Brahman

ಅವಧೂತ ಗೀತಾ

(Avadhuta Gita in Kannada)

(ಈಶ್ವರಾನುಗ್ರಹಾದೇವ ಪುಂಸಾಮದ್ವೈತವಾಸನಾ)

Sage Dattatreya

Language:Sanskrit
Translation:English

1. Background of the TextThe Avadhuta Gita is a text of radical non-dualism (Advaita Vedānta). Unlike texts that employ a step-by-step pedagogical approach or those that debate opposing views, the Avadhuta Gita starts directly at the absolute summit.It completely bypasses dualistic concepts, ritualistic injunctions, and even traditional stages of meditation. Instead, it serves as a direct declaration of the nature of the Self (Ātman) as already free, unattached, and unstained by the world. It is traditionally studied by those who have already purified the mind and possess a strong intellectual grasp of Vedanta, serving as a means to plunge directly into direct experience.2.

Read In:
DevanagariGujaratiBengaliAssameseOdiaTeluguTamilKannadaMalayalamEnglish (IAST)
Reading depth
Lyrics
#of 271
ಅಥ ಪ್ರಥಮೋಽಧ್ಯಾಯಃ
ಈಶ್ವರಾನುಗ್ರಹಾದೇವ ಪುಂಸಾಮದ್ವೈತವಾಸನಾ ।
ಮಹದ್ಭಯಪರಿತ್ರಾಣಾದ್ವಿಪ್ರಾಣಾಮುಪಜಾಯತೇ ॥ ೧-೧॥
ಯೇನೇದಂ ಪೂರಿತಂ ಸರ್ವಮಾತ್ಮನೈವಾತ್ಮನಾತ್ಮನಿ ।
ನಿರಾಕಾರಂ ಕಥಂ ವನ್ದೇ ಹ್ಯಭಿನ್ನಂ ಶಿವಮವ್ಯಯಮ್ ॥ ೧-೨॥
ಪಞ್ಚಭೂತಾತ್ಮಕಂ ವಿಶ್ವಂ ಮರೀಚಿಜಲಸನ್ನಿಭಮ್ ।
ಕಸ್ಯಾಪ್ಯಹೋ ನಮಸ್ಕುರ್ಯಾಮಹಮೇಕೋ ನಿರಞ್ಜನಃ ॥ ೧-೩॥
ಆತ್ಮೈವ ಕೇವಲಂ ಸರ್ವಂ ಭೇದಾಭೇದೋ ನ ವಿದ್ಯತೇ ।
ಅಸ್ತಿ ನಾಸ್ತಿ ಕಥಂ ಬ್ರೂಯಾಂ ವಿಸ್ಮಯಃ ಪ್ರತಿಭಾತಿ ಮೇ ॥ ೧-೪॥
ವೇದಾನ್ತಸಾರಸರ್ವಸ್ವಂ ಜ್ಞಾನಂ ವಿಜ್ಞಾನಮೇವ ಚ ।
ಅಹಮಾತ್ಮಾ ನಿರಾಕಾರಃ ಸರ್ವವ್ಯಾಪೀ ಸ್ವಭಾವತಃ ॥ ೧-೫॥
ಯೋ ವೈ ಸರ್ವಾತ್ಮಕೋ ದೇವೋ ನಿಷ್ಕಲೋ ಗಗನೋಪಮಃ ।
ಸ್ವಭಾವನಿರ್ಮಲಃ ಶುದ್ಧಃ ಸ ಏವಾಯಂ ನ ಸಂಶಯಃ ॥ ೧-೬॥
ಅಹಮೇವಾವ್ಯಯೋಽನನ್ತಃ ಶುದ್ಧವಿಜ್ಞಾನವಿಗ್ರಹಃ ।
ಸುಖಂ ದುಃಖಂ ನ ಜಾನಾಮಿ ಕಥಂ ಕಸ್ಯಾಪಿ ವರ್ತತೇ ॥ ೧-೭॥
ನ ಮಾನಸಂ ಕರ್ಮ ಶುಭಾಶುಭಂ ಮೇ
ನ ಕಾಯಿಕಂ ಕರ್ಮ ಶುಭಾಶುಭಂ ಮೇ ।
ನ ವಾಚಿಕಂ ಕರ್ಮ ಶುಭಾಶುಭಂ ಮೇ
ಜ್ಞಾನಾಮೃತಂ ಶುದ್ಧಮತೀನ್ದ್ರಿಯೋಽಹಮ್ ॥ ೧-೮॥
ಮನೋ ವೈ ಗಗನಾಕಾರಂ ಮನೋ ವೈ ಸರ್ವತೋಮುಖಮ್ ।
ಮನೋಽತೀತಂ ಮನಃ ಸರ್ವಂ ನ ಮನಃ ಪರಮಾರ್ಥತಃ ॥ ೧-೯॥
ಅಹಮೇಕಮಿದಂ ಸರ್ವಂ ವ್ಯೋಮಾತೀತಂ ನಿರನ್ತರಮ್ ।
ಪಶ್ಯಾಮಿ ಕಥಮಾತ್ಮಾನಂ ಪ್ರತ್ಯಕ್ಷಂ ವಾ ತಿರೋಹಿತಮ್ ॥ ೧-೧೦॥
ತ್ವಮೇವಮೇಕಂ ಹಿ ಕಥಂ ನ ಬುಧ್ಯಸೇ
ಸಮಂ ಹಿ ಸರ್ವೇಷು ವಿಮೃಷ್ಟಮವ್ಯಯಮ್ ।
ಸದೋದಿತೋಽಸಿ ತ್ವಮಖಣ್ಡಿತಃ ಪ್ರಭೋ
ದಿವಾ ಚ ನಕ್ತಂ ಚ ಕಥಂ ಹಿ ಮನ್ಯಸೇ ॥ ೧-೧೧॥
ಆತ್ಮಾನಂ ಸತತಂ ವಿದ್ಧಿ ಸರ್ವತ್ರೈಕಂ ನಿರನ್ತರಮ್ ।
ಅಹಂ ಧ್ಯಾತಾ ಪರಂ ಧ್ಯೇಯಮಖಣ್ಡಂ ಖಣ್ಡ್ಯತೇ ಕಥಮ್ ॥ ೧-೧೨॥
ನ ಜಾತೋ ನ ಮೃತೋಽಸಿ ತ್ವಂ ನ ತೇ ದೇಹಃ ಕದಾಚನ ।
ಸರ್ವಂ ಬ್ರಹ್ಮೇತಿ ವಿಖ್ಯಾತಂ ಬ್ರವೀತಿ ಬಹುಧಾ ಶ್ರುತಿಃ ॥ ೧-೧೩॥
ಸ ಬಾಹ್ಯಾಭ್ಯನ್ತರೋಽಸಿ ತ್ವಂ ಶಿವಃ ಸರ್ವತ್ರ ಸರ್ವದಾ ।
ಇತಸ್ತತಃ ಕಥಂ ಭ್ರಾನ್ತಃ ಪ್ರಧಾವಸಿ ಪಿಶಾಚವತ್ ॥ ೧-೧೪॥
ಸಂಯೋಗಶ್ಚ ವಿಯೋಗಶ್ಚ ವರ್ತತೇ ನ ಚ ತೇ ನ ಮೇ ।
ನ ತ್ವಂ ನಾಹಂ ಜಗನ್ನೇದಂ ಸರ್ವಮಾತ್ಮೈವ ಕೇವಲಮ್ ॥ ೧-೧೫॥
ಶಬ್ದಾದಿಪಞ್ಚಕಸ್ಯಾಸ್ಯ ನೈವಾಸಿ ತ್ವಂ ನ ತೇ ಪುನಃ ।
ತ್ವಮೇವ ಪರಮಂ ತತ್ತ್ವಮತಃ ಕಿಂ ಪರಿತಪ್ಯಸೇ ॥ ೧-೧೬॥
ಜನ್ಮ ಮೃತ್ಯುರ್ನ ತೇ ಚಿತ್ತಂ ಬನ್ಧಮೋಕ್ಷೌ ಶುಭಾಶುಭೌ ।
ಕಥಂ ರೋದಿಷಿ ರೇ ವತ್ಸ ನಾಮರೂಪಂ ನ ತೇ ನ ಮೇ ॥ ೧-೧೭॥
ಅಹೋ ಚಿತ್ತ ಕಥಂ ಭ್ರಾನ್ತಃ ಪ್ರಧಾವಸಿ ಪಿಶಾಚವತ್ ।
ಅಭಿನ್ನಂ ಪಶ್ಯ ಚಾತ್ಮಾನಂ ರಾಗತ್ಯಾಗಾತ್ಸುಖೀ ಭವ ॥ ೧-೧೮॥
ತ್ವಮೇವ ತತ್ತ್ವಂ ಹಿ ವಿಕಾರವರ್ಜಿತಂ
ನಿಷ್ಕಮ್ಪಮೇಕಂ ಹಿ ವಿಮೋಕ್ಷವಿಗ್ರಹಮ್ ।
ನ ತೇ ಚ ರಾಗೋ ಹ್ಯಥವಾ ವಿರಾಗಃ
ಕಥಂ ಹಿ ಸನ್ತಪ್ಯಸಿ ಕಾಮಕಾಮತಃ ॥ ೧-೧೯॥
ವದನ್ತಿ ಶ್ರುತಯಃ ಸರ್ವಾಃ ನಿರ್ಗುಣಂ ಶುದ್ಧಮವ್ಯಯಮ್ ।
ಅಶರೀರಂ ಸಮಂ ತತ್ತ್ವಂ ತನ್ಮಾಂ ವಿದ್ಧಿ ನ ಸಂಶಯಃ ॥ ೧-೨೦॥
ಸಾಕಾರಮನೃತಂ ವಿದ್ಧಿ ನಿರಾಕಾರಂ ನಿರನ್ತರಮ್ ।
ಏತತ್ತತ್ತ್ವೋಪದೇಶೇನ ನ ಪುನರ್ಭವಸಮ್ಭವಃ ॥ ೧-೨೧॥
ಏಕಮೇವ ಸಮಂ ತತ್ತ್ವಂ ವದನ್ತಿ ಹಿ ವಿಪಶ್ಚಿತಃ ।
ರಾಗತ್ಯಾಗಾತ್ಪುನಶ್ಚಿತ್ತಮೇಕಾನೇಕಂ ನ ವಿದ್ಯತೇ ॥ ೧-೨೨॥
ಅನಾತ್ಮರೂಪಂ ಚ ಕಥಂ ಸಮಾಧಿ-
ರಾತ್ಮಸ್ವರೂಪಂ ಚ ಕಥಂ ಸಮಾಧಿಃ ।
ಅಸ್ತೀತಿ ನಾಸ್ತೀತಿ ಕಥಂ ಸಮಾಧಿ-
ರ್ಮೋಕ್ಷಸ್ವರೂಪಂ ಯದಿ ಸರ್ವಮೇಕಮ್ ॥ ೧-೨೩॥
ವಿಶುದ್ಧೋಽಸಿ ಸಮಂ ತತ್ತ್ವಂ ವಿದೇಹಸ್ತ್ವಮಜೋಽವ್ಯಯಃ ।
ಜಾನಾಮೀಹ ನ ಜಾನಾಮೀತ್ಯಾತ್ಮಾನಂ ಮನ್ಯಸೇ ಕಥಮ್ ॥ ೧-೨೪॥
ತತ್ತ್ವಮಸ್ಯಾದಿವಾಕ್ಯೇನ ಸ್ವಾತ್ಮಾ ಹಿ ಪ್ರತಿಪಾದಿತಃ ।
ನೇತಿ ನೇತಿ ಶ್ರುತಿರ್ಬ್ರೂಯಾದನೃತಂ ಪಾಞ್ಚಭೌತಿಕಮ್ ॥ ೧-೨೫॥
ಆತ್ಮನ್ಯೇವಾತ್ಮನಾ ಸರ್ವಂ ತ್ವಯಾ ಪೂರ್ಣಂ ನಿರನ್ತರಮ್ ।
ಧ್ಯಾತಾ ಧ್ಯಾನಂ ನ ತೇ ಚಿತ್ತಂ ನಿರ್ಲಜ್ಜಂ ಧ್ಯಾಯತೇ ಕಥಮ್ ॥ ೧-೨೬॥
ಶಿವಂ ನ ಜಾನಾಮಿ ಕಥಂ ವದಾಮಿ
ಶಿವಂ ನ ಜಾನಾಮಿ ಕಥಂ ಭಜಾಮಿ ।
ಅಹಂ ಶಿವಶ್ಚೇತ್ಪರಮಾರ್ಥತತ್ತ್ವಂ
ಸಮಸ್ವರೂಪಂ ಗಗನೋಪಮಂ ಚ ॥ ೧-೨೭॥
ನಾಹಂ ತತ್ತ್ವಂ ಸಮಂ ತತ್ತ್ವಂ ಕಲ್ಪನಾಹೇತುವರ್ಜಿತಮ್ ।
ಗ್ರಾಹ್ಯಗ್ರಾಹಕನಿರ್ಮುಕ್ತಂ ಸ್ವಸಂವೇದ್ಯಂ ಕಥಂ ಭವೇತ್ ॥ ೧-೨೮॥
ಅನನ್ತರೂಪಂ ನ ಹಿ ವಸ್ತು ಕಿಞ್ಚಿ-
ತ್ತತ್ತ್ವಸ್ವರೂಪಂ ನ ಹಿ ವಸ್ತು ಕಿಞ್ಚಿತ್ ।
ಆತ್ಮೈಕರೂಪಂ ಪರಮಾರ್ಥತತ್ತ್ವಂ
ನ ಹಿಂಸಕೋ ವಾಪಿ ನ ಚಾಪ್ಯಹಿಂಸಾ ॥ ೧-೨೯॥
ವಿಶುದ್ಧೋಽಸಿ ಸಮಂ ತತ್ತ್ವಂ ವಿದೇಹಮಜಮವ್ಯಯಮ್ ।
ವಿಭ್ರಮಂ ಕಥಮಾತ್ಮಾರ್ಥೇ ವಿಭ್ರಾನ್ತೋಽಹಂ ಕಥಂ ಪುನಃ ॥ ೧-೩೦॥
ಘಟೇ ಭಿನ್ನೇ ಘಟಾಕಾಶಂ ಸುಲೀನಂ ಭೇದವರ್ಜಿತಮ್ ।
ಶಿವೇನ ಮನಸಾ ಶುದ್ಧೋ ನ ಭೇದಃ ಪ್ರತಿಭಾತಿ ಮೇ ॥ ೧-೩೧॥
ನ ಘಟೋ ನ ಘಟಾಕಾಶೋ ನ ಜೀವೋ ಜೀವವಿಗ್ರಹಃ ।
ಕೇವಲಂ ಬ್ರಹ್ಮ ಸಂವಿದ್ಧಿ ವೇದ್ಯವೇದಕವರ್ಜಿತಮ್ ॥ ೧-೩೨॥
ಸರ್ವತ್ರ ಸರ್ವದಾ ಸರ್ವಮಾತ್ಮಾನಂ ಸತತಂ ಧ್ರುವಮ್ ।
ಸರ್ವಂ ಶೂನ್ಯಮಶೂನ್ಯಂ ಚ ತನ್ಮಾಂ ವಿದ್ಧಿ ನ ಸಂಶಯಃ ॥ ೧-೩೩॥
ವೇದಾ ನ ಲೋಕಾ ನ ಸುರಾ ನ ಯಜ್ಞಾ
ವರ್ಣಾಶ್ರಮೋ ನೈವ ಕುಲಂ ನ ಜಾತಿಃ ।
ನ ಧೂಮಮಾರ್ಗೋ ನ ಚ ದೀಪ್ತಿಮಾರ್ಗೋ
ಬ್ರಹ್ಮೈಕರೂಪಂ ಪರಮಾರ್ಥತತ್ತ್ವಮ್ ॥ ೧-೩೪॥
ವ್ಯಾಪ್ಯವ್ಯಾಪಕನಿರ್ಮುಕ್ತಃ ತ್ವಮೇಕಃ ಸಫಲಂ ಯದಿ ।
ಪ್ರತ್ಯಕ್ಷಂ ಚಾಪರೋಕ್ಷಂ ಚ ಹ್ಯಾತ್ಮಾನಂ ಮನ್ಯಸೇ ಕಥಮ್ ॥ ೧-೩೫॥
ಅದ್ವೈತಂ ಕೇಚಿದಿಚ್ಛನ್ತಿ ದ್ವೈತಮಿಚ್ಛನ್ತಿ ಚಾಪರೇ ।
ಸಮಂ ತತ್ತ್ವಂ ನ ವಿನ್ದನ್ತಿ ದ್ವೈತಾದ್ವೈತವಿವರ್ಜಿತಮ್ ॥ ೧-೩೬॥
ಶ್ವೇತಾದಿವರ್ಣರಹಿತಂ ಶಬ್ದಾದಿಗುಣವರ್ಜಿತಮ್ ।
ಕಥಯನ್ತಿ ಕಥಂ ತತ್ತ್ವಂ ಮನೋವಾಚಾಮಗೋಚರಮ್ ॥ ೧-೩೭॥
ಯದಾಽನೃತಮಿದಂ ಸರ್ವಂ ದೇಹಾದಿಗಗನೋಪಮಮ್ ।
ತದಾ ಹಿ ಬ್ರಹ್ಮ ಸಂವೇತ್ತಿ ನ ತೇ ದ್ವೈತಪರಮ್ಪರಾ ॥ ೧-೩೮॥
ಪರೇಣ ಸಹಜಾತ್ಮಾಪಿ ಹ್ಯಭಿನ್ನಃ ಪ್ರತಿಭಾತಿ ಮೇ ।
ವ್ಯೋಮಾಕಾರಂ ತಥೈವೈಕಂ ಧ್ಯಾತಾ ಧ್ಯಾನಂ ಕಥಂ ಭವೇತ್ ॥ ೧-೩೯॥
ಯತ್ಕರೋಮಿ ಯದಶ್ನಾಮಿ ಯಜ್ಜುಹೋಮಿ ದದಾಮಿ ಯತ್ ।
ಏತತ್ಸರ್ವಂ ನ ಮೇ ಕಿಞ್ಚಿದ್ವಿಶುದ್ಧೋಽಹಮಜೋಽವ್ಯಯಃ ॥ ೧-೪೦॥
ಸರ್ವಂ ಜಗದ್ವಿದ್ಧಿ ನಿರಾಕೃತೀದಂ
ಸರ್ವಂ ಜಗದ್ವಿದ್ಧಿ ವಿಕಾರಹೀನಮ್ ।
ಸರ್ವಂ ಜಗದ್ವಿದ್ಧಿ ವಿಶುದ್ಧದೇಹಂ
ಸರ್ವಂ ಜಗದ್ವಿದ್ಧಿ ಶಿವೈಕರೂಪಮ್ ॥ ೧-೪೧॥
ತತ್ತ್ವಂ ತ್ವಂ ನ ಹಿ ಸನ್ದೇಹಃ ಕಿಂ ಜಾನಾಮ್ಯಥವಾ ಪುನಃ ।
ಅಸಂವೇದ್ಯಂ ಸ್ವಸಂವೇದ್ಯಮಾತ್ಮಾನಂ ಮನ್ಯಸೇ ಕಥಮ್ ॥ ೧-೪೨॥
ಮಾಯಾಽಮಾಯಾ ಕಥಂ ತಾತ ಛಾಯಾಽಛಾಯಾ ನ ವಿದ್ಯತೇ ।
ತತ್ತ್ವಮೇಕಮಿದಂ ಸರ್ವಂ ವ್ಯೋಮಾಕಾರಂ ನಿರಞ್ಜನಮ್ ॥ ೧-೪೩॥
ಆದಿಮಧ್ಯಾನ್ತಮುಕ್ತೋಽಹಂ ನ ಬದ್ಧೋಽಹಂ ಕದಾಚನ ।
ಸ್ವಭಾವನಿರ್ಮಲಃ ಶುದ್ಧ ಇತಿ ಮೇ ನಿಶ್ಚಿತಾ ಮತಿಃ ॥ ೧-೪೪॥
ಮಹದಾದಿ ಜಗತ್ಸರ್ವಂ ನ ಕಿಞ್ಚಿತ್ಪ್ರತಿಭಾತಿ ಮೇ ।
ಬ್ರಹ್ಮೈವ ಕೇವಲಂ ಸರ್ವಂ ಕಥಂ ವರ್ಣಾಶ್ರಮಸ್ಥಿತಿಃ ॥ ೧-೪೫॥
ಜಾನಾಮಿ ಸರ್ವಥಾ ಸರ್ವಮಹಮೇಕೋ ನಿರನ್ತರಮ್ ।
ನಿರಾಲಮ್ಬಮಶೂನ್ಯಂ ಚ ಶೂನ್ಯಂ ವ್ಯೋಮಾದಿಪಞ್ಚಕಮ್ ॥ ೧-೪೬॥
ನ ಷಣ್ಢೋ ನ ಪುಮಾನ್ನ ಸ್ತ್ರೀ ನ ಬೋಧೋ ನೈವ ಕಲ್ಪನಾ ।
ಸಾನನ್ದೋ ವಾ ನಿರಾನನ್ದಮಾತ್ಮಾನಂ ಮನ್ಯಸೇ ಕಥಮ್ ॥ ೧-೪೭॥
ಷಡಙ್ಗಯೋಗಾನ್ನ ತು ನೈವ ಶುದ್ಧಂ
ಮನೋವಿನಾಶಾನ್ನ ತು ನೈವ ಶುದ್ಧಮ್ ।
ಗುರೂಪದೇಶಾನ್ನ ತು ನೈವ ಶುದ್ಧಂ
ಸ್ವಯಂ ಚ ತತ್ತ್ವಂ ಸ್ವಯಮೇವ ಬುದ್ಧಮ್ ॥ ೧-೪೮॥
ನ ಹಿ ಪಞ್ಚಾತ್ಮಕೋ ದೇಹೋ ವಿದೇಹೋ ವರ್ತತೇ ನ ಹಿ ।
ಆತ್ಮೈವ ಕೇವಲಂ ಸರ್ವಂ ತುರೀಯಂ ಚ ತ್ರಯಂ ಕಥಮ್ ॥ ೧-೪೯॥
ನ ಬದ್ಧೋ ನೈವ ಮುಕ್ತೋಽಹಂ ನ ಚಾಹಂ ಬ್ರಹ್ಮಣಃ ಪೃಥಕ್ ।
ನ ಕರ್ತಾ ನ ಚ ಭೋಕ್ತಾಹಂ ವ್ಯಾಪ್ಯವ್ಯಾಪಕವರ್ಜಿತಃ ॥ ೧-೫೦॥
ಯಥಾ ಜಲಂ ಜಲೇ ನ್ಯಸ್ತಂ ಸಲಿಲಂ ಭೇದವರ್ಜಿತಮ್ ।
ಪ್ರಕೃತಿಂ ಪುರುಷಂ ತದ್ವದಭಿನ್ನಂ ಪ್ರತಿಭಾತಿ ಮೇ ॥ ೧-೫೧॥
ಯದಿ ನಾಮ ನ ಮುಕ್ತೋಽಸಿ ನ ಬದ್ಧೋಽಸಿ ಕದಾಚನ ।
ಸಾಕಾರಂ ಚ ನಿರಾಕಾರಮಾತ್ಮಾನಂ ಮನ್ಯಸೇ ಕಥಮ್ ॥ ೧-೫೨॥
ಜಾನಾಮಿ ತೇ ಪರಂ ರೂಪಂ ಪ್ರತ್ಯಕ್ಷಂ ಗಗನೋಪಮಮ್ ।
ಯಥಾ ಪರಂ ಹಿ ರೂಪಂ ಯನ್ಮರೀಚಿಜಲಸನ್ನಿಭಮ್ ॥ ೧-೫೩॥
ನ ಗುರುರ್ನೋಪದೇಶಶ್ಚ ನ ಚೋಪಾಧಿರ್ನ ಮೇ ಕ್ರಿಯಾ ।
ವಿದೇಹಂ ಗಗನಂ ವಿದ್ಧಿ ವಿಶುದ್ಧೋಽಹಂ ಸ್ವಭಾವತಃ ॥ ೧-೫೪॥
ವಿಶುದ್ಧೋಽಸ್ಯ ಶರೀರೋಽಸಿ ನ ತೇ ಚಿತ್ತಂ ಪರಾತ್ಪರಮ್ ।
ಅಹಂ ಚಾತ್ಮಾ ಪರಂ ತತ್ತ್ವಮಿತಿ ವಕ್ತುಂ ನ ಲಜ್ಜಸೇ ॥ ೧-೫೫॥
ಕಥಂ ರೋದಿಷಿ ರೇ ಚಿತ್ತ ಹ್ಯಾತ್ಮೈವಾತ್ಮಾತ್ಮನಾ ಭವ ।
ಪಿಬ ವತ್ಸ ಕಲಾತೀತಮದ್ವೈತಂ ಪರಮಾಮೃತಮ್ ॥ ೧-೫೬॥
ನೈವ ಬೋಧೋ ನ ಚಾಬೋಧೋ ನ ಬೋಧಾಬೋಧ ಏವ ಚ ।
ಯಸ್ಯೇದೃಶಃ ಸದಾ ಬೋಧಃ ಸ ಬೋಧೋ ನಾನ್ಯಥಾ ಭವೇತ್ ॥ ೧-೫೭॥
ಜ್ಞಾನಂ ನ ತರ್ಕೋ ನ ಸಮಾಧಿಯೋಗೋ
ನ ದೇಶಕಾಲೌ ನ ಗುರೂಪದೇಶಃ ।
ಸ್ವಭಾವಸಂವಿತ್ತರಹಂ ಚ ತತ್ತ್ವ-
ಮಾಕಾಶಕಲ್ಪಂ ಸಹಜಂ ಧ್ರುವಂ ಚ ॥ ೧-೫೮॥
ನ ಜಾತೋಽಹಂ ಮೃತೋ ವಾಪಿ ನ ಮೇ ಕರ್ಮ ಶುಭಾಶುಭಮ್ ।
ವಿಶುದ್ಧಂ ನಿರ್ಗುಣಂ ಬ್ರಹ್ಮ ಬನ್ಧೋ ಮುಕ್ತಿಃ ಕಥಂ ಮಮ ॥ ೧-೫೯॥
ಯದಿ ಸರ್ವಗತೋ ದೇವಃ ಸ್ಥಿರಃ ಪೂರ್ಣೋ ನಿರನ್ತರಃ ।
ಅನ್ತರಂ ಹಿ ನ ಪಶ್ಯಾಮಿ ಸ ಬಾಹ್ಯಾಭ್ಯನ್ತರಃ ಕಥಮ್ ॥ ೧-೬೦॥
ಸ್ಫುರತ್ಯೇವ ಜಗತ್ಕೃತ್ಸ್ನಮಖಣ್ಡಿತನಿರನ್ತರಮ್ ।
ಅಹೋ ಮಾಯಾಮಹಾಮೋಹೋ ದ್ವೈತಾದ್ವೈತವಿಕಲ್ಪನಾ ॥ ೧-೬೧॥
ಸಾಕಾರಂ ಚ ನಿರಾಕಾರಂ ನೇತಿ ನೇತೀತಿ ಸರ್ವದಾ ।
ಭೇದಾಭೇದವಿನಿರ್ಮುಕ್ತೋ ವರ್ತತೇ ಕೇವಲಃ ಶಿವಃ ॥ ೧-೬೨॥
ನ ತೇ ಚ ಮಾತಾ ಚ ಪಿತಾ ಚ ಬನ್ಧುಃ
ನ ತೇ ಚ ಪತ್ನೀ ನ ಸುತಶ್ಚ ಮಿತ್ರಮ್ ।
ನ ಪಕ್ಷಪಾತೀ ನ ವಿಪಕ್ಷಪಾತಃ
ಕಥಂ ಹಿ ಸನ್ತಪ್ತಿರಿಯಂ ಹಿ ಚಿತ್ತೇ ॥ ೧-೬೩॥
ದಿವಾ ನಕ್ತಂ ನ ತೇ ಚಿತ್ತಂ ಉದಯಾಸ್ತಮಯೌ ನ ಹಿ ।
ವಿದೇಹಸ್ಯ ಶರೀರತ್ವಂ ಕಲ್ಪಯನ್ತಿ ಕಥಂ ಬುಧಾಃ ॥ ೧-೬೪॥
ನಾವಿಭಕ್ತಂ ವಿಭಕ್ತಂ ಚ ನ ಹಿ ದುಃಖಸುಖಾದಿ ಚ ।
ನ ಹಿ ಸರ್ವಮಸರ್ವಂ ಚ ವಿದ್ಧಿ ಚಾತ್ಮಾನಮವ್ಯಯಮ್ ॥ ೧-೬೫॥
ನಾಹಂ ಕರ್ತಾ ನ ಭೋಕ್ತಾ ಚ ನ ಮೇ ಕರ್ಮ ಪುರಾಽಧುನಾ ।
ನ ಮೇ ದೇಹೋ ವಿದೇಹೋ ವಾ ನಿರ್ಮಮೇತಿ ಮಮೇತಿ ಕಿಮ್ ॥ ೧-೬೬॥
ನ ಮೇ ರಾಗಾದಿಕೋ ದೋಷೋ ದುಃಖಂ ದೇಹಾದಿಕಂ ನ ಮೇ ।
ಆತ್ಮಾನಂ ವಿದ್ಧಿ ಮಾಮೇಕಂ ವಿಶಾಲಂ ಗಗನೋಪಮಮ್ ॥ ೧-೬೭॥
ಸಖೇ ಮನಃ ಕಿಂ ಬಹುಜಲ್ಪಿತೇನ
ಸಖೇ ಮನಃ ಸರ್ವಮಿದಂ ವಿತರ್ಕ್ಯಮ್ ।
ಯತ್ಸಾರಭೂತಂ ಕಥಿತಂ ಮಯಾ ತೇ
ತ್ವಮೇವ ತತ್ತ್ವಂ ಗಗನೋಪಮೋಽಸಿ ॥ ೧-೬೮॥
ಯೇನ ಕೇನಾಪಿ ಭಾವೇನ ಯತ್ರ ಕುತ್ರ ಮೃತಾ ಅಪಿ ।
ಯೋಗಿನಸ್ತತ್ರ ಲೀಯನ್ತೇ ಘಟಾಕಾಶಮಿವಾಮ್ಬರೇ ॥ ೧-೬೯॥
ತೀರ್ಥೇ ಚಾನ್ತ್ಯಜಗೇಹೇ ವಾ ನಷ್ಟಸ್ಮೃತಿರಪಿ ತ್ಯಜನ್ ।
ಸಮಕಾಲೇ ತನುಂ ಮುಕ್ತಃ ಕೈವಲ್ಯವ್ಯಾಪಕೋ ಭವೇತ್ ॥ ೧-೭೦॥
ಧರ್ಮಾರ್ಥಕಾಮಮೋಕ್ಷಾಂಶ್ಚ ದ್ವಿಪದಾದಿಚರಾಚರಮ್ ।
ಮನ್ಯನ್ತೇ ಯೋಗಿನಃ ಸರ್ವಂ ಮರೀಚಿಜಲಸನ್ನಿಭಮ್ ॥ ೧-೭೧॥
ಅತೀತಾನಾಗತಂ ಕರ್ಮ ವರ್ತಮಾನಂ ತಥೈವ ಚ ।
ನ ಕರೋಮಿ ನ ಭುಞ್ಜಾಮಿ ಇತಿ ಮೇ ನಿಶ್ಚಲಾ ಮತಿಃ ॥ ೧-೭೨॥
ಶೂನ್ಯಾಗಾರೇ ಸಮರಸಪೂತ-
ಸ್ತಿಷ್ಠನ್ನೇಕಃ ಸುಖಮವಧೂತಃ ।
ಚರತಿ ಹಿ ನಗ್ನಸ್ತ್ಯಕ್ತ್ವಾ ಗರ್ವಂ
ವಿನ್ದತಿ ಕೇವಲಮಾತ್ಮನಿ ಸರ್ವಮ್ ॥ ೧-೭೩॥
ತ್ರಿತಯತುರೀಯಂ ನ ಹಿ ನಹಿ ಯತ್ರ
ವಿನ್ದತಿ ಕೇವಲಮಾತ್ಮನಿ ತತ್ರ ।
ಧರ್ಮಾಧರ್ಮೌ ನ ಹಿ ನಹಿ ಯತ್ರ
ಬದ್ಧೋ ಮುಕ್ತಃ ಕಥಮಿಹ ತತ್ರ ॥ ೧-೭೪॥
ವಿನ್ದತಿ ವಿನ್ದತಿ ನ ಹಿ ನಹಿ ಮನ್ತ್ರಂ
ಛನ್ದೋಲಕ್ಷಣಂ ನ ಹಿ ನಹಿ ತನ್ತ್ರಮ್ ।
ಸಮರಸಮಗ್ನೋ ಭಾವಿತಪೂತಃ
ಪ್ರಲಪಿತಮೇತತ್ಪರಮವಧೂತಃ ॥ ೧-೭೫॥
ಸರ್ವಶೂನ್ಯಮಶೂನ್ಯಂ ಚ ಸತ್ಯಾಸತ್ಯಂ ನ ವಿದ್ಯತೇ ।
ಸ್ವಭಾವಭಾವತಃ ಪ್ರೋಕ್ತಂ ಶಾಸ್ತ್ರಸಂವಿತ್ತಿಪೂರ್ವಕಮ್ ॥ ೧-೭೬॥
ಅಥ ದ್ವಿತೀಯೋಽಧ್ಯಾಯಃ
ಬಾಲಸ್ಯ ವಾ ವಿಷಯಭೋಗರತಸ್ಯ ವಾಪಿ
ಮೂರ್ಖಸ್ಯ ಸೇವಕಜನಸ್ಯ ಗೃಹಸ್ಥಿತಸ್ಯ ।
ಏತದ್ಗುರೋಃ ಕಿಮಪಿ ನೈವ ನ ಚಿನ್ತನೀಯಂ
ರತ್ನಂ ಕಥಂ ತ್ಯಜತಿ ಕೋಽಪ್ಯಶುಚೌ ಪ್ರವಿಷ್ಟಮ್ ॥ ೨-೧॥
ನೈವಾತ್ರ ಕಾವ್ಯಗುಣ ಏವ ತು ಚಿನ್ತನೀಯೋ
ಗ್ರಾಹ್ಯಃ ಪರಂ ಗುಣವತಾ ಖಲು ಸಾರ ಏವ ।
ಸಿನ್ದೂರಚಿತ್ರರಹಿತಾ ಭುವಿ ರೂಪಶೂನ್ಯಾ
ಪಾರಂ ನ ಕಿಂ ನಯತಿ ನೌರಿಹ ಗನ್ತುಕಾಮಾನ್ ॥ ೨-೨॥
ಪ್ರಯತ್ನೇನ ವಿನಾ ಯೇನ ನಿಶ್ಚಲೇನ ಚಲಾಚಲಮ್ ।
ಗ್ರಸ್ತಂ ಸ್ವಭಾವತಃ ಶಾನ್ತಂ ಚೈತನ್ಯಂ ಗಗನೋಪಮಮ್ ॥ ೨-೩॥
ಅಯತ್ನಾಛಾಲಯೇದ್ಯಸ್ತು ಏಕಮೇವ ಚರಾಚರಮ್ ।
ಸರ್ವಗಂ ತತ್ಕಥಂ ಭಿನ್ನಮದ್ವೈತಂ ವರ್ತತೇ ಮಮ ॥ ೨-೪॥
ಅಹಮೇವ ಪರಂ ಯಸ್ಮಾತ್ಸಾರಾತ್ಸಾರತರಂ ಶಿವಮ್ ।
ಗಮಾಗಮವಿನಿರ್ಮುಕ್ತಂ ನಿರ್ವಿಕಲ್ಪಂ ನಿರಾಕುಲಮ್ ॥ ೨-೫॥
ಸರ್ವಾವಯವನಿರ್ಮುಕ್ತಂ ತಥಾಹಂ ತ್ರಿದಶಾರ್ಚಿತಮ್ ।
ಸಮ್ಪೂರ್ಣತ್ವಾನ್ನ ಗೃಹ್ಣಾಮಿ ವಿಭಾಗಂ ತ್ರಿದಶಾದಿಕಮ್ ॥ ೨-೬॥
ಪ್ರಮಾದೇನ ನ ಸನ್ದೇಹಃ ಕಿಂ ಕರಿಷ್ಯಾಮಿ ವೃತ್ತಿಮಾನ್ ।
ಉತ್ಪದ್ಯನ್ತೇ ವಿಲೀಯನ್ತೇ ಬುದ್ಬುದಾಶ್ಚ ಯಥಾ ಜಲೇ ॥ ೨-೭॥
ಮಹದಾದೀನಿ ಭೂತಾನಿ ಸಮಾಪ್ಯೈವಂ ಸದೈವ ಹಿ ।
ಮೃದುದ್ರವ್ಯೇಷು ತೀಕ್ಷ್ಣೇಷು ಗುಡೇಷು ಕಟುಕೇಷು ಚ ॥ ೨-೮॥
ಕಟುತ್ವಂ ಚೈವ ಶೈತ್ಯತ್ವಂ ಮೃದುತ್ವಂ ಚ ಯಥಾ ಜಲೇ ।
ಪ್ರಕೃತಿಃ ಪುರುಷಸ್ತದ್ವದಭಿನ್ನಂ ಪ್ರತಿಭಾತಿ ಮೇ ॥ ೨-೯॥
ಸರ್ವಾಖ್ಯಾರಹಿತಂ ಯದ್ಯತ್ಸೂಕ್ಷ್ಮಾತ್ಸೂಕ್ಷ್ಮತರಂ ಪರಮ್ ।
ಮನೋಬುದ್ಧೀನ್ದ್ರಿಯಾತೀತಮಕಲಙ್ಕಂ ಜಗತ್ಪತಿಮ್ ॥ ೨-೧೦॥
ಈದೃಶಂ ಸಹಜಂ ಯತ್ರ ಅಹಂ ತತ್ರ ಕಥಂ ಭವೇತ್ ।
ತ್ವಮೇವ ಹಿ ಕಥಂ ತತ್ರ ಕಥಂ ತತ್ರ ಚರಾಚರಮ್ ॥ ೨-೧೧॥
ಗಗನೋಪಮಂ ತು ಯತ್ಪ್ರೋಕ್ತಂ ತದೇವ ಗಗನೋಪಮಮ್ ।
ಚೈತನ್ಯಂ ದೋಷಹೀನಂ ಚ ಸರ್ವಜ್ಞಂ ಪೂರ್ಣಮೇವ ಚ ॥ ೨-೧೨॥
ಪೃಥಿವ್ಯಾಂ ಚರಿತಂ ನೈವ ಮಾರುತೇನ ಚ ವಾಹಿತಮ್ ।
ವರಿಣಾ ಪಿಹಿತಂ ನೈವ ತೇಜೋಮಧ್ಯೇ ವ್ಯವಸ್ಥಿತಮ್ ॥ ೨-೧೩॥
ಆಕಾಶಂ ತೇನ ಸಂವ್ಯಾಪ್ತಂ ನ ತದ್ವ್ಯಾಪ್ತಂ ಚ ಕೇನಚಿತ್ ।
ಸ ಬಾಹ್ಯಾಭ್ಯನ್ತರಂ ತಿಷ್ಠತ್ಯವಚ್ಛಿನ್ನಂ ನಿರನ್ತರಮ್ ॥ ೨-೧೪॥
ಸೂಕ್ಷ್ಮತ್ವಾತ್ತದದೃಶ್ಯತ್ವಾನ್ನಿರ್ಗುಣತ್ವಾಚ್ಚ ಯೋಗಿಭಿಃ ।
ಆಲಮ್ಬನಾದಿ ಯತ್ಪ್ರೋಕ್ತಂ ಕ್ರಮಾದಾಲಮ್ಬನಂ ಭವೇತ್ ॥ ೨-೧೫॥
ಸತತಾಽಭ್ಯಾಸಯುಕ್ತಸ್ತು ನಿರಾಲಮ್ಬೋ ಯದಾ ಭವೇತ್ ।
ತಲ್ಲಯಾಲ್ಲೀಯತೇ ನಾನ್ತರ್ಗುಣದೋಷವಿವರ್ಜಿತಃ ॥ ೨-೧೬॥
ವಿಷವಿಶ್ವಸ್ಯ ರೌದ್ರಸ್ಯ ಮೋಹಮೂರ್ಚ್ಛಾಪ್ರದಸ್ಯ ಚ ।
ಏಕಮೇವ ವಿನಾಶಾಯ ಹ್ಯಮೋಘಂ ಸಹಜಾಮೃತಮ್ ॥ ೨-೧೭॥
ಭಾವಗಮ್ಯಂ ನಿರಾಕಾರಂ ಸಾಕಾರಂ ದೃಷ್ಟಿಗೋಚರಮ್ ।
ಭಾವಾಭಾವವಿನಿರ್ಮುಕ್ತಮನ್ತರಾಲಂ ತದುಚ್ಯತೇ ॥ ೨-೧೮॥
ಬಾಹ್ಯಭಾವಂ ಭವೇದ್ವಿಶ್ವಮನ್ತಃ ಪ್ರಕೃತಿರುಚ್ಯತೇ ।
ಅನ್ತರಾದನ್ತರಂ ಜ್ಞೇಯಂ ನಾರಿಕೇಲಫಲಾಮ್ಬುವತ್ ॥ ೨-೧೯॥
ಭ್ರಾನ್ತಿಜ್ಞಾನಂ ಸ್ಥಿತಂ ಬಾಹ್ಯಂ ಸಮ್ಯಗ್ಜ್ಞಾನಂ ಚ ಮಧ್ಯಗಮ್ ।
ಮಧ್ಯಾನ್ಮಧ್ಯತರಂ ಜ್ಞೇಯಂ ನಾರಿಕೇಲಫಲಾಮ್ಬುವತ್ ॥ ೨-೨೦॥
ಪೌರ್ಣಮಾಸ್ಯಾಂ ಯಥಾ ಚನ್ದ್ರ ಏಕ ಏವಾತಿನಿರ್ಮಲಃ ।
ತೇನ ತತ್ಸದೃಶಂ ಪಶ್ಯೇದ್ದ್ವಿಧಾದೃಷ್ಟಿರ್ವಿಪರ್ಯಯಃ ॥ ೨-೨೧॥
ಅನೇನೈವ ಪ್ರಕಾರೇಣ ಬುದ್ಧಿಭೇದೋ ನ ಸರ್ವಗಃ ।
ದಾತಾ ಚ ಧೀರತಾಮೇತಿ ಗೀಯತೇ ನಾಮಕೋಟಿಭಿಃ ॥ ೨-೨೨॥
ಗುರುಪ್ರಜ್ಞಾಪ್ರಸಾದೇನ ಮೂರ್ಖೋ ವಾ ಯದಿ ಪಣ್ಡಿತಃ ।
ಯಸ್ತು ಸಮ್ಬುಧ್ಯತೇ ತತ್ತ್ವಂ ವಿರಕ್ತೋ ಭವಸಾಗರಾತ್ ॥ ೨-೨೩॥
ರಾಗದ್ವೇಷವಿನಿರ್ಮುಕ್ತಃ ಸರ್ವಭೂತಹಿತೇ ರತಃ ।
ದೃಢಬೋಧಶ್ಚ ಧೀರಶ್ಚ ಸ ಗಚ್ಛೇತ್ಪರಮಂ ಪದಮ್ ॥ ೨-೨೪॥
ಘಟೇ ಭಿನ್ನೇ ಘಟಾಕಾಶ ಆಕಾಶೇ ಲೀಯತೇ ಯಥಾ ।
ದೇಹಾಭಾವೇ ತಥಾ ಯೋಗೀ ಸ್ವರೂಪೇ ಪರಮಾತ್ಮನಿ ॥ ೨-೨೫॥
ಉಕ್ತೇಯಂ ಕರ್ಮಯುಕ್ತಾನಾಂ ಮತಿರ್ಯಾನ್ತೇಽಪಿ ಸಾ ಗತಿಃ ।
ನ ಚೋಕ್ತಾ ಯೋಗಯುಕ್ತಾನಾಂ ಮತಿರ್ಯಾನ್ತೇಽಪಿ ಸಾ ಗತಿಃ ॥ ೨-೨೬॥
ಯಾ ಗತಿಃ ಕರ್ಮಯುಕ್ತಾನಾಂ ಸಾ ಚ ವಾಗಿನ್ದ್ರಿಯಾದ್ವದೇತ್ ।
ಯೋಗಿನಾಂ ಯಾ ಗತಿಃ ಕ್ವಾಪಿ ಹ್ಯಕಥ್ಯಾ ಭವತೋರ್ಜಿತಾ ॥ ೨-೨೭॥
ಏವಂ ಜ್ಞಾತ್ವಾ ತ್ವಮುಂ ಮಾರ್ಗಂ ಯೋಗಿನಾಂ ನೈವ ಕಲ್ಪಿತಮ್ ।
ವಿಕಲ್ಪವರ್ಜನಂ ತೇಷಾಂ ಸ್ವಯಂ ಸಿದ್ಧಿಃ ಪ್ರವರ್ತತೇ ॥ ೨-೨೮॥
ತೀರ್ಥೇ ವಾನ್ತ್ಯಜಗೇಹೇ ವಾ ಯತ್ರ ಕುತ್ರ ಮೃತೋಽಪಿ ವಾ ।
ನ ಯೋಗೀ ಪಶ್ಯತೇ ಗರ್ಭಂ ಪರೇ ಬ್ರಹ್ಮಣಿ ಲೀಯತೇ ॥ ೨-೨೯॥
ಸಹಜಮಜಮಚಿನ್ತ್ಯಂ ಯಸ್ತು ಪಶ್ಯೇತ್ಸ್ವರೂಪಂ
ಘಟತಿ ಯದಿ ಯಥೇಷ್ಟಂ ಲಿಪ್ಯತೇ ನೈವ ದೋಷೈಃ ।
ಸಕೃದಪಿ ತದಭಾವಾತ್ಕರ್ಮ ಕಿಞ್ಚಿನ್ನಕುರ್ಯಾತ್
ತದಪಿ ನ ಚ ವಿಬದ್ಧಃ ಸಂಯಮೀ ವಾ ತಪಸ್ವೀ ॥ ೨-೩೦॥
ನಿರಾಮಯಂ ನಿಷ್ಪ್ರತಿಮಂ ನಿರಾಕೃತಿಂ
ನಿರಾಶ್ರಯಂ ನಿರ್ವಪುಷಂ ನಿರಾಶಿಷಮ್ ।
ನಿರ್ದ್ವನ್ದ್ವನಿರ್ಮೋಹಮಲುಪ್ತಶಕ್ತಿಕಂ
ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೧॥
ವೇದೋ ನ ದೀಕ್ಷಾ ನ ಚ ಮುಣ್ಡನಕ್ರಿಯಾ
ಗುರುರ್ನ ಶಿಷ್ಯೋ ನ ಚ ಯನ್ತ್ರಸಮ್ಪದಃ ।
ಮುದ್ರಾದಿಕಂ ಚಾಪಿ ನ ಯತ್ರ ಭಾಸತೇ
ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೨॥
ನ ಶಾಮ್ಭವಂ ಶಾಕ್ತಿಕಮಾನವಂ ನ ವಾ
ಪಿಣ್ಡಂ ಚ ರೂಪಂ ಚ ಪದಾದಿಕಂ ನ ವಾ ।
ಆರಮ್ಭನಿಷ್ಪತ್ತಿಘಟಾದಿಕಂ ಚ ನೋ
ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೩॥
ಯಸ್ಯ ಸ್ವರೂಪಾತ್ಸಚರಾಚರಂ ಜಗ-
ದುತ್ಪದ್ಯತೇ ತಿಷ್ಠತಿ ಲೀಯತೇಽಪಿ ವಾ ।
ಪಯೋವಿಕಾರಾದಿವ ಫೇನಬುದ್ಬುದಾ-
ಸ್ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೪॥
ನಾಸಾನಿರೋಧೋ ನ ಚ ದೃಷ್ಟಿರಾಸನಂ
ಬೋಧೋಽಪ್ಯಬೋಧೋಽಪಿ ನ ಯತ್ರ ಭಾಸತೇ ।
ನಾಡೀಪ್ರಚಾರೋಽಪಿ ನ ಯತ್ರ ಕಿಞ್ಚಿ-
ತ್ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೫॥
ನಾನಾತ್ವಮೇಕತ್ವಮುಭತ್ವಮನ್ಯತಾ
ಅಣುತ್ವದೀರ್ಘತ್ವಮಹತ್ತ್ವಶೂನ್ಯತಾ ।
ಮಾನತ್ವಮೇಯತ್ವಸಮತ್ವವರ್ಜಿತಂ
ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೬॥
ಸುಸಂಯಮೀ ವಾ ಯದಿ ವಾ ನ ಸಂಯಮೀ
ಸುಸಙ್ಗ್ರಹೀ ವಾ ಯದಿ ವಾ ನ ಸಙ್ಗ್ರಹೀ ।
ನಿಷ್ಕರ್ಮಕೋ ವಾ ಯದಿ ವಾ ಸಕರ್ಮಕ-
ಸ್ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೭॥
ಮನೋ ನ ಬುದ್ಧಿರ್ನ ಶರೀರಮಿನ್ದ್ರಿಯಂ
ತನ್ಮಾತ್ರಭೂತಾನಿ ನ ಭೂತಪಞ್ಚಕಮ್ ।
ಅಹಙ್ಕೃತಿಶ್ಚಾಪಿ ವಿಯತ್ಸ್ವರೂಪಕಂ
ತಮೀಶಮಾತ್ಮಾನಮುಪೈತಿ ಶಾಶ್ವತಮ್ ॥ ೨-೩೮॥
ವಿಧೌ ನಿರೋಧೇ ಪರಮಾತ್ಮತಾಂ ಗತೇ
ನ ಯೋಗಿನಶ್ಚೇತಸಿ ಭೇದವರ್ಜಿತೇ ।
ಶೌಚಂ ನ ವಾಶೌಚಮಲಿಙ್ಗಭಾವನಾ
ಸರ್ವಂ ವಿಧೇಯಂ ಯದಿ ವಾ ನಿಷಿಧ್ಯತೇ ॥ ೨-೩೯॥
ಮನೋ ವಚೋ ಯತ್ರ ನ ಶಕ್ತಮೀರಿತುಂ
ನೂನಂ ಕಥಂ ತತ್ರ ಗುರೂಪದೇಶತಾ ।
ಇಮಾಂ ಕಥಾಮುಕ್ತವತೋ ಗುರೋಸ್ತ-
ದ್ಯುಕ್ತಸ್ಯ ತತ್ತ್ವಂ ಹಿ ಸಮಂ ಪ್ರಕಾಶತೇ ॥ ೨-೪೦॥
ಅಥ ತೃತೀಯೋಽಧ್ಯಾಯಃ
ಗುಣವಿಗುಣವಿಭಾಗೋ ವರ್ತತೇ ನೈವ ಕಿಞ್ಚಿತ್
ರತಿವಿರತಿವಿಹೀನಂ ನಿರ್ಮಲಂ ನಿಷ್ಪ್ರಪಞ್ಚಮ್ ।
ಗುಣವಿಗುಣವಿಹೀನಂ ವ್ಯಾಪಕಂ ವಿಶ್ವರೂಪಂ
ಕಥಮಹಮಿಹ ವನ್ದೇ ವ್ಯೋಮರೂಪಂ ಶಿವಂ ವೈ ॥ ೩-೧॥
ಶ್ವೇತಾದಿವರ್ಣರಹಿತೋ ನಿಯತಂ ಶಿವಶ್ಚ
ಕಾರ್ಯಂ ಹಿ ಕಾರಣಮಿದಂ ಹಿ ಪರಂ ಶಿವಶ್ಚ ।
ಏವಂ ವಿಕಲ್ಪರಹಿತೋಽಹಮಲಂ ಶಿವಶ್ಚ
ಸ್ವಾತ್ಮಾನಮಾತ್ಮನಿ ಸುಮಿತ್ರ ಕಥಂ ನಮಾಮಿ ॥ ೩-೨॥
ನಿರ್ಮೂಲಮೂಲರಹಿತೋ ಹಿ ಸದೋದಿತೋಽಹಂ
ನಿರ್ಧೂಮಧೂಮರಹಿತೋ ಹಿ ಸದೋದಿತೋಽಹಮ್ ।
ನಿರ್ದೀಪದೀಪರಹಿತೋ ಹಿ ಸದೋದಿತೋಽಹಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩॥
ನಿಷ್ಕಾಮಕಾಮಮಿಹ ನಾಮ ಕಥಂ ವದಾಮಿ
ನಿಃಸಙ್ಗಸಙ್ಗಮಿಹ ನಾಮ ಕಥಂ ವದಾಮಿ ।
ನಿಃಸಾರಸಾರರಹಿತಂ ಚ ಕಥಂ ವದಾಮಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೪॥
ಅದ್ವೈತರೂಪಮಖಿಲಂ ಹಿ ಕಥಂ ವದಾಮಿ
ದ್ವೈತಸ್ವರೂಪಮಖಿಲಂ ಹಿ ಕಥಂ ವದಾಮಿ ।
ನಿತ್ಯಂ ತ್ವನಿತ್ಯಮಖಿಲಂ ಹಿ ಕಥಂ ವದಾಮಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೫॥
ಸ್ಥೂಲಂ ಹಿ ನೋ ನ ಹಿ ಕೃಶಂ ನ ಗತಾಗತಂ ಹಿ
ಆದ್ಯನ್ತಮಧ್ಯರಹಿತಂ ನ ಪರಾಪರಂ ಹಿ ।
ಸತ್ಯಂ ವದಾಮಿ ಖಲು ವೈ ಪರಮಾರ್ಥತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೬॥
ಸಂವಿದ್ಧಿ ಸರ್ವಕರಣಾನಿ ನಭೋನಿಭಾನಿ
ಸಂವಿದ್ಧಿ ಸರ್ವವಿಷಯಾಂಶ್ಚ ನಭೋನಿಭಾಂಶ್ಚ ।
ಸಂವಿದ್ಧಿ ಚೈಕಮಮಲಂ ನ ಹಿ ಬನ್ಧಮುಕ್ತಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೭॥
ದುರ್ಬೋಧಬೋಧಗಹನೋ ನ ಭವಾಮಿ ತಾತ
ದುರ್ಲಕ್ಷ್ಯಲಕ್ಷ್ಯಗಹನೋ ನ ಭವಾಮಿ ತಾತ ।
ಆಸನ್ನರೂಪಗಹನೋ ನ ಭವಾಮಿ ತಾತ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೮॥
ನಿಷ್ಕರ್ಮಕರ್ಮದಹನೋ ಜ್ವಲನೋ ಭವಾಮಿ
ನಿರ್ದುಃಖದುಃಖದಹನೋ ಜ್ವಲನೋ ಭವಾಮಿ ।
ನಿರ್ದೇಹದೇಹದಹನೋ ಜ್ವಲನೋ ಭವಾಮಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೯॥
ನಿಷ್ಪಾಪಪಾಪದಹನೋ ಹಿ ಹುತಾಶನೋಽಹಂ
ನಿರ್ಧರ್ಮಧರ್ಮದಹನೋ ಹಿ ಹುತಾಶನೋಽಹಮ್ ।
ನಿರ್ಬನ್ಧಬನ್ಧದಹನೋ ಹಿ ಹುತಾಶನೋಽಹಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೦॥
ನಿರ್ಭಾವಭಾವರಹಿತೋ ನ ಭವಾಮಿ ವತ್ಸ
ನಿರ್ಯೋಗಯೋಗರಹಿತೋ ನ ಭವಾಮಿ ವತ್ಸ ।
ನಿಶ್ಚಿತ್ತಚಿತ್ತರಹಿತೋ ನ ಭವಾಮಿ ವತ್ಸ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೧॥
ನಿರ್ಮೋಹಮೋಹಪದವೀತಿ ನ ಮೇ ವಿಕಲ್ಪೋ
ನಿಃಶೋಕಶೋಕಪದವೀತಿ ನ ಮೇ ವಿಕಲ್ಪಃ ।
ನಿರ್ಲೋಭಲೋಭಪದವೀತಿ ನ ಮೇ ವಿಕಲ್ಪೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೨॥
ಸಂಸಾರಸನ್ತತಿಲತಾ ನ ಚ ಮೇ ಕದಾಚಿತ್
ಸನ್ತೋಷಸನ್ತತಿಸುಖೋ ನ ಚ ಮೇ ಕದಾಚಿತ್ ।
ಅಜ್ಞಾನಬನ್ಧನಮಿದಂ ನ ಚ ಮೇ ಕದಾಚಿತ್
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೩॥
ಸಂಸಾರಸನ್ತತಿರಜೋ ನ ಚ ಮೇ ವಿಕಾರಃ
ಸನ್ತಾಪಸನ್ತತಿತಮೋ ನ ಚ ಮೇ ವಿಕಾರಃ ।
ಸತ್ತ್ವಂ ಸ್ವಧರ್ಮಜನಕಂ ನ ಚ ಮೇ ವಿಕಾರೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೪॥
ಸನ್ತಾಪದುಃಖಜನಕೋ ನ ವಿಧಿಃ ಕದಾಚಿತ್
ಸನ್ತಾಪಯೋಗಜನಿತಂ ನ ಮನಃ ಕದಾಚಿತ್ ।
ಯಸ್ಮಾದಹಙ್ಕೃತಿರಿಯಂ ನ ಚ ಮೇ ಕದಾಚಿತ್
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೫॥
ನಿಷ್ಕಮ್ಪಕಮ್ಪನಿಧನಂ ನ ವಿಕಲ್ಪಕಲ್ಪಂ
ಸ್ವಪ್ನಪ್ರಬೋಧನಿಧನಂ ನ ಹಿತಾಹಿತಂ ಹಿ ।
ನಿಃಸಾರಸಾರನಿಧನಂ ನ ಚರಾಚರಂ ಹಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೬॥
ನೋ ವೇದ್ಯವೇದಕಮಿದಂ ನ ಚ ಹೇತುತರ್ಕ್ಯಂ
ವಾಚಾಮಗೋಚರಮಿದಂ ನ ಮನೋ ನ ಬುದ್ಧಿಃ ।
ಏವಂ ಕಥಂ ಹಿ ಭವತಃ ಕಥಯಾಮಿ ತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೭॥
ನಿರ್ಭಿನ್ನಭಿನ್ನರಹಿತಂ ಪರಮಾರ್ಥತತ್ತ್ವ-
ಮನ್ತರ್ಬಹಿರ್ನ ಹಿ ಕಥಂ ಪರಮಾರ್ಥತತ್ತ್ವಮ್ ।
ಪ್ರಾಕ್ಸಮ್ಭವಂ ನ ಚ ರತಂ ನ ಹಿ ವಸ್ತು ಕಿಞ್ಚಿತ್
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೮॥
ರಾಗಾದಿದೋಷರಹಿತಂ ತ್ವಹಮೇವ ತತ್ತ್ವಂ
ದೈವಾದಿದೋಷರಹಿತಂ ತ್ವಹಮೇವ ತತ್ತ್ವಮ್ ।
ಸಂಸಾರಶೋಕರಹಿತಂ ತ್ವಹಮೇವ ತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೧೯॥
ಸ್ಥಾನತ್ರಯಂ ಯದಿ ಚ ನೇತಿ ಕಥಂ ತುರೀಯಂ
ಕಾಲತ್ರಯಂ ಯದಿ ಚ ನೇತಿ ಕಥಂ ದಿಶಶ್ಚ ।
ಶಾನ್ತಂ ಪದಂ ಹಿ ಪರಮಂ ಪರಮಾರ್ಥತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೦॥
ದೀರ್ಘೋ ಲಘುಃ ಪುನರಿತೀಹ ನಮೇ ವಿಭಾಗೋ
ವಿಸ್ತಾರಸಂಕಟಮಿತೀಹ ನ ಮೇ ವಿಭಾಗಃ ।
ಕೋಣಂ ಹಿ ವರ್ತುಲಮಿತೀಹ ನ ಮೇ ವಿಭಾಗೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೧॥
ಮಾತಾಪಿತಾದಿ ತನಯಾದಿ ನ ಮೇ ಕದಾಚಿತ್
ಜಾತಂ ಮೃತಂ ನ ಚ ಮನೋ ನ ಚ ಮೇ ಕದಾಚಿತ್ ।
ನಿರ್ವ್ಯಾಕುಲಂ ಸ್ಥಿರಮಿದಂ ಪರಮಾರ್ಥತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೨॥
ಶುದ್ಧಂ ವಿಶುದ್ಧಮವಿಚಾರಮನನ್ತರೂಪಂ
ನಿರ್ಲೇಪಲೇಪಮವಿಚಾರಮನನ್ತರೂಪಮ್ ।
ನಿಷ್ಖಣ್ಡಖಣ್ಡಮವಿಚಾರಮನನ್ತರೂಪಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೩॥
ಬ್ರಹ್ಮಾದಯಃ ಸುರಗಣಾಃ ಕಥಮತ್ರ ಸನ್ತಿ
ಸ್ವರ್ಗಾದಯೋ ವಸತಯಃ ಕಥಮತ್ರ ಸನ್ತಿ ।
ಯದ್ಯೇಕರೂಪಮಮಲಂ ಪರಮಾರ್ಥತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೪॥
ನಿರ್ನೇತಿ ನೇತಿ ವಿಮಲೋ ಹಿ ಕಥಂ ವದಾಮಿ
ನಿಃಶೇಷಶೇಷವಿಮಲೋ ಹಿ ಕಥಂ ವದಾಮಿ ।
ನಿರ್ಲಿಙ್ಗಲಿಙ್ಗವಿಮಲೋ ಹಿ ಕಥಂ ವದಾಮಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೫॥
ನಿಷ್ಕರ್ಮಕರ್ಮಪರಮಂ ಸತತಂ ಕರೋಮಿ
ನಿಃಸಙ್ಗಸಙ್ಗರಹಿತಂ ಪರಮಂ ವಿನೋದಮ್ ।
ನಿರ್ದೇಹದೇಹರಹಿತಂ ಸತತಂ ವಿನೋದಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೬॥
ಮಾಯಾಪ್ರಪಞ್ಚರಚನಾ ನ ಚ ಮೇ ವಿಕಾರಃ ।
ಕೌಟಿಲ್ಯದಮ್ಭರಚನಾ ನ ಚ ಮೇ ವಿಕಾರಃ ।
ಸತ್ಯಾನೃತೇತಿ ರಚನಾ ನ ಚ ಮೇ ವಿಕಾರೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೭॥
ಸನ್ಧ್ಯಾದಿಕಾಲರಹಿತಂ ನ ಚ ಮೇ ವಿಯೋಗೋ-
ಹ್ಯನ್ತಃ ಪ್ರಬೋಧರಹಿತಂ ಬಧಿರೋ ನ ಮೂಕಃ ।
ಏವಂ ವಿಕಲ್ಪರಹಿತಂ ನ ಚ ಭಾವಶುದ್ಧಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೮॥
ನಿರ್ನಾಥನಾಥರಹಿತಂ ಹಿ ನಿರಾಕುಲಂ ವೈ
ನಿಶ್ಚಿತ್ತಚಿತ್ತವಿಗತಂ ಹಿ ನಿರಾಕುಲಂ ವೈ ।
ಸಂವಿದ್ಧಿ ಸರ್ವವಿಗತಂ ಹಿ ನಿರಾಕುಲಂ ವೈ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೨೯॥
ಕಾನ್ತಾರಮನ್ದಿರಮಿದಂ ಹಿ ಕಥಂ ವದಾಮಿ
ಸಂಸಿದ್ಧಸಂಶಯಮಿದಂ ಹಿ ಕಥಂ ವದಾಮಿ ।
ಏವಂ ನಿರನ್ತರಸಮಂ ಹಿ ನಿರಾಕುಲಂ ವೈ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೦॥
ನಿರ್ಜೀವಜೀವರಹಿತಂ ಸತತಂ ವಿಭಾತಿ
ನಿರ್ಬೀಜಬೀಜರಹಿತಂ ಸತತಂ ವಿಭಾತಿ ।
ನಿರ್ವಾಣಬನ್ಧರಹಿತಂ ಸತತಂ ವಿಭಾತಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೧॥
ಸಮ್ಭೂತಿವರ್ಜಿತಮಿದಂ ಸತತಂ ವಿಭಾತಿ
ಸಂಸಾರವರ್ಜಿತಮಿದಂ ಸತತಂ ವಿಭಾತಿ ।
ಸಂಹಾರವರ್ಜಿತಮಿದಂ ಸತತಂ ವಿಭಾತಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೨॥
ಉಲ್ಲೇಖಮಾತ್ರಮಪಿ ತೇ ನ ಚ ನಾಮರೂಪಂ
ನಿರ್ಭಿನ್ನಭಿನ್ನಮಪಿ ತೇ ನ ಹಿ ವಸ್ತು ಕಿಞ್ಚಿತ್ ।
ನಿರ್ಲಜ್ಜಮಾನಸ ಕರೋಷಿ ಕಥಂ ವಿಷಾದಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೩॥
ಕಿಂ ನಾಮ ರೋದಿಷಿ ಸಖೇ ನ ಜರಾ ನ ಮೃತ್ಯುಃ
ಕಿಂ ನಾಮ ರೋದಿಷಿ ಸಖೇ ನ ಚ ಜನ್ಮ ದುಃಖಮ್ ।
ಕಿಂ ನಾಮ ರೋದಿಷಿ ಸಖೇ ನ ಚ ತೇ ವಿಕಾರೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೪॥
ಕಿಂ ನಾಮ ರೋದಿಷಿ ಸಖೇ ನ ಚ ತೇ ಸ್ವರೂಪಂ
ಕಿಂ ನಾಮ ರೋದಿಷಿ ಸಖೇ ನ ಚ ತೇ ವಿರೂಪಮ್ ।
ಕಿಂ ನಾಮ ರೋದಿಷಿ ಸಖೇ ನ ಚ ತೇ ವಯಾಂಸಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೫॥
ಕಿಂ ನಾಮ ರೋದಿಷಿ ಸಖೇ ನ ಚ ತೇ ವಯಾಂಸಿ
ಕಿಂ ನಾಮ ರೋದಿಷಿ ಸಖೇ ನ ಚ ತೇ ಮನಾಂಸಿ ।
ಕಿಂ ನಾಮ ರೋದಿಷಿ ಸಖೇ ನ ತವೇನ್ದ್ರಿಯಾಣಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೬॥
ಕಿಂ ನಾಮ ರೋದಿಷಿ ಸಖೇ ನ ಚ ತೇಽಸ್ತಿ ಕಾಮಃ
ಕಿಂ ನಾಮ ರೋದಿಷಿ ಸಖೇ ನ ಚ ತೇ ಪ್ರಲೋಭಃ ।
ಕಿಂ ನಾಮ ರೋದಿಷಿ ಸಖೇ ನ ಚ ತೇ ವಿಮೋಹೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೭॥
ಐಶ್ವರ್ಯಮಿಚ್ಛಸಿ ಕಥಂ ನ ಚ ತೇ ಧನಾನಿ
ಐಶ್ವರ್ಯಮಿಚ್ಛಸಿ ಕಥಂ ನ ಚ ತೇ ಹಿ ಪತ್ನೀ ।
ಐಶ್ವರ್ಯಮಿಚ್ಛಸಿ ಕಥಂ ನ ಚ ತೇ ಮಮೇತಿ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೮॥
ಲಿಙ್ಗಪ್ರಪಞ್ಚಜನುಷೀ ನ ಚ ತೇ ನ ಮೇ ಚ
ನಿರ್ಲಜ್ಜಮಾನಸಮಿದಂ ಚ ವಿಭಾತಿ ಭಿನ್ನಮ್ ।
ನಿರ್ಭೇದಭೇದರಹಿತಂ ನ ಚ ತೇ ನ ಮೇ ಚ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೩೯॥
ನೋ ವಾಣುಮಾತ್ರಮಪಿ ತೇ ಹಿ ವಿರಾಗರೂಪಂ
ನೋ ವಾಣುಮಾತ್ರಮಪಿ ತೇ ಹಿ ಸರಾಗರೂಪಮ್ ।
ನೋ ವಾಣುಮಾತ್ರಮಪಿ ತೇ ಹಿ ಸಕಾಮರೂಪಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೪೦॥
ಧ್ಯಾತಾ ನ ತೇ ಹಿ ಹೃದಯೇ ನ ಚ ತೇ ಸಮಾಧಿ-
ರ್ಧ್ಯಾನಂ ನ ತೇ ಹಿ ಹೃದಯೇ ನ ಬಹಿಃ ಪ್ರದೇಶಃ ।
ಧ್ಯೇಯಂ ನ ಚೇತಿ ಹೃದಯೇ ನ ಹಿ ವಸ್ತು ಕಾಲೋ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೪೧॥
ಯತ್ಸಾರಭೂತಮಖಿಲಂ ಕಥಿತಂ ಮಯಾ ತೇ
ನ ತ್ವಂ ನ ಮೇ ನ ಮಹತೋ ನ ಗುರುರ್ನ ನ ಶಿಷ್ಯಃ ।
ಸ್ವಚ್ಛನ್ದರೂಪಸಹಜಂ ಪರಮಾರ್ಥತತ್ತ್ವಂ
ಜ್ಞಾನಾಮೃತಂ ಸಮರಸಂ ಗಗನೋಪಮೋಽಹಮ್ ॥ ೩-೪೨॥
ಕಥಮಿಹ ಪರಮಾರ್ಥಂ ತತ್ತ್ವಮಾನನ್ದರೂಪಂ
ಕಥಮಿಹ ಪರಮಾರ್ಥಂ ನೈವಮಾನನ್ದರೂಪಮ್ ।
ಕಥಮಿಹ ಪರಮಾರ್ಥಂ ಜ್ಞಾನವಿಜ್ಞಾನರೂಪಂ
ಯದಿ ಪರಮಹಮೇಕಂ ವರ್ತತೇ ವ್ಯೋಮರೂಪಮ್ ॥ ೩-೪೩॥
ದಹನಪವನಹೀನಂ ವಿದ್ಧಿ ವಿಜ್ಞಾನಮೇಕ-
ಮವನಿಜಲವಿಹೀನಂ ವಿದ್ಧಿ ವಿಜ್ಞಾನರೂಪಮ್ ।
ಸಮಗಮನವಿಹೀನಂ ವಿದ್ಧಿ ವಿಜ್ಞಾನಮೇಕಂ
ಗಗನಮಿವ ವಿಶಾಲಂ ವಿದ್ಧಿ ವಿಜ್ಞಾನಮೇಕಮ್ ॥ ೩-೪೪॥
ನ ಶೂನ್ಯರೂಪಂ ನ ವಿಶೂನ್ಯರೂಪಂ
ನ ಶುದ್ಧರೂಪಂ ನ ವಿಶುದ್ಧರೂಪಮ್ ।
ರೂಪಂ ವಿರೂಪಂ ನ ಭವಾಮಿ ಕಿಞ್ಚಿತ್
ಸ್ವರೂಪರೂಪಂ ಪರಮಾರ್ಥತತ್ತ್ವಮ್ ॥ ೩-೪೫॥
ಮುಞ್ಚ ಮುಞ್ಚ ಹಿ ಸಂಸಾರಂ ತ್ಯಾಗಂ ಮುಞ್ಚ ಹಿ ಸರ್ವಥಾ ।
ತ್ಯಾಗಾತ್ಯಾಗವಿಷಂ ಶುದ್ಧಮಮೃತಂ ಸಹಜಂ ಧ್ರುವಮ್ ॥ ೩-೪೬॥
ಅಥ ಚತುರ್ಥೋಽಧ್ಯಾಯಃ
ನಾವಾಹನಂ ನೈವ ವಿಸರ್ಜನಂ ವಾ
ಪುಷ್ಪಾಣಿ ಪತ್ರಾಣಿ ಕಥಂ ಭವನ್ತಿ ।
ಧ್ಯಾನಾನಿ ಮನ್ತ್ರಾಣಿ ಕಥಂ ಭವನ್ತಿ
ಸಮಾಸಮಂ ಚೈವ ಶಿವಾರ್ಚನಂ ಚ ॥ ೪-೧॥
ನ ಕೇವಲಂ ಬನ್ಧವಿಬನ್ಧಮುಕ್ತೋ
ನ ಕೇವಲಂ ಶುದ್ಧವಿಶುದ್ಧಮುಕ್ತಃ ।
ನ ಕೇವಲಂ ಯೋಗವಿಯೋಗಮುಕ್ತಃ
ಸ ವೈ ವಿಮುಕ್ತೋ ಗಗನೋಪಮೋಽಹಮ್ ॥ ೪-೨॥
ಸಞ್ಜಾಯತೇ ಸರ್ವಮಿದಂ ಹಿ ತಥ್ಯಂ
ಸಞ್ಜಾಯತೇ ಸರ್ವಮಿದಂ ವಿತಥ್ಯಮ್ ।
ಏವಂ ವಿಕಲ್ಪೋ ಮಮ ನೈವ ಜಾತಃ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೩॥
ನ ಸಾಞ್ಜನಂ ಚೈವ ನಿರಞ್ಜನಂ ವಾ
ನ ಚಾನ್ತರಂ ವಾಪಿ ನಿರನ್ತರಂ ವಾ ।
ಅನ್ತರ್ವಿಭನ್ನಂ ನ ಹಿ ಮೇ ವಿಭಾತಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೪॥
ಅಬೋಧಬೋಧೋ ಮಮ ನೈವ ಜಾತೋ
ಬೋಧಸ್ವರೂಪಂ ಮಮ ನೈವ ಜಾತಮ್ ।
ನಿರ್ಬೋಧಬೋಧಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೫॥
ನ ಧರ್ಮಯುಕ್ತೋ ನ ಚ ಪಾಪಯುಕ್ತೋ
ನ ಬನ್ಧಯುಕ್ತೋ ನ ಚ ಮೋಕ್ಷಯುಕ್ತಃ ।
ಯುಕ್ತಂ ತ್ವಯುಕ್ತಂ ನ ಚ ಮೇ ವಿಭಾತಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೬॥
ಪರಾಪರಂ ವಾ ನ ಚ ಮೇ ಕದಾಚಿತ್
ಮಧ್ಯಸ್ಥಭಾವೋ ಹಿ ನ ಚಾರಿಮಿತ್ರಮ್ ।
ಹಿತಾಹಿತಂ ಚಾಪಿ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೭॥
ನೋಪಾಸಕೋ ನೈವಮುಪಾಸ್ಯರೂಪಂ
ನ ಚೋಪದೇಶೋ ನ ಚ ಮೇ ಕ್ರಿಯಾ ಚ ।
ಸಂವಿತ್ಸ್ವರೂಪಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೮॥
ನೋ ವ್ಯಾಪಕಂ ವ್ಯಾಪ್ಯಮಿಹಾಸ್ತಿ ಕಿಞ್ಚಿತ್
ನ ಚಾಲಯಂ ವಾಪಿ ನಿರಾಲಯಂ ವಾ ।
ಅಶೂನ್ಯಶೂನ್ಯಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೯॥
ನ ಗ್ರಾಹಕೋ ಗ್ರಾಹ್ಯಕಮೇವ ಕಿಞ್ಚಿತ್
ನ ಕಾರಣಂ ವಾ ಮಮ ನೈವ ಕಾರ್ಯಮ್ ।
ಅಚಿನ್ತ್ಯಚಿನ್ತ್ಯಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೦॥
ನ ಭೇದಕಂ ವಾಪಿ ನ ಚೈವ ಭೇದ್ಯಂ
ನ ವೇದಕಂ ವಾ ಮಮ ನೈವ ವೇದ್ಯಮ್ ।
ಗತಾಗತಂ ತಾತ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೧॥
ನ ಚಾಸ್ತಿ ದೇಹೋ ನ ಚ ಮೇ ವಿದೇಹೋ
ಬುದ್ಧಿರ್ಮನೋ ಮೇ ನ ಹಿ ಚೇನ್ದ್ರಿಯಾಣಿ ।
ರಾಗೋ ವಿರಾಗಶ್ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೨॥
ಉಲ್ಲೇಖಮಾತ್ರಂ ನ ಹಿ ಭಿನ್ನಮುಚ್ಚೈ-
ರುಲ್ಲೇಖಮಾತ್ರಂ ನ ತಿರೋಹಿತಂ ವೈ ।
ಸಮಾಸಮಂ ಮಿತ್ರ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೩॥
ಜಿತೇನ್ದ್ರಿಯೋಽಹಂ ತ್ವಜಿತೇನ್ದ್ರಿಯೋ ವಾ
ನ ಸಂಯಮೋ ಮೇ ನಿಯಮೋ ನ ಜಾತಃ ।
ಜಯಾಜಯೌ ಮಿತ್ರ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೪॥
ಅಮೂರ್ತಮೂರ್ತಿರ್ನ ಚ ಮೇ ಕದಾಚಿ-
ದಾದ್ಯನ್ತಮಧ್ಯಂ ನ ಚ ಮೇ ಕದಾಚಿತ್ ।
ಬಲಾಬಲಂ ಮಿತ್ರ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೫॥
ಮೃತಾಮೃತಂ ವಾಪಿ ವಿಷಾವಿಷಂ ಚ
ಸಞ್ಜಾಯತೇ ತಾತ ನ ಮೇ ಕದಾಚಿತ್ ।
ಅಶುದ್ಧಶುದ್ಧಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೬॥
ಸ್ವಪ್ನಃ ಪ್ರಬೋಧೋ ನ ಚ ಯೋಗಮುದ್ರಾ
ನಕ್ತಂ ದಿವಾ ವಾಪಿ ನ ಮೇ ಕದಾಚಿತ್ ।
ಅತುರ್ಯತುರ್ಯಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೭॥
ಸಂವಿದ್ಧಿ ಮಾಂ ಸರ್ವವಿಸರ್ವಮುಕ್ತಂ
ಮಾಯಾ ವಿಮಾಯಾ ನ ಚ ಮೇ ಕದಾಚಿತ್ ।
ಸನ್ಧ್ಯಾದಿಕಂ ಕರ್ಮ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೮॥
ಸಂವಿದ್ಧಿ ಮಾಂ ಸರ್ವಸಮಾಧಿಯುಕ್ತಂ
ಸಂವಿದ್ಧಿ ಮಾಂ ಲಕ್ಷ್ಯವಿಲಕ್ಷ್ಯಮುಕ್ತಮ್ ।
ಯೋಗಂ ವಿಯೋಗಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೧೯॥
ಮೂರ್ಖೋಽಪಿ ನಾಹಂ ನ ಚ ಪಣ್ಡಿತೋಽಹಂ
ಮೌನಂ ವಿಮೌನಂ ನ ಚ ಮೇ ಕದಾಚಿತ್ ।
ತರ್ಕಂ ವಿತರ್ಕಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೨೦॥
ಪಿತಾ ಚ ಮಾತಾ ಚ ಕುಲಂ ನ ಜಾತಿ-
ರ್ಜನ್ಮಾದಿ ಮೃತ್ಯುರ್ನ ಚ ಮೇ ಕದಾಚಿತ್ ।
ಸ್ನೇಹಂ ವಿಮೋಹಂ ಚ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೨೧॥
ಅಸ್ತಂ ಗತೋ ನೈವ ಸದೋದಿತೋಽಹಂ
ತೇಜೋವಿತೇಜೋ ನ ಚ ಮೇ ಕದಾಚಿತ್ ।
ಸನ್ಧ್ಯಾದಿಕಂ ಕರ್ಮ ಕಥಂ ವದಾಮಿ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೨೨॥
ಅಸಂಶಯಂ ವಿದ್ಧಿ ನಿರಾಕುಲಂ ಮಾಂ
ಅಸಂಶಯಂ ವಿದ್ಧಿ ನಿರನ್ತರಂ ಮಾಮ್ ।
ಅಸಂಶಯಂ ವಿದ್ಧಿ ನಿರಞ್ಜನಂ ಮಾಂ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೨೩॥
ಧ್ಯಾನಾನಿ ಸರ್ವಾಣಿ ಪರಿತ್ಯಜನ್ತಿ
ಶುಭಾಶುಭಂ ಕರ್ಮ ಪರಿತ್ಯಜನ್ತಿ ।
ತ್ಯಾಗಾಮೃತಂ ತಾತ ಪಿಬನ್ತಿ ಧೀರಾಃ
ಸ್ವರೂಪನಿರ್ವಾಣಮನಾಮಯೋಽಹಮ್ ॥ ೪-೨೪॥
ವಿನ್ದತಿ ವಿನ್ದತಿ ನ ಹಿ ನ ಹಿ ಯತ್ರ
ಛನ್ದೋಲಕ್ಷಣಂ ನ ಹಿ ನ ಹಿ ತತ್ರ ।
ಸಮರಸಮಗ್ನೋ ಭಾವಿತಪೂತಃ
ಪ್ರಲಪತಿ ತತ್ತ್ವಂ ಪರಮವಧೂತಃ ॥ ೪-೨೫॥
ಅಥ ಪಞ್ಚಮೋಽಧ್ಯಾಯಃ
ಓಂ ಇತಿ ಗದಿತಂ ಗಗನಸಮಂ ತತ್
ನ ಪರಾಪರಸಾರವಿಚಾರ ಇತಿ ।
ಅವಿಲಾಸವಿಲಾಸನಿರಾಕರಣಂ
ಕಥಮಕ್ಷರಬಿನ್ದುಸಮುಚ್ಚರಣಮ್ ॥ ೫-೧॥
ಇತಿ ತತ್ತ್ವಮಸಿಪ್ರಭೃತಿಶ್ರುತಿಭಿಃ
ಪ್ರತಿಪಾದಿತಮಾತ್ಮನಿ ತತ್ತ್ವಮಸಿ ।
ತ್ವಮುಪಾಧಿವಿವರ್ಜಿತಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨॥
ಅಧ ಊರ್ಧ್ವವಿವರ್ಜಿತಸರ್ವಸಮಂ
ಬಹಿರನ್ತರವರ್ಜಿತಸರ್ವಸಮಮ್ ।
ಯದಿ ಚೈಕವಿವರ್ಜಿತಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೩॥
ನ ಹಿ ಕಲ್ಪಿತಕಲ್ಪವಿಚಾರ ಇತಿ
ನ ಹಿ ಕಾರಣಕಾರ್ಯವಿಚಾರ ಇತಿ ।
ಪದಸನ್ಧಿವಿವರ್ಜಿತಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೪॥
ನ ಹಿ ಬೋಧವಿಬೋಧಸಮಾಧಿರಿತಿ
ನ ಹಿ ದೇಶವಿದೇಶಸಮಾಧಿರಿತಿ ।
ನ ಹಿ ಕಾಲವಿಕಾಲಸಮಾಧಿರಿತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೫॥
ನ ಹಿ ಕುಮ್ಭನಭೋ ನ ಹಿ ಕುಮ್ಭ ಇತಿ
ನ ಹಿ ಜೀವವಪುರ್ನ ಹಿ ಜೀವ ಇತಿ ।
ನ ಹಿ ಕಾರಣಕಾರ್ಯವಿಭಾಗ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೬॥
ಇಹ ಸರ್ವನಿರನ್ತರಮೋಕ್ಷಪದಂ
ಲಘುದೀರ್ಘವಿಚಾರವಿಹೀನ ಇತಿ ।
ನ ಹಿ ವರ್ತುಲಕೋಣವಿಭಾಗ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೭॥
ಇಹ ಶೂನ್ಯವಿಶೂನ್ಯವಿಹೀನ ಇತಿ
ಇಹ ಶುದ್ಧವಿಶುದ್ಧವಿಹೀನ ಇತಿ ।
ಇಹ ಸರ್ವವಿಸರ್ವವಿಹೀನ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೮॥
ನ ಹಿ ಭಿನ್ನವಿಭಿನ್ನವಿಚಾರ ಇತಿ
ಬಹಿರನ್ತರಸನ್ಧಿವಿಚಾರ ಇತಿ ।
ಅರಿಮಿತ್ರವಿವರ್ಜಿತಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೯॥
ನ ಹಿ ಶಿಷ್ಯವಿಶಿಷ್ಯಸ್ವರೂಪ ಇತಿ
ನ ಚರಾಚರಭೇದವಿಚಾರ ಇತಿ ।
ಇಹ ಸರ್ವನಿರನ್ತರಮೋಕ್ಷಪದಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೦॥
ನನು ರೂಪವಿರೂಪವಿಹೀನ ಇತಿ
ನನು ಭಿನ್ನವಿಭಿನ್ನವಿಹೀನ ಇತಿ ।
ನನು ಸರ್ಗವಿಸರ್ಗವಿಹೀನ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೧॥
ನ ಗುಣಾಗುಣಪಾಶನಿಬನ್ಧ ಇತಿ
ಮೃತಜೀವನಕರ್ಮ ಕರೋಮಿ ಕಥಮ್ ।
ಇತಿ ಶುದ್ಧನಿರಞ್ಜನಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೨॥
ಇಹ ಭಾವವಿಭಾವವಿಹೀನ ಇತಿ
ಇಹ ಕಾಮವಿಕಾಮವಿಹೀನ ಇತಿ ।
ಇಹ ಬೋಧತಮಂ ಖಲು ಮೋಕ್ಷಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೩॥
ಇಹ ತತ್ತ್ವನಿರನ್ತರತತ್ತ್ವಮಿತಿ
ನ ಹಿ ಸನ್ಧಿವಿಸನ್ಧಿವಿಹೀನ ಇತಿ ।
ಯದಿ ಸರ್ವವಿವರ್ಜಿತಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೪॥
ಅನಿಕೇತಕುಟೀ ಪರಿವಾರಸಮಂ
ಇಹಸಙ್ಗವಿಸಙ್ಗವಿಹೀನಪರಮ್ ।
ಇಹ ಬೋಧವಿಬೋಧವಿಹೀನಪರಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೫॥
ಅವಿಕಾರವಿಕಾರಮಸತ್ಯಮಿತಿ
ಅವಿಲಕ್ಷವಿಲಕ್ಷಮಸತ್ಯಮಿತಿ ।
ಯದಿ ಕೇವಲಮಾತ್ಮನಿ ಸತ್ಯಮಿತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೬॥
ಇಹ ಸರ್ವಸಮಂ ಖಲು ಜೀವ ಇತಿ
ಇಹ ಸರ್ವನಿರನ್ತರಜೀವ ಇತಿ ।
ಇಹ ಕೇವಲನಿಶ್ಚಲಜೀವ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೭॥
ಅವಿವೇಕವಿವೇಕಮಬೋಧ ಇತಿ
ಅವಿಕಲ್ಪವಿಕಲ್ಪಮಬೋಧ ಇತಿ ।
ಯದಿ ಚೈಕನಿರನ್ತರಬೋಧ ಇತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೮॥
ನ ಹಿ ಮೋಕ್ಷಪದಂ ನ ಹಿ ಬನ್ಧಪದಂ
ನ ಹಿ ಪುಣ್ಯಪದಂ ನ ಹಿ ಪಾಪಪದಮ್ ।
ನ ಹಿ ಪೂರ್ಣಪದಂ ನ ಹಿ ರಿಕ್ತಪದಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೧೯॥
ಯದಿ ವರ್ಣವಿವರ್ಣವಿಹೀನಸಮಂ
ಯದಿ ಕಾರಣಕಾರ್ಯವಿಹೀನಸಮಮ್ ।
ಯದಿಭೇದವಿಭೇದವಿಹೀನಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೦॥
ಇಹ ಸರ್ವನಿರನ್ತರಸರ್ವಚಿತೇ
ಇಹ ಕೇವಲನಿಶ್ಚಲಸರ್ವಚಿತೇ ।
ದ್ವಿಪದಾದಿವಿವರ್ಜಿತಸರ್ವಚಿತೇ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೧॥
ಅತಿಸರ್ವನಿರನ್ತರಸರ್ವಗತಂ
ಅತಿನಿರ್ಮಲನಿಶ್ಚಲಸರ್ವಗತಮ್ ।
ದಿನರಾತ್ರಿವಿವರ್ಜಿತಸರ್ವಗತಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೨॥
ನ ಹಿ ಬನ್ಧವಿಬನ್ಧಸಮಾಗಮನಂ
ನ ಹಿ ಯೋಗವಿಯೋಗಸಮಾಗಮನಮ್ ।
ನ ಹಿ ತರ್ಕವಿತರ್ಕಸಮಾಗಮನಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೩॥
ಇಹ ಕಾಲವಿಕಾಲನಿರಾಕರಣಂ
ಅಣುಮಾತ್ರಕೃಶಾನುನಿರಾಕರಣಮ್ ।
ನ ಹಿ ಕೇವಲಸತ್ಯನಿರಾಕರಣಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೪॥
ಇಹ ದೇಹವಿದೇಹವಿಹೀನ ಇತಿ
ನನು ಸ್ವಪ್ನಸುಷುಪ್ತಿವಿಹೀನಪರಮ್ ।
ಅಭಿಧಾನವಿಧಾನವಿಹೀನಪರಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೫॥
ಗಗನೋಪಮಶುದ್ಧವಿಶಾಲಸಮಂ
ಅತಿಸರ್ವವಿವರ್ಜಿತಸರ್ವಸಮಮ್ ।
ಗತಸಾರವಿಸಾರವಿಕಾರಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೬॥
ಇಹ ಧರ್ಮವಿಧರ್ಮವಿರಾಗತರ-
ಮಿಹ ವಸ್ತುವಿವಸ್ತುವಿರಾಗತರಮ್ ।
ಇಹ ಕಾಮವಿಕಾಮವಿರಾಗತರಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೭॥
ಸುಖದುಃಖವಿವರ್ಜಿತಸರ್ವಸಮ-
ಮಿಹ ಶೋಕವಿಶೋಕವಿಹೀನಪರಮ್ ।
ಗುರುಶಿಷ್ಯವಿವರ್ಜಿತತತ್ತ್ವಪರಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೮॥
ನ ಕಿಲಾಙ್ಕುರಸಾರವಿಸಾರ ಇತಿ
ನ ಚಲಾಚಲಸಾಮ್ಯವಿಸಾಮ್ಯಮಿತಿ ।
ಅವಿಚಾರವಿಚಾರವಿಹೀನಮಿತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೨೯॥
ಇಹ ಸಾರಸಮುಚ್ಚಯಸಾರಮಿತಿ ।
ಕಥಿತಂ ನಿಜಭಾವವಿಭೇದ ಇತಿ ।
ವಿಷಯೇ ಕರಣತ್ವಮಸತ್ಯಮಿತಿ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೩೦॥
ಬಹುಧಾ ಶ್ರುತಯಃ ಪ್ರವದನ್ತಿ ಯತೋ
ವಿಯದಾದಿರಿದಂ ಮೃಗತೋಯಸಮಮ್ ।
ಯದಿ ಚೈಕನಿರನ್ತರಸರ್ವಸಮಂ
ಕಿಮು ರೋದಿಷಿ ಮಾನಸಿ ಸರ್ವಸಮಮ್ ॥ ೫-೩೧॥
ವಿನ್ದತಿ ವಿನ್ದತಿ ನ ಹಿ ನ ಹಿ ಯತ್ರ
ಛನ್ದೋಲಕ್ಷಣಂ ನ ಹಿ ನ ಹಿ ತತ್ರ ।
ಸಮರಸಮಗ್ನೋ ಭಾವಿತಪೂತಃ
ಪ್ರಲಪತಿ ತತ್ತ್ವಂ ಪರಮವಧೂತಃ ॥ ೫-೩೨॥
ಅಥ ಷಷ್ಠಮೋಽಧ್ಯಾಯಃ
ಬಹುಧಾ ಶ್ರುತಯಃ ಪ್ರವದನ್ತಿ ವಯಂ
ವಿಯದಾದಿರಿದಂ ಮೃಗತೋಯಸಮಮ್ ।
ಯದಿ ಚೈಕನಿರನ್ತರಸರ್ವಶಿವ-
ಮುಪಮೇಯಮಥೋಹ್ಯುಪಮಾ ಚ ಕಥಮ್ ॥ ೬-೧॥
ಅವಿಭಕ್ತಿವಿಭಕ್ತಿವಿಹೀನಪರಂ
ನನು ಕಾರ್ಯವಿಕಾರ್ಯವಿಹೀನಪರಮ್ ।
ಯದಿ ಚೈಕನಿರನ್ತರಸರ್ವಶಿವಂ
ಯಜನಂ ಚ ಕಥಂ ತಪನಂ ಚ ಕಥಮ್ ॥ ೬-೨॥
ಮನ ಏವ ನಿರನ್ತರಸರ್ವಗತಂ
ಹ್ಯವಿಶಾಲವಿಶಾಲವಿಹೀನಪರಮ್ ।
ಮನ ಏವ ನಿರನ್ತರಸರ್ವಶಿವಂ
ಮನಸಾಪಿ ಕಥಂ ವಚಸಾ ಚ ಕಥಮ್ ॥ ೬-೩॥
ದಿನರಾತ್ರಿವಿಭೇದನಿರಾಕರಣ-
ಮುದಿತಾನುದಿತಸ್ಯ ನಿರಾಕರಣಮ್ ।
ಯದಿ ಚೈಕನಿರನ್ತರಸರ್ವಶಿವಂ
ರವಿಚನ್ದ್ರಮಸೌ ಜ್ವಲನಶ್ಚ ಕಥಮ್ ॥ ೬-೪॥
ಗತಕಾಮವಿಕಾಮವಿಭೇದ ಇತಿ
ಗತಚೇಷ್ಟವಿಚೇಷ್ಟವಿಭೇದ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ಬಹಿರನ್ತರಭಿನ್ನಮತಿಶ್ಚ ಕಥಮ್ ॥ ೬-೫॥
ಯದಿ ಸಾರವಿಸಾರವಿಹೀನ ಇತಿ
ಯದಿ ಶೂನ್ಯವಿಶೂನ್ಯವಿಹೀನ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ಪ್ರಥಮಂ ಚ ಕಥಂ ಚರಮಂ ಚ ಕಥಮ್ ॥ ೬-೬॥
ಯದಿಭೇದವಿಭೇದನಿರಾಕರಣಂ
ಯದಿ ವೇದಕವೇದ್ಯನಿರಾಕರಣಮ್ ।
ಯದಿ ಚೈಕನಿರನ್ತರಸರ್ವಶಿವಂ
ತೃತೀಯಂ ಚ ಕಥಂ ತುರೀಯಂ ಚ ಕಥಮ್ ॥ ೬-೭॥
ಗದಿತಾವಿದಿತಂ ನ ಹಿ ಸತ್ಯಮಿತಿ
ವಿದಿತಾವಿದಿತಂ ನ ಹಿ ಸತ್ಯಮಿತಿ ।
ಯದಿ ಚೈಕನಿರನ್ತರಸರ್ವಶಿವಂ
ವಿಷಯೇನ್ದ್ರಿಯಬುದ್ಧಿಮನಾಂಸಿ ಕಥಮ್ ॥ ೬-೮॥
ಗಗನಂ ಪವನೋ ನ ಹಿ ಸತ್ಯಮಿತಿ
ಧರಣೀ ದಹನೋ ನ ಹಿ ಸತ್ಯಮಿತಿ ।
ಯದಿ ಚೈಕನಿರನ್ತರಸರ್ವಶಿವಂ
ಜಲದಶ್ಚ ಕಥಂ ಸಲಿಲಂ ಚ ಕಥಮ್ ॥ ೬-೯॥
ಯದಿ ಕಲ್ಪಿತಲೋಕನಿರಾಕರಣಂ
ಯದಿ ಕಲ್ಪಿತದೇವನಿರಾಕರಣಮ್ ।
ಯದಿ ಚೈಕನಿರನ್ತರಸರ್ವಶಿವಂ
ಗುಣದೋಷವಿಚಾರಮತಿಶ್ಚ ಕಥಮ್ ॥ ೬-೧೦॥
ಮರಣಾಮರಣಂ ಹಿ ನಿರಾಕರಣಂ
ಕರಣಾಕರಣಂ ಹಿ ನಿರಾಕರಣಮ್ ।
ಯದಿ ಚೈಕನಿರನ್ತರಸರ್ವಶಿವಂ
ಗಮನಾಗಮನಂ ಹಿ ಕಥಂ ವದತಿ ॥ ೬-೧೧॥
ಪ್ರಕೃತಿಃ ಪುರುಷೋ ನ ಹಿ ಭೇದ ಇತಿ
ನ ಹಿ ಕಾರಣಕಾರ್ಯವಿಭೇದ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ಪುರುಷಾಪುರುಷಂ ಚ ಕಥಂ ವದತಿ ॥ ೬-೧೨॥
ತೃತೀಯಂ ನ ಹಿ ದುಃಖಸಮಾಗಮನಂ
ನ ಗುಣಾದ್ದ್ವಿತೀಯಸ್ಯ ಸಮಾಗಮನಮ್ ।
ಯದಿ ಚೈಕನಿರನ್ತರಸರ್ವಶಿವಂ
ಸ್ಥವಿರಶ್ಚ ಯುವಾ ಚ ಶಿಶುಶ್ಚ ಕಥಮ್ ॥ ೬-೧೩॥
ನನು ಆಶ್ರಮವರ್ಣವಿಹೀನಪರಂ
ನನು ಕಾರಣಕರ್ತೃವಿಹೀನಪರಮ್ ।
ಯದಿ ಚೈಕನಿರನ್ತರಸರ್ವಶಿವ-
ಮವಿನಷ್ಟವಿನಷ್ಟಮತಿಶ್ಚ ಕಥಮ್ ॥ ೬-೧೪॥
ಗ್ರಸಿತಾಗ್ರಸಿತಂ ಚ ವಿತಥ್ಯಮಿತಿ
ಜನಿತಾಜನಿತಂ ಚ ವಿತಥ್ಯಮಿತಿ ।
ಯದಿ ಚೈಕನಿರನ್ತರಸರ್ವಶಿವ-
ಮವಿನಾಶಿ ವಿನಾಶಿ ಕಥಂ ಹಿ ಭವೇತ್ ॥ ೬-೧೫॥
ಪುರುಷಾಪುರುಷಸ್ಯ ವಿನಷ್ಟಮಿತಿ
ವನಿತಾವನಿತಸ್ಯ ವಿನಷ್ಟಮಿತಿ ।
ಯದಿ ಚೈಕನಿರನ್ತರಸರ್ವಶಿವ-
ಮವಿನೋದವಿನೋದಮತಿಶ್ಚ ಕಥಮ್ ॥ ೬-೧೬॥
ಯದಿ ಮೋಹವಿಷಾದವಿಹೀನಪರೋ
ಯದಿ ಸಂಶಯಶೋಕವಿಹೀನಪರಃ ।
ಯದಿ ಚೈಕನಿರನ್ತರಸರ್ವಶಿವ-
ಮಹಮತ್ರ ಮಮೇತಿ ಕಥಂ ಚ ಪುನಃ ॥ ೬-೧೭॥
ಮಹಮೇತಿ
ನನು ಧರ್ಮವಿಧರ್ಮವಿನಾಶ ಇತಿ
ನನು ಬನ್ಧವಿಬನ್ಧವಿನಾಶ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ-
ಮಿಹದುಃಖವಿದುಃಖಮತಿಶ್ಚ ಕಥಮ್ ॥ ೬-೧೮॥
ನ ಹಿ ಯಾಜ್ಞಿಕಯಜ್ಞವಿಭಾಗ ಇತಿ
ನ ಹುತಾಶನವಸ್ತುವಿಭಾಗ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ವದ ಕರ್ಮಫಲಾನಿ ಭವನ್ತಿ ಕಥಮ್ ॥ ೬-೧೯॥
ನನು ಶೋಕವಿಶೋಕವಿಮುಕ್ತ ಇತಿ
ನನು ದರ್ಪವಿದರ್ಪವಿಮುಕ್ತ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ನನು ರಾಗವಿರಾಗಮತಿಶ್ಚ ಕಥಮ್ ॥ ೬-೨೦॥
ನ ಹಿ ಮೋಹವಿಮೋಹವಿಕಾರ ಇತಿ
ನ ಹಿ ಲೋಭವಿಲೋಭವಿಕಾರ ಇತಿ ।
ಯದಿ ಚೈಕನಿರನ್ತರಸರ್ವಶಿವಂ
ಹ್ಯವಿವೇಕವಿವೇಕಮತಿಶ್ಚ ಕಥಮ್ ॥ ೬-೨೧॥
ತ್ವಮಹಂ ನ ಹಿ ಹನ್ತ ಕದಾಚಿದಪಿ
ಕುಲಜಾತಿವಿಚಾರಮಸತ್ಯಮಿತಿ ।
ಅಹಮೇವ ಶಿವಃ ಪರಮಾರ್ಥ ಇತಿ
ಅಭಿವಾದನಮತ್ರ ಕರೋಮಿ ಕಥಮ್ ॥ ೬-೨೨॥
ಗುರುಶಿಷ್ಯವಿಚಾರವಿಶೀರ್ಣ ಇತಿ
ಉಪದೇಶವಿಚಾರವಿಶೀರ್ಣ ಇತಿ ।
ಅಹಮೇವ ಶಿವಃ ಪರಮಾರ್ಥ ಇತಿ
ಅಭಿವಾದನಮತ್ರ ಕರೋಮಿ ಕಥಮ್ ॥ ೬-೨೩॥
ನ ಹಿ ಕಲ್ಪಿತದೇಹವಿಭಾಗ ಇತಿ
ನ ಹಿ ಕಲ್ಪಿತಲೋಕವಿಭಾಗ ಇತಿ ।
ಅಹಮೇವ ಶಿವಃ ಪರಮಾರ್ಥ ಇತಿ
ಅಭಿವಾದನಮತ್ರ ಕರೋಮಿ ಕಥಮ್ ॥ ೬-೨೪॥
ಸರಜೋ ವಿರಜೋ ನ ಕದಾಚಿದಪಿ
ನನು ನಿರ್ಮಲನಿಶ್ಚಲಶುದ್ಧ ಇತಿ ।
ಅಹಮೇವ ಶಿವಃ ಪರಮಾರ್ಥ ಇತಿ
ಅಭಿವಾದನಮತ್ರ ಕರೋಮಿ ಕಥಮ್ ॥ ೬-೨೫॥
ನ ಹಿ ದೇಹವಿದೇಹವಿಕಲ್ಪ ಇತಿ
ಅನೃತಂ ಚರಿತಂ ನ ಹಿ ಸತ್ಯಮಿತಿ ।
ಅಹಮೇವ ಶಿವಃ ಪರಮಾರ್ಥ ಇತಿ
ಅಭಿವಾದನಮತ್ರ ಕರೋಮಿ ಕಥಮ್ ॥ ೬-೨೬॥
ವಿನ್ದತಿ ವಿನ್ದತಿ ನ ಹಿ ನ ಹಿ ಯತ್ರ
ಛನ್ದೋಲಕ್ಷಣಂ ನ ಹಿ ನ ಹಿ ತತ್ರ ।
ಸಮರಸಮಗ್ನೋ ಭಾವಿತಪೂತಃ
ಪ್ರಲಪತಿ ತತ್ತ್ವಂ ಪರಮವಧೂತಃ ॥ ೬-೨೭॥
ಅಥ ಸಪ್ತಮೋಽಧ್ಯಾಯಃ
ರಥ್ಯಾಕರ್ಪಟವಿರಚಿತಕನ್ಥಃ
ಪುಣ್ಯಾಪುಣ್ಯವಿವರ್ಜಿತಪನ್ಥಃ ।
ಶೂನ್ಯಾಗಾರೇ ತಿಷ್ಠತಿ ನಗ್ನೋ
ಶುದ್ಧನಿರಞ್ಜನಸಮರಸಮಗ್ನಃ ॥ ೭-೧॥
ಲಕ್ಷ್ಯಾಲಕ್ಷ್ಯವಿವರ್ಜಿತಲಕ್ಷ್ಯೋ
ಯುಕ್ತಾಯುಕ್ತವಿವರ್ಜಿತದಕ್ಷಃ ।
ಕೇವಲತತ್ತ್ವನಿರಞ್ಜನಪೂತೋ
ವಾದವಿವಾದಃ ಕಥಮವಧೂತಃ ॥ ೭-೨॥
ಆಶಾಪಾಶವಿಬನ್ಧನಮುಕ್ತಾಃ
ಶೌಚಾಚಾರವಿವರ್ಜಿತಯುಕ್ತಾಃ ।
ಏವಂ ಸರ್ವವಿವರ್ಜಿತಶಾನ್ತಾ-
ಸ್ತತ್ತ್ವಂ ಶುದ್ಧನಿರಞ್ಜನವನ್ತಃ ॥ ೭-೩॥
ಕಥಮಿಹ ದೇಹವಿದೇಹವಿಚಾರಃ
ಕಥಮಿಹ ರಾಗವಿರಾಗವಿಚಾರಃ ।
ನಿರ್ಮಲನಿಶ್ಚಲಗಗನಾಕಾರಂ
ಸ್ವಯಮಿಹ ತತ್ತ್ವಂ ಸಹಜಾಕಾರಮ್ ॥ ೭-೪॥
ಕಥಮಿಹ ತತ್ತ್ವಂ ವಿನ್ದತಿ ಯತ್ರ
ರೂಪಮರೂಪಂ ಕಥಮಿಹ ತತ್ರ ।
ಗಗನಾಕಾರಃ ಪರಮೋ ಯತ್ರ
ವಿಷಯೀಕರಣಂ ಕಥಮಿಹ ತತ್ರ ॥ ೭-೫॥
ಗಗನಾಕಾರನಿರನ್ತರಹಂಸ-
ಸ್ತತ್ತ್ವವಿಶುದ್ಧನಿರಞ್ಜನಹಂಸಃ ।
ಏವಂ ಕಥಮಿಹ ಭಿನ್ನವಿಭಿನ್ನಂ
ಬನ್ಧವಿಬನ್ಧವಿಕಾರವಿಭಿನ್ನಮ್ ॥ ೭-೬॥
ಕೇವಲತತ್ತ್ವನಿರನ್ತರಸರ್ವಂ
ಯೋಗವಿಯೋಗೌ ಕಥಮಿಹ ಗರ್ವಮ್ ।
ಏವಂ ಪರಮನಿರನ್ತರಸರ್ವ-
ಮೇವಂ ಕಥಮಿಹ ಸಾರವಿಸಾರಮ್ ॥ ೭-೭॥
ಕೇವಲತತ್ತ್ವನಿರಞ್ಜನಸರ್ವಂ
ಗಗನಾಕಾರನಿರನ್ತರಶುದ್ಧಮ್ ।
ಏವಂ ಕಥಮಿಹ ಸಙ್ಗವಿಸಙ್ಗಂ
ಸತ್ಯಂ ಕಥಮಿಹ ರಙ್ಗವಿರಙ್ಗಮ್ ॥ ೭-೮॥
ಯೋಗವಿಯೋಗೈ ರಹಿತೋ ಯೋಗೀ
ಭೋಗವಿಭೋಗೈ ರಹಿತೋ ಭೋಗೀ ।
ಏವಂ ಚರತಿ ಹಿ ಮನ್ದಂ ಮನ್ದಂ
ಮನಸಾ ಕಲ್ಪಿತಸಹಜಾನನ್ದಮ್ ॥ ೭-೯॥
ಬೋಧವಿಬೋಧೈಃ ಸತತಂ ಯುಕ್ತೋ
ದ್ವೈತಾದ್ವೈತೈಃ ಕಥಮಿಹ ಮುಕ್ತಃ ।
ಸಹಜೋ ವಿರಜಃ ಕಥಮಿಹ ಯೋಗೀ
ಶುದ್ಧನಿರಞ್ಜನಸಮರಸಭೋಗೀ ॥ ೭-೧೦॥
ಭಗ್ನಾಭಗ್ನವಿವರ್ಜಿತಭಗ್ನೋ
ಲಗ್ನಾಲಗ್ನವಿವರ್ಜಿತಲಗ್ನಃ ।
ಏವಂ ಕಥಮಿಹ ಸಾರವಿಸಾರಃ
ಸಮರಸತತ್ತ್ವಂ ಗಗನಾಕಾರಃ ॥ ೭-೧೧॥
ಸತತಂ ಸರ್ವವಿವರ್ಜಿತಯುಕ್ತಃ
ಸರ್ವಂ ತತ್ತ್ವವಿವರ್ಜಿತಮುಕ್ತಃ ।
ಏವಂ ಕಥಮಿಹ ಜೀವಿತಮರಣಂ
ಧ್ಯಾನಾಧ್ಯಾನೈಃ ಕಥಮಿಹ ಕರಣಮ್ ॥ ೭-೧೨॥
ಇನ್ದ್ರಜಾಲಮಿದಂ ಸರ್ವಂ ಯಥಾ ಮರುಮರೀಚಿಕಾ ।
ಅಖಣ್ಡಿತಮನಾಕಾರೋ ವರ್ತತೇ ಕೇವಲಃ ಶಿವಃ ॥ ೭-೧೩॥
ಧರ್ಮಾದೌ ಮೋಕ್ಷಪರ್ಯನ್ತಂ ನಿರೀಹಾಃ ಸರ್ವಥಾ ವಯಮ್ ।
ಕಥಂ ರಾಗವಿರಾಗೈಶ್ಚ ಕಲ್ಪಯನ್ತಿ ವಿಪಶ್ಚಿತಃ ॥ ೭-೧೪॥
ವಿನ್ದತಿ ವಿನ್ದತಿ ನ ಹಿ ನ ಹಿ ಯತ್ರ
ಛನ್ದೋಲಕ್ಷಣಂ ನ ಹಿ ನ ಹಿ ತತ್ರ ।
ಸಮರಸಮಗ್ನೋ ಭಾವಿತಪೂತಃ
ಪ್ರಲಪತಿ ತತ್ತ್ವಂ ಪರಮವಧೂತಃ ॥ ೭-೧೫॥
ಅಥ ಅಷ್ಟಮೋಽಧ್ಯಾಯಃ
ತ್ವದ್ಯಾತ್ರಯಾ ವ್ಯಾಪಕತಾ ಹತಾ ತೇ
ಧ್ಯಾನೇನ ಚೇತಃಪರತಾ ಹತಾ ತೇ ।
ಸ್ತುತ್ಯಾ ಮಯಾ ವಾಕ್ಪರತಾ ಹತಾ ತೇ
ಕ್ಷಮಸ್ವ ನಿತ್ಯಂ ತ್ರಿವಿಧಾಪರಾಧಾನ್ ॥ ೮-೧॥
ಕಾಮೈರಹತಧೀರ್ದಾನ್ತೋ ಮೃದುಃ ಶುಚಿರಕಿಞ್ಚನಃ ।
ಅನೀಹೋ ಮಿತಭುಕ್ ಶಾನ್ತಃ ಸ್ಥಿರೋ ಮಚ್ಛರಣೋ ಮುನಿಃ ॥ ೮-೨॥
ಅಪ್ರಮತ್ತೋ ಗಭೀರಾತ್ಮಾ ಧೃತಿಮಾನ್ ಜಿತಷಡ್ಗುಣಃ ।
ಅಮಾನೀ ಮಾನದಃ ಕಲ್ಪೋ ಮೈತ್ರಃ ಕಾರುಣಿಕಃ ಕವಿಃ ॥ ೮-೩॥
ಕೃಪಾಲುರಕೃತದ್ರೋಹಸ್ತಿತಿಕ್ಷುಃ ಸರ್ವದೇಹಿನಾಮ್ ।
ಸತ್ಯಸಾರೋಽನವದ್ಯಾತ್ಮಾ ಸಮಃ ಸರ್ವೋಪಕಾರಕಃ ॥ ೮-೪॥
ಅವಧೂತಲಕ್ಷಣಂ ವರ್ಣೈರ್ಜ್ಞಾತವ್ಯಂ ಭಗವತ್ತಮೈಃ ।
ವೇದವರ್ಣಾರ್ಥತತ್ತ್ವಜ್ಞೈರ್ವೇದವೇದಾನ್ತವಾದಿಭಿಃ ॥ ೮-೫॥
ಆಶಾಪಾಶವಿನಿರ್ಮುಕ್ತ ಆದಿಮಧ್ಯಾನ್ತನಿರ್ಮಲಃ ।
ಆನನ್ದೇ ವರ್ತತೇ ನಿತ್ಯಮಕಾರಂ ತಸ್ಯ ಲಕ್ಷಣಮ್ ॥ ೮-೬॥
ವಾಸನಾ ವರ್ಜಿತಾ ಯೇನ ವಕ್ತವ್ಯಂ ಚ ನಿರಾಮಯಮ್ ।
ವರ್ತಮಾನೇಷು ವರ್ತೇತ ವಕಾರಂ ತಸ್ಯ ಲಕ್ಷಣಮ್ ॥ ೮-೭॥
ಧೂಲಿಧೂಸರಗಾತ್ರಾಣಿ ಧೂತಚಿತ್ತೋ ನಿರಾಮಯಃ ।
ಧಾರಣಾಧ್ಯಾನನಿರ್ಮುಕ್ತೋ ಧೂಕಾರಸ್ತಸ್ಯ ಲಕ್ಷಣಮ್ ॥ ೮-೮॥
ತತ್ತ್ವಚಿನ್ತಾ ಧೃತಾ ಯೇನ ಚಿನ್ತಾಚೇಷ್ಟಾವಿವರ್ಜಿತಃ ।
ತಮೋಽಹಂಕಾರನಿರ್ಮುಕ್ತಸ್ತಕಾರಸ್ತಸ್ಯ ಲಕ್ಷಣಮ್ ॥ ೮-೯॥
ದತ್ತಾತ್ರೇಯಾವಧೂತೇನ ನಿರ್ಮಿತಾನನ್ದರೂಪಿಣಾ ।
ಯೇ ಪಠನ್ತಿ ಚ ಶೃಣ್ವನ್ತಿ ತೇಷಾಂ ನೈವ ಪುನರ್ಭವಃ ॥ ೮-೧೦॥

More Brahman Stotras

ॐ भद्रं कर्णेभिः शृणुयाम
Bhadram Karne
भूगुर्वसिष्ठः क्रतुरंगिराश्च मनुः पुलस्त्यः
Bhugurvashista Kraturam
ब्रह्मज्ञानावलीमाला
Brahma Jnanavali Mala
श्री ब्रह्मसूत्राणि
Brahma Sutras
ब्रह्मार्पणं ब्रह्म
Brahmarpanam Brahma Havih
चित्ति पन्नम्
Chitti Pannam
दशश्लोकी न भूमिर्न तोयं
Dasa Shloki
द्वादश आदित्य ध्यान श्लोकाः (पाठान्तरम्)
Dvadasha Aditya Dhyana Shlokah (Pathantaram)
View All Veda & Upanishad Collection →

Explore More

Veda & Upanishad CollectionWealthObstaclesHealthProtectionWisdomHome