kalaśa pūjā śloka — Kalasha Puja
kalā kalā hi devānāṃ dānavānāṃ kalā kalā | saṃgṛhya nirmito yasmātkalaśastena kathyate ||1||
kalaśasya mukhe viṣṇuḥ kaṇṭhe rudraḥ samāśritaḥ | mūle tvasya sthito brahmā madhye mātṛgaṇāḥ smṛtāḥ ||2||
kukṣau tu sāgarāḥ sapta saptadvīpā ca medinī | arjunī gomatī caiva candrabhāgā sarasvatī ||3||
kāverī kṛṣṇaḥ veṇā ca gaṅgā caiva mahānadī | tāpī godāvarī caiva māhendrī narmadā tathā ||4||
nadāśca vividhā jātā nadyaḥ sarvāstathāparāḥ | pṛthivyāṃ yāni tīrthāni kalaśasthāni tāni vai ||5||
sarve samudrāḥ saritastīrthāni jaladā nadāḥ | āyāntu mama śāntyarthaṃ duritakṣayakārakāḥ ||6||
ṛgvedo'tha yajurvedaḥ sāmavedo hyatharvaṇaḥ | aṅgaiśca sahitāḥ sarve kalaśāmbuṃ samāśritāḥ ||7||
atra gāyatrī savitrī śāntiḥ puṣṭikarī tathā | āyāntu devapūjārthaṃ duritakṣayakārakāḥ ||8||
śaṅkha pūjā śloka — Shankha Puja
śaṅkhaṃ candrārka daivatyaṃ madhye varuṇa daivatam | pṛṣṭhe prajāpati vidyāt agre gaṅgā sarasvatī ||
tvaṃ purā sāgarotpannaḥ viṣṇunā vidhṛtaḥ kare | pūjitaḥ sarva devaiśca pāñcajanya namo'stu te ||
trailokye yāni tīrthāni vāsudevasya ca ājñayā | śaṅkhe tiṣṭhanti viprendra tasmācchaṅkhaṃ prapūjayet ||
pāñcajanyāya vidmahe pavamānāya dhīmahi | tannaḥ śaṅkhaḥ pracodayāt ||
āsanaṃ śloka — Asanam
vicitraratnakhacitaṃ divyāstaraṇasaṃyutam || svarṇasiṃhāsanaṃ cāru gṛhṇīṣva surapūjita ||
pādyaṃ śloka — Padyam
sarvatīrthasamudbhūtaṃ pādyaṃ gandhādibhiryutam | vighnarāja gṛhāṇedaṃ bhagavān bhaktavatsala ||
arghyaṃ śloka — Arghyam
gaṇādhyakṣa namaste'stu gṛhāṇa karuṇākara | arghyañca phalasaṃyuktaṃ gandhamālyākṣatairyutam ||
ācamanīyaṃ śloka — Achamaniyam
vināyakaṃ namastubhyaṃ tridaśairabhivandita | gaṅgodakena deveśa kuruṣvācamanaṃ prabho ||
madhuparkaṃ śloka — Madhuparkam
dadhyājyamadhu saṃyuktaṃ madhuparkaṃ mayā''hṛtam | gṛhāṇa sarvalokeśa gajavaktra namo'stu te ||
vastraṃ śloka — Vastram
śītavātoṣṇasantrāṇaṃ lajjāyā rakṣaṇaṃ param | dehālaṅkaraṇaṃ vastramataḥ śāntiṃ prayaccha me ||
puṣpāñjali śloka — Pushpanjali
nānāsugandhipuṣpāṇi yathākālodbhavāni ca | puṣpāñjalirmayādatta gṛhāṇa parameśvara ||
naivedyaṃ śloka — Naivedyam
naivedyaṃ gṛhyatāṃ deva bhaktiṃ me hyacalāṃ kuru | īpsitaṃ me varaṃ dehi paratra ca parāṃ gatim || śarkarākhaṇḍakhādyāni dadhikṣīraghṛtāni ca | āhāraṃ bhakṣyabhojyaṃ ca naivedyaṃ pratigṛhyatām ||
tāmbūlaṃ śloka — Tambulam
pūgīphalaṃ mahaddivyaṃ nāgavallīdalairyutam | elādicūrṇasaṃyuktaṃ tāmbūlaṃ pratigṛhyatām ||
nīṟājanaṃ śloka — Neerajanam
kadalīgarbhasambhūtaṃ karpūraṃ tu pradīpitam | ārārtikamahaṃ kurve paśya me varado bhava ||