8 - brahmānandavallī - kṛṣṇa yajurveda taittirīya āraṇyaka pāṭhaḥ - brahmavidāpnoti paraṃ

kṛṣṇa yajurvedīya taittirīya āraṇyake aṣṭamaḥ prapāṭhakaḥ - brahmānandavallī
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | hariḥ om ||
brahmānanda vallī
anuvākaṃ 13
saha nā̭ vavatu | saha naṷ bhunaktu | saha vīrya̭-ṅkaravāvahai | tejasvinā vadhī̭tamastu mā vi̭dviṣāvahai || oṃ śānti-śśānti-śśāntiḥ̭ || 25 ||

(saha pañca̭) (a. 13)
anuvākaṃ 14
brahmavidāpnoti param ||
tadeṣā-'bhyṷktā | satya-ñjñāna-ma̭nanta-mbrahma̭ |
yo veda nihi̭ta-ṅguhā̭yā-mparame vyo̭mann |
so-'śnute sarvān kāmān-thsaha | brahma̭ṇā vipaściteti̭ ||
tasmādvā etasmā̭dātmana̭ ākāśa-ssambhṷ̄taḥ | ākāśā-dvāyuḥ | vāyoragniḥ | agnerāpaḥ̭ | adbhyaḥ pṛ̭thivī | pṛthivyā oṣa̭dhayaḥ |
oṣa̭dhībhyo-'nnam | annā-tpurṷṣaḥ ||
sa vā eṣa puruṣo-'nna̭rasamayaḥ || tasyeda̭meva śiraḥ | aya-ndakṣi̭ṇaḥ pakṣaḥ | ayamutta̭raḥ pakṣaḥ | ayamātmā | ida-mpuccha̭-mpratiṣṭhā || tadapyeṣa ślo̭ko bhavati || 26 ||

annādvai prajāḥ prajāya̭nte | yāḥ kāśca̭ pṛthivīg śritāḥ | atho annḙnaiva jī̭vanti | athai̭nadapi̭yantyantataḥ | annagṃ hi bhūtānā-ñjyeṣṭham | tasmā-thsarvauṣadha mṷcyate |
sarvaṃ-vai~ te-'nna̭māpnuvanti | ye-'nna-mbrahmopāsa̭te | annagṃ hi bhūtānā-ñjyeṣṭham | tasmā-thsarvauṣadha mṷcyate | annā-dbhūtāni jāya̭nte | jātānyannḙna vardhante |
adyate-'tti ca̭ bhūtāni | tasmādanna-ntaducya̭ta iti ||
tasmādvā etasmā-danna̭rasamayāt |
anyo-'ntara ātmā prāṇa mayaḥ | tenai̭ṣa pūrṇaḥ ||
sa vā eṣa puruṣavi̭dha eva | tasya purṷṣa vidhatām |
anvaya̭-mpuruṣa vidhaḥ | tasya prāṇa̭ eva śiraḥ ||
vyāno dakṣi̭ṇaḥ pakṣaḥ | apāna utta̭raḥ pakṣaḥ |
ākā̭śa ātmā | pṛthivī puccha̭-mpratiṣṭhā ||
tadapyeṣa ślo̭ko bhavati || 27 ||

prāṇa-ndevā anuprāṇa̭nti | manuṣyāḥ paśava̭śca ye | prāṇo hi bhūtānāmāyuḥ̭ | tasmā-thsarvāyuṣa mṷcyate | sarva̭meva ta āyṷryanti |
ye prāṇa-mbrahmopāsa̭te |
prāṇo hi bhūtā̭nāmāyuḥ | tasmā-thsarvāyuṣa-mucya̭ta iti || tasyaiṣa eva śārī̭ra ātmā | yaḥ̭ pūrvasya ||
tasmādvā etasmā-tprāṇamayāt | anyo-'ntara ātmā̭ manomayaḥ | tenai̭ṣa pūrṇaḥ || sa vā eṣa puruṣavi̭dha eva | tasya purṷṣavidhatām |
anvaya̭-mpuruṣavidhaḥ | tasya yajṷreva śiraḥ | ṛg dakṣi̭ṇaḥ pakṣaḥ | sāmotta̭raḥ pakṣaḥ | ādḙśa ātmā | atharvāṅgirasaḥ puccha̭-mpratiṣṭhā ||
tadapyeṣa ślo̭ko bhavati || 28 ||

yato vāco niva̭rtante | aprāpya mana̭sā saha | ānanda-mbrahma̭ṇo vidvān | na bibheti kadā̭caneti || tasyaiṣa eva śārī̭ra ātmā | yaḥ̭ pūrvasya ||
tasmādvā etasmā-nmanomayāt | anyo-'ntara ātmā vi̭jñānamayaḥ | tenai̭ṣa pūrṇaḥ || sa vā eṣa puruṣavi̭dha eva | tasya purṷṣa vidhatām |
anvaya̭-mpuruṣa vidhaḥ | tasya śra̭ddhaiva śiraḥ | ṛta-ndakṣi̭ṇaḥ pakṣaḥ | satyamutta̭raḥ pakṣaḥ | yo̭ga ātmā | mahaḥ puccha̭-mpratiṣṭhā || tadapyeṣa ślo̭ko bhavati || 29 ||

vijñānaṃ̭-ya~jña-nta̭nute | karmā̭ṇi tanute-'pi̭ ca | vijñāna̭-ndevā-ssarve | brahma jyeṣṭha-mupā̭sate | vijñāna-mbrahma ce-dveda̭ | tasmāccenna pramādya̭ti | śarīrḙ pāpma̭no hitvā | sarvān-kāmān-thsamaśnṷta iti || tasyaiṣa eva śārī̭ra ātmā | yaḥ̭ pūrvasya || tasmādvā etasmā-dvi̭jñānamayāt | anyo-'ntara ātmā̭-''nandamayaḥ | tenai̭ṣa pūrṇaḥ || sa vā eṣa puruṣavi̭dha eva | tasya purṷṣavidhatām |
anvaya̭-mpuruṣavidhaḥ | tasya priya̭-meva śiraḥ |
modo dakṣi̭ṇaḥ pakṣaḥ |
pramoda utta̭raḥ pakṣaḥ | āna̭nda ātmā |
brahma puccha̭-mpratiṣṭhā ||
tadapyeṣa ślo̭ko bhavati || 30 ||

asa̭nneva sa̭ bhavati | asa-dbrahmeti veda cet |
asti brahmeti̭ ce-dveda | santamena-ntato vi̭duriti ||
tasyaiṣa eva śārī̭ra ātmā | yaḥ̭ pūrvasya || athāto̭-'nu praśnāḥ || utā vidvā namuṃ-lo~ka-mpretya̭ | kaścana ga̭cchatī(3) | āho̭ vidvānamuṃ-lo~ka-mpretya̭ | kaści-thsama̭śnutā(3) u || so̭-'kāmayata |
bahusyā-mprajā̭yeyeti̭ | sa tapo̭-'tapyata | sa tapa̭staptvā | idagṃ sarva̭-masṛjata || yadida-ṅkiñca̭ | tathsṛṣṭvā | tadevānu prāvi̭śat || tada̭nupraviśya̭ | sacca tyaccā̭bhavat | nirukta-ñcā ni̭rukta-ñca |
nilaya̭na-ñcā ni̭layana-ñca | vijñāna-ñcā vi̭jñāna-ñca | satya-ñcānṛta-ñca sa̭tya-mabhavat || yadi̭da-ṅkiñca |
tathsatya-mi̭tyā cakṣate || tadapyeṣa ślo̭ko bhavati || 31 ||

asadvā idamagra̭ āsīt | tato vai sada̭jāyata |
tadātmānagg svaya̭-makuruta | tasmā-tta-thsukṛtamucya̭ta iti || yadvai̭ ta-thsukṛtam | ra̭so vai saḥ | rasagg hyevāyaṃ-la~bdhvā-''na̭ndī bhavati ||
ko hyevānyā-tkaḥ prāṇyāt | yadeṣa ākāśa āna̭ndo na syāt | eṣa hyevāna̭ndayāti || yadā hyḙvaiṣa etasmi-nnadṛśye 'nātmye 'nirukte 'nilayane 'bhayaṃ
prati̭ṣṭhāṃ-vi~ndate | atha so-'bhaya-ṅga̭to bhavati ||
yadā hyḙvaiṣa etasmi-nnudara-manta̭ra-ṅkurute |
atha tasya bha̭ya-mbhavati || tattveva bhayaṃ-vi~duṣo-'ma̭nvānasya ||
tadapyeṣa ślo̭ko bhavati || 32 ||

bhīṣā-'smā-dvātaḥ̭ pavate | bhīṣodḙti sūryaḥ̭ |
bhīṣā-'smā-dagni̭-ścendraśca | mṛtyu-rdhāvati pañca̭ma iti || saiṣā-''nandasya mīmāgṃ̭sā bhavati || yuvā syā-thsādhu yṷvā-'ddhyāyakaḥ | āśiṣṭho dṛḍhiṣṭho̭ baliṣṭhaḥ | tasyeya-mpṛthivī sarvā vittasya̭ pūrṇā syāt |
sa eko mānuṣa̭ ānandaḥ || te ye śata-mmānuṣā̭ ānandāḥ | || 33-' ||
sa eko manuṣya-gandharvāṇā̭-mānandaḥ | śrotriyasya cākāma̭hatasya || te ye śata-mmanuṣya-gandharvāṇā̭-mānandāḥ | sa eko deva-gandharvāṇā̭-mānandaḥ | śrotriyasya cākāma̭hatasya ||
te ye śata-ndeva-gandharvāṇā̭-mānandāḥ |
sa ekaḥ pitṛṇā-ñciraloka-lokānā̭-mānandaḥ |
śrotriyasya cākāma̭hatasya ||
te ye śata-mpitṛṇā-ñciraloka-lokānā̭-mānandāḥ |
sa eka ājānajānā-ndevānā̭-mānandaḥ | || 33.b ||
śrotriyasya cākāma̭hatasya ||
te ye śata-mājāna-jānā-ndevānā̭ mānandāḥ |
sa ekaḥ karma-devānā-ndevānā̭-mānandaḥ |
ye karmaṇā devāna̭pi yanti | śrotriyasya cākāma̭hatasya || te ye śata-ṅkarmadevānā-ndevānā̭-mānandāḥ | sa eko devānā̭-mānandaḥ | śrotriyasya cākāma̭hatasya || te ye śata-ndevānā̭-mānandāḥ | sa eka indra̭syānandaḥ | || 33.c ||
śrotriyasya cākāma̭hatasya || te ye śatamindra̭-syā-''nandāḥ | sa eko bṛhaspatḙ-rānandaḥ | śrotriyasya cākāma̭hatasya ||
te ye śata-mbṛhaspatḙ rānandāḥ | sa ekaḥ prajāpatḙ-rānandaḥ | śrotriyasya cākāma̭hatasya || te ye śata-mprajāpatḙ-rānandāḥ | sa eko brahmaṇa̭ ānandaḥ | śrotriyasya cākāma̭hatasya || 33.d ||
sa yaścā̭ya-mpuruṣe | yaścāsā̭-vāditye | sa ekaḥ̭ ||
sa ya̭ evaṃ-vi~t | asmāllo̭kā-tpretya |
etamannamaya-mātmāna-mupa̭saṅkrāmati |
eta-mprāṇamaya-mātmāna-mupa̭saṅkrāmati |
eta-mmanomaya-mātmāna-mupa̭saṅkrāmati |
etaṃ-vi~jñānamaya-mātmāna-mupa̭saṅkrāmati |
etamānandamaya-mātmāna-mupa̭saṅkrāmati ||
tadapyeṣa ślo̭ko bhavati || 33è ||
yato vāco niva̭rtante | aprāpya mana̭sā saha | ānanda-mbrahma̭ṇo vidvān | na bibheti kuta̭ścaneti || etagṃ ha vā va̭ na tapati | kimahagṃ sādhṷ nākaravam | kimaha-mpāpa-makara̭va-miti ||
sa ya evaṃ-vi~dvānete ātmā̭nagg spṛṇute ||
ubhe hyḙvaiṣa ete ātmā̭nagg spṛṇute |
ya evaṃ-ve~da̭ || ityṷpaniṣa̭t || 34 ||
saha nā̭ vavatu | saha naṷ bhunaktu | saha vīrya̭-ṅkaravāvahai | tejasvinā vadhī̭tamastu mā vi̭dviṣāvahai || oṃ śānti-śśānti-śśāntiḥ̭ ||
(brahmavididamayamidameka̭vigṃśatiḥ |
annā danna̭rasamayā-tprāṇo vyāno-'pāna ākā̭śaḥ pṛthivī pucchagṃ ṣaḍvigṃ̭śatiḥ |
prāṇa-mprā̭ṇamayā-nma̭no yajur ṛ-khsāmādeśo-'tharvāṅgirasaḥ puccha-ndvāvigṃ̭śatiḥ |
yataḥ̭ śraddhartagṃ satyam ~yo̭go maho̭-'ṣṭāda̭śa | vijñāna-mpriya-mmodaḥ pramoda āna̭ndo brahma puccha-ndvāvigṃ̭śatiḥ |
asa̭nnevāthāṣṭāvi gṃ̭śatiḥ | asa-thṣoḍa̭śa |
bhīṣā-'smā-nmānuṣo manuṣyagandharvāṇā-ndevagandharvāṇā-mpitṛṇāmciralokalokānā mājānajānā-ṅkarmadevānām ~ye karmaṇā devānāmindra̭sya bṛhaspateḥ prajāpate-rbrahmaṇa-ssa yaśva̭ saṅkrāmatyeka̭pañcāśat |
yataḥ kuta̭śca naitamekā̭daśa nava̭) (a. 14)
||