ଗୀତଗୋଵିନ୍ଦଂ ପ୍ରଥମଃ ସର୍ଗଃ - ସାମୋଦ ଦାମୋଦରଃ

॥ ଅଷ୍ଟପଦୀ ॥
॥ ଶ୍ରୀ ଗୋପାଲକ ଧ୍ଯାନମ୍ ॥
ଯଦ୍ଗୋପୀଵଦନେନ୍ଦୁମଣ୍ଡନମଭୂତ୍କସ୍ତୂରିକାପତ୍ରକଂ ଯଲ୍ଲକ୍ଷ୍ମୀକୁଚଶାତକୁମ୍ଭ କଲଶେ ଵ୍ଯାଗୋଚମିନ୍ଦୀଵରମ୍ ।
ଯନ୍ନିର୍ଵାଣଵିଧାନସାଧନଵିଧୌ ସିଦ୍ଧାଞ୍ଜନଂ ଯୋଗିନାଂ ତନ୍ନଶ୍ଯାମଲମାଵିରସ୍ତୁ ହୃଦଯେ କୃଷ୍ଣାଭିଧାନଂ ମହଃ ॥ 1 ॥

॥ ଶ୍ରୀ ଜଯଦେଵ ଧ୍ଯାନମ୍ ॥
ରାଧାମନୋରମରମାଵରରାସଲୀଲ-ଗାନାମୃତୈକଭଣିତଂ କଵିରାଜରାଜମ୍ ।
ଶ୍ରୀମାଧଵାର୍ଚ୍ଚନଵିଧଵନୁରାଗସଦ୍ମ-ପଦ୍ମାଵତୀପ୍ରିଯତମଂ ପ୍ରଣତୋସ୍ମି ନିତ୍ଯମ୍ ॥ 2 ॥

ଶ୍ରୀଗୋପଲଵିଲାସିନୀ ଵଲଯସଦ୍ରତ୍ନାଦିମୁଗ୍ଧାକୃତି ଶ୍ରୀରାଧାପତିପାଦପଦ୍ମଭଜନାନନ୍ଦାବ୍ଧିମଗ୍ନୋଽନିଶମ୍ ॥
ଲୋକେ ସତ୍କଵିରାଜରାଜ ଇତି ଯଃ ଖ୍ଯାତୋ ଦଯାମ୍ଭୋନିଧିଃ ତଂ ଵନ୍ଦେ ଜଯଦେଵସଦ୍ଗୁରୁମହଂ ପଦ୍ମାଵତୀଵଲ୍ଲଭମ୍ ॥ 3 ॥
॥ ପ୍ରଥମଃ ସର୍ଗଃ ॥
॥ ସାମୋଦଦାମୋଦରଃ ॥
ମେଘୈର୍ମେଦୁରମମ୍ବରଂ ଵନଭୁଵଃ ଶ୍ଯାମାସ୍ତମାଲଦ୍ରୁମୈ-ର୍ନକ୍ତଂ ଭୀରୁରଯଂ ତ୍ଵମେଵ ତଦିମଂ ରାଧେ ଗୃହଂ ପ୍ରାପଯ ।
ଇତ୍ଥଂ ନନ୍ଦନିଦେଶିତଶ୍ଚଲିତଯୋଃ ପ୍ରତ୍ଯଧ୍ଵକୁଞ୍ଜଦ୍ରୁମଂ ରାଧାମାଧଵଯୋର୍ଜଯନ୍ତି ଯମୁନାକୂଲେ ରହଃକେଲଯଃ ॥ 1 ॥
ଵାଗ୍ଦେଵତାଚରିତଚିତ୍ରିତଚିତ୍ତସଦ୍ମା ପଦ୍ମାଵତୀଚରଣଚାରଣଚକ୍ରଵର୍ତୀ ।
ଶ୍ରୀଵାସୁଦେଵରତିକେଲିକଥାସମେତଂ ଏତଂ କରୋତି ଜଯଦେଵକଵିଃ ପ୍ରବନ୍ଧମ୍ ॥ 2 ॥
ଯଦି ହରିସ୍ମରଣେ ସରସଂ ମନୋ ଯଦି ଵିଲାସକଲାସୁ କୁତୂହଲମ୍ ।
ମଧୁରକୋମଲକାନ୍ତପଦାଵଲୀଂ ଶୃଣୁ ତଦା ଜଯଦେଵସରସ୍ଵତୀମ୍ ॥ 3 ॥
ଵାଚଃ ପଲ୍ଲଵଯତ୍ଯୁମାପତିଧରଃ ସନ୍ଦର୍ଭଶୁଦ୍ଧିଂ ଗିରାଂ ଜାନୀତେ ଜଯଦେଵ ଏଵ ଶରଣଃ ଶ୍ଲାଘ୍ଯୋ ଦୁରୂହଦ୍ରୁତେ ।
ଶୃଙ୍ଗାରୋତ୍ତରସତ୍ପ୍ରମେଯରଚନୈରାଚାର୍ଯଗୋଵର୍ଧନ-ସ୍ପର୍ଧୀ କୋଽପି ନ ଵିଶ୍ରୁତଃ ଶ୍ରୁତିଧରୋ ଧୋଯୀ କଵିକ୍ଷ୍ମାପତିଃ ॥ 4 ॥
॥ ଗୀତଂ 1 ॥
ପ୍ରଲଯପଯୋଧିଜଲେ ଧୃତଵାନସି ଵେଦମ୍ ।
ଵିହିତଵହିତ୍ରଚରିତ୍ରମଖେଦମ୍ ॥
କେଶଵ ଧୃତମୀନଶରୀର ଜଯ ଜଗଦୀଶ ହରେ ॥ 1 ॥
କ୍ଷିତିରତିଵିପୁଲତରେ ତଵ ତିଷ୍ଠତି ପୃଷ୍ଠେ ।
ଧରଣିଧରଣକିଣଚକ୍ରଗରିଷ୍ଠେ ॥
କେଶଵ ଧୃତକଚ୍ଛପରୂପ ଜଯ ଜଗଦୀଶ ହରେ ॥ 2 ॥
ଵସତି ଦଶନଶିଖରେ ଧରଣୀ ତଵ ଲଗ୍ନା ।
ଶଶିନି କଲଙ୍କକଲେଵ ନିମଗ୍ନା ॥
କେଶଵ ଧୃତସୂକରରୂପ ଜଯ ଜଗଦୀଶ ହରେ ॥ 3 ॥
ତଵ କରକମଲଵରେ ନଖମଦ୍ଭୁତଶୃଙ୍ଗମ୍ ।
ଦଲିତହିରଣ୍ଯକଶିପୁତନୁଭୃଙ୍ଗମ୍ ॥
କେଶଵ ଧୃତନରହରିରୂପ ଜଯ ଜଗଦୀଶ ହରେ ॥ 4 ॥
ଛଲଯସି ଵିକ୍ରମଣେ ବଲିମଦ୍ଭୁତଵାମନ ।
ପଦନଖନୀରଜନିତଜନପାଵନ ॥
କେଶଵ ଧୃତଵାମନରୂପ ଜଯ ଜଗଦୀଶ ହରେ ॥ 5 ॥
କ୍ଷତ୍ରିଯରୁଧିରମଯେ ଜଗଦପଗତପାପମ୍ ।
ସ୍ନପଯସି ପଯସି ଶମିତଭଵତାପମ୍ ॥
କେଶଵ ଧୃତଭୃଘୁପତିରୂପ ଜଯ ଜଗଦୀଶ ହରେ ॥ 6 ॥
ଵିତରସି ଦିକ୍ଷୁ ରଣେ ଦିକ୍ପତିକମନୀଯମ୍ ।
ଦଶମୁଖମୌଲିବଲିଂ ରମଣୀଯମ୍ ॥
କେଶଵ ଧୃତରାମଶରୀର ଜଯ ଜଗଦୀଶ ହରେ ॥ 7 ॥
ଵହସି ଵପୁଷି ଵିଶଦେ ଵସନଂ ଜଲଦାଭମ୍ ।
ହଲହତିଭୀତିମିଲିତଯମୁନାଭମ୍ ॥
କେଶଵ ଧୃତହଲଧରରୂପ ଜଯ ଜଗଦୀଶ ହରେ ॥ 8 ॥
ନିନ୍ଦସି ଯଜ୍ଞଵିଧେରହହ ଶ୍ରୁତିଜାତମ୍ ।
ସଦଯହୃଦଯଦର୍ଶିତପଶୁଘାତମ୍ ॥
କେଶଵ ଧୃତବୁଦ୍ଧଶରୀର ଜଯ ଜଗଦୀଶ ହରେ ॥ 9 ॥
ମ୍ଲେଚ୍ଛନିଵହନିଧନେ କଲଯସି କରଵାଲମ୍ ।
ଧୂମକେତୁମିଵ କିମପି କରାଲମ୍ ॥
କେଶଵ ଧୃତକଲ୍କିଶରୀର ଜଯ ଜଗଦୀଶ ହରେ ॥ 10 ॥
ଶ୍ରୀଜଯଦେଵକଵେରିଦମୁଦିତମୁଦାରମ୍ ।
ଶୃଣୁ ସୁଖଦଂ ଶୁଭଦଂ ଭଵସାରମ୍ ॥
କେଶଵ ଧୃତଦଶଵିଧରୂପ ଜଯ ଜଗଦୀଶ ହରେ ॥ 11 ॥
ଵେଦାନୁଦ୍ଧରତେ ଜଗନ୍ନିଵହତେ ଭୂଗୋଲମୁଦ୍ବିଭ୍ରତେ ଦୈତ୍ଯଂ ଦାରଯତେ ବଲିଂ ଛଲଯତେ କ୍ଷତ୍ରକ୍ଷଯଂ କୁର୍ଵତେ ।
ପୌଲସ୍ତ୍ଯଂ ଜଯତେ ହଲଂ କଲଯତେ କାରୁଣ୍ଯମାତନ୍ଵତେ ମ୍ଲେଚ୍ଛାନ୍ମୂର୍ଚ୍ଛଯତେ ଦଶାକୃତିକୃତେ କୃଷ୍ଣାଯ ତୁଭ୍ଯଂ ନମଃ ॥ 5 ॥
॥ ଗୀତଂ 2 ॥
ଶ୍ରିତକମଲାକୁଚମଣ୍ଡଲ! ଧୃତକୁଣ୍ଡଲ! ।
କଲିତଲଲିତଵନମାଲ! ଜଯ, ଜଯ, ଦେଵ! ହରେ! ॥ 1 ॥
ଦିନମଣୀମଣ୍ଡଲମଣ୍ଡନ! ଭଵଖଣ୍ଡନ! ।
ମୁନିଜନମାନସହଂସ! ଜଯ, ଜଯ, ଦେଵ! ହରେ! ॥ 2 ॥
କାଲିଯଵିଷଧରଗଞ୍ଜନ! ଜନରଞ୍ଜନ! ।
ଯଦୁକୁଲନଲିନଦିନେଶ! ଜଯ, ଜଯ, ଦେଵ! ହରେ! ॥ 3 ॥
ମଧୁମୁରନରକଵିନାଶନ! ଗରୁଡାସନ! ।
ସୁରକୁଲକେଲିନିଦାନ! ଜଯ, ଜଯ, ଦେଵ! ହରେ! ॥ 4 ॥
ଅମଲକମଲଦଲଲୋଚନ! ଭଵମୋଚନ୍! ।
ତ୍ରିଭୁଵନଭଵନନିଧାନ! ଜଯ, ଜଯ, ଦେଵ! ହରେ! ॥ 5 ॥
ଜନକସୁତାକୃତଭୂଷଣ! ଜିତଦୂଷଣ! ।
ସମରଶମିତଦଶକଣ୍ଠ! ଜଯ, ଜଯ, ଦେଵ! ହରେ! ॥ 6 ॥
ଅଭିନଵଜଲଧରସୁନ୍ଦର! ଧୃତମନ୍ଦର! ।
ଶ୍ରୀମୁଖଚନ୍ଦ୍ରଚକୋର! ଜଯ, ଜଯ, ଦେଵ! ହରେ! ॥ 7 ॥
ଶ୍ରୀଜଯଦେଵକଵେରିଦଂ କୁରୁତେ ମୁଦମ୍ ।
ମଙ୍ଗଲମୁଜ୍ଜ୍ଵଲଗୀତଂ; ଜଯ, ଜଯ, ଦେଵ! ହରେ! ॥ 8 ॥
ପଦ୍ମାପଯୋଧରତଟୀପରିରମ୍ଭଲଗ୍ନ-କାଶ୍ମୀରମୁଦ୍ରିତମୁରୋ ମଧୁସୂଦନସ୍ଯ ।
ଵ୍ଯକ୍ତାନୁରାଗମିଵ ଖେଲଦନଙ୍ଗଖେଦ-ସ୍ଵେଦାମ୍ବୁପୂରମନୁପୂରଯତୁ ପ୍ରିଯଂ ଵଃ ॥ 6 ॥
ଵସନ୍ତେ ଵାସନ୍ତୀକୁସୁମସୁକୁମାରୈରଵଯଵୈ-ର୍ଭ୍ରମନ୍ତୀଂ କାନ୍ତାରେ ବହୁଵିହିତକୃଷ୍ଣାନୁସରଣାମ୍ ।
ଅମନ୍ଦଂ କନ୍ଦର୍ପଜ୍ଵରଜନିତଚିନ୍ତାକୁଲତଯା ଵଲଦ୍ବାଧାଂ ରାଧାଂ ସରସମିଦମୁଚେ ସହଚରୀ ॥ 7 ॥
॥ ଗୀତଂ 3 ॥
ଲଲିତଲଵଙ୍ଗଲତାପରିଶୀଲନକୋମଲମଲଯସମୀରେ ।
ମଧୁକରନିକରକରମ୍ବିତକୋକିଲକୂଜିତକୁଞ୍ଜକୁଟୀରେ ॥
ଵିହରତି ହରିରିହ ସରସଵସନ୍ତେ ନୃତ୍ଯତି ଯୁଵତିଜନେନ ସମଂ ସଖି ଵିରହିଜନସ୍ଯ ଦୁରନ୍ତେ ॥ 1 ॥
ଉନ୍ମଦମଦନମନୋରଥପଥିକଵଧୂଜନଜନିତଵିଲାପେ ।
ଅଲିକୁଲସଙ୍କୁଲକୁସୁମସମୂହନିରାକୁଲବକୁଲକଲାପେ ॥ 2 ॥
ମୃଗମଦସୌରଭରଭସଵଶଂଵଦନଵଦଲମାଲତମାଲେ ।
ଯୁଵଜନହୃଦଯଵିଦାରଣମନସିଜନଖରୁଚିକିଂଶୁକଜାଲେ ॥ 3 ॥
ମଦନମହୀପତିକନକଦଣ୍ଡରୁଚିକେଶରକୁସୁମଵିକାସେ ।
ମିଲିତଶିଲୀମୁଖପାଟଲିପଟଲକୃତସ୍ମରତୂଣଵିଲାସେ ॥ 4 ॥
ଵିଗଲିତଲଜ୍ଜିତଜଗଦଵଲୋକନତରୁଣକରୁଣକୃତହାସେ ।
ଵିରହିନିକୃନ୍ତନକୁନ୍ତମୁଖାକୃତିକେତକଦନ୍ତୁରିତାଶେ ॥ 5 ॥
ମାଧଵିକାପରିମଲଲଲିତେ ନଵମାଲିକଜାତିସୁଗନ୍ଧୌ ।
ମୁନିମନସାମପି ମୋହନକାରିଣି ତରୁଣାକାରଣବନ୍ଧୌ ॥ 6 ॥
ସ୍ଫୁରଦତିମୁକ୍ତଲତାପରିରମ୍ଭଣମୁକୁଲିତପୁଲକିତଚୂତେ ।
ବୃନ୍ଦାଵନଵିପିନେ ପରିସରପରିଗତଯମୁନାଜଲପୂତେ ॥ 7 ॥
ଶ୍ରୀଜଯଦେଵଭଣିତମିଦମୁଦଯତି ହରିଚରଣସ୍ମୃତିସାରମ୍ ।
ସରସଵସନ୍ତସମଯଵନଵର୍ଣନମନୁଗତମଦନଵିକାରମ୍ ॥ 8 ॥
ଦରଵିଦଲିତମଲ୍ଲୀଵଲ୍ଲିଚଞ୍ଚତ୍ପରାଗ-ପ୍ରକଟିତପଟଵାସୈର୍ଵାସଯନ୍ କାନନାନି ।
ଇହ ହି ଦହତି ଚେତଃ କେତକୀଗନ୍ଧବନ୍ଧୁଃ ପ୍ରସରଦସମବାଣପ୍ରାଣଵଦ୍ଗନ୍ଧଵାହଃ ॥ 8 ॥
ଉନ୍ମୀଲନ୍ମଧୁଗନ୍ଧଲୁବ୍ଧମଧୁପଵ୍ଯାଧୂତଚୂତାଙ୍କୁର-କ୍ରୀଡତ୍କୋକିଲକାକଲୀକଲକଲୈରୁଦ୍ଗୀର୍ଣକର୍ଣଜ୍ଵରାଃ ।
ନୀଯନ୍ତେ ପଥିକୈଃ କଥଙ୍କଥମପି ଧ୍ଯାନାଵଧାନକ୍ଷଣ-ପ୍ରାପ୍ତପ୍ରାଣସମାସମାଗମରସୋଲ୍ଲାସୈରମୀ ଵାସରାଃ ॥ 9 ॥
ଅନେକନାରୀପରିରମ୍ଭସମ୍ଭ୍ରମ-ସ୍ଫୁରନ୍ମନୋହାରିଵିଲାସଲାଲସମ୍ ।
ମୁରାରିମାରାଦୁପଦର୍ଶଯନ୍ତ୍ଯସୌ ସଖୀ ସମକ୍ଷଂ ପୁନରାହ ରାଧିକାମ୍ ॥ 10 ॥
॥ ଗୀତଂ 4 ॥
ଚନ୍ଦନଚର୍ଚିତନୀଲକଲେବରପୀତଵସନଵନମାଲୀ ।
କେଲିଚଲନ୍ମଣିକୁଣ୍ଡଲମଣ୍ଡିତଗଣ୍ଡଯୁଗସ୍ମିତଶାଲୀ ॥
ହରିରିହମୁଗ୍ଧଵଧୂନିକରେ ଵିଲାସିନି ଵିଲସତି କେଲିପରେ ॥ 1 ॥
ପୀନପଯୋଧରଭାରଭରେଣ ହରିଂ ପରିରମ୍ଯ ସରାଗମ୍ ।
ଗୋପଵଧୂରନୁଗାଯତି କାଚିଦୁଦଞ୍ଚିତପଞ୍ଚମରାଗମ୍ ॥ 2 ॥
କାପି ଵିଲାସଵିଲୋଲଵିଲୋଚନଖେଲନଜନିତମନୋଜମ୍ ।
ଧ୍ଯାଯତି ମୁଗ୍ଧଵଧୂରଧିକଂ ମଧୁସୂଦନଵଦନସରୋଜମ୍ ॥ 3 ॥
କାପି କପୋଲତଲେ ମିଲିତା ଲପିତୁଂ କିମପି ଶ୍ରୁତିମୂଲେ ।
ଚାରୁ ଚୁଚୁମ୍ବ ନିତମ୍ବଵତୀ ଦଯିତଂ ପୁଲକୈରନୁକୂଲେ ॥ 4 ॥
କେଲିକଲାକୁତୁକେନ ଚ କାଚିଦମୁଂ ଯମୁନାଜଲକୂଲେ ।
ମଞ୍ଜୁଲଵଞ୍ଜୁଲକୁଞ୍ଜଗତଂ ଵିଚକର୍ଷ କରେଣ ଦୁକୂଲେ ॥ 5 ॥
କରତଲତାଲତରଲଵଲଯାଵଲିକଲିତକଲସ୍ଵନଵଂଶେ ।
ରାସରସେ ସହନୃତ୍ଯପରା ହରିଣା ଯୁଵତିଃ ପ୍ରଶଶଂସେ ॥ 6 ॥
ଶ୍ଲିଷ୍ଯତି କାମପି ଚୁମ୍ବତି କାମପି କାମପି ରମଯତି ରାମାମ୍ ।
ପଶ୍ଯତି ସସ୍ମିତଚାରୁପରାମପରାମନୁଗଚ୍ଛତି ଵାମାମ୍ ॥ 7 ॥
ଶ୍ରୀଜଯଦେଵକଵେରିଦମଦ୍ଭୁତକେଶଵକେଲିରହସ୍ଯମ୍ ।
ଵୃନ୍ଦାଵନଵିପିନେ ଲଲିତଂ ଵିତନୋତୁ ଶୁଭାନି ଯଶସ୍ଯମ୍ ॥ 8 ॥
ଵିଶ୍ଵେଷାମନୁରଞ୍ଜନେନ ଜନଯନ୍ନାନନ୍ଦମିନ୍ଦୀଵର-ଶ୍ରେଣୀଶ୍ଯାମଲକୋମଲୈରୁପନଯନ୍ନଙ୍ଗୈରନଙ୍ଗୋତ୍ସଵମ୍ ।
ସ୍ଵଚ୍ଛନ୍ଦଂ ଵ୍ରଜସୁନ୍ଦରୀଭିରଭିତଃ ପ୍ରତ୍ଯଙ୍ଗମାଲିଙ୍କିତଃ ଶୃଙ୍ଗାରଃ ସଖି ମୂର୍ତିମାନିଵ ମଧୌ ମୁଗ୍ଧୋ ହରିଃ କ୍ରୀଡତି ॥ 11 ॥
ଅଦ୍ଯୋତ୍ସଙ୍ଗଵସଦ୍ଭୁଜଙ୍ଗକଵଲକ୍ଲେଶାଦିଵେଶାଚଲଂ ପ୍ରାଲେଯପ୍ଲଵନେଚ୍ଛଯାନୁସରତି ଶ୍ରୀଖଣ୍ଡଶୈଲାନିଲଃ ।
କିଂ ଚ ସ୍ନିଗ୍ଧରସାଲମୌଲିମୁକୁଲାନ୍ଯାଲୋକ୍ଯ ହର୍ଷୋଦଯା-ଦୁନ୍ମୀଲନ୍ତି କୁହୂଃ କୁହୂରିତି କଲୋତ୍ତାଲାଃ ପିକାନାଂ ଗିରଃ ॥ 12 ॥
ରାସୋଲ୍ଲାସଭରେଣଵିଭ୍ରମଭୃତାମାଭୀରଵାମଭ୍ରୁଵା-ମଭ୍ଯର୍ଣଂ ପରିରମ୍ଯନିର୍ଭରମୁରଃ ପ୍ରେମାନ୍ଧଯା ରାଧଯା ।
ସାଧୁ ତ୍ଵଦ୍ଵଦନଂ ସୁଧାମଯମିତି ଵ୍ଯାହୃତ୍ଯ ଗୀତସ୍ତୁତି-ଵ୍ଯାଜାଦୁଦ୍ଭଟଚୁମ୍ବିତସ୍ମିତମନୋହରୀ ହରିଃ ପାତୁ ଵଃ ॥ 13 ॥