2.5 - upahomaśeṣaḥ - kṛṣṇa yajurveda taittirīya brāhmaṇa pāṭhaḥ - prāṇo rakṣati

kṛṣṇa yajurvedīya taittirīya brāhmaṇe dvitīyāṣṭake pañcamaḥ prapāṭhakaḥ - upahomaśeṣaḥ
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | hariḥ om ||
2.5.1 upahomāḥ

prāṇo ra̭kṣati viśvameja̭t | iryo̭ bhūtvā ba̭hudhā bahūni̭ | sa ithsarvaṃ-vyā~̭naśe || yo devo deveṣṷ vibhūrantaḥ | āvṛ̭dūdā-tkṣetriya̭ddhvagadvṛṣā | tami-tprāṇa-mmanaso pa̭śikṣata | agra̭-ndevānā̭-midama̭ttu no haviḥ || mana̭saścittedam | bhūta-mbhavya̭-ñca gupyate | taddhi deveṣva̭griyam || 1 ||
ā na̭ etu puraścaram | saha devairimagṃ havam | mana-śśreya̭si śreyasi | karma̭n. yajñapa̭ti-ndadha̭t || juṣatā-mme vāgidagṃ haviḥ | virāḍdevī purohi̭tā | havyavāḍana̭ pāyinī || yayā̭ rūpāṇi̭ bahudhā vada̭nti | peśāgṃ̭si devāḥ pa̭rame janitre | sāno̭ virāḍana̭pasphurantī || 2 ||
vāgdevī jṷṣatāmidagṃ haviḥ || cakṣṷ-rdevānā-ñjyoti̭ramṛte nya̭ktam | asya vijñānā̭ya bahudhā nidhī̭yate | tasya̭ sumna-ma̭śīmahi | mā no̭ hāsī-dvicakṣaṇam || āyurinnaḥ pratīryatām | ana̭ndhā-ścakṣṷṣā vayam | jīvā jyoti̭raśīmahi | suvarjyoti̭-rutāmṛtam || śrotrḙṇa bhadra muta śṛ̭ṇvanti satyam | śrotrḙṇa vāca̭-mbahudhodya mā̭nām | śrotrḙṇa moda̭śca maha̭śca śrūyate | śrotrḙṇa sarvā diśa āśṛ̭ṇomi || yena prācyā̭ uta da̭kṣiṇā | pratīcyai̭ diśa-śśṛṇvantyṷttarāt | tadicchrotra̭-mbahudhodyamā̭nam | arānna nemiḥ pari sarva̭-mbabhūva || 3 ||

(agri - yamana̭pasphurantī - satyagṃ sapta ca̭) (a. 1)
2.5.2 upahomāḥ

udehi̭ vājinyo a̭syaphsva̭ntaḥ | idagṃ rāṣṭramāvi̭śa sūnṛtā̭vat | yo rohi̭to viśva̭mida-ñjajāna̭ | sa no̭ rāṣṭreṣu sudhi̭tāndadhātu || rohagṃ̭ rohagṃ rohi̭ta ārṷroha | prajābhirvṛddhi̭-ñjanuṣā̭mupastham | tābhi-ssagṃra̭bdho avidathṣaḍurvīḥ | gātu-mprapaśya̭nniha rāṣṭramāhāḥ || āhā̭rṣī-drāṣṭramiha rohi̭taḥ | mṛdho vyāsthadabha̭ya-nno astu || 4 ||
asmabhya̭-ndyāvāpṛthivī śakva̭rībhiḥ | rāṣṭra-ndṷhāthāmiha revatī̭bhiḥ || vima̭marśa rohi̭to viśvarṷ̄paḥ | samācakrāṇaḥ praruho ruha̭śca | diva̭gantvāya̭ mahatā ma̭himnā | vi no̭ rāṣṭramṷnattu paya̭sā svena̭ || yāste viśastapa̭sā sambabhūvuḥ | gāyatraṃ-va~thsamanu tāsta āguḥ̭ | tāstvā vi̭śantu maha̭sā svena̭ | sa-mmā̭tā putro abhyḙtu rohi̭taḥ || 5 ||
yūyamṷgrā marutaḥ pṛśnimātaraḥ | indrḙṇa sayujā pramṛ̭ṇītha śatrūṋ | ā vo rohi̭to aśṛṇodabhidyavaḥ | trisa̭ptāso maruta-ssvādusammudaḥ || rohi̭to dyāvā̭pṛthivī ja̭jāna | tasmiggstantṷ-mparameṣṭhī ta̭tāna | tasmi̭ñchiśriye aja eka̭pāt | adṛgṃ̭ haddyāvā̭pṛthivī balḙna || rohi̭to dyāvā̭pṛthivī a̭dṛgṃhat | tena suvaḥ̭ stabhita-ntena nākaḥ̭ || 6 ||
so antari̭kṣe raja̭so vimānaḥ̭ | tena̭ devā-ssuvaranva̭vindann || suśeva̭-ntvā bhānavo̭ dīdivāgṃsam | sama̭grāso juhvo̭ jātavedaḥ | ukṣanti̭ tvā vājinamā ghṛtena̭ | sagṃsa̭magne yuvase bhoja̭nāni || agne śardha̭ mahate saubha̭gāya | tava̭ dyumnā-nyṷttamāni̭ santu | sa-ñjāspatyagṃ suyamamākṛ̭ṇuṣva | śatrūyatāmabhiti̭ṣṭhā mahā̭si || 7 ||

(a- stvetu rohi̭to - nāko - mahāgṃ̭si) (a. 2)
2.5.3 upahomāḥ

puna̭rna indro̭ maghavā̭ dadātu | dhanā̭ni śakro dhanyaḥ̭ surādhāḥ | arvācīna̭-ṅkṛṇutāṃ-yā~cito manaḥ̭ | śruṣṭī no̭ asya haviṣo̭ juṣāṇaḥ || yāni̭ no jina-ndhanā̭ni | jahartha̭ śūra manyunā | indrānṷvinda nastāni̭ | anena̭ haviṣā punaḥ̭ || indra āśābhyaḥ pari̭ | sarvābhyo-'bha̭ya-ṅkarat || 8 ||
jetā śatrūn. vica̭rṣaṇiḥ || ākūtyai tvā kāmā̭ya tvā samṛdhe tvā | puro da̭dhe amṛtatvāya̭ jīvase || ākṷ̄timasyāva̭se | kāma̭masya samṛ̭ddhyai | indra̭sya yuñjate dhiyaḥ̭ || ākṷ̄ti-ndevī-mmana̭saḥ puro da̭dhe | yajñasya̭ mātā suhavā̭ me astu | yadicchāmi mana̭sā sakā̭maḥ | videya̭menaddhṛda̭ye nivi̭ṣṭam || 9 ||
sedagniragnīgṃ ratyetyanyān | yatra̭ vājī tana̭yo vīḍupā̭ṇiḥ | sahasra̭pāthā akṣarā̭ sameti̭ || āśā̭nā-ntvā ''śāpālebhyaḥ̭ | caturbhyo̭ amṛtebhyaḥ | ida-mbhūtasyāddhya̭kṣebhyaḥ | vidhema̭ haviṣā̭ vayam || viśvā āśā madhṷnā sagṃsṛ̭jāmi | anamīvā āpa oṣa̭dhayo bhavantu | ayaṃ-ya~ja̭māno mṛdho vya̭syatām || 10 ||
agṛ̭bhītāḥ paśavaḥ̭ santu sarve || agni-ssomo varṷṇo mitra indraḥ̭ | bṛhaspatiḥ̭ savitā ya-ssa̭hasrī | pūṣā no gobhirava̭sā sara̭svatī | tvaṣṭā̭ rūpāṇi sama̭naktu yajñaiḥ || tvaṣṭā̭ rūpāṇi dadha̭tī sara̭svatī | pūṣā bhagagṃ̭ savitā no̭ dadātu | bṛhaspati-rdadadindraḥ̭ sahasram | mitro dātā varṷṇa-ssomo̭ agniḥ || 11 ||

(karan - nivi̭ṣṭa - masyatāṃ - +nava̭ ca) (a. 3)
2.5.4 upahomāḥ

ā no̭ bhara bhaga̭mindra dyumantam | ni tḙ deṣṇasya̭ dhīmahi prareke | urva i̭va paprathe kāmo̭ asme | tamāpṛ̭ṇā vasupate vasṷ̄nām || ima-ṅkāma̭-mmandayā gobhiraśvaiḥ | candrava̭tā rādha̭sā papratha̭śca | suvaryavo̭ matibhistubhyaṃ-vi~prāḥ | indrā̭ya vāhaḥ̭ kuśikāso̭ akrann || indra̭sya nu vīryā̭ṇi pravo̭cam | yāni̭ cakāra̭ prathamāni̭ vajrī || 12 ||
aha-nnahimanvapasta̭tarda | pra vakṣaṇā̭ abhina-tparva̭tānām || ahannahi-mparva̭te śiśriyāṇam | tvaṣṭā-'smai vajragg̭ svarya̭-ntatakṣa | vāśrā i̭va dhenava-ssyanda̭mānāḥ | añjaḥ̭ samudra-mava̭jagmurāpaḥ̭ || vṛṣāyamā̭ṇo-'vṛṇīta somam | trika̭drukeṣva-piba-thsutasya̭ | ā sāya̭ka-mmaghavā̭ datta vajram | aha̭nnena-mprathamajā mahī̭nām || 13 ||
yadindrāha̭n-prathamajā mahī̭nām | ānmāyināmami̭nāḥ prota māyāḥ | ā-thsūrya̭-ñjanaya-ndyāmuṣāsam | tādīknā śatrūnna kilā̭vivithse || aha̭n vṛtraṃ-vṛ~̭trataraṃ-vya~gṃsam | indro vajrḙṇa mahatā vadhena̭ | skandhāgṃ̭sīva kuli̭śenā vivṛ̭kṇā | ahiḥ̭ śayata upapṛk-pṛ̭thivyām || ayoddhyeva durmada ā hi juhve | mahāvīra-ntṷ vibādha-mṛ̭jīṣam || 14 ||
nātā̭rīrasya samṛ̭tiṃ-va~dhānām | sagṃ rujānāḥ pipiṣa indra̭śatruḥ || viśvo vihā̭yā aratiḥ | vasṷrdadhe haste dakṣi̭ṇe | taraṇirna śi̭śrathat | śravasya̭yā na śi̭śrathat | viśva̭smā idi̭ṣuddhyase | devatrā havyamūhi̭ṣe | viśva̭smā ithsukṛte vāra̭mṛṇvati | agni-rdvārā vyṛ̭ṇvati || 15 ||
udujjihā̭no abhi kāma̭mīrayanṋ | prapṛñcan viśvā bhuva̭nāni pūrvathā | ā ketunā suṣa̭middho yaji̭ṣṭhaḥ | kāma̭-nno agne abhiha̭rya digbhyaḥ || juṣāṇo havyamamṛtḙṣu dūḍhyaḥ̭ | ā no̭ rayi-mba̭hulā-ṅgoma̭tīmiṣam | nidhḙhi yakṣa̭damṛtḙṣu bhūṣanṋ || aśvi̭nā yajñamāga̭tam | dāśuṣaḥ purṷdagṃsasā | pūṣā ra̭kṣatu no rayim || 16 ||
imaṃ-ya~jñamaśvinā̭ vardhaya̭ntā | imau rayiṃ-ya~ja̭mānāya dhattam | imau paśū-nra̭kṣatāṃ-vi~śvato̭ naḥ | pūṣā naḥ̭ pātu sadama-pra̭yucchann || pra tḙ mahe sa̭rasvati | subha̭ge vāji̭nīvati | satyavācḙ bhare matim || ida-ntḙ havya-ṅghṛtava̭-thsarasvati | satyavāce prabha̭remā havīgṃṣi̭ | imāni̭ te duritā saubha̭gāni | tebhi̭rvayagṃ subhagā̭sa-ssyāma || 17 ||

(vaj - yrahī̭nā - mṛjīṣaṃ - ~vyṛ̭ṇvati - rakṣatu no rayigṃ - saubha̭gānyeka̭-ñca) (a. 4)
2.5.5 upahomāḥ

yajño rāyo yajña ī̭śe vasṷ̄nām | yajña-ssasyānā̭muta sṷkṣitīnām | yajña iṣṭaḥ pūrvaci̭tti-ndadhātu | yajño bra̭hmaṇvāgṃ apyḙtu devān || ayaṃ-ya~jño va̭rdhatā-ṅgobhiraśvaiḥ | iyaṃ-ve~diḥ̭ svapatyā suvīrā | ida-mbarhirati̭ baraḥīgṣyanyā | imaṃ-ya~jñaṃ-vi~śvḙ avantu devāḥ || bhaga̭ eva bhaga̭vāgṃ astu devāḥ | tena̭ vaya-mbhaga̭vanta-ssyāma || 18 ||
ta-ntvā̭ bhaga sarva ijjo̭havīmi | sa no̭ bhaga pura etā bha̭veha || bhaga praṇḙta-rbhaga satya̭rādhaḥ | bhagemā-ndhiyamuda̭va dada̭nnaḥ | bhaga praṇo̭ janaya gobhiraśvaiḥ | bhaga pra nṛbhi̭-rnṛvantaḥ̭ syāma || śaśva̭tī-ssamā upa̭yanti lokāḥ | śaśva̭tī-ssamā upa̭yantyāpaḥ̭ | iṣṭa-mpūrtagṃ śaśva̭tīnāgṃ samā̭nāgṃ śāśvatena̭ | haviṣeṣṭvā 'nantaṃ-lo~ka-mparamārṷroha || 19 ||
iyameva sā yā pra̭thamā vyauccha̭t | sā rūpāṇi̭ kurute pañca̭ devī || dve svasā̭rau vayatastantra̭metat | sanātanaṃ-vi~ta̭tagṃ ṣaṇma̭yūkham | avānyāg stantūn kirato̭ dhatto anyān | nāva̭pṛjyāte na ga̭māte antam || ā vo̭ yantūdavāhāso̭ adya | vṛṣṭiṃ-ye~ viśvḙ maruto̭ junanti̭ | ayaṃ-yo~ agni-rma̭ruta-ssami̭ddhaḥ | eta-ñjṷṣaddhva-ṅkavayo yuvānaḥ || 20 ||
dhārāvarā maruto̭ dhṛṣṇuvo̭jasaḥ | mṛgā na bhīmāsta̭viṣebhi̭-rūrmibhiḥ̭ | agnayo na śṷśucānā ṛ̭jīṣiṇaḥ̭ | bhrumi-ndhama̭nta upa gā a̭vṛṇvata || vica̭krame pṛthivīmeṣa etām | kṣetrā̭ya viṣṇu-rmanṷṣe daśasyann | dhruvāso̭ asya kīrayo janā̭saḥ | urukṣitigṃ sujani̭mā cakāra ||, trirdevaḥ pṛ̭thivīmeṣa etām | vica̭krame śatarca̭sa-mmahitvā | pra viṣṇṷ-rastu tavasasta vī̭yān | tveṣagg hya̭sya sthavi̭rasya nāma̭ |||| āvedhasa-nnīla̭pṛṣṭha-mbṛhantam | bṛhaspatigṃ sada̭ne sādayaddhvam | sādadyo̭ni-ndama ādī̭divāgṃsam | hira̭ṇyavarṇamaruṣagṃ sa̭pema || sa hi śuciḥ̭ śatapa̭tra-ssa śundhyūḥ || 21 ||
hira̭ṇyavāśīriṣira-ssṷvara.ṣāḥ | bṛhaspati-ssa svā̭veśa ṛṣvāḥ | pūrū sakhi̭bhya ā suti-ṅka̭riṣṭhaḥ || pūṣaggstava̭ vrate vayam | na ri̭ṣyema kadā cana | stotāra̭sta iha sma̭si || yāstḙ pūṣannāvo̭ anta-ssa̭mudre | hiraṇyayī̭rantari̭kṣe cara̭nti | yābhi̭ryāsi dūtyāgṃ sūrya̭sya | kāmḙna kṛta-śśrava̭ icchamā̭naḥ || 22 ||
ara̭ṇyānyara̭ṇyānyasau | yā preva naśya̭si | kathā grāma-nna pṛ̭cchasi | na tvā bhīri̭va vindatī(3) || vṛṣāravāya vada̭te | yadupāva̭ti ciccikaḥ | āghāṭībhi̭riva dhāvayanṋ | araṇyāni-rma̭hīyate || uta gāva̭ ivādann | uto veśmḙva dṛśyate || 23 ||
uto a̭raṇyāni-ssāyam | śakaṭīri̭va sarjati || gāmaṅgaiṣa āhva̭yati | dārvaṅgaiṣa upā̭vadhīt | vasa̭nnaraṇyānyāgṃ sāyam | akrṷkṣaditi̭ manyate || na vā a̭raṇyānirha̭nti | anyaścennābhigaccha̭ti | svādoḥ phala̭sya jagdhvā | yatra kāma-nnipa̭dyate || āñja̭nagandhīgṃ surabhīm | bahvannāmakṛ̭ṣīvalām | prāha-mmṛgāṇā-mmātaram | araṇyānīma̭śagṃ-siṣam || 24 ||

(syāma - ruroha - yuvānaḥ - śundh - yūricchamā̭no - dṛśyate - nipa̭dyate catvāri̭ ca) (a. 5)
2.5.6 upahomāḥ

vārtra̭hatyāya śava̭se | pṛtanā-sāhyā̭ya ca | indratvā-''va̭rtayāmasi || subrahmā̭ṇaṃ-vī~rava̭nta-mbṛhantam | uru-ṅga̭bhīra-mpṛthubṷddhnamindra | śrutarṣi̭-mugrama̭bhi-mātiṣāham | asmabhya̭-ñcitraṃ-vṛ~ṣa̭ṇagṃ rayi-ndāḥ || kṣetriyai tvā nir-ṛ̭tyai tvā | druho mṷñcāmi varṷṇasya pāśāt | anāgasa-mbrahma̭ṇe tvā karomi || 25 ||
śive te dyāvā̭pṛthivī ubhe ime || śa-ntḙ agni-ssahādbhira̭stu | śa-ndyāvā̭pṛthivī sahauṣa̭dhībhiḥ | śamantari̭kṣagṃ saha vātḙna te | śa-nte cata̭sraḥ pradiśo̭ bhavantu || yā daivīścata̭sraḥ pradiśaḥ̭ | vāta̭patnīrabhi sūryo̭ vicaṣṭe | tāsā-ntvā jarasa āda̭dhāmi | pra yakṣma̭ etu nir-ṛ̭ti-mparācaiḥ || amo̭ci yakṣmā-dduritā-dava̭rtyai || 26 ||
druhaḥ pāśānnir-ṛ̭tyai coda̭moci | ahā ava̭rtimavi̭da-thsyonam | apya̭bhū-dbhadre sṷkṛtasya̭ loke || sūrya̭mṛta-ntama̭so grāhyā yat | devā amṷñca-nnasṛ̭janvyḙnasaḥ | evamahamima-ṅkṣetriyājjā̭miśagṃsāt | druho mṷñcāmi varṷṇasya pāśāt || bṛha̭spate yuvamindra̭śca vasvaḥ̭ | divyasyḙśāthe uta pārthi̭vasya | dhattagṃ rayigg stṷvate kīrayḙ cit || 27 ||
yūya-mpā̭ta svastibhi-ssadā̭ naḥ || devāyudhamindramājohṷvānāḥ | viśvāvṛdha̭mabhi ye rakṣa̭māṇāḥ | yena̭ hatā dīrghamaddhvā̭namāyanṋ | anantamarthamani̭var-thsyamānāḥ || yattḙ sujāte himava̭thsu bheṣajam | mayobhū-śśanta̭mā yaddhṛdo-'si̭ | tato̭ no dehi sībale || ado giribhyo adhi yatpradhāva̭si | sagṃśobha̭mānā kanyḙva śubhre || 28 ||
tā-ntvā mudga̭lā haviṣā̭ vardhayanti | sā naḥ̭ sībale rayimābhā̭jayeha || pūrva̭-ndevā apa̭reṇā-nupaśyañjanma̭bhiḥ | janmānyava̭raiḥ parā̭ṇi | vedā̭ni devā ayamasmīti mām | ahagṃ hitvā śarī̭ra-ñjarasaḥ̭ parastāt || prāṇāpānau cakṣu-śśrotram | vāca-mmana̭si sambhṛ̭tām | hitvā śarī̭ra-ñjarasaḥ̭ parastāt | ā bhūti-mbhūtiṃ̭-va~yama̭śnavāmahai || imā eva tā uṣaso yāḥ pra̭thamā vyaucchanṋ | tā devyaḥ̭ kurvate pañca̭ rūpā | śaśva̭tīrnāva̭pṛjyanti | na ga̭mantyantam || 29 ||

(karo - myava̭rtyai - ci - cchubhre - 'śnavāmahai catvāri̭ ca) (a. 6)
2.5.7 upahomāḥ

vasṷ̄nā-ntvā-''dhī̭tena | rudrāṇā̭mūrmyā | ādityānā-nteja̭sā | viśvḙṣā-ndevānā-ṅkratṷnā | marutāmemnā̭ juhomi svāhā || abhibhṷ̄ti-rahamāga̭mam | indra̭sakhā svāyudhaḥ̭ | āsvāśā̭su duṣṣahaḥ̭ || idaṃ-va~rco̭ agninā̭ dattamāgāt | yaśo bharga-ssaha ojo bala̭-ñca || 30 ||
dīrghāyutvāya̭ śataśā̭radāya | prati̭gṛbhṇāmi mahate vīryā̭ya || āyṷrasi viśvāyṷrasi | sarvāyṷrasi sarvamāyṷrasi | sarva̭-mma āyṷrbhūyāt | sarvamāyṷrgeṣam || bhūrbhuva-ssuvaḥ̭ || agni-rdharmḙṇānnādaḥ | mṛtyu-rdharmeṇānna̭patiḥ | brahma̭ kṣatragg svāhā || 31 ||
prajāpa̭tiḥ praṇetā | bṛhaspatiḥ̭ pura etā | yamaḥ panthāḥ | candramāḥ punarasu-ssvāhā || agnira̭nnādo-'nna̭patiḥ | annādya̭masmin. yajñe yaja̭mānāya dadātu svāhā || somo rājā rāja̭patiḥ | rājyamasmin. yajñe yaja̭mānāya dadātu svāhā || varṷṇa-ssamrā-ṭthsamrāṭpa̭tiḥ | sāmrājyamasmin. yajñe yaja̭mānāya dadātu svāhā || 32 ||
mitraḥ, kṣatra-ṅkṣatrapa̭tiḥ | kṣatramasmin. yajñe yaja̭mānāya dadātu svāhā || indro bala-mbala̭patiḥ | bala̭masmin. yajñe yaja̭mānāya dadātu svāhā || bṛhaspati-rbrahma brahma̭patiḥ | brahmāsmin. yajñe yaja̭mānāya dadātu svāhā || savitā rāṣṭragṃ rāṣṭrapa̭tiḥ | rāṣṭramasmin. yajñe yaja̭mānāya dadātu svāhā || pūṣā viśāṃ-vi~ṭpa̭tiḥ | viśa̭masmin. yajñe yaja̭mānāya dadātu svāhā || sara̭svatī puṣṭiḥ puṣṭi̭patnī | puṣṭi̭masmin. yajñe yaja̭mānāya dadātu svāhā || tvaṣṭā̭ paśūnā-mmi̭thunānāgṃ̭ rūpakṛ-drūpapa̭tiḥ | rūpeṇāsmin. yajñe yaja̭mānāya paśū-nda̭dātu svāhā || 33 ||

(ca - svāhā - sāmrājyamasmin. yajñe yaja̭mānāya dadātu svāhā - viśa̭masmin. yajñe yaja̭mānāya dadātu svāhā̭ catvāri̭ ca) (a. 7)
(agni-ssomo varṷṇo mitra indro bṛhaspatiḥ̭ savitā pūṣā sarasvatī tvaṣṭā daśa̭)
2.5.8 upahomāḥ

sa ī-mpāhi ya ṛ̭jīṣī tarṷtraḥ | ya-śśipra̭vān vṛṣabho yo ma̭tīnām | yo gotrabhi-dva̭jrabhṛdyo ha̭riṣṭhāḥ | sa i̭ndra citrāgṃ abhitṛ̭ndhi vājāṋ || ā te śuṣmo̭ vṛṣabha ḙtu paścāt | ottarāda̭dharāgā purastāt | ā viśvato̭ abhi sametvarvām | indra̭ dyumnagṃ suva̭rvaddhehyasme || proṣva̭smai puroratham | indrā̭ya śūṣama̭rcata || 34 ||
abhīkḙ cidu lokakṛt | saṅge samathsṷ vṛtrahā | asmāka̭-mbodhi coditā | nabha̭ntā-manyakeṣām | jyākā adhi dhanva̭su || indraṃ̭-va~yagṃ śṷnāsīram | asmin. yajñe ha̭vāmahe | āvājairupa̭ no gamat || indrā̭ya śunāsīrā̭ya | srucā jṷhuta no haviḥ || 35 ||
juṣatā-mprati medhi̭raḥ || pra havyāni̭ ghṛtava̭ntyasmai | harya̭śvāya bharatā sajoṣāḥ | indrartubhi-rbrahma̭ṇā vāvṛdhānaḥ | śunāsīrī havirida-ñjṷṣasva || vayaḥ̭ suparṇā upa̭sedurindram | priyamḙdhā ṛṣa̭yo nādha̭mānāḥ | apa̭ dhvāntamūrṇuhi pūrdhi cakṣuḥ̭ | mumugdhya̭smā-nnidhayḙva baddhān || bṛhadindrā̭ya gāyata || 36 ||
marṷto vṛtrahanta̭mam | yena jyoti-raja̭nayannṛtāvṛdhaḥ̭ | deva-ndevāya jāgṛ̭vi || kā mihaikāḥ ka ime pa̭taṅgāḥ | mānthālāḥ kuli pari̭ mā patanti | anā̭vṛtainān-pradha̭mantu devāḥ | saupa̭rṇa-ñcakṣṷstanuvā̭ videya || evā va̭ndasva varṷṇa-mbṛhantam | namasyā dhīra̭mamṛta̭sya gopām | sa na-śśarma̭ trivarṷ̄thaṃ-vi~yagṃ̭sat || 37 ||
yūya-mpā̭ta svastibhi-ssadā̭ naḥ || nākḙ suparṇamupa yat-pata̭ntam | hṛdā vena̭nto abhyaca̭kṣata tvā | hira̭ṇyapakṣaṃ-va~rṷṇasya dūtam | yamasya yonaṷ śakuna-mbhṷraṇyum || śa-nno̭ devīrabhiṣṭa̭ye | āpo̭ bhavantu pītaye | śaṃ-yo~rabhisra̭vantu naḥ || īśā̭nā vāryā̭ṇām | kṣaya̭ntī-ścarṣaṇīnām || 38 ||
apo yā̭cāmi bheṣajam || aphsu me somo̭ abravīt | anta-rviśvā̭ni bheṣajā | agni-ñca̭ viśvaśa̭mbhuvam | āpa̭śca viśvabhḙṣajīḥ || yadaphsu tḙ sarasvati | goṣvaśvḙṣu yanmadhṷ | tena̭ me vājinīvati | mukha̭maṅgdhi sarasvati || yā sara̭svatī vaiśambhalyā || 39 ||
tasyā-mme rāsva | tasyāste bhakṣīya | tasyāste bhūyiṣṭhabhājo̭ bhūyāsma || aha-ntvada̭smi mada̭si tvametat | mamā̭si yonistava yoni̭rasmi | mamaiva sanvaha̭ havyānya̭gne | putraḥ pitre lo̭kakṛjjā̭tavedaḥ || ihaiva santatra santa̭-ntvā 'gne | prāṇena̭ vācā mana̭sā bibharmi | tiro mā santamāyurmā prahā̭sīt || 40 ||
jyoti̭ṣā tvā vaiśvānareṇopa̭tiṣṭhe || aya-nte yoni̭r-ṛtviyaḥ̭ | yato̭ jāto aro̭cathāḥ | ta-ñjānanna̭gna āro̭ha | athā̭ no vardhayā rayim || yā tḙ agne yajñiyā̭ tanūstaye-hyāro̭hātmā-''tmānam | acchā vasṷ̄ni kṛṇvannasme naryā̭ purūṇi̭ | yajño bhūtvā yajñamāsī̭da svāṃ-yo~nim | jāta̭vedo bhuva ājāya̭māna-ssakṣa̭ya ehi̭ || upāva̭roha jātavedaḥ punastvam || 41 ||
devebhyo̭ havyaṃ-va~̭ha naḥ prajānann | āyuḥ̭ prajāgṃ rayimasmāsṷ dhehi | aja̭sro dīdihi no duroṇe || tamindra̭-ñjohavīmi maghavā̭namugram | satrādadhā̭na-mapra̭tiṣkutagṃ śavāgṃ̭si | magṃhi̭ṣṭho gīrbhirā ca̭ yajñiyo̭ 'vavarta̭t | rāye no viśvā̭ supathā̭ kṛṇotu vajrī || trika̭drukeṣu mahiṣo yavā̭śira-ntuviśuṣma̭stṛpat | soma̭mapiba-dviṣṇṷnā sutaṃ-ya~thāva̭śat | sa ī-mmamāda mahi karma karta̭ve mahāmurum || 42 ||
sainagṃ̭ saśca-ddeva-ndeva-ssatyamindugṃ̭ satya indraḥ̭ || vidadyatī̭ saramā̭ rugṇamadreḥ | mahi pāthaḥ̭ pūrvyagṃ saddhriya̭kkaḥ | agra̭-nnaya-thsupadyakṣa̭rāṇām | acchā rava̭-mprathamā jā̭natī gāt || vida-dgavyagṃ̭ saramā̭ dṛḍhamūrvam | yenā nuka-mmānṷṣī bhoja̭te viṭ | ā ye viśvā svapatyāni̭ cakruḥ | kṛṇvānāso̭ amṛtatvāya̭ gātum || tva-nnṛbhi̭rnṛpate devahṷ̄tau || 43 ||
bhūrī̭ṇi vṛtvā ha̭ryaśva hagṃsi | tva-nnida̭syu-ñcumṷrim | dhuni-ñcāsvā̭payo dabhīta̭ye suhantṷ || evā pā̭hi pratnathā manda̭tu tvā | śrudhi brahma̭ vāvṛdhasvota gīrbhiḥ | āvi-ssūrya̭-ṅkṛṇuhi pīpihīṣaḥ | jahi śatrūgṃ̭rabhi gā i̭ndra tṛndhi || agne bādha̭sva vimṛdho̭ nudasva | apāmī̭vā apa rakṣāgṃ̭si sedha | asmā-thsa̭mudrā-dbṛ̭hato divo naḥ̭ || 44 ||
apā-mbhūmānamupa̭ na-ssṛjeha || yajña prati̭tiṣṭha sumatau suśevā ā tvā | vasṷ̄ni purudhā vi̭śantu | dīrghamāyu-ryaja̭mānāya kṛṇvann | athāmṛtḙna jaritāra̭maṅgdhi || indraḥ̭ śunāva-dvita̭noti sīram | saṃva~thsarasya̭ pratimāṇa̭metat | arkasya jyotistadidā̭sa jyeṣṭham | saṃva~thsaragṃ śunavathsīra̭metat || indra̭sya rādhaḥ praya̭ta-mpuru tmanā | tada̭rkarūpaṃ-vi~mimā̭nameti | dvāda̭śāre prati̭tiṣṭhatī-dvṛṣā || aśvāyanto̭ gavyanto̭ vājaya̭ntaḥ | havā̭mahe tvopa̭ganta vā ṷ | ābhūṣa̭ntastvā sumatau navā̭yām | vayami̭ndra tvā śunagṃ hṷvema || 45 ||