্ঞানামৃতং সমরসং গগনোপমোঽহম্ ॥ ৩-১৩॥
সংসারসন্ততিরজো ন চ মে বিকারঃ
সন্তাপসন্ততিতমো ন চ মে বিকারঃ ।
সত্ত্বং স্বধর্মজনকং ন চ মে বিকারো
জ্ঞানামৃতং সমরসং গগনোপমোঽহম্ ॥ ৩-১৪॥
সন্তাপদুঃখজনকো ন বিধিঃ কদাচিত্
সন্তাপযোগজনিতং ন মনঃ কদাচিত্ ।
যস্মাদহঙ্কৃতিরিযং ন চ মে কদাচিত্
জ্ঞানামৃতং সমরসং গগনোপমোঽহম্ ॥ ৩-১৫॥
নিষ্কম্পকম্পনিধনং ন বিকল্পকল্পং
স্বপ্নপ্রবোধনিধনং ন হিতাহিতং হি ।
নিঃসারসারনিধনং ন চরাচরং হি
জ্ঞানামৃতং সমরসং গগনোপমোঽহম্ ॥ ৩-১৬॥
নো বেদ্যবেদকমিদং ন চ হেতুতর্ক্যং
বাচামগোচরমিদং ন মনো ন বুদ্ধিঃ ।
এবং কথং হি ভবতঃ কথযামি তত্ত্বং
জ্ঞানামৃতং সমরসং গগনোপমোঽহম্ ॥ ৩-১৭॥
নির্ভিন্নভিন্নরহিতং পরমার্থতত্ত্ব-
মন্তর্বহির্ন হি কথং পরমার্থতত্ত্বম্ ।
প্রাক্সম্ভবং ন চ রতং ন হি বস্তু কিঞ্চিত্
জ্ঞানামৃতং সমরসং গগনোপমোঽহম্ ॥ ৩-১৮॥
রাগাদিদোষরহিতং ত্বহমেব তত্ত্বং
দৈবাদিদোষরহিতং ত্বহমেব তত্ত্বম্ ।
সংসারশোকরহিতং ত্বহমেব তত্ত্বং
জ্ঞানামৃতং সমরসং গগনোপমোঽহম্ ॥ ৩-১৯॥
স্থানত্রযং যদি চ নেতি কথং তুরীযং
কালত্রযং যদি চ নেতি কথং দিশশ্চ ।
শান্তং পদং হি পরমং পরমার্থতত্ত্বং
জ্ঞানামৃতং সমরসং গগনোপমোঽহম্ ॥ ৩-২০॥
দীর্ঘো লঘুঃ পুনরিতীহ নমে বিভাগো
বিস্তারসংকটমিতীহ ন মে বিভাগঃ ।
কোণং হি বর্তুলমিতীহ ন মে বিভাগো
জ্ঞানামৃতং সমরসং গগনোপমোঽহম্ ॥ ৩-২১॥
মাতাপিতাদি তনযাদি ন মে কদাচিত্
জাতং মৃতং ন চ মনো ন চ মে কদাচিত্ ।
নির্ব্যাকুলং স্থিরমিদং পরমার্থতত্ত্বং
জ্ঞানামৃতং সমরসং গগনোপমোঽহম্ ॥ ৩-২২॥
শুদ্ধং বিশুদ্ধমবিচারমনন্তরূপং
নির্লেপলেপমবিচারমনন্তরূপম্ ।
নিষ্খণ্ডখণ্ডমবিচারমনন্তরূপং
জ্ঞানামৃতং সমরসং গগনোপমোঽহম্ ॥ ৩-২৩॥
ব্রহ্মাদযঃ সুরগণাঃ কথমত্র সন্তি
স্বর্গাদযো বসতযঃ কথমত্র সন্তি ।
যদ্যেকরূপমমলং পরমার্থতত্ত্বং
জ্ঞানামৃতং সমরসং গগনোপমোঽহম্ ॥ ৩-২৪॥
নির্নেতি নেতি বিমলো হি কথং বদামি
নিঃশেষশেষবিমলো হি কথং বদামি ।
নির্লিঙ্গলিঙ্গবিমলো হি কথং বদামি
জ্ঞানামৃতং সমরসং গগনোপমোঽহম্ ॥ ৩-২৫॥
নিষ্কর্মকর্মপরমং সততং করোমি
নিঃসঙ্গসঙ্গরহিতং পরমং বিনোদম্ ।
নির্দেহদেহরহিতং সততং বিনোদং
জ্ঞানামৃতং সমরসং গগনোপমোঽহম্ ॥ ৩-২৬॥
মাযাপ্রপঞ্চরচনা ন চ মে বিকারঃ ।
কৌটিল্যদম্ভরচনা ন চ মে বিকারঃ ।
সত্যানৃতেতি রচনা ন চ মে বিকারো
জ্ঞানামৃতং সমরসং গগনোপমোঽহম্ ॥ ৩-২৭॥
সন্ধ্যাদিকালরহিতং ন চ মে বিযোগো-
হ্যন্তঃ প্রবোধরহিতং বধিরো ন মূকঃ ।
এবং বিকল্পরহিতং ন চ ভাবশুদ্ধং
জ্ঞানামৃতং সমরসং গগনোপমোঽহম্ ॥ ৩-২৮॥
নির্নাথনাথরহিতং হি নিরাকুলং বৈ
নিশ্চিত্তচিত্তবিগতং হি নিরাকুলং বৈ ।
সংবিদ্ধি সর্ববিগতং হি নিরাকুলং বৈ
জ্ঞানামৃতং সমরসং গগনোপমোঽহম্ ॥ ৩-২৯॥
কান্তারমন্দিরমিদং হি কথং বদামি
সংসিদ্ধসংশযমিদং হি কথং বদামি ।
এবং নিরন্তরসমং হি নিরাকুলং বৈ
জ্ঞানামৃতং সমরসং গগনোপমোঽহম্ ॥ ৩-৩০॥
নির্জীবজীবরহিতং সততং বিভাতি
নির্বীজবীজরহিতং সততং বিভাতি ।
নির্বাণবন্ধরহিতং সততং বিভাতি
জ্ঞানামৃতং সমরসং গগনোপমোঽহম্ ॥ ৩-৩১॥
সম্ভূতিবর্জিতমিদং সততং বিভাতি
সংসারবর্জিতমিদং সততং বিভাতি ।
সংহারবর্জিতমিদং সততং বিভাতি
জ্ঞানামৃতং সমরসং গগনোপমোঽহম্ ॥ ৩-৩২॥
উল্লেখমাত্রমপি তে ন চ নামরূপং
নির্ভিন্নভিন্নমপি তে ন হি বস্তু কিঞ্চিত্ ।
নির্লজ্জমানস করোষি কথং বিষাদং
জ্ঞানামৃতং সমরসং গগনোপমোঽহম্ ॥ ৩-৩৩॥
কিং নাম রোদিষি সখে ন জরা ন মৃত্যুঃ
কিং নাম রোদিষি সখে ন চ জন্ম দুঃখম্ ।
কিং নাম রোদিষি সখে ন চ তে বিকারো
জ্ঞানামৃতং সমরসং গগনোপমোঽহম্ ॥ ৩-৩৪॥
কিং নাম রোদিষি সখে ন চ তে স্বরূপং
কিং নাম রোদিষি সখে ন চ তে বিরূপম্ ।
কিং নাম রোদিষি সখে ন চ তে বযাংসি
জ্ঞানামৃতং সমরসং গগনোপমোঽহম্ ॥ ৩-৩৫॥
কিং নাম রোদিষি সখে ন চ তে বযাংসি
কিং নাম রোদিষি সখে ন চ তে মনাংসি ।
কিং নাম রোদিষি সখে ন তবেন্দ্রিযাণি
জ্ঞানামৃতং সমরসং গগনোপমোঽহম্ ॥ ৩-৩৬॥
কিং নাম রোদিষি সখে ন চ তেঽস্তি কামঃ
কিং নাম রোদিষি সখে ন চ তে প্রলোভঃ ।
কিং নাম রোদিষি সখে ন চ তে বিমোহো
জ্ঞানামৃতং সমরসং গগনোপমোঽহম্ ॥ ৩-৩৭॥
ঐশ্বর্যমিচ্ছসি কথং ন চ তে ধনানি
ঐশ্বর্যমিচ্ছসি কথং ন চ তে হি পত্নী ।
ঐশ্বর্যমিচ্ছসি কথং ন চ তে মমেতি
জ্ঞানামৃতং সমরসং গগনোপমোঽহম্ ॥ ৩-৩৮॥
লিঙ্গপ্রপঞ্চজনুষী ন চ তে ন মে চ
নির্লজ্জমানসমিদং চ বিভাতি ভিন্নম্ ।
নির্ভেদভেদরহিতং ন চ তে ন মে চ
জ্ঞানামৃতং সমরসং গগনোপমোঽহম্ ॥ ৩-৩৯॥
নো বাণুমাত্রমপি তে হি বিরাগরূপং
নো বাণুমাত্রমপি তে হি সরাগরূপম্ ।
নো বাণুমাত্রমপি তে হি সকামরূপং
জ্ঞানামৃতং সমরসং গগনোপমোঽহম্ ॥ ৩-৪০॥
ধ্যাতা ন তে হি হৃদযে ন চ তে সমাধি-
র্ধ্যানং ন তে হি হৃদযে ন বহিঃ প্রদেশঃ ।
ধ্যেযং ন চেতি হৃদযে ন হি বস্তু কালো
জ্ঞানামৃতং সমরসং গগনোপমোঽহম্ ॥ ৩-৪১॥
যত্সারভূতমখিলং কথিতং মযা তে
ন ত্বং ন মে ন মহতো ন গুরুর্ন ন শিষ্যঃ ।
স্বচ্ছন্দরূপসহজং পরমার্থতত্ত্বং
জ্ঞানামৃতং সমরসং গগনোপমোঽহম্ ॥ ৩-৪২॥
কথমিহ পরমার্থং তত্ত্বমানন্দরূপং
কথমিহ পরমার্থং নৈবমানন্দরূপম্ ।
কথমিহ পরমার্থং জ্ঞানবিজ্ঞানরূপং
যদি পরমহমেকং বর্ততে ব্যোমরূপম্ ॥ ৩-৪৩॥
দহনপবনহীনং বিদ্ধি বিজ্ঞানমেক-
মবনিজলবিহীনং বিদ্ধি বিজ্ঞানরূপম্ ।
সমগমনবিহীনং বিদ্ধি বিজ্ঞানমেকং
গগনমিব বিশালং বিদ্ধি বিজ্ঞানমেকম্ ॥ ৩-৪৪॥
ন শূন্যরূপং ন বিশূন্যরূপং
ন শুদ্ধরূপং ন বিশুদ্ধরূপম্ ।
রূপং বিরূপং ন ভবামি কিঞ্চিত্
স্বরূপরূপং পরমার্থতত্ত্বম্ ॥ ৩-৪৫॥
মুঞ্চ মুঞ্চ হি সংসারং ত্যাগং মুঞ্চ হি সর্বথা ।
ত্যাগাত্যাগবিষং শুদ্ধমমৃতং সহজং ধ্রুবম্ ॥ ৩-৪৬॥
অথ চতুর্থোঽধ্যাযঃ
নাবাহনং নৈব বিসর্জনং বা
পুষ্পাণি পত্রাণি কথং ভবন্তি ।
ধ্যানানি মন্ত্রাণি কথং ভবন্তি
সমাসমং চৈব শিবার্চনং চ ॥ ৪-১॥
ন কেবলং বন্ধবিবন্ধমুক্তো
ন কেবলং শুদ্ধবিশুদ্ধমুক্তঃ ।
ন কেবলং যোগবিযোগমুক্তঃ
স বৈ বিমুক্তো গগনোপমোঽহম্ ॥ ৪-২॥
সঞ্জাযতে সর্বমিদং হি তথ্যং
সঞ্জাযতে সর্বমিদং বিতথ্যম্ ।
এবং বিকল্পো মম নৈব জাতঃ
স্বরূপনির্বাণমনামযোঽহম্ ॥ ৪-৩॥
ন সাঞ্জনং চৈব নিরঞ্জনং বা
ন চান্তরং বাপি নিরন্তরং বা ।
অন্তর্বিভন্নং ন হি মে বিভাতি
স্বরূপনির্বাণমনামযোঽহম্ ॥ ৪-৪॥
অবোধবোধো মম নৈব জাতো
বোধস্বরূপং মম নৈব জাতম্ ।
নির্বোধবোধং চ কথং বদামি
স্বরূপনির্বাণমনামযোঽহম্ ॥ ৪-৫॥
ন ধর্মযুক্তো ন চ পাপযুক্তো
ন বন্ধযুক্তো ন চ মোক্ষযুক্তঃ ।
যুক্তং ত্বযুক্তং ন চ মে বিভাতি
স্বরূপনির্বাণমনামযোঽহম্ ॥ ৪-৬॥
পরাপরং বা ন চ মে কদাচিত্
মধ্যস্থভাবো হি ন চারিমিত্রম্ ।
হিতাহিতং চাপি কথং বদামি
স্বরূপনির্বাণমনামযোঽহম্ ॥ ৪-৭॥
নোপাসকো নৈবমুপাস্যরূপং
ন চোপদেশো ন চ মে ক্রিযা চ ।
সংবিত্স্বরূপং চ কথং বদামি
স্বরূপনির্বাণমনামযোঽহম্ ॥ ৪-৮॥
নো ব্যাপকং ব্যাপ্যমিহাস্তি কিঞ্চিত্
ন চালযং বাপি নিরালযং বা ।
অশূন্যশূন্যং চ কথং বদামি
স্বরূপনির্বাণমনামযোঽহম্ ॥ ৪-৯॥
ন গ্রাহকো গ্রাহ্যকমেব কিঞ্চিত্
ন কারণং বা মম নৈব কার্যম্ ।
অচিন্ত্যচিন্ত্যং চ কথং বদামি
স্বরূপনির্বাণমনামযোঽহম্ ॥ ৪-১০॥
ন ভেদকং বাপি ন চৈব ভেদ্যং
ন বেদকং বা মম নৈব বেদ্যম্ ।
গতাগতং তাত কথং বদামি
স্বরূপনির্বাণমনামযোঽহম্ ॥ ৪-১১॥
ন চাস্তি দেহো ন চ মে বিদেহো
বুদ্ধির্মনো মে ন হি চেন্দ্রিযাণি ।
রাগো বিরাগশ্চ কথং বদামি
স্বরূপনির্বাণমনামযোঽহম্ ॥ ৪-১২॥
উল্লেখমাত্রং ন হি ভিন্নমুচ্চৈ-
রুল্লেখমাত্রং ন তিরোহিতং বৈ ।
সমাসমং মিত্র কথং বদামি
স্বরূপনির্বাণমনামযোঽহম্ ॥ ৪-১৩॥
জিতেন্দ্রিযোঽহং ত্বজিতেন্দ্রিযো বা
ন সংযমো মে নিযমো ন জাতঃ ।
জযাজযৌ মিত্র কথং বদামি
স্বরূপনির্বাণমনামযোঽহম্ ॥ ৪-১৪॥
অমূর্তমূর্তির্ন চ মে কদাচি-
দাদ্যন্তমধ্যং ন চ মে কদাচিত্ ।
বলাবলং মিত্র কথং বদামি
স্বরূপনির্বাণমনামযোঽহম্ ॥ ৪-১৫॥
মৃতামৃতং বাপি বিষাবিষং চ
সঞ্জাযতে তাত ন মে কদাচিত্ ।
অশুদ্ধশুদ্ধং চ কথং বদামি
স্বরূপনির্বাণমনামযোঽহম্ ॥ ৪-১৬॥
স্বপ্নঃ প্রবোধো ন চ যোগমুদ্রা
নক্তং দিবা বাপি ন মে কদাচিত্ ।
অতুর্যতুর্যং চ কথং বদামি
স্বরূপনির্বাণমনামযোঽহম্ ॥ ৪-১৭॥
সংবিদ্ধি মাং সর্ববিসর্বমুক্তং
মাযা বিমাযা ন চ মে কদাচিত্ ।
সন্ধ্যাদিকং কর্ম কথং বদামি
স্বরূপনির্বাণমনামযোঽহম্ ॥ ৪-১৮॥
সংবিদ্ধি মাং সর্বসমাধিযুক্তং
সংবিদ্ধি মাং লক্ষ্যবিলক্ষ্যমুক্তম্ ।
যোগং বিযোগং চ কথং বদামি
স্বরূপনির্বাণমনামযোঽহম্ ॥ ৪-১৯॥
মূর্খোঽপি নাহং ন চ পণ্ডিতোঽহং
মৌনং বিমৌনং ন চ মে কদাচিত্ ।
তর্কং বিতর্কং চ কথং বদামি
স্বরূপনির্বাণমনামযোঽহম্ ॥ ৪-২০॥
পিতা চ মাতা চ কুলং ন জাতি-
র্জন্মাদি মৃত্যুর্ন চ মে কদাচিত্ ।
স্নেহং বিমোহং চ কথং বদামি
স্বরূপনির্বাণমনামযোঽহম্ ॥ ৪-২১॥
অস্তং গতো নৈব সদোদিতোঽহং
তেজোবিতেজো ন চ মে কদাচিত্ ।
সন্ধ্যাদিকং কর্ম কথং বদামি
স্বরূপনির্বাণমনামযোঽহম্ ॥ ৪-২২॥
অসংশযং বিদ্ধি নিরাকুলং মাং
অসংশযং বিদ্ধি নিরন্তরং মাম্ ।
অসংশযং বিদ্ধি নিরঞ্জনং মাং
স্বরূপনির্বাণমনামযোঽহম্ ॥ ৪-২৩॥
ধ্যানানি সর্বাণি পরিত্যজন্তি
শুভাশুভং কর্ম পরিত্যজন্তি ।
ত্যাগামৃতং তাত পিবন্তি ধীরাঃ
স্বরূপনির্বাণমনামযোঽহম্ ॥ ৪-২৪॥
বিন্দতি বিন্দতি ন হি ন হি যত্র
ছন্দোলক্ষণং ন হি ন হি তত্র ।
সমরসমগ্নো ভাবিতপূতঃ
প্রলপতি তত্ত্বং পরমবধূতঃ ॥ ৪-২৫॥
অথ পঞ্চমোঽধ্যাযঃ
ওঁ ইতি গদিতং গগনসমং তত্
ন পরাপরসারবিচার ইতি ।
অবিলাসবিলাসনিরাকরণং
কথমক্ষরবিন্দুসমুচ্চরণম্ ॥ ৫-১॥
ইতি তত্ত্বমসিপ্রভৃতিশ্রুতিভিঃ
প্রতিপাদিতমাত্মনি তত্ত্বমসি ।
ত্বমুপাধিবিবর্জিতসর্বসমং
কিমু রোদিষি মানসি সর্বসমম্ ॥ ৫-২॥
অধ ঊর্ধ্ববিবর্জিতসর্বসমং
বহিরন্তরবর্জিতসর্বসমম্ ।
যদি চৈকবিবর্জিতসর্বসমং
কিমু রোদিষি মানসি সর্বসমম্ ॥ ৫-৩॥
ন হি কল্পিতকল্পবিচার ইতি
ন হি কারণকার্যবিচার ইতি ।
পদসন্ধিবিবর্জিতসর্বসমং
কিমু রোদিষি মানসি সর্বসমম্ ॥ ৫-৪॥
ন হি বোধবিবোধসমাধিরিতি
ন হি দেশবিদেশসমাধিরিতি ।
ন হি কালবিকালসমাধিরিতি
কিমু রোদিষি মানসি সর্বসমম্ ॥ ৫-৫॥
ন হি কুম্ভনভো ন হি কুম্ভ ইতি
ন হি জীববপুর্ন হি জীব ইতি ।
ন হি কারণকার্যবিভাগ ইতি
কিমু রোদিষি মানসি সর্বসমম্ ॥ ৫-৬॥
ইহ সর্বনিরন্তরমোক্ষপদং
লঘুদীর্ঘবিচারবিহীন ইতি ।
ন হি বর্তুলকোণবিভাগ ইতি
কিমু রোদিষি মানসি সর্বসমম্ ॥ ৫-৭॥
ইহ শূন্যবিশূন্যবিহীন ইতি
ইহ শুদ্ধবিশুদ্ধবিহীন ইতি ।
ইহ সর্ববিসর্ববিহীন ইতি
কিমু রোদিষি মানসি সর্বসমম্ ॥ ৫-৮॥
ন হি ভিন্নবিভিন্নবিচার ইতি
বহিরন্তরসন্ধিবিচার ইতি ।
অরিমিত্রবিবর্জিতসর্বসমং
কিমু রোদিষি মানসি সর্বসমম্ ॥ ৫-৯॥
ন হি শিষ্যবিশিষ্যস্বরূপ ইতি
ন চরাচরভেদবিচার ইতি ।
ইহ সর্বনিরন্তরমোক্ষপদং
কিমু রোদিষি মানসি সর্বসমম্ ॥ ৫-১০॥
ননু রূপবিরূপবিহীন ইতি
ননু ভিন্নবিভিন্নবিহীন ইতি ।
ননু সর্গবিসর্গবিহীন ইতি
কিমু রোদিষি মানসি সর্বসমম্ ॥ ৫-১১॥
ন গুণাগুণপাশনিবন্ধ ইতি
মৃতজীবনকর্ম করোমি কথম্ ।
ইতি শুদ্ধনিরঞ্জনসর্বসমং
কিমু রোদিষি মানসি সর্বসমম্ ॥ ৫-১২॥
ইহ ভাববিভাববিহীন ইতি
ইহ কামবিকামবিহীন ইতি ।
ইহ বোধতমং খলু মোক্ষসমং
কিমু রোদিষি মানসি সর্বসমম্ ॥ ৫-১৩॥
ইহ তত্ত্বনিরন্তরতত্ত্বমিতি
ন হি সন্ধিবিসন্ধিবিহীন ইতি ।
যদি সর্ববিবর্জিতসর্বসমং
কিমু রোদিষি মানসি সর্বসমম্ ॥ ৫-১৪॥
অনিকেতকুটী পরিবারসমং
ইহসঙ্গবিসঙ্গবিহীনপরম্ ।
ইহ বোধবিবোধবিহীনপরং
কিমু রোদিষি মানসি সর্বসমম্ ॥ ৫-১৫॥
অবিকারবিকারমসত্যমিতি
অবিলক্ষবিলক্ষমসত্যমিতি ।
যদি কেবলমাত্মনি সত্যমিতি
কিমু রোদিষি মানসি সর্বসমম্ ॥ ৫-১৬॥
ইহ সর্বসমং খলু জীব ইতি
ইহ সর্বনিরন্তরজীব ইতি ।
ইহ কেবলনিশ্চলজীব ইতি
কিমু রোদিষি মানসি সর্বসমম্ ॥ ৫-১৭॥
অবিবেকবিবেকমবোধ ইতি
অবিকল্পবিকল্পমবোধ ইতি ।
যদি চৈকনিরন্তরবোধ ইতি
কিমু রোদিষি মানসি সর্বসমম্ ॥ ৫-১৮॥
ন হি মোক্ষপদং ন হি বন্ধপদং
ন হি পুণ্যপদং ন হি পাপপদম্ ।
ন হি পূর্ণপদং ন হি রিক্তপদং
কিমু রোদিষি মানসি সর্বসমম্ ॥ ৫-১৯॥
যদি বর্ণবিবর্ণবিহীনসমং
যদি কারণকার্যবিহীনসমম্ ।
যদিভেদবিভেদবিহীনসমং
কিমু রোদিষি মানসি সর্বসমম্ ॥ ৫-২০॥
ইহ সর্বনিরন্তরসর্বচিতে
ইহ কেবলনিশ্চলসর্বচিতে ।
দ্বিপদাদিবিবর্জিতসর্বচিতে
কিমু রোদিষি মানসি সর্বসমম্ ॥ ৫-২১॥
অতিসর্বনিরন্তরসর্বগতং
অতিনির্মলনিশ্চলসর্বগতম্ ।
দিনরাত্রিবিবর্জিতসর্বগতং
কিমু রোদিষি মানসি সর্বসমম্ ॥ ৫-২২॥
ন হি বন্ধবিবন্ধসমাগমনং
ন হি যোগবিযোগসমাগমনম্ ।
ন হি তর্কবিতর্কসমাগমনং
কিমু রোদিষি মানসি সর্বসমম্ ॥ ৫-২৩॥
ইহ কালবিকালনিরাকরণং
অণুমাত্রকৃশানুনিরাকরণম্ ।
ন হি কেবলসত্যনিরাকরণং
কিমু রোদিষি মানসি সর্বসমম্ ॥ ৫-২৪॥
ইহ দেহবিদেহবিহীন ইতি
ননু স্বপ্নসুষুপ্তিবিহীনপরম্ ।
অভিধানবিধানবিহীনপরং
কিমু রোদিষি মানসি সর্বসমম্ ॥ ৫-২৫॥
গগনোপমশুদ্ধবিশালসমং
অতিসর্ববিবর্জিতসর্বসমম্ ।
গতসারবিসারবিকারসমং
কিমু রোদিষি মানসি সর্বসমম্ ॥ ৫-২৬॥
ইহ ধর্মবিধর্মবিরাগতর-
মিহ বস্তুবিবস্তুবিরাগতরম্ ।
ইহ কামবিকামবিরাগতরং
কিমু রোদিষি মানসি সর্বসমম্ ॥ ৫-২৭॥
সুখদুঃখবিবর্জিতসর্বসম-
মিহ শোকবিশোকবিহীনপরম্ ।
গুরুশিষ্যবিবর্জিততত্ত্বপরং
কিমু রোদিষি মানসি সর্বসমম্ ॥ ৫-২৮॥
ন কিলাঙ্কুরসারবিসার ইতি
ন চলাচলসাম্যবিসাম্যমিতি ।
অবিচারবিচারবিহীনমিতি
কিমু রোদিষি মানসি সর্বসমম্ ॥ ৫-২৯॥
ইহ সারসমুচ্চযসারমিতি ।
কথিতং নিজভাববিভেদ ইতি ।
বিষযে করণত্বমসত্যমিতি
কিমু রোদিষি মানসি সর্বসমম্ ॥ ৫-৩০॥
বহুধা শ্রুতযঃ প্রবদন্তি যতো
বিযদাদিরিদং মৃগতোযসমম্ ।
যদি চৈকনিরন্তরসর্বসমং
কিমু রোদিষি মানসি সর্বসমম্ ॥ ৫-৩১॥
বিন্দতি বিন্দতি ন হি ন হি যত্র
ছন্দোলক্ষণং ন হি ন হি তত্র ।
সমরসমগ্নো ভাবিতপূতঃ
প্রলপতি তত্ত্বং পরমবধূতঃ ॥ ৫-৩২॥
অথ ষষ্ঠমোঽধ্যাযঃ
বহুধা শ্রুতযঃ প্রবদন্তি বযং
বিযদাদিরিদং মৃগতোযসমম্ ।
যদি চৈকনিরন্তরসর্বশিব-
মুপমেযমথোহ্যুপমা চ কথম্ ॥ ৬-১॥
অবিভক্তিবিভক্তিবিহীনপরং
ননু কার্যবিকার্যবিহীনপরম্ ।
যদি চৈকনিরন্তরসর্বশিবং
যজনং চ কথং তপনং চ কথম্ ॥ ৬-২॥
মন এব নিরন্তরসর্বগতং
হ্যবিশালবিশালবিহীনপরম্ ।
মন এব নিরন্তরসর্বশিবং
মনসাপি কথং বচসা চ কথম্ ॥ ৬-৩॥
দিনরাত্রিবিভেদনিরাকরণ-
মুদিতানুদিতস্য নিরাকরণম্ ।
যদি চৈকনিরন্তরসর্বশিবং
রবিচন্দ্রমসৌ জ্বলনশ্চ কথম্ ॥ ৬-৪॥
গতকামবিকামবিভেদ ইতি
গতচেষ্টবিচেষ্টবিভেদ ইতি ।
যদি চৈকনিরন্তরসর্বশিবং
বহিরন্তরভিন্নমতিশ্চ কথম্ ॥ ৬-৫॥
যদি সারবিসারবিহীন ইতি
যদি শূন্যবিশূন্যবিহীন ইতি ।
যদি চৈকনিরন্তরসর্বশিবং
প্রথমং চ কথং চরমং চ কথম্ ॥ ৬-৬॥
যদিভেদবিভেদনিরাকরণং
যদি বেদকবেদ্যনিরাকরণম্ ।
যদি চৈকনিরন্তরসর্বশিবং
তৃতীযং চ কথং তুরীযং চ কথম্ ॥ ৬-৭॥
গদিতাবিদিতং ন হি সত্যমিতি
বিদিতাবিদিতং ন হি সত্যমিতি ।
যদি চৈকনিরন্তরসর্বশিবং
বিষযেন্দ্রিযবুদ্ধিমনাংসি কথম্ ॥ ৬-৮॥
গগনং পবনো ন হি সত্যমিতি
ধরণী দহনো ন হি সত্যমিতি ।
যদি চৈকনিরন্তরসর্বশিবং
জলদশ্চ কথং সলিলং চ কথম্ ॥ ৬-৯॥
যদি কল্পিতলোকনিরাকরণং
যদি কল্পিতদেবনিরাকরণম্ ।
যদি চৈকনিরন্তরসর্বশিবং
গুণদোষবিচারমতিশ্চ কথম্ ॥ ৬-১০॥
মরণামরণং হি নিরাকরণং
করণাকরণং হি নিরাকরণম্ ।
যদি চৈকনিরন্তরসর্বশিবং
গমনাগমনং হি কথং বদতি ॥ ৬-১১॥
প্রকৃতিঃ পুরুষো ন হি ভেদ ইতি
ন হি কারণকার্যবিভেদ ইতি ।
যদি চৈকনিরন্তরসর্বশিবং
পুরুষাপুরুষং চ কথং বদতি ॥ ৬-১২॥
তৃতীযং ন হি দুঃখসমাগমনং
ন গুণাদ্দ্বিতীযস্য সমাগমনম্ ।
যদি চৈকনিরন্তরসর্বশিবং
স্থবিরশ্চ যুবা চ শিশুশ্চ কথম্ ॥ ৬-১৩॥
ননু আশ্রমবর্ণবিহীনপরং
ননু কারণকর্তৃবিহীনপরম্ ।
যদি চৈকনিরন্তরসর্বশিব-
মবিনষ্টবিনষ্টমতিশ্চ কথম্ ॥ ৬-১৪॥
গ্রসিতাগ্রসিতং চ বিতথ্যমিতি
জনিতাজনিতং চ বিতথ্যমিতি ।
যদি চৈকনিরন্তরসর্বশিব-
মবিনাশি বিনাশি কথং হি ভবেত্ ॥ ৬-১৫॥
পুরুষাপুরুষস্য বিনষ্টমিতি
বনিতাবনিতস্য বিনষ্টমিতি ।
যদি চৈকনিরন্তরসর্বশিব-
মবিনোদবিনোদমতিশ্চ কথম্ ॥ ৬-১৬॥
যদি মোহবিষাদবিহীনপরো
যদি সংশযশোকবিহীনপরঃ ।
যদি চৈকনিরন্তরসর্বশিব-
মহমত্র মমেতি কথং চ পুনঃ ॥ ৬-১৭॥
মহমেতি
ননু ধর্মবিধর্মবিনাশ ইতি
ননু বন্ধবিবন্ধবিনাশ ইতি ।
যদি চৈকনিরন্তরসর্বশিবং-
মিহদুঃখবিদুঃখমতিশ্চ কথম্ ॥ ৬-১৮॥
ন হি যাজ্ঞিকযজ্ঞবিভাগ ইতি
ন হুতাশনবস্তুবিভাগ ইতি ।
যদি চৈকনিরন্তরসর্বশিবং
বদ কর্মফলানি ভবন্তি কথম্ ॥ ৬-১৯॥
ননু শোকবিশোকবিমুক্ত ইতি
ননু দর্পবিদর্পবিমুক্ত ইতি ।
যদি চৈকনিরন্তরসর্বশিবং
ননু রাগবিরাগমতিশ্চ কথম্ ॥ ৬-২০॥
ন হি মোহবিমোহবিকার ইতি
ন হি লোভবিলোভবিকার ইতি ।
যদি চৈকনিরন্তরসর্বশিবং
হ্যবিবেকবিবেকমতিশ্চ কথম্ ॥ ৬-২১॥
ত্বমহং ন হি হন্ত কদাচিদপি
কুলজাতিবিচারমসত্যমিতি ।
অহমেব শিবঃ পরমার্থ ইতি
অভিবাদনমত্র করোমি কথম্ ॥ ৬-২২॥
গুরুশিষ্যবিচারবিশীর্ণ ইতি
উপদেশবিচারবিশীর্ণ ইতি ।
অহমেব শিবঃ পরমার্থ ইতি
অভিবাদনমত্র করোমি কথম্ ॥ ৬-২৩॥
ন হি কল্পিতদেহবিভাগ ইতি
ন হি কল্পিতলোকবিভাগ ইতি ।
অহমেব শিবঃ পরমার্থ ইতি
অভিবাদনমত্র করোমি কথম্ ॥ ৬-২৪॥
সরজো বিরজো ন কদাচিদপি
ননু নির্মলনিশ্চলশুদ্ধ ইতি ।
অহমেব শিবঃ পরমার্থ ইতি
অভিবাদনমত্র করোমি কথম্ ॥ ৬-২৫॥
ন হি দেহবিদেহবিকল্প ইতি
অনৃতং চরিতং ন হি সত্যমিতি ।
অহমেব শিবঃ পরমার্থ ইতি
অভিবাদনমত্র করোমি কথম্ ॥ ৬-২৬॥
বিন্দতি বিন্দতি ন হি ন হি যত্র
ছন্দোলক্ষণং ন হি ন হি তত্র ।
সমরসমগ্নো ভাবিতপূতঃ
প্রলপতি তত্ত্বং পরমবধূতঃ ॥ ৬-২৭॥
অথ সপ্তমোঽধ্যাযঃ
রথ্যাকর্পটবিরচিতকন্থঃ
পুণ্যাপুণ্যবিবর্জিতপন্থঃ ।
শূন্যাগারে তিষ্ঠতি নগ্নো
শুদ্ধনিরঞ্জনসমরসমগ্নঃ ॥ ৭-১॥
লক্ষ্যালক্ষ্যবিবর্জিতলক্ষ্যো
যুক্তাযুক্তবিবর্জিতদক্ষঃ ।
কেবলতত্ত্বনিরঞ্জনপূতো
বাদবিবাদঃ কথমবধূতঃ ॥ ৭-২॥
আশাপাশবিবন্ধনমুক্তাঃ
শৌচাচারবিবর্জিতযুক্তাঃ ।
এবং সর্ববিবর্জিতশান্তা-
স্তত্ত্বং শুদ্ধনিরঞ্জনবন্তঃ ॥ ৭-৩॥
কথমিহ দেহবিদেহবিচারঃ
কথমিহ রাগবিরাগবিচারঃ ।
নির্মলনিশ্চলগগনাকারং
স্বযমিহ তত্ত্বং সহজাকারম্ ॥ ৭-৪॥
কথমিহ তত্ত্বং বিন্দতি যত্র
রূপমরূপং কথমিহ তত্র ।
গগনাকারঃ পরমো যত্র
বিষযীকরণং কথমিহ তত্র ॥ ৭-৫॥
গগনাকারনিরন্তরহংস-
স্তত্ত্ববিশুদ্ধনিরঞ্জনহংসঃ ।
এবং কথমিহ ভিন্নবিভিন্নং
বন্ধবিবন্ধবিকারবিভিন্নম্ ॥ ৭-৬॥
কেবলতত্ত্বনিরন্তরসর্বং
যোগবিযোগৌ কথমিহ গর্বম্ ।
এবং পরমনিরন্তরসর্ব-
মেবং কথমিহ সারবিসারম্ ॥ ৭-৭॥
কেবলতত্ত্বনিরঞ্জনসর্বং
গগনাকারনিরন্তরশুদ্ধম্ ।
এবং কথমিহ সঙ্গবিসঙ্গং
সত্যং কথমিহ রঙ্গবিরঙ্গম্ ॥ ৭-৮॥
যোগবিযোগৈ রহিতো যোগী
ভোগবিভোগৈ রহিতো ভোগী ।
এবং চরতি হি মন্দং মন্দং
মনসা কল্পিতসহজানন্দম্ ॥ ৭-৯॥
বোধবিবোধৈঃ সততং যুক্তো
দ্বৈতাদ্বৈতৈঃ কথমিহ মুক্তঃ ।
সহজো বিরজঃ কথমিহ যোগী
শুদ্ধনিরঞ্জনসমরসভোগী ॥ ৭-১০॥
ভগ্নাভগ্নবিবর্জিতভগ্নো
লগ্নালগ্নবিবর্জিতলগ্নঃ ।
এবং কথমিহ সারবিসারঃ
সমরসতত্ত্বং গগনাকারঃ ॥ ৭-১১॥
সততং সর্ববিবর্জিতযুক্তঃ
সর্বং তত্ত্ববিবর্জিতমুক্তঃ ।
এবং কথমিহ জীবিতমরণং
ধ্যানাধ্যানৈঃ কথমিহ করণম্ ॥ ৭-১২॥
ইন্দ্রজালমিদং সর্বং যথা মরুমরীচিকা ।
অখণ্ডিতমনাকারো বর্ততে কেবলঃ শিবঃ ॥ ৭-১৩॥
ধর্মাদৌ মোক্ষপর্যন্তং নিরীহাঃ সর্বথা বযম্ ।
কথং রাগবিরাগৈশ্চ কল্পযন্তি বিপশ্চিতঃ ॥ ৭-১৪॥
বিন্দতি বিন্দতি ন হি ন হি যত্র
ছন্দোলক্ষণং ন হি ন হি তত্র ।
সমরসমগ্নো ভাবিতপূতঃ
প্রলপতি তত্ত্বং পরমবধূতঃ ॥ ৭-১৫॥
অথ অষ্টমোঽধ্যাযঃ
ত্বদ্যাত্রযা ব্যাপকতা হতা তে
ধ্যানেন চেতঃপরতা হতা তে ।
স্তুত্যা মযা বাক্পরতা হতা তে
ক্ষমস্ব নিত্যং ত্রিবিধাপরাধান্ ॥ ৮-১॥
কামৈরহতধীর্দান্তো মৃদুঃ শুচিরকিঞ্চনঃ ।
অনীহো মিতভুক্ শান্তঃ স্থিরো মচ্ছরণো মুনিঃ ॥ ৮-২॥
অপ্রমত্তো গভীরাত্মা ধৃতিমান্ জিতষড্গুণঃ ।
অমানী মানদঃ কল্পো মৈত্রঃ কারুণিকঃ কবিঃ ॥ ৮-৩॥
কৃপালুরকৃতদ্রোহস্তিতিক্ষুঃ সর্বদেহিনাম্ ।
সত্যসারোঽনবদ্যাত্মা সমঃ সর্বোপকারকঃ ॥ ৮-৪॥
অবধূতলক্ষণং বর্ণৈর্জ্ঞাতব্যং ভগবত্তমৈঃ ।
বেদবর্ণার্থতত্ত্বজ্ঞৈর্বেদবেদান্তবাদিভিঃ ॥ ৮-৫॥
আশাপাশবিনির্মুক্ত আদিমধ্যান্তনির্মলঃ ।
আনন্দে বর্ততে নিত্যমকারং তস্য লক্ষণম্ ॥ ৮-৬॥
বাসনা বর্জিতা যেন বক্তব্যং চ নিরামযম্ ।
বর্তমানেষু বর্তেত বকারং তস্য লক্ষণম্ ॥ ৮-৭॥
ধূলিধূসরগাত্রাণি ধূতচিত্তো নিরামযঃ ।
ধারণাধ্যাননির্মুক্তো ধূকারস্তস্য লক্ষণম্ ॥ ৮-৮॥
তত্ত্বচিন্তা ধৃতা যেন চিন্তাচেষ্টাবিবর্জিতঃ ।
তমোঽহংকারনির্মুক্তস্তকারস্তস্য লক্ষণম্ ॥ ৮-৯॥
দত্তাত্রেযাবধূতেন নির্মিতানন্দরূপিণা ।
যে পঠন্তি চ শৃণ্বন্তি তেষাং নৈব পুনর্ভবঃ ॥ ৮-১০॥

More Brahman Stotras

ॐ भद्रं कर्णेभिः शृणुयाम
Bhadram Karne
भूगुर्वसिष्ठः क्रतुरंगिराश्च मनुः पुलस्त्यः
Bhugurvashista Kraturam
ब्रह्मज्ञानावलीमाला
Brahma Jnanavali Mala
श्री ब्रह्मसूत्राणि
Brahma Sutras
ब्रह्मार्पणं ब्रह्म
Brahmarpanam Brahma Havih
चित्ति पन्नम्
Chitti Pannam
दशश्लोकी न भूमिर्न तोयं
Dasa Shloki
द्वादश आदित्य ध्यान श्लोकाः (पाठान्तरम्)
Dvadasha Aditya Dhyana Shlokah (Pathantaram)
View All Veda & Upanishad Collection →

Explore More

Veda & Upanishad CollectionWealthObstaclesHealthProtectionWisdomHome