5 - প্রবর্গ্য ব্রাহ্মণম্ - কৃষ্ণ যজুর্বেদ তৈত্তিরীয আরণ্যক পাঠঃ - দেবা বৈ সত্রমাসত

কৃষ্ণ যজুর্বেদীয তৈত্তিরীয আরণ্যকে পঞ্চমঃ প্রপাঠকঃ - প্রবর্গ্য ব্রাহ্মণম্
ও-ন্নমঃ পরমাত্মনে, শ্রী মহাগণপতযে নমঃ,
শ্রী গুরুভ্যো নমঃ । হরিঃ ওম্ ॥
অনুবাকং 1
দেবা বৈ সত্রমাসত । ঋদ্ধিপরিমিতম্ ঁযশস্কামাঃ । তে-ঽব্রুবন্ন্ । যন্নঃ প্রথমং-যঁশ ঋচ্ছাত্ । সর্বেষা-ন্নস্ত-থ্সহাসদিতি ।
তেষা-ঙ্কুরুক্ষেত্রং-বেঁদিরাসীত্ । তস্যৈ খাণ্ডবো দক্ষিণার্ধ আসীত্ । তূর্ঘ্নমুত্তরার্ধঃ । পরীণজ্জঘনার্ধঃ । মরব উত্করঃ ॥ 1 ॥

তেষা-ম্মখং-বৈঁষ্ণবং-যঁশ আর্চ্ছত্ । তন্ন্যকামযত । তেনাপাক্রামত্ । ত-ন্দেবা অন্বাযন্ন্ । যশো-ঽবরুরুথ্সমানাঃ । তস্যান্বাগতস্য ।
সব্যাদ্ধনুরজাযত । দক্ষিণাদিষবঃ । তস্মাদিষুধন্ব-ম্পুণ্যজন্ম ।
যজ্ঞজন্মা হি ॥ 2 ॥

তমেকগ্ং সন্তম্ । বহবো নাভ্যধৃষ্ণুবন্ন্ । তস্মাদেকমিষুধন্বিনম্ । বহবো-ঽনিষুধন্বা নাভিধৃষ্ণুবন্তি । সো-ঽস্মযত । এক-ম্মা সন্ত-ম্বহবো নাভ্যধর্ষিষুরিতি ।
তস্য সিষ্মিযাণস্য তেজো-ঽপাক্রামত্ । ত-দ্দেবা ওষধীষু ন্যমৃজুঃ । তে শ্যামাকা অভবন্ন্ । স্মযাকা বৈ নামৈতে ॥ 3 ॥

ত-থ্স্মযাকানাগ্ স্মযাকত্বম্ । তস্মা-দ্দীক্ষিতেনাপিগৃহ্য স্মেতব্যম্ । তেজসো ধৃত্যৈ । স ধনুঃ প্রতিষ্কভ্যাতিষ্ঠত্ । তা উপদীকা অব্রুবন্-বরম্ ঁবৃণামহৈ । অথ ব ইমগ্ং রন্ধযাম ।
যত্র ক্ব চ খনাম । তদপো-ঽভিতৃণদামেতি ।
তস্মাদুপদীকা যত্র ক্ব চ খনন্তি । তদপো-ঽভিতৃন্দন্তি ॥ 4 ॥

বারেবৃতগ্গ্ হ্যাসাম্ । তস্য জ্যামপ্যাদন্ন্ ।
তস্য ধনুর্বিপ্রবমাণগ্ং শির উদবর্তযত্ ।
ত-দ্দ্যাবাপৃথিবী অনুপ্রাবর্তত । য-ত্প্রাবর্তত ।
ত-ত্প্রবর্গ্যস্য প্রবর্গ্যত্বম্ । যদ্ঘ্রাঁ(4) ইত্যপতত্ ।
তদ্ধর্মস্য ঘর্মত্বম্ ।
মহতো বীর্যমপপ্তদিতি । ত-ন্মহাবীরস্য মহাবীরত্বম্ ॥ 5 ॥

যদস্যা-স্সমভরন্ন্ । ত-থ্সম্রাজ্ঞঃ সম্রাট্ত্বম্ ।
তগ্গ্ স্তৃত-ন্দেবতাস্ত্রেধা ব্যগৃহ্ণত । অগ্নিঃ প্রাতস্সবনম্ । ইন্দ্রো মাদ্ধ্যন্দিনগ্ং সবনম্ । বিশ্বে দেবাস্তৃতীযসবনম্ । তেনাপশীর্ষ্ণা যজ্ঞেন যজমানাঃ । নাশিষো-ঽবারুন্ধত ।
ন সুবর্গং-লোঁকমভ্যজযন্ন্ ।
তে দেবা অশ্বিনাবব্রুবন্ন্ ॥ 6 ॥

ভিষজৌ বৈ স্থঃ । ইদং-যঁজ্ঞস্য শিরঃ প্রতিধত্তমিতি । তাবব্রূতাং-বঁরম্ ঁবৃণাবহৈ । গ্রহ এব নাবত্রাপি গৃহ্যতামিতি ।
তাভ্যা-মেতমাশ্বিন-মগৃহ্ণন্ন্ ।
তাবেত-দ্যজ্ঞস্য শিরঃ প্রত্যধত্তাম্ ।
য-ত্প্রবর্গ্যঃ । তেন সশীর্ষ্ণা যজ্ঞেন যজমানাঃ । অবাশিষো-ঽরুন্ধত ।
অভি সুবর্গং-লোঁকমজযন্ন্ । য-ত্প্রবর্গ্য-ম্প্রবৃণক্তি । যজ্ঞস্যৈব তচ্ছিরঃ প্রতিদধাতি ।
তেন সশীর্ষ্ণা যজ্ঞেন যজমানঃ ।
অবাশিষো রুন্ধে । অভি সুবর্গং-লোঁক-ঞ্জযতি ।
তস্মাদেষ আশ্বিনপ্রবযা ইব । য-ত্প্রবর্গ্যঃ ॥ 7 ॥

(উত্করো - হ্যে - তে - তৃন্দন্তি - মহাবীরত্ব - মব্রুবন্ - নজযন্-থ্সপ্ত চ) (অ. 1)
অনুবাকং 2
সাবিত্র-ঞ্জুহোতি প্রসূত্যৈ । চতুর্গৃহীতেন জুহোতি ।
চতুষ্পাদঃ পশবঃ । পশূনেবাবরুন্ধে । চতস্রো দিশঃ । দিক্ষ্বেব প্রতিতিষ্ঠতি ।
ছন্দাগ্ংসি দেবেভ্যো-ঽপাক্রামন্ন্ ।
ন বো-ঽভাগানি হব্যং-বঁক্ষ্যাম ইতি ।
তেভ্য এত-চ্চতুর্গৃহীত-মধারযন্ন্ । পুরোনুবাক্যাযৈ যাজ্যাযৈ ॥ 8 ॥

দেবতাযৈ বষট্কারায । যচ্চতুর্গৃহীত-ঞ্জুহোতি ।
ছন্দাগ্স্যেব ত-ত্প্রীণাতি । তান্যস্য প্রীতানি দেবেভ্যো হব্যং-বঁহন্তি । ব্রহ্মবাদিনো বদন্তি । হোতব্য-ন্দীক্ষিতস্য গৃহা(3) ই ন হোতব্যা(3) মিতি । হবির্বৈ দীক্ষিতঃ । যজ্জুহুযাত্ । হবিষ্কৃতং-যঁজমানমগ্নৌ প্রদদ্ধ্যাত্ ।
যন্ন জুহুযাত্ ॥ 9 ॥

যজ্ঞপরুরন্তরিযাত্ । যজুরেব বদেত্ ।
ন হবিষ্কৃতং-যঁজমানমগ্নৌ প্রদধাতি । ন যজ্ঞপরুরন্তরেতি । গাযত্রী ছন্দাগ্স্যত্যমন্যত ।
তস্যৈ বষট্কারো-ঽভ্যয্য শিরো-ঽচ্ছিনত্ ।
তস্যৈ দ্বেধা রসঃ পরা-ঽপতত্ । পৃথিবীমর্ধঃ প্রাবিশত্ । পশূনর্ধঃ । যঃ পৃথিবী-ম্প্রাবিশত্ ॥ 10 ॥

স খদিরো-ঽভবত্ । যঃ পশূন্ । সো-ঽজাম্ । যত্খাদির্যভ্রি-র্ভবতি । ছন্দসামেব রসেন যজ্ঞস্য শির-স্সম্ভরতি । যদৌদুম্বরী ।
ঊর্গ্বা উদুম্বরঃ । ঊর্জৈব যজ্ঞস্য শির-স্সম্ভরতি । য-দ্বৈণবী । তেজো বৈ বেণুঃ ॥ 11 ॥

তেজসৈব যজ্ঞস্য শির-স্সম্ভরতি । য-দ্বৈকঙ্কতী ।
ভা এবাবরুন্ধে । দেবস্য ত্বা সবিতুঃ প্রসব ইত্যভ্রিমাদত্তে প্রসূত্যৈ । অশ্বিনো-র্বাহুভ্যামিত্যাহ । অশ্বিনৌ হি দেবানামদ্ধ্বর্যূ আস্তাম্ ।
পূষ্ণো হস্তাভ্যামিত্যাহ যত্যৈ । বজ্র ইব বা এষা । যদভ্রিঃ । অভ্রিরসি নারিরসীত্যাহ শান্ত্যৈ ॥ 12 ॥

অদ্ধ্বরকৃ-দ্দেবেভ্য ইত্যাহ । যজ্ঞো বা অদ্ধ্বরঃ । যজ্ঞকৃ-দ্দেবেভ্য ইতি বাবৈতদাহ । উত্তিষ্ঠ ব্রহ্মণস্পত ইত্যাহ ।
ব্রহ্মণৈব যজ্ঞস্য শিরো-ঽচ্ছৈতি ।
প্রৈতু ব্রহ্মণস্পতিরিত্যাহ । প্রেত্যৈব যজ্ঞস্য শিরো-ঽচ্ছৈতি । প্র দেব্যেতু সূনৃতেত্যাহ ।
যজ্ঞো বৈ সূনৃতা । অচ্ছা বীরন্নর্য-ম্পঙ্ক্তিরাধসমিত্যাহ ॥ 13 ॥

পাঙ্ক্তো হি যজ্ঞঃ । দেবা যজ্ঞন্নযন্তু ন ইত্যাহ ।
দেবানেব যজ্ঞনিযঃ কুরুতে । দেবী দ্যাবাপৃথিবী অনু মে মগ্ংসাথামিত্যাহ । আভ্যামেবানুমতো যজ্ঞস্য শির-স্সম্ভরতি । ঋদ্ধ্যাসমদ্য মখস্য শির ইত্যাহ । যজ্ঞো বৈ মখঃ ।
ঋদ্ধ্যাসমদ্য যজ্ঞস্য শির ইতি বাবৈতদাহ ।
মখায ত্বা মখস্য ত্বা শীর্ষ্ণ ইত্যাহ ।
নির্দিশ্যৈবৈনদ্ধরতি ॥ 14 ॥

ত্রির্হরতি । ত্রয ইমে লোকাঃ । এভ্য এব লোকেভ্যো যজ্ঞস্য শির-স্সম্ভরতি । তূষ্ণী-ঞ্চতুর্থগ্ং হরতি । অপরিমিতাদেব যজ্ঞস্য শির-স্সম্ভরতি ।
মৃত্খনাদগ্রে হরতি । তস্মা-ন্মৃত্খনঃ করুণ্যতমঃ । ইযত্যগ্র আসীরিত্যাহ । অস্যামেবাছম্বট্কারং-যঁজ্ঞস্য শির-স্সম্ভরতি । ঊর্জম্ ঁবা এতগ্ং রস-ম্পৃথিব্যা উপদীকা উদ্দিহন্তি ॥ 15 ॥

য-দ্বল্মীকম্ । য-দ্বল্মীকবপা সম্ভারো ভবতি ।
ঊর্জমেব রস-ম্পৃথিব্যা অবরুন্ধে । অথো শ্রোত্রমেব । শ্রোত্রগ্গ্ হ্যেত-ত্পৃথিব্যাঃ । য-দ্বল্মীকঃ । অবধিরো ভবতি । য এবং-বেঁদ । ইন্দ্রো বৃত্রায বজ্রমুদযচ্ছত্ ।
স যত্রযত্র পরাক্রমত ॥ 16 ॥

তন্নাদ্ধ্রিযত । স পূতীকস্তম্বে পরাক্রমত । সো-ঽদ্ধ্রিযত । সো-ঽব্রবীত্ । ঊতিং-বৈঁ মে ধা ইতি । তদূতীকানা-মূতীকত্বম্ । যদূতীকা ভবন্তি ।
যজ্ঞাযৈবোতি-ন্দধতি । অগ্নিজা অসি প্রজাপতে রেত ইত্যাহ । য এব রসঃ পশূ-ন্প্রাবিশত্ ॥ 17 ॥

তমেবাবরুন্ধে । পঞ্চৈতে সম্ভারা ভবন্তি । পাঙ্ক্তো যজ্ঞঃ । যাবানেব যজ্ঞঃ । তস্য শির-স্সম্ভরতি । যদ্গ্রাম্যাণা-ম্পশূনাঞ্চর্মণা সম্ভরেত্ । গ্রাম্যা-ন্পশূঞ্ছুচা-ঽর্পযেত্ । কৃষ্ণাজিনেন সম্ভরতি । আরণ্যানেব পশূঞ্ছুচা-ঽর্পযতি । তস্মা-থ্সমাবত্-পশূনা-ম্প্রজাযমানানাম্ ॥ 18 ॥

আরণ্যাঃ পশবঃ কনীযাগ্ংসঃ । শুচা হ্যৃতাঃ ।
লোমত-স্সম্ভরতি । অতো হ্যস্য মেদ্ধ্যম্ । পরিগৃহ্যা যন্তি । রক্ষসামপহত্যৈ ।
বহবো হরন্তি । অপচিতিমেবাস্মি-ন্দধতি ।
উদ্ধতে সিকতোপোপ্তে পরিশ্রিতে নিদধতি শান্ত্যৈ ।
মদন্তীভিরুপ সৃজতি ॥ 19 ॥

তেজ এবাস্মি-ন্দধাতি । মধু ত্বা মধুলা করোত্বিত্যাহ । ব্রহ্মণৈবাস্মিন্ -তেজো দধাতি ।
যদ্গ্রাম্যাণা-ম্পাত্রাণা-ঙ্কপালৈ-স্সগ্ংসৃজেত্ ।
গ্রাম্যাণি পাত্রাণি শুচা-ঽর্পযেত্ । অর্মকপালৈ-স্সগ্ংসৃজতি । এতানি বা অনুপজীবনীযানি । তান্যেব শুচা-ঽর্পযতি ।
শর্করাভি-স্সগ্ংসৃজতি ধৃত্যৈ । অথো শন্ত্বায । অজলোমৈ-স্সগ্ংসৃজতি । এষা বা অগ্নেঃ প্রিযা তনূঃ । যদজা । প্রিযযৈবৈন-ন্তনুবা সগ্ংসৃজতি । অথো তেজসা । কৃষ্ণাজিনস্য লোমভি-স্সগ্ংসৃজতি । যজ্ঞো বৈ কৃষ্ণাজিনম্ ।
যজ্ঞেনৈব যজ্ঞগ্ং সগ্ংসৃজতি ॥ 20 ॥

(যাজাযৈ - ন জুহুযা - দবিশ-দ্- বেণঃ - শান্ত্যৈ - পঙ্ক্তিরাধসমিত্যাহ - হরতি - দিহন্তি - পরাক্রম - তাবিশত্ - প্রজাযমানানাগ্ং - সৃজতি - শন্ত্বাযা ষ্টৌ চ) (অ. 2)
অনুবাকং 3
পরিশ্রিতে করোতি । ব্রহ্মবর্চসস্য পরিগৃহীত্যৈ । ন কুর্বন্নভি প্রাণ্যাত্ । য-ত্কুর্বন্নভি প্রাণ্যাত্ । প্রাণাঞ্ছুচা-ঽর্পযেত্ । অপহায প্রাণিতি ।
প্রাণানা-ঙ্গোপীথায । ন প্রবর্গ্যম্-চাদিত্যম্-চান্তরেযাত্ । যদন্তরেযাত্ । দুশ্চর্মা স্যাত্ ॥ 21 ॥

তস্মান্নান্তরায্যম্ । আত্মনো গোপীথায । বেণুনা করোতি । তেজো বৈ বেণুঃ । তেজঃ প্রবর্গ্যঃ । তেজসৈব তেজ-স্সমর্ধযতি । মখস্য শিরো-ঽসীত্যাহ । যজ্ঞো বৈ মখঃ । তস্যৈতচ্ছিরঃ । য-ত্প্রবর্গ্যঃ ॥ 22 ॥

তস্মাদেবমাহ । যজ্ঞস্য পদে স্থ ইত্যাহ । যজ্ঞস্য হ্যেতে পদে । অথো প্রতিষ্ঠিত্যৈ । গাযত্রেণ ত্বা ছন্দসা করোমীত্যাহ ।
ছন্দোভিরেবৈন-ঙ্করোতি । ত্র্যুদ্ধি-ঙ্করোতি । ত্রয ইমে লোকাঃ । এষাম্ ঁলোকানামাপ্ত্যৈ । ছন্দোভিঃ করোতি ॥ 23 ॥

বীর্যম্ ঁবৈ ছন্দাগ্ংসি । বীর্যেণৈবৈন-ঙ্করোতি ।
যজুষা বিল-ঙ্করোতি ব্যাবৃযৈ । ইযন্ত-ঙ্করোতি ।
প্রজাপতিনা যজ্ঞমুখেন সম্মিতম্ । ইযন্ত-ঙ্করোতি ।
যজ্ঞপরুষা সম্মিতম্ । ইযন্ত-ঙ্করোতি ।
এতাবদ্বৈ পুরুষে বীর্যম্ । বীর্যসম্মিতম্ ॥ 24 ॥

অপরিমিত-ঙ্করোতি । অপরিমিতস্যাবরুদ্ধ্যৈ । পরিগ্রীব-ঙ্করোতি ধৃত্যৈ । সূর্যস্য হরসা শ্রাযেত্যাহ । যথাযজুরেবৈতত্ । অশ্বশকেন ধূপযতি । প্রাজাপত্যো বা অশ্বঃ সযোনিত্বায । বৃষ্ণো অশ্বস্য নিষ্পদসীত্যাহ ।
অসৌ বা আদিত্যো বৃষা-ঽশ্বঃ । তস্য ছন্দাগ্ংসি নিষ্পত্ ॥ 25 ॥

ছন্দোভিরেবৈন-ন্ধূপযতি । অর্চিষে ত্বা শোচিষে ত্বেত্যাহ । তেজ এবাস্মি-ন্দধাতি । বারুণো-ঽভীদ্ধঃ । মৈত্রিযোপৈতি শান্ত্যৈ । সিদ্ধ্যৈ ত্বেত্যাহ । যথাযজুরেবৈতত্ । দেবস্ত্বা সবিতোদ্বপত্বিত্যাহ ।
সবিতৃপ্রসূত এবৈন-ম্ব্রহ্মণা দেবতাভিরুদ্বপতি । অপদ্যমানঃ পৃথিব্যামাশা দিশ আপৃণেত্যাহ ॥ 26 ॥

তস্মাদগ্নি-স্সর্বা দিশো-ঽনু বিভাতি ।
উত্তিষ্ঠ বৃহন্-ভবোর্ধ্বস্তিষ্ঠ ধ্রুবস্ত্বমিত্যাহ প্রতিষ্ঠিত্যৈ ।
ঈশ্বরো বা এষো-ঽন্ধো ভবিতোঃ ।
যঃ প্রবর্গ্যমন্বীক্ষতে । সূর্যস্য ত্বা চক্ষুষা-ঽন্বীক্ষ ইত্যাহ ।
চক্ষুষো গোপীথায । ঋজবে ত্বা সাধবে ত্বা সুক্ষিত্যৈ ত্বা ভূত্যৈ ত্বেত্যাহ । ইযং-বাঁ ঋজুঃ । অন্তরিক্ষগ্ং সাধু । অসৌ সুক্ষিতিঃ ॥ 27 ॥

দিশো ভূতিঃ । ইমানেবাস্মৈ লোকান্ কল্পযতি । অথো প্রতিষ্ঠিত্যৈ । ইদ-মহ-মমুমামুষ্যাযণম্ ঁবিশা পশুভি-র্ব্রহ্মবর্চসেন পর্যূহামীত্যাহ ।
বিশৈবৈন-ম্পশুভি-র্ব্রহ্মবর্চসেন পর্যূহতি ।
বিশেতি রাজন্যস্য ব্রূযাত্ । বিশৈবৈন-ম্পর্যূহতি । পশুভিরিতি বৈশ্যস্য । পশুভিরেবৈন-ম্পর্যূহতি । অসুর্য-ম্পাত্রমনাচ্ছৃণ্ণম্ ॥ 28 ॥

আচ্ছৃণত্তি । দেবত্রা-ঽকঃ । অজক্ষীরেণাচ্ছৃণত্তি ।
পরমং-বাঁ এত-ত্পযঃ । যদজক্ষীরম্ । পরমেণৈবৈন-ম্পযসা-ঽঽচ্ছৃণত্তি ।
যজুষা ব্যাবৃত্ত্যৈ । ছন্দোভিরাচ্ছৃণত্তি । ছন্দোভির্বা এষ ক্রিযতে । ছন্দোভিরেব ছন্দাগ্স্যাচ্ছৃণত্তি । ছৃন্ধি বাচমিত্যাহ ।
বাচমেবাবরুন্ধে । ছৃন্ধ্যূর্জমিত্যাহ । ঊর্জমেবাবরুন্ধে । ছৃন্ধি হবিরিত্যাহ । হবিরেবাকঃ । দেব পুরশ্চর সঘ্যাসন্ত্বেত্যাহ ।
যথাযজুরেবৈতত্ ॥ 29 ॥

(স্যা-দ্য-ত্প্রবর্গ্যঃ - ছন্দোভিঃ করোতি - বীর্য সম্মিতম্ - ছন্দাগ্ংসি নিষ্পত্ - পৃণেত্যাহ - সুক্ষিতি - রনাচ্ছৃণ্ণম্ - ছন্দাগ্স্যাচ্ছৃণ ত্ত্যষ্টৌ চ) (অ. 3)
অনুবাকং 4
ব্রহ্ম-ন্প্রচরিষ্যামো হোত-র্ঘর্মমভিষ্টুহীত্যাহ ।
এষ বা এতর্হি বৃহস্পতিঃ । যদ্ব্রহ্মা ।
তস্মা এব প্রতিপ্রোচ্য প্রচরতি ।
আত্মনো-ঽনার্ত্যৈ । যমায ত্বা মখায ত্বেত্যাহ ।
এতা বা এতস্য দেবতাঃ । তাভিরেবৈনগ্ং সমর্ধযতি । মদন্তীভিঃ প্রোক্ষতি । তেজ এবাস্মি-ন্দধাতি ॥ 30 ॥

অভিপূর্ব-ম্প্রোক্ষতি । অভিপূর্ব-মেবাস্মিন্-তেজো দধাতি । ত্রিঃ প্রোক্ষতি । ত্র্যাবৃদ্ধি যজ্ঞঃ । অথো মেদ্ধ্যত্বায । হোতা-ঽন্বাহ । রক্ষসামপহত্যৈ । অনবানম্ । প্রাণানাগ্ং সন্তত্যৈ ।
ত্রিষ্টুভঃ সতী-র্গাযত্রীরিবান্বাহ ॥ 31 ॥

গাযত্রো হি প্রাণঃ । প্রাণমেব যজমানে দধাতি । সন্ততমন্বাহ । প্রাণানামন্নাদ্যস্য সন্তত্যৈ । অথো রক্ষসামপহত্যৈ । য-ত্পরিমিতা অনুব্রূযাত্ । পরিমিতমবরুন্ধীত । অপরিমিতা অন্বাহ ।
অপরিমিতস্যাবরুদ্ধ্যৈ । শিরো বা এত-দ্যজ্ঞস্য ॥ 32 ॥

য-ত্প্রবর্গ্যঃ । ঊংর্মুঞ্জাঃ । য-ন্মৌঞ্জো বেদো ভবতি । ঊর্জৈব যজ্ঞস্য শির-স্সমর্ধযতি । প্রাণাহুতী-র্জুহোতি । প্রাণানেব যজমানে দধাতি । সপ্ত জুহোতি । সপ্ত বৈ শীর্ষণ্যাঃ প্রাণাঃ । প্রাণানেবাস্মি-ন্দধাতি । দেবস্ত্বা সবিতা মদ্ধ্বা-ঽনক্ত্বিত্যাহ ॥ 33 ॥

তেজসৈবৈনমনক্তি । পৃথিবী-ন্তপসস্ত্রাযস্বেতি হিরণ্যমুপাস্যতি । অস্যা অনতিদাহায । শিরো বা এত-দ্যজ্ঞস্য । য-ত্প্রবর্গ্যঃ । অগ্নি-স্সর্বা দেবতাঃ । প্রলবানাদীপ্যোপাস্যতি । দেবতাস্বেব যজ্ঞস্য শিরঃ প্রতিদধাতি । অপ্রতিশীর্ণাগ্র-ম্ভবতি ।
এত-দ্বর্হির্হ্যেষঃ ॥ 34 ॥

অর্চিরসি শোচিরসীত্যাহ । তেজ এবাস্মি-ন্ব্রহ্মবর্চস-ন্দধাতি । সগ্ংসীদস্ব মহাগ্ং অসীত্যাহ । মহান্. হ্যেষঃ । ব্রহ্মবাদিনো বদন্তি ।
এতে বাব ত ঋত্বিজঃ । যে দর্শপূর্ণমাসযোঃ ।
অথ কথা হোতা যজমানাযাশিষো নাশাস্ত ইতি ।
পুরস্তাদাশীঃ খলু বা অন্যো যজ্ঞঃ । উপরিষ্টাদাশীরন্যঃ ॥ 35 ॥

অনাধৃষ্যা পুরস্তাদিতি যদেতানি যজূগ্ষ্যাহ । শীর্ষত এব যজ্ঞস্য যজমান আশিষো-ঽবরুন্ধে । আযুঃ পুরস্তাদাহ । প্রজা-ন্দক্ষিণতঃ । প্রাণ-ম্পশ্চাত্ ।
শ্রোত্রমুত্তরতঃ । বিধৃতিমুপরিষ্টাত্ । প্রাণানেবাস্মৈ সমীচো দধাতি ।
ঈশ্বরো বা এষ দিশো-ঽনূন্মদিতোঃ ।
যন্দিশো-ঽনু ব্যাস্থাপযন্তি ॥ 36 ॥

মনোরশ্বা-ঽসি ভূরিপুত্রেতীমা-মভিমৃশতি ।
ইযং-বৈঁ মনোরশ্বা ভূরিপুত্রা । অস্যামেব প্রতিতিষ্ঠত্যনুন্মাদায । সূপসদা মে ভূযা মা মা হিগ্ংসীরিত্যাহাহিগ্ংসাযৈ ।
চিতঃ স্থ পরিচিত ইত্যাহ । অপচিতিমেবাস্মি-ন্দধাতি । শিরো বা এত-দ্যজ্ঞস্য । য-ত্প্রবর্গ্যঃ ।
অসৌ খলু বা আদিত্যঃ প্রবর্গ্যঃ । তস্য মরুতো রশ্মযঃ ॥ 37 ॥

স্বাহা মরুদ্ভিঃ পরিশ্রযস্বেত্যাহ । অমুমেবাদিত্যগ্ং রশ্মিভিঃ পর্যূহতি ।
তস্মা-দসাবাদিত্যো-ঽমুষ্মিন্ ঁলোকে রশ্মিভিঃ পর্যূঢঃ । তস্মা-দ্রাজা বিশা পর্যূঢঃ । তস্মা-দ্গ্রামণী-স্সজাতৈঃ পর্যূঢঃ । অগ্নে-স্সৃষ্টস্য যতঃ । বিকঙ্কত-ম্ভা আর্চ্ছত্ ।
য-দ্বৈকঙ্কতাঃ পরিধযো ভবন্তি ।
ভা এবাবরুন্ধে । দ্বাদশ ভবন্তি ॥ 38 ॥

দ্বাদশ মাসা-স্সংবঁথ্সরঃ । সংবঁথ্সরমেবাবরুন্ধে ।
অস্তি ত্রযোদশো মাস ইত্যাহুঃ । য-ত্ত্রযোদশঃ পরিধির্ভবতি । তেনৈব ত্রযোদশ-ম্মাসমবরুন্ধে । অন্তরিক্ষস্যান্ত-র্ধিরসীত্যাহ ব্যাবৃত্ত্যৈ । দিব-ন্তপসস্ত্রাযস্বে-ত্যুপরিষ্টা-দ্ধিরণ্যমধি নিদধাতি । অমুষ্যা অনতিদাহায । অথো আভ্যামেবৈনমুভযতঃ পরিগৃহ্ণাতি ।
অর্হ-ন্বিভর্ষি সাযকানি ধন্বেত্যাহ ॥ 39 ॥

স্তৌত্যেবৈনমেতত্ । গাযত্রমসি ত্রৈষ্টুভমসি জাগতমসীতি ধবিত্রাণ্যাদত্তে । ছন্দোভিরেবৈনান্যাদত্তে । মধু মদ্ধ্বিতি ধূনোতি । প্রাণো বৈ মধু । প্রাণমেব যজমানে দধাতি । ত্রিঃ পরিযন্তি । ত্রিবৃদ্ধি প্রাণঃ ।
ত্রিঃ পরিযন্তি । ত্র্যাবৃদ্ধি যজ্ঞঃ ॥ 40 ॥

অথো রক্ষসামপহত্যৈ । ত্রিঃ পুনঃ পরিযন্তি ।
ষট্-থ্সম্পদ্যন্তে । ষড্বা ঋতবঃ । ঋতুষ্বেব প্রতিতিষ্ঠন্তি । যো বৈ ঘর্মস্য প্রিযান্-তনুবমাক্রামতি । দুশ্চর্মা বৈ স ভবতি ।
এষ হ বা অস্য প্রিযা-ন্তনুবমাক্রামতি ।
য স্ত্রিঃ পরীত্য চতুর্থ-ম্পর্যেতি ।
এতাগ্ং হ বা অস্যোগ্রদেবো রাজনিরাচক্রাম ॥ 41 ॥

ততো বৈ স দুশ্চর্মা-ঽভবত্ । তস্মা-ত্ত্রিঃ পরীত্য ন চতুর্থ-ম্পরীযাত্ । আত্মনো গোপীথায । প্রাণা বৈ ধবিত্রাণি । অব্যতিষঙ্গ-ন্ধূন্বন্তি ।
প্রাণানা-মব্যতিষঙ্গায ক্লৃপ্ত্যৈ । বিনিষদ্য ধূন্বন্তি । দিক্ষ্বেব প্রতিতিষ্ঠন্তি । ঊর্ধ্বন্ধূন্বন্তি । সুবর্গস্য লোকস্য সমষ্ট্যৈ । সর্বতো ধূন্বন্তি ।
তস্মাদযগ্ং সর্বতঃ পবতে ॥ 42 ॥

(দধা- তীবান্বাহ - যজ্ঞ - স্যাহৈ - ষ - উপরিষ্টাদাশীরন্যো - ব্যাস্থাপযন্তি - রশ্মযো - ভবন্তি - ধন্বেত্যাহ - যজ্ঞ - শ্চক্রাম - সমষ্ট্যৈ দ্বে চ) (অ. 4)
অনুবাকং 5
অগ্নিষ্ট্বা বসুভিঃ পুরস্তা-দ্রোচযতু গাযত্রেণ ছন্দসেত্যাহ । অগ্নিরেবৈনং-বঁসুভিঃ পুরস্তা-দ্রোচযতি গাযত্রেণ ছন্দসা । স মা রুচিতো রোচযেত্যাহ । আশিষমেবৈতামাশাস্তে ।
ইন্দ্রস্ত্বা রুদ্রৈ-র্দক্ষিণতো রোচযতু ত্রৈষ্টুভেন
ছন্দসেত্যাহ । ইন্দ্র এবৈনগ্ং রুদ্রৈ-র্দক্ষিণতো রোচযতি ত্রৈষ্টুভেন ছন্দসা । স মা রুচিতো রোচযেত্যাহ । আশিষমেবৈতামাশাস্তে ।
বরুণস্ত্বা-ঽঽদিত্যৈঃ পশ্চা-দ্রোচযতু জাগতেন ছন্দসেত্যাহ । বরুণ এবৈনমাদিত্যৈঃ পশ্চা-দ্রোচযতি জাগতেন ছন্দসা ॥ 43 ॥

স মা রুচিতো রোচযেত্যাহ । আশিষমেবৈতামাশাস্তে ।
দ্যুতানস্ত্বা মারুতো মরুদ্ভিরুত্তরতো রোচযত্বানুষ্টুভেন ছন্দসেত্যাহ ।
দ্যুতান এবৈন-ম্মারুতো মরুদ্ভিরুত্তরতো রোচযত্যানুষ্টুভেন ছন্দসা ।
স মা রুচিতো রোচযেত্যাহ । আশিষমেবৈতামাশাস্তে ।
বৃহস্পতিস্ত্বা বিশ্বৈ-র্দেবৈরুপরিষ্টা-দ্রোচযতু পাঙ্ক্তেন ছন্দসেত্যাহ ।
বৃহস্পতিরেবৈনম্ ঁবিশ্বৈ-র্দেবৈরুপরিষ্টা-দ্রোচযতি পাঙ্ক্তেন ছন্দসা ।
স মা রুচিতো রোচযেত্যাহ । আশিষমেবৈতামাশাস্তে ॥ 44 ॥

রোচিতস্ত্ব-ন্দেব ঘর্ম দেবেষ্বসীত্যাহ । রোচিতো হ্যেষ দেবেষু । রোচিষীযাহ-ম্মনুষ্যেষ্বিত্যাহ । রোচত এবৈষ মনুষ্যেষু । সম্রাড্ ঘর্ম রুচিতস্ত্ব-ন্দেবেষ্বাযুষ্মাগ্ স্তেজস্বী ব্রহ্মবর্চস্যসীত্যাহ ।
রুচিতো হ্যেষ দেবেষ্বাযুষ্মাগ্ স্তেজস্বী ব্রহ্মবর্চসী ।
রুচিতো-ঽহ-ম্মনুষ্যেষ্বাযুষ্মাগ্ স্তেজস্বী ব্রহ্মবর্চসী ভূযাসমিত্যাহ ।
রুচিত এবৈষ মনুষ্যেষ্বাযুষ্মাগ্ স্তেজস্বী ব্রহ্মবর্চসী ভবতি । রুগসি রুচ-ম্মযি ধেহি মযি রুগিত্যাহ । আশিষমেবৈতামাশাস্তে ।
তং-যঁদেতৈ-র্যজুর্ভিররোচযিত্বা । রুচিতো ঘর্ম ইতি প্রব্রূযাত্ । অরোচুকো-ঽদ্ধ্বর্যু-স্স্যাত্ ।
অরোচুকো যজমানঃ । অথ যদেনমেতৈর্যজুর্ভী রোচযিত্বা । রুচিতো ঘর্ম ইতি প্রাহ । রোচুকো-ঽদ্ধ্বর্যু-র্ভবতি । রোচুকো যজমানঃ ॥ 45 ॥

(পশ্চা-দ্রোচযতি জগতেন ছন্দসা - পাঙ্ক্তেন ছন্দসা স মা রুচিতো রোচযেত্যাহাশিষমেবৈতামাশাস্তে - শাস্তে ঽষ্টৌ চ) (অ. 5)
অনুবাকং 6
শিরো বা এত-দ্যজ্ঞস্য । য-ত্প্রবর্গ্যঃ । গ্রীবা উপসদঃ । পুরস্তাদুপসদা-ম্প্রবর্গ্য-ম্প্রবৃণক্তি । গ্রীবাস্বেব যজ্ঞস্য শিরঃ প্রতিদধাতি । ত্রিঃ প্রবৃণক্তি । ত্রয ইমে লোকাঃ । এভ্য এব লোকেভ্যো যজ্ঞস্য শিরো-ঽবরুন্ধে ।
ষট্-থ্সম্পদ্যন্তে । ষড্বা ঋতবঃ ॥ 46 ॥

ঋতুভ্য এব যজ্ঞস্য শিরো-ঽবরুন্ধে । দ্বাদশ কৃত্বঃ প্রবৃণক্তি । দ্বাদশ মাসা-স্সংবঁথ্সরঃ । সংবঁথ্সরাদেব যজ্ঞস্য শিরো-ঽবরুন্ধে । চতুর্বিগ্ংশতি-স্সম্পদ্যন্তে । চতুর্বিগ্ংশতিরর্ধমাসাঃ ।
অর্ধমাসেভ্য এব যজ্ঞস্য শিরো-ঽবরুন্ধে । অথো খলু । সকৃদেব প্রবৃজ্যঃ । একগ্ং হি শিরঃ ॥ 47 ॥

অগ্নিষ্টোমে প্রবৃণক্তি । এতাবান্. বৈ যজ্ঞঃ । যাবানগ্নিষ্টোমঃ । যাবানেব যজ্ঞঃ । তস্য শিরঃ প্রতিদধাতি । নোক্থ্যে প্রবৃঞ্জ্যাত্ ।
প্রজা বৈ পশব উক্থানি । যদুক্থ্যে প্রবৃঞ্জ্যাত্ ।
প্রজা-ম্পশূনস্য নির্দহেত্ । বিশ্বজিতি সর্বপৃষ্ঠে প্রবৃণক্তি ॥ 48 ॥

পৃষ্ঠানি বা অচ্যুতঞ্চ্যাবযন্তি ।
পৃষ্ঠৈরেবাস্মা অচ্যুতঞ্চ্যাবযিত্বা-ঽবরুন্ধে । অপশ্য-ঙ্গোপামিত্যাহ । প্রাণো বৈ গোপাঃ । প্রাণমেব প্রজাসু বিযাতযতি ।
অপশ্য-ঙ্গোপামিত্যাহ । অসৌ বা আদিত্যো গোপাঃ । স হীমাঃ প্রজা গোপাযতি । তমেব প্রজানা-ঙ্গোপ্তার-ঙ্কুরুতে । অনিপদ্যমানমিত্যাহ ॥ 49 ॥

ন হ্যেষ নিপদ্যতে । আ চ পরা চ পথিভিশ্চরন্তমিত্যাহ । আ চ হ্যেষ পরা চ পথিভিশ্চরতি । স সদ্ধ্রীচী-স্স বিষূচীর্বসান ইত্যাহ । সদ্ধ্রীচীশ্চ হ্যেষ বিষূচীশ্চ বসানঃ প্রজা অভি বিপশ্যতি । আ বরীবর্তি ভুবনেষ্বন্তরিত্যাহ । আ হ্যেষ বরীবর্তি ভুবনেষ্বন্তঃ । অত্র প্রাবীর্মধু মাদ্ধ্বীভ্যা-ম্মধু মাধূচীভ্যামিত্যাহ ।
বাসন্তিকাবেবাস্মা ঋতূ কল্পযতি ।
সমগ্নিরগ্নিনা গতেত্যাহ ॥ 50 ॥

গ্রৈষ্মাবেবাস্মা ঋতূ কল্পযতি । সমগ্নিরগ্নিনা গতেত্যাহ । অগ্নির্হ্যেবৈষো-ঽগ্নিনা সঙ্গচ্ছতে । স্বাহা সমগ্নিস্তপসা গতেত্যাহ ।
পূর্বমেবোদিতম্ । উত্তরেণাভিগৃণাতি ।
ধর্তা দিবো বিভাসি রজসঃ পৃথিব্যা ইত্যাহ ।
বার্ষিকাবেবাস্মা ঋতূ কল্পযতি ।
হৃদে ত্বা মনসে ত্বেত্যাহ । শারদাবেবাস্মা ঋতূ কল্পযতি ॥ 51 ॥

দিবি দেবেষু হোত্রা যচ্ছেত্যাহ । হোত্রাভিরেবেমান্ ঁলোকান্-থ্স-ন্দধাতি । বিশ্বাসা-ম্ভুবা-ম্পত ইত্যাহ । হৈমন্তিকাবেবাস্মা ঋতূ কল্পযতি ।
দেবশ্রূস্ত্ব-ন্দেব ঘর্ম দেবা-ন্পাহীত্যাহ ।
শৈশিরাবেবাস্মা ঋতূ কল্পযতি ।
তপোজাং-বাঁচমস্মে নিযচ্ছ দেবাযুবমিত্যাহ ।
যা বৈ মেদ্ধ্যা বাক্ । সা তপোজাঃ । তামেবাবরুন্ধে ॥ 52 ॥

গর্ভো দেবানামিত্যাহ । গর্ভো হ্যেষ দেবানাম্ । পিতা মতীনামিত্যাহ । প্রজা বৈ মতযঃ । তাসামেষ এব পিতা । য-ত্প্রবর্গ্যঃ ।
তস্মাদেবমাহ । পতিঃ প্রজানামিত্যাহ । পতির্হ্যেষ প্রজানাম্ । মতিঃ কবীনামিত্যাহ ॥ 53 ॥

মতির্হ্যেষ কবীনাম্ । স-ন্দেবো দেবেন সবিত্রা ঽযতিষ্ট সগ্ং সূর্যেণারুক্তেত্যাহ ।
অমুঞ্চৈবাদিত্য-ম্প্রবর্গ্যঞ্চ সগ্ংশাস্তি ।
আযুর্দাস্ত্বমস্মভ্য-ঙ্ঘর্ম বর্চোদা অসীত্যাহ ।
আশিষমেবৈতামাশাস্তে । পিতা নো-ঽসি পিতা নো বোধেত্যাহ । বোধযত্যেবৈনম্ । ন বৈ তে-ঽবকাশা ভবন্তি । পত্নিযৈ দশমঃ ।
নব বৈ পুরুষে প্রাণাঃ ॥ 54 ॥

নাভির্দশমী । প্রাণানেব যজমানে দধাতি । অথো দশাক্ষরা বিরাট্ । অন্নং-বিঁরাট্ । বিরাজৈবান্নাদ্যমবরুন্ধে । যজ্ঞস্য শিরো-ঽচ্ছিদ্যত । ত-দ্দেবা হোত্রাভিঃ প্রত্যদধুঃ । ঋত্বিজো-ঽবেক্ষন্তে । এতা বৈ হোত্রাঃ । হোত্রাভিরেব যজ্ঞস্য শিরঃ প্রতিদধাতি ॥ 55 ॥

রুচিতমবেক্ষন্তে । রুচিতাদ্বৈ প্রজাপতিঃ প্রজা অসৃজত । প্রজানাগ্ং সৃষ্ট্যৈ । রুচিতমবেক্ষন্তে । রুচিতাদ্বৈ পর্জন্যো বর্ষতি । বর্ষুকঃ পর্জন্যো ভবতি । স-ম্প্রজা এধন্তে । রুচিতমবেক্ষন্তে । রুচিতম্ ঁবৈ ব্রহ্মবর্চসম্ । ব্রহ্মবর্চসিনো ভবন্তি ॥ 56 ॥

অধীযন্তো-ঽবেক্ষন্তে । সর্বমাযুর্যন্তি । ন পত্ন্যবেক্ষেত । য-ত্পন্ত্যবেক্ষেত । প্রজাযেত । প্রজান্ত্বস্যৈ নির্দহেত্ । যন্নাবেক্ষেত । ন প্রজাযেত ।
নাস্যৈ প্রজান্নির্দহেত্ । তিরস্কৃত্য যজু-র্বাচযতি । প্রজাযতে । নাস্যৈ প্রজান্নির্দহতি । ত্বষ্টীমতী তে সপেযেত্যাহ । সপাদ্ধি প্রজাঃ প্রজাযন্তে ॥ 57 ॥

(ঋতবো - হি শিরঃ - সর্বপৃষ্ঠে প্রবৃণ - ক্ত্যনিপদ্যমানমিত্যাহ - গতেত্যাহ - শারদাবেবাস্মা ঋতূ কল্পযতি - রুন্ধে - কবিনামিত্যাহ - প্রাণাঃ - প্রতিদধাতি - ভবন্তি - বাচযতি চত্বারি চ) (অ. 6)
অনুবাকং 7
দেবস্য ত্বা সবিতুঃ প্রসব ইতি রশনামাদত্তে প্রসূত্যৈ । অশ্বিনো-র্বাহুভ্যামিত্যাহ । অশ্বিনৌ হি দেবানামদ্ধ্বর্যূ আস্তাম্ । পূষ্ণো হস্তাভ্যামিত্যাহ যত্যৈ । আদদে-ঽদিত্যৈ রাস্না-ঽসীত্যাহ যজুষ্কৃত্যৈ । ইড এহ্যদিত এহি সরস্বত্যেহীত্যাহ । এতানি বা অস্যৈ দেবনামানি ।
দেবনামৈরেবৈনা-মাহ্বযতি । অসাবেহ্য-সাবেহ্য-সাবেহীত্যাহ । এতানি বা অস্যৈ মনুষ্যনামানি ॥ 58 ॥

মনুষ্যনামৈরেবৈনামাহ্বযতি ।
ষট্-থ্সম্পদ্যন্তে । ষড্বা ঋতবঃ ।
ঋতুভিরেবৈনামাহ্বযতি । অদিত্যা উষ্ণীষমসীত্যাহ । যথাযজুরেবৈতত্ ।
বাযুরস্যৈড ইত্যাহ । বাযুদেবত্যো বৈ বথ্সঃ ।
পূষা ত্বোপাবসৃজত্বিত্যাহ । পৌষ্ণা বৈ দেবতযা পশবঃ ॥ 59 ॥

স্বযৈবৈন-ন্দেবতযোপাবসৃজতি । অশ্বিভ্যা-ম্প্রদাপযেত্যাহ । অশ্বিনৌ বৈ দেবানা-ম্ভিষজৌ । তাভ্যামেবাস্মৈ ভেষজ-ঙ্করোতি । যস্তে স্তনঃ শশয ইত্যাহ । স্তৌত্যেবৈনাম্ । উস্র ঘর্মগ্ং শিগ্ংষোস্র ঘর্ম-ম্পাহি ঘর্মায শিগ্ংষেত্যাহ । যথা ব্রূযাদমুষ্মৈ দেহীতি । তাদৃগেব তত্ । বৃহস্পতিস্ত্বোপসীদত্বিত্যাহ ॥ 60 ॥

ব্রহ্ম বৈ দেবানা-ম্বৃহস্পতিঃ । ব্রহ্মণৈবৈনামুপসীদতি ।
দানব-স্স্থ পেরব ইত্যাহ । মেদ্ধ্যানেবৈনান্করোতি ।
বিষ্বগ্বৃতো লোহিতেনেত্যাহ ব্যাবৃত্ত্যৈ ।
অশ্বিভ্যা-ম্পিন্বস্ব সরস্বত্যৈ পিন্বস্ব পূষ্ণে পিন্বস্ব বৃহস্পতযে পিন্বস্বেত্যাহ ।
এতাভ্যো হ্যেষা দেবতাভ্যঃ পিন্বতে ।
ইন্দ্রায পিন্বস্বেন্দ্রায পিন্বস্বেত্যাহ ।
ইন্দ্রমেব ভাগধেযেন সমর্ধযতি । দ্বিরিন্দ্রাযেত্যাহ ॥ 61 ॥

তস্মাদিন্দ্রো দেবতানা-ম্ভূযিষ্ঠভাক্তমঃ ।
গাযত্রো-ঽসি ত্রৈষ্টুভো-ঽসি জাগতমসীতি শফোপযমানাদত্তে ।
ছন্দোভিরেবৈনানাদত্তে । সহোর্জো ভাগেনোপমেহীত্যাহ ।
ঊর্জ এবৈন-ম্ভাগমকঃ ।
অশ্বিনৌ বা এত-দ্যজ্ঞস্য শিরঃ প্রতিদধতাবব্রূতাম্ ।
আবাভ্যামেব পূর্বাভ্যাং-বঁষট্ক্রিযাতা ইতি ।
ইন্দ্রাশ্বিনা মধুন-স্সারঘস্যেত্যাহ ।
অশ্বিভ্যামেব পূর্বাভ্যাং-বঁষট্করোতি ।
অথো অশ্বিনাবেব ভাগধেযেন সমর্ধযতি ॥ 62 ॥

ঘর্ম-ম্পাত বসবো যজতা বডিত্যাহ ।
বসূনেব ভাগধেযেন সমর্ধযতি । য-দ্বষট্কুর্যাত্ । যাতযামা-ঽস্য বষট্কার-স্স্যাত্ ।
যন্ন বষট্কুর্যাত্ । রক্ষাগ্ংসি যজ্ঞগ্ং হন্যুঃ । বডিত্যাহ । পরোক্ষমেব বষট্করোতি । নাস্য যাতযামা বষট্কারো ভবতি ।
ন যজ্ঞগ্ং রক্ষাগ্ংসি ঘ্নন্তি ॥ 63 ॥

স্বাহা ত্বা সূর্যস্য রশ্মযে বৃষ্টিবনযে জুহোমীত্যাহ । যো বা অস্য পুণ্যো রশ্মিঃ । স বৃষ্টিবনিঃ । তস্মা এবৈন-ঞ্জুহোতি ।
মধু হবিরসীত্যাহ । স্বদযত্যেবৈনম্ । সূর্যস্য তপস্তপেত্যাহ ।
যথাযজুরেবৈতত্ । দ্যাবাপৃথিবীভ্যা-ন্ত্বা পরিগৃহ্ণামীত্যাহ ।
দ্যাবাপৃথিবীভ্যা-মেবৈন-ম্পরিগৃহ্ণাতি ॥ 64 ॥

অন্তরিক্ষেণ ত্বোপযচ্ছামীত্যাহ । অন্তরিক্ষেণৈবৈন-মুপযচ্ছতি ।
ন বা এত-ম্মনুষ্যো ভর্তুমর্হতি ।
দেবানা-ন্ত্বা পিতৃণামনুমতো ভর্তুগ্ং শকেযমিত্যাহ । দেবৈরেবৈন-ম্পিতৃভিরনুমত আদত্তে । বি বা এনমেতদর্ধযন্তি । য-ত্পশ্চা-ত্প্রবৃজ্য পুরো জুহ্বতি । তেজো-ঽসি তেজো-ঽনু প্রেহীত্যাহ । তেজ এবাস্মি-ন্দধাতি । দিবিস্পৃম্মা মা হিগ্ংসী-রন্তরিক্ষস্পৃম্মা মা হিগ্ংসীঃ
পৃথিবিস্পৃম্মা মা হিগ্ংসীরিত্যাহাহিগ্ংসাযৈ ॥ 65 ॥

সুবরসি সুবর্মে যচ্ছ দিবং-যঁচ্ছ দিবো মা পাহীত্যাহ । আশিষমেবৈতামাশাস্তে । শিরো বা এত-দ্যজ্ঞস্য । য-ত্প্রবর্গ্যঃ ।
আত্মা বাযুঃ । উদ্যত্য বাতনামান্যাহ ।
আত্মন্নেব যজ্ঞস্য শিরঃ প্রতিদধাতি ।
অনবানম্ । প্রাণানাগ্ং সন্তত্যৈ । পঞ্চাহ ॥ 66 ॥

পাঙ্ক্তো যজ্ঞঃ । যাবানেব যজ্ঞঃ । তস্য শিরঃ প্রতিদধাতি । অগ্নযে ত্বা বসুমতে স্বাহেত্যাহ ।
অসৌ বা আদিত্যো-ঽগ্নি-র্বসুমান্ । তস্মা এবৈনঞ্জুহোতি । সোমায ত্বা রুদ্রবতে স্বাহেত্যাহ ।
চন্দ্রমা বৈ সোমো রুদ্রবান্ । তস্মা এবৈনঞ্জুহোতি । বরুণায ত্বা-ঽঽদিত্যবতে স্বাহেত্যাহ ॥ 67 ॥

অফ্সু বৈ বরুণ আদিত্যবান্ । তস্মা এবৈনঞ্জুহোতি ।
বৃহস্পতযে ত্বা বিশ্বদেব্যাবতে স্বাহেত্যাহ ।
ব্রহ্ম বৈ দেবানা-ম্বৃহস্পতিঃ ।
ব্রহ্মণ এবৈনঞ্জুহোতি ।
সবিত্রে ত্বর্ভুমতে বিভুমতে প্রভুমতে বাজবতে স্বাহেত্যাহ । সংবঁথ্সরো বৈ সবিতর্ভুমান্. বিভুমা-ন্প্রভুমান্. বাজবান্ । তস্মা এবৈনঞ্জুহোতি । যমায ত্বা-ঽঙ্গিরস্বতে পিতৃমতে স্বাহেত্যাহ ।
প্রাণো বৈ যমো-ঽঙ্গিরস্বা-ন্পিতৃমান্ ॥ 68 ॥

তস্মা এবৈনঞ্জুহোতি । এতাভ্য এবৈন-ন্দেবতাভ্যো জুহোতি । দশ সম্পদ্যন্তে । দশাক্ষরা বিরাট্ । অন্নং-বিঁরাট্ । বিরাজৈবান্নাদ্যমবরুন্ধে । রৌহিণাভ্যাং-বৈঁ দেবা-স্সুবর্গং-লোঁকমাযন্ন্ । ত-দ্রৌহিণযো রৌহিণত্বম্ । য-দ্রৌহিণৌ ভবতঃ । রৌহিণাভ্যামেব ত-দ্যজমান-স্সুবর্গং-লোঁকমেতি ।
অহর্জ্যোতিঃ কেতুনা জুষতাগ্ং সুজ্যোতির্জ্যোতিষাগ্ স্বাহা রাত্রির্জ্যোতিঃ কেতুনা জুষতাগ্ং সুজ্যোতির্জ্যোতিষাগ্ স্বাহেত্যাহ ।
আদিত্যমেব তদমুষ্মিন্ ঁলোকে-ঽহ্না পরস্তা-দ্দাধার । রাত্রিযা অবস্তাত্ ।
তস্মাদসাবাদিত্যো ঽমুষ্মিন্ ঁলোকে-ঽহোরাত্রাভ্যা-ন্ধৃতঃ ॥ 69 ॥

(মনুষ্যনামানি - পশবঃ - সীদত্বিত্যা - হেন্দ্রাযেত্যাহা - র্ধযতি - ঘ্নন্তি - গৃহ্ণা - ত্যহিগ্ংসাযৈ - পঞ্চাহা - দিত্যবতে স্বাহেত্যাহ - পিতৃমা - নেতি চত্বারি চ) (অ. 7)
অনুবাকং 8
বিশ্বা আশা দক্ষিণসদিত্যাহ । বিশ্বানেব দেবা-ন্প্রীণাতি । অথো দুরিষ্ট্যা এবৈন-ম্পাতি । বিশ্বা-ন্দেবানযাডিহেত্যাহ । বিশ্বানেব দেবা-ন্ভাগধেযেন সমর্ধযতি । স্বাহাকৃতস্য ঘর্মস্য মধোঃ পিবতমশ্বিনেত্যাহ ।
অশ্বিনাবেব ভাগধেযেন সমর্ধযতি ।
স্বাহা-ঽগ্নযে যজ্ঞিযায শংযঁজুর্ভিরিত্যাহ । অভ্যেবৈন-ঙ্ঘারযতি । অথো হবিরেবাকঃ ॥ 70 ॥

অশ্বিনা ঘর্ম-ম্পাতগ্ং হার্দিবান-মহর্দিবাভি-রূতিভিরিত্যাহ । অশ্বিনাবেব ভাগধেযেন সমর্ধযতি । অনু বা-ন্দ্যাবাপৃথিবী মগ্ংসাতামিত্যাহানুমত্যৈ ।
স্বাহেন্দ্রায স্বাহেন্দ্রা বডিত্যাহ ।
ইন্দ্রায হি পুরো হূযতে । আশ্রাব্যাহ ঘর্মস্য যজেতি । বষট্কৃতে জুহোতি । রক্ষসামপহত্যৈ । অনুযজতি স্বগাকৃত্যৈ ।
ঘর্মমপাতমশ্বিনেত্যাহ ॥ 71 ॥

পূর্বমেবোদিতম্ । উত্তরেণাভিগৃণাতি ।
অনু বান্-দ্যাবাপৃথিবী অমগ্ংসাতামিত্যাহানুমত্যৈ ।
ত-ম্প্রাব্যম্ ঁযথাবণ্ণমো দিবে নমঃ পৃথিব্যা ইত্যাহ । যথাযজুরেবৈতত্ । দিবি ধা ইমং-যঁজ্ঞং-যঁজ্ঞমিম-ন্দিবি ধা ইত্যাহ ।
সুবর্গমেবৈনম্ ঁলোক-ঙ্গমযতি ।
দিব-ঙ্গচ্ছান্তরিক্ষ-ঙ্গচ্ছ পৃথিবী-ঙ্গচ্ছেত্যাহ ।
এষ্বেবৈনম্ ঁলোকেষু প্রতিষ্ঠাপযতি । পঞ্চ প্রদিশো গচ্ছেত্যাহ ॥ 72 ॥

দিক্ষ্বেবৈন-ম্প্রতিষ্ঠাপযতি ।
দেবা-ন্ঘর্মপা-ন্গচ্ছ পিতৄ-ন্ঘর্মপা-ন্গচ্ছেত্যাহ । উভযেষ্বেবৈন-ম্প্রতিষ্ঠাপযতি । য-ত্পিন্বতে । বর্ষুকঃ পর্জন্যো ভবতি । তস্মা-ত্পিন্বমানঃ পুণ্যঃ । য-ত্প্রাম্পিন্বতে । ত-দ্দেবানাম্ । য-দ্দক্ষিণা । তত্-পিতৃণাম্ ॥ 73 ॥

য-ত্প্রত্যক্ । ত-ন্মনুষ্যাণাম্ । যদুদঙ্ঙ্ । ত-দ্রুদ্রাণাম্ । প্রাঞ্চমুদঞ্চ-ম্পিন্বযতি । দেবত্রা-ঽকঃ । অথো খলু । সর্বা অনু দিশঃ পিন্বযতি । সর্বা দিশ-স্সমেধন্তে । অন্তঃপরিধি পিন্বযতি ॥ 74 ॥

তেজসো-ঽস্কন্দায । ইষে পীপিহ্যূর্জে পীপিহীত্যাহ ।
ইষমেবোর্জং-যঁজমানে দধাতি । যজমানায পীপিহীত্যাহ । যজমানাযৈবৈতা-মাশিষমাশাস্তে ।
মহ্যঞ্জ্যৈষ্ঠ্যায পীপিহীত্যাহ ।
আত্মন এবৈতামাশিষমাশাস্তে ।
ত্বিষ্যৈ ত্বা দ্যুম্নায ত্বেন্দ্রিযায ত্বা ভূত্যৈ ত্বেত্যাহ । যথাযজুরেবৈতত্ । ধর্মা-ঽসি সুধর্মা মে ন্যস্মে ব্রহ্মাণি ধারযেত্যাহ ॥ 75 ॥

ব্রহ্মন্নেবৈন-ম্প্রতিষ্ঠাপযতি । নেত্ত্বা বাতঃ স্কন্দযাদিতি যদ্যভিচরেত্ । অমুষ্য ত্বা প্রাণে সাদযাম্যমুনা সহ নিরর্থ-ঙ্গচ্ছেতি ব্রূযা-দ্য-ন্দ্বিষ্যাত্ । যমেব দ্বেষ্টি । তেনৈনগ্ং সহ নিরর্থ-ঙ্গমযতি । পূষ্ণে শরসে স্বাহেত্যাহ । যা এব দেবতা হুতভাগাঃ । তাভ্য এবৈনঞ্জুহোতি । গ্রাবভ্য-স্স্বাহেত্যাহ । যা এবান্তরিক্ষে বাচঃ ॥ 76 ॥

তাভ্য এবৈনঞ্জুহোতি । প্রতিরেভ্য-স্স্বাহেত্যাহ । প্রাণা বৈ দেবাঃ প্রতিরাঃ । তেভ্য এবৈনঞ্জুহোতি । দ্যাবাপৃথিবীভ্যাগ্ স্বাহেত্যাহ ।
দ্যাবাপৃথিবীভ্যা-মেবৈনঞ্জুহোতি । পিতৃভ্যো ঘর্মপেভ্য-স্স্বাহেত্যাহ । যে বৈ যজ্বানঃ । তে পিতরো ঘর্মপাঃ । তেভ্য এবৈনঞ্জুহোতি ॥ 77 ॥

রুদ্রায রুদ্রহোত্রে স্বাহেত্যাহ । রুদ্রমেব ভাগধেযেন সমর্ধযতি । সর্বত-স্সমনক্তি । সর্বত এব রুদ্রন্নিরবদযতে । উদঞ্চন্নিরস্যতি ।
এষা বৈ রুদ্রস্য দিক্ । স্বাযামেব দিশি রুদ্রন্নিরবদযতে । অপ উপস্পৃশতি মেদ্ধ্যত্বায । নান্বীক্ষেত । যদন্বীক্ষেত ॥ 78 ॥

চক্ষুরস্য প্রমাযুকগ্গ্ স্যাত্ । তস্মান্নান্বীক্ষ্যঃ ।
অপীপরো মা-ঽহ্নো রাত্রিযৈ মা পাহ্যেষা তে অগ্নে সমিত্তযা সমিদ্ধ্যস্বাযুর্মে দা বর্চসা মা-ঽঞ্জীরিত্যাহ । আযুরেবাস্মিন্ বর্চো দধাতি ।
অপীপরো মা রাত্রিযা অহ্নো মা পাহ্যেষা তে অগ্নে সমিত্তযা সমিদ্ধ্যস্বাযুর্মে দা বর্চসা মা-ঽঞ্জীরিত্যাহ । আযুরেবাস্মিন্ বর্চো দধাতি ।
অগ্নি-র্জ্যোতি-র্জ্যোতিরগ্নি-স্স্বাহা সূর্যো জ্যোতির্জ্যোতি-স্সূর্য-স্স্বাহেত্যাহ । যথাযজুরেবৈতত্ । ব্রহ্মবাদিনো বদন্তি । হোতব্যমগ্নিহোত্রা(3) ন্ন হোতব্যা(3) মিতি ॥ 79 ॥

য-দ্যজুষা জুহুযাত্ । অযথাপূর্বমাহুতী জুহুযাত্ । যন্ন জুহুযাত্ । অগ্নিঃ পরাভবেত্ । ভূ-স্স্বাহেত্যেব হোতব্যম্ । যথাপূর্বমাহুতী জুহোতি । নাগ্নিঃ পরাভবতি । হুতগ্ং হবির্মধু হবিরিত্যাহ ।
স্বদযত্যেবৈনম্ । ইন্দ্রতমে-ঽগ্নাবিত্যাহ ॥ 80 ॥

প্রাণো বা ইন্দ্রতমো-ঽগ্নিঃ ।
প্রাণ এবৈনমিন্দ্রতমে-ঽগ্নৌ জুহোতি ।
পিতা নো-ঽসি মা মা হিগ্ংসীরিত্যাহাহিগ্ংসাযৈ ।
অশ্যাম তে দেব ঘর্ম মধুমতো বাজবতঃ পিতুমত ইত্যাহ । আশিষমেবৈতামাশাস্তে ।
স্বধাবিনো-ঽশীমহি ত্বা মা মা হিগ্ংসী-রিত্যাহাহিগ্ংসাযৈ । তেজসা বা এতে ব্যৃদ্ধ্যন্তে । যে প্রবর্গ্যেণ চরন্তি । প্রাশ্ঞন্তি ।
তেজ এবাত্মন্-দধতে ॥ 81 ॥

সংবঁথ্সরন্ন মাগ্ংসমশ্ঞীযাত্ । ন রামামুপেযাত্ । ন মৃন্মযেন পিবেত্ । নাস্য রাম উচ্ছিষ্ট-ম্পিবেত্ । তেজ এব তথ্সগ্ংশ্যতি ।
দেবাসুরা-স্সংযঁত্তা আসন্ন্ । তে দেবা বিজযমুপযন্তঃ । বিভ্রাজি সৌর্যে ব্রহ্ম সন্ন্যদধত । য-ত্কিঞ্চ দিবাকীর্ত্যম্ ।
তদেতেনৈব ব্রতেনাগোপাযত্ । তস্মাদেত-দ্ব্রত-ঞ্চার্যম্ । তেজসো গোপীথায । তস্মাদেতানি যজূগ্ংষি বিভ্রাজঃ সৌর্যস্যেত্যাহুঃ ।
স্বাহা ত্বা সূর্যস্য রশ্মিভ্য ইতি প্রাত-স্সগ্ংসাদযতি । স্বাহা ত্বা নক্ষত্রেভ্য ইতি সাযম্ ।
এতা বা এতস্য দেবতাঃ । তাভিরেবৈনগ্ং সমর্ধযতি ॥ 82 ॥

(অক - রশ্বিনেত্যাহ - প্রদিশো গচ্ছেত্যাহ - পিতৃণা - মন্তঃ পরিধি পিন্বযতি - ধারযেত্যাহ - বাচো - ধর্মপা স্তেভ্য এবৈন-ঞ্জুহো - ত্যন্বীক্ষেত - হোতব্যা (3) মি - ত্যগ্রাবিত্যাহ - দধতে - ঽগোপায-থ্সপ্ত চ) (অ. 8)
অনুবাকং 9
ঘর্ম যা তে দিবি শুগিতি তিস্র আহুতী-র্জুহোতি ।
ছন্দোভিরেবাস্যৈভ্যো লোকেভ্য-শ্শুচমব যজতে । ইযত্যগ্রে জুহোতি । অথেযত্যথেযতি । ত্রয ইমে লোকাঃ ।
এভ্য এব লোকেভ্য-শ্শুচমব যজতে ।
অনু নো-ঽদ্যানুমতিরিত্যাহানুমত্যৈ । দিবস্ত্বা পরস্পাযা ইত্যাহ । দিব এবেমান্ ঁলোকা-ন্দাধার ।
ব্রহ্মণস্ত্বা পরস্পাযা ইত্যাহ ॥ 83 ॥

এষ্বেব লোকেষু প্রজা দাধার । প্রাণস্য ত্বা পরস্পাযা ইত্যাহ । প্রজাস্বেব প্রাণা-ন্দাধার । শিরো বা এত-দ্যজ্ঞস্য । য-ত্প্রবর্গ্যঃ । অসৌ খলু বা আদিত্যঃ প্রবর্গ্যঃ । তং-যঁ-দ্দক্ষিণা প্রত্যঞ্চ-মুদঞ্চ-মুদ্বাসযেত্ ।
জিহ্মং-যঁজ্ঞস্য শিরো হরেত্ ।
প্রাঞ্চমুদ্বাসযতি । পুরস্তাদেব যজ্ঞস্য শিরঃ প্রতিদধাতি ॥ 84 ॥

প্রাঞ্চমুদ্বাসযতি । তস্মাদসাবাদিত্যঃ পুরস্তাদুদেতি । শফোপযমান্ধবিত্রাণি ধৃষ্টী ইত্যন্ববহরন্তি ।
সাত্মানমেবৈনগ্ং সতনু-ঙ্করোতি । সাত্মা-ঽমুষ্মিন্ ঁলোকে ভবতি ।
য এবং-বেঁদ । ঔদুম্বরাণি ভবন্তি । ঊর্গ্বা উদুম্বরঃ । ঊর্জমেবাবরুন্ধে । বর্ত্মনা বা অন্বিত্য ॥ 85 ॥

যজ্ঞগ্ং রক্ষাগ্ংসি জিঘাগ্ংসন্তি । সাম্না প্রস্তোতা-ঽন্ববৈতি । সাম বৈ রক্ষোহা । রক্ষসামপহত্যৈ । ত্রির্নিধনমুপৈতি । ত্রয ইমে লোকাঃ । এভ্য এব লোকেভ্যো রক্ষাগ্স্যপহন্তি । পুরুষঃপুরুষো নিধনমুপৈতি । পুরুষঃপুরুষো হি রক্ষস্বী । রক্ষসামপহত্যৈ ॥ 86 ॥

য-ত্পৃথিব্যামুদ্বাসযেত্ । পৃথিবীগ্ং শুচা-ঽর্পযেত্ । যদফ্সু । অপ-শ্শুচার্পযেত্ । যদোষধীষু । ওষধী-শ্শুচা-ঽর্পযেত্ ।
য-দ্বনস্পতিষু । বনস্পতীঞ্ছুচা-ঽর্পযেত্ । হিরণ্যন্নিধাযোদ্বাসযতি ।
অমৃতং-বৈঁ হিরণ্যম্ ॥ 87 ॥

অমৃত এবৈন-ম্প্রতিষ্ঠাপযতি ।
বল্গুরসি শং-যুঁধাযা ইতি ত্রিঃ পরিষিঞ্চন্পর্যেতি । ত্রিবৃদ্বা অগ্নিঃ । যাবানেবাগ্নিঃ । তস্য শুচগ্ং শমযতি । ত্রিঃ পুনঃ পর্যেতি । ষট্-থ্সম্পদ্যন্তে । ষড্বা ঋতবঃ । ঋতুভিরেবাস্য শুচগ্ং শমযতি । চতুঃ স্রক্তির্নাভির্-ঋতস্যেত্যাহ ॥ 88 ॥

ইযং-বাঁ ঋতম্ । তস্যা এষ এব নাভিঃ । য-ত্প্রবর্গ্যঃ । তস্মাদেবমাহ । সদো বিশ্বাযুরিত্যাহ । সদো হীযম্ । অপ দ্বেষো অপ হ্বর ইত্যাহ ভ্রাতৃব্যাপনুত্ত্যৈ । ঘর্মৈতত্তে-ঽন্নমেত-ত্পুরীষমিতি দদ্ধ্না মধুমিশ্রেণ পূরযতি ।
ঊর্গ্বা অন্নাদ্যন্দধি । ঊর্জৈবৈনমন্নাদ্যেন সমর্ধযতি ॥ 89 ॥

অনশনাযুকো ভবতি । য এবং-বেঁদ ।
রন্তির্নামাসি দিব্যো গন্ধর্ব ইত্যাহ ।
রূপমেবাস্যৈ-ত-ন্মহিমানগ্ং রন্তি-ম্বন্ধুতাং-ব্যাঁচষ্টে । সমহমাযুষা স-ম্প্রাণেনেত্যাহ । আশিষমেবৈতামাশাস্তে ।
ব্যসৌ যো-ঽস্মা-ন্দ্বেষ্টি যঞ্চ বয-ন্দ্বিষ্ম ইত্যাহ । অভিচার এবাস্যৈষঃ । অচিক্রদ-দ্বৃষা হরিরিত্যাহ । বৃষা হ্যেষঃ ॥ 90 ॥

বৃষা হরিঃ । মহা-ন্মিত্রো ন দর্শত ইত্যাহ । স্তৌত্যেবৈনমেতত্ । চিদসি সমুদ্রযোনিরিত্যাহ । স্বামেবৈনং-যোঁনিঙ্গমযতি ।
নমস্তে অস্তু মা মা হিগ্ংসীরিত্যাহাহিগ্ংসাযৈ ।
বিশ্বাবসুগ্ং সোমগন্ধর্বমিত্যাহ । যদেবাস্য ক্রিযমাণস্যান্তর্যন্তি । তদেবাস্যৈতেনা প্যাযযতি ।
বিশ্বাবসুরভি তন্নো গৃণাত্বিত্যাহ ॥ 91 ॥

পূর্বমেবোদিতম্ । উত্তরেণাভিগৃণাতি ।
ধিযো হিন্বানো ধিয ইন্নো অব্যাদিত্যাহ । ঋতূনেবাস্মৈ কল্পযতি । প্রাসা-ঙ্গন্ধর্বো অমৃতানি বোচদিত্যাহ । প্রাণা বা অমৃতাঃ ।
প্রাণানেবাস্মৈ কল্পযতি । এতত্ত্বন্দেব ঘর্ম দেবো দেবানুপাগা ইত্যাহ । দেবো হ্যেষ সন্দেবানুপৈতি । ইদমহ-ম্মনুষ্যো মনুষ্যানিত্যাহ ॥ 92 ॥

মনুষ্যো হি । এষ স-ন্মনুষ্যানুপৈতি ।
ঈশ্বরো বৈ প্রবর্গ্যমুদ্বাসযন্ন্ । প্রজা-ম্পশূন্-থ্সোমপীথমনূদ্বাস-স্সোমপীথানুমেহি । সহ প্রজযা সহ রাযস্পোষেণেত্যাহ । প্রজামেব পশূন্-থ্সোমপীথমাত্ম-ন্ধত্তে । সুমিত্রা ন আপ ওষধয-স্সন্ত্বিত্যাহ । আশিষমেবৈতামাশাস্তে ।
দুর্মিত্রাস্তস্মৈ ভূযাসু-র্যো-ঽস্মান্-দ্বেষ্টি যঞ্চ বয-ন্দ্বিষ্ম ইত্যাহ । অভিচার এবাস্যৈষঃ । প্র বা এষো-ঽস্মা-ল্লোকাচ্চ্যবতে ।
যঃ প্রবর্গ্যমুদ্বাসযতি । উদু ত্য-ঞ্চিত্রমিতি সৌরীভ্যামৃগ্ভ্যা-ম্পুনরেত্য গার্হপত্যে জুহোতি ।
অযম্ ঁবৈ লোকো গার্হপত্যঃ । অস্মিন্নেব লোকে প্রতিতিষ্ঠতি ।
অসৌ খলু বা আদিত্য-স্সুবর্গো লোকঃ ।
য-থ্সৌরী ভবতঃ । তেনৈব সুবর্গা-ল্লোকান্নৈতি ॥ 93 ॥

(ব্রহ্মণস্ত্বা পরস্পাযা ইত্যাহ - দধা - ত্যন্বিত্য - রক্ষস্বী রক্ষসামপহত্যৈ - বৈ হিরণ্য - মাহা - র্ধযতি - হ্যেষ - গৃণাত্বিত্যাহ - মনুষ্যানিত্যাহা - স্যৈষো ঽষ্টৌ চ) (অ. 9)
অনুবাকং 10
প্রজাপতিং-বৈঁ দেবা-শ্শুক্র-ম্পযো-ঽদুহ্রন্ন্ । তদেভ্যো ন ব্যভবত্ । তদগ্নির্ব্যকরোত্ । তানি শুক্রিযাণি সামান্যভবন্ন্ । তেষাং-যোঁ রসো-ঽত্যক্ষরত্ । তানি শুক্রযজূগ্ষ্যভবন্ন্ ।
শুক্রিযাণাং-বাঁ এতানি শুক্রিযাণি । সামপযসংবাঁ এতযোরন্যত্ ।
দেবানামন্যত্পযঃ । যদ্গোঃ পযঃ ॥ 94 ॥

ত-থ্সাম্নঃ পযঃ । যদজাযৈ পযঃ । ত-দ্দেবানা-ম্পযঃ । তস্মা-দ্যত্রৈতৈ-র্যজুর্ভিশ্চরন্তি । ত-ত্পযসা চরন্তি । প্রজাপতিমেব ত-দ্দেবান্পযসা-ঽন্নাদ্যেন সমর্ধযন্তি । এষ হ ত্বৈ সাক্ষা-ত্প্রবর্গ্য-ম্ভক্ষযতি । যস্যৈবং-বিঁদুষঃ প্রবর্গ্যঃ প্রবৃজ্যতে । উত্তরবেদ্যা-মুদ্বাসযেত্-তেজস্কামস্য । তেজো বা উত্তরবেদিঃ ॥ 95 ॥

তেজঃ প্রবর্গ্যঃ । তেজসৈব তেজ-স্সমর্ধযতি ।
উত্তরবেদ্যা-মুদ্বাসযে-দন্নকামস্য । শিরো বা এত-দ্যজ্ঞস্য । য-ত্প্রবর্গ্যঃ । মুখমুত্তরবেদিঃ ।
শীর্ষ্ণৈব মুখগ্ং সন্দধাত্যন্নাদ্যায । অন্নাদ এব ভবতি । যত্র খলু বা এতমুদ্বাসিতং-বঁযাগ্ংসি পর্যাসতে । পরি বৈ তাগ্ং সমা-ম্প্রজা বযাগ্স্যাসতে ॥ 96 ॥

তস্মা-দুত্তরবেদ্যা-মেবোদ্বাসযেত্ । প্রজানা-ঙ্গোপীথায । পুরো বা পশ্চাদ্বোদ্বাসযেত্ । পুরস্তাদ্বা এতজ্জ্যোতিরুদেতি । ত-ত্পশ্চান্নিম্রোচতি । স্বামেবৈনম্ ঁযোনিমনূদ্বাসযতি ।
অপা-ম্মদ্ধ্য উদ্বাসযেত্ । অপাং-বাঁ এতন্মদ্ধ্যা-জ্জ্যোতিরজাযত । জ্যোতিঃ প্রবর্গ্যঃ । স্ব এবৈনং-যোঁনৌ প্রতিষ্ঠাপযতি ॥ 97 ॥

য-ন্দ্বিষ্যাত্ । যত্র স স্যাত্ । তস্যা-ন্দিশ্যুদ্বাসযেত্ ।
এষ বা অগ্নি-র্বৈশ্বানরঃ । যত্-প্রবর্গ্যঃ ।
অগ্নিনৈবৈনং-বৈঁশ্বানরেণাভি প্রবর্তযতি ।
ঔদুম্বর্যাগ্ং শাখাযামুদ্বাসযেত্ ।
ঊর্গ্বা উদুম্বরঃ । অন্ন-ম্প্রাণঃ । শুগ্ঘর্মঃ ॥ 98 ॥

ইদমহ-মমুষ্যামুষ্যাযণস্য শুচা প্রাণমপি দহামীত্যাহ । শুচৈবাস্য প্রাণমপি দহতি । তাজগার্তিমার্চ্ছতি । যত্র দর্ভা উপদীকসন্ততা-স্স্যুঃ । তদুদ্বাসযে-দ্বৃষ্টিকামস্য । এতা বা অপামনূজ্ঝাবর্যো নাম ।
য-দ্দর্ভাঃ । অসৌ খলু বা আদিত্য ইতো বৃষ্টিমুদীরযতি । অসাবেবাস্মা আদিত্যো বৃষ্টিন্নিযচ্ছতি । তা আপো নিযতা ধন্বনা যন্তি ॥ 99 ॥

(গোঃ পয - উত্তরবেদি - রাসতে - স্থাপযতি - ঘর্মো - যন্তি) (অ. 10)
অনুবাকং 11
প্রজাপতি-স্সম্ভ্রিযমাণঃ । সম্রাট্-থ্সম্ভৃতঃ । ঘর্মঃ প্রবৃক্তঃ । মহাবীর উদ্বাসিতঃ । অসৌ খলু বাবৈষ আদিত্যঃ । য-ত্প্রবর্গ্যঃ ।
স এতানি নামান্যকুরুত । য এবং-বেঁদ । বিদুরেনন্নাম্না । ব্রহ্মবাদিনো বদন্তি ॥ 100 ॥

যো বৈ বসীযাগ্ং সংযঁথানামমুপচরতি ।
পুণ্যার্তিং-বৈঁ স তস্মৈ কামযতে । পুণ্যার্তিমস্মৈ কামযন্তে । য এবং-বেঁদ । তস্মাদেবং-বিঁদ্বান্ । ঘর্ম ইতি দিবা-ঽঽচক্ষীত । সম্রাডিতি নক্তম্ । এতে বা এতস্য প্রিযে তনুবৌ । এতে অস্য প্রিযে নামনী । প্রিযযৈবৈন-ন্তনুবা ॥ 101 ॥

প্রিযেণ নাম্না সমর্ধযতি । কীর্তিরস্য পূর্বা গচ্ছতি জনতামাযতঃ । গাযত্রী দেবেভ্যো-ঽপাক্রামত্ । তান্দেবাঃ প্রবর্গ্যেণৈবানু ব্যভবন্ন্ ।
প্রবর্গ্যেণাপ্নুবন্ন্ । যচ্চতুর্বিগ্ংশতিঃ কৃত্বঃ প্রবর্গ্য-ম্প্রবৃণক্তি । গাযত্রীমেব তদনু বিভবতি । গাযত্রীমাপ্নোতি । পূর্বা-ঽস্য জনং-যঁতঃ কীর্তির্গচ্ছতি । বৈশ্বদেব-স্সগ্ংসন্নঃ ॥ 102 ॥

বসবঃ প্রবৃক্তঃ । সোমো-ঽভিকীর্যমাণঃ । আশ্বিনঃ পযস্যানীযমানে ।
মারুতঃ ক্বথন্ন্ । পৌষ্ণ উদন্তঃ । সারস্বতো বিষ্যন্দমানঃ । মৈত্র-শ্শরো গৃহীতঃ । তেজ উদ্যতো বাযুঃ । হ্রিযমাণঃ প্রজাপতিঃ ।
হূযমানো বাঘুতঃ ॥ 103 ॥

অসৌ খলু বাবৈষ আদিত্যঃ । য-ত্প্রবর্গ্যঃ ।
স এতানি নামান্যকুরুত । য এবং-বেঁদ । বিদুরেনন্নাম্না । ব্রহ্মবাদিনো বদন্তি ।
যন্মৃন্ময-মাহুতিন্নাশ্ঞুতে-ঽথ । কস্মাদেষো-ঽশ্ঞুত ইতি । বাগেষ ইতি ব্রূযাত্ । বাচ্যেব বাচ-ন্দধাতি ॥ 104 ॥

তস্মাদশ্ঞুতে । প্রজাপতির্বা এষ দ্বাদশধা বিহিতঃ । য-ত্প্রবর্গ্যঃ । য-ত্প্রাগবকাশেভ্যঃ । তেন প্রজা অসৃজত । অবকাশৈ-র্দেবাসুরানসৃজত । যদূর্ধ্বমবকাশেভ্যঃ ।
তেনান্নমসৃজত । অন্ন-ম্প্রজাপতিঃ । প্রজাপতির্বাবৈষঃ ॥ 105 ॥

(বদন্তি - তনুবা - সগ্ংসন্নো - হূযমানো বাঘুতো - দধা - ত্যেষঃ) (অ. 11)
অনুবাকং 12
সবিতা ভূত্বা প্রথমে-ঽহ-ন্প্রবৃজ্যতে । তেন কামাগ্ং এতি । য-দ্দ্বিতীযে-ঽহন্-প্রবৃজ্যতে । অগ্নি-র্ভূত্বা দেবানেতি । যত্-তৃতীযে-ঽহন্-প্রবৃজ্যতে । বাযু-র্ভূত্বা প্রাণানেতি ।
যচ্চতুর্থে-ঽহন্-প্রবৃজ্যতে । আদিত্যো ভূত্বা রশ্মীনেতি । য-ত্পঞ্চমে-ঽহন্-প্রবৃজ্যতে । চন্দ্রমা ভূত্বা নক্ষত্রাণ্যেতি ॥ 106 ॥

য-থ্ষষ্ঠে-ঽহন্-প্রবৃজ্যতে । ঋতু-র্ভূত্বা সংবঁথ্সরমেতি । য-থ্সপ্তমে-ঽহন্-প্রবৃজ্যতে । ধাতা ভূত্বা শক্বরীমেতি । যদষ্টমে-ঽহন্-প্রবৃজ্যতে । বৃহস্পতি-র্ভূত্বা গাযত্রীমেতি ।
য-ন্নবমে-ঽহন্-প্রবৃজ্যতে । মিত্রো ভূত্বা ত্রিবৃত ইমান্ ঁলোকানেতি । য-দ্দশমে-ঽহন্-প্রবৃজ্যতে । বরুণো ভূত্বা বিরাজমেতি ॥ 107 ॥

যদেকাদশে-ঽহন্-প্রবৃজ্যতে । ইন্দ্রো ভূত্বা ত্রিষ্টুভমেতি । য-দ্দ্বাদশে-ঽহন্-প্রবৃজ্যতে । সোমো ভূত্বা সুত্যামেতি । যত্-পুরস্তাদুপসদা-ম্প্রবৃজ্যতে । তস্মাদিতঃ পরাংঅমূং-লোঁকাগ্স্তপন্নেতি । যদুপরিষ্টা-দুপসদা-ম্প্রবৃজ্যতে । তস্মাদমুতো-ঽর্বাংইমাং-লোঁকাগ্স্তপন্নেতি । য এবং-বেঁদ ।
ঐব তপতি ॥ 108 ॥
(নক্ষত্রাণ্যেতি - বিরাজমেতি - তপতি) (অ. 12)
দেবা বৈ সত্রগ্ং - সাবিত্রম্ - পরিশ্রিতে - ব্রহ্ম-ন্প্রচরিষ্যামো - ঽগ্নিষ্ট্বা - শিরো গ্রীবা - দেবস্য রশনাং - ঁবিশ্বা আশা - ধর্ম যা ত - প্রজাপতিগ্ং শুক্রম্ - প্রজাপতি-স্সম্ভ্রিযমাণঃ -
সবিতা ভূত্বা দ্বাদশ)
(দেবা বৈ সত্রগ্ং - স খদিরঃ - পরিশ্রিতে - ঽভিপূর্ব - মথো রক্ষসাম্ - গ্রৈষ্মাবেবাস্মৈ - ব্রহ্ম বৈ দেবানা - মশ্বিনা ঘর্ম-ম্পাতম্ - প্রাণো বৈ - বৃষা হরি--র্ যো বৈ বসীযাগ্ং সংযঁথানাম
মষ্টোত্তরশতম্)
(দেবা বৈ সত্র - মৈব তপতি)
॥ হরিঃ ওম্ ॥
॥ কৃষ্ণ যজুর্বেদীয তৈত্তিরীয আরণ্যকে পঞ্চমঃ প্রপাঠক-স্সমাপ্তঃ ॥