ગોપાલ અક્ષય કવચમ્

શ્રી ગણેશાય નમઃ ।
શ્રી નારદ ઉવાચ।
ઇન્દ્રાદ્યમરવર્ગેષુ બ્રહ્મન્યત્પરમાઽદ્ભુતમ્ ।
અક્ષયં કવચં નામ કથયસ્વ મમ પ્રભો ॥ ૧॥

યદ્ધૃત્વાઽઽકર્ણ્ય વીરસ્તુ ત્રૈલોક્ય વિજયી ભવેત્ । બ્રહ્મોવાચ ।
શૃણુ પુત્ર મુનિશ્રેષ્ઠ કવચં પરમાદ્ભુતમ્ ॥ ૨॥

ઇન્દ્રાદિદેવવૃન્દૈશ્ચ નારાયણમુખાચ્છ્રતમ્ ।
ત્રૈલોક્યવિજયસ્યાસ્ય કવચસ્ય પ્રજાપતિઃ ॥ ૩॥

ઋષિશ્છન્દો દેવતા ચ સદા નારાયણઃ પ્રભુઃ ।
અસ્ય શ્રીત્રૈલોક્યવિજયાક્ષયકવચસ્ય પ્રજાપતિઋર્ષિઃ।
અનુષ્ટુપ્છન્દઃ।, શ્રીનારાયણઃ પરમાત્મા દેવતા।
ધર્માર્થકામમોક્ષાર્થે જપે વિનિયોગઃ ।
પાદૌ રક્ષતુ ગોવિન્દો જઙ્ઘે પાતુ જગત્પ્રભુઃ ॥ ૪॥

ઊરૂ દ્વૌ કેશવઃ પાતુ કટી દામોદરસ્તતઃ ।
વદનં શ્રીહરિઃ પાતુ નાડીદેશં ચ મેઽચ્યુતઃ ॥ ૫॥

વામપાર્શ્વં તથા વિષ્ણુર્દક્ષિણં ચ સુદર્શનઃ ।
બાહુમૂલે વાસુદેવો હૃદયં ચ જનાર્દનઃ ॥ ૬॥

કણ્ઠં પાતુ વરાહશ્ચ કૃષ્ણશ્ચ મુખમણ્ડલમ્ ।
કર્ણૌ મે માધવઃ પાતુ હૃષીકેશશ્ચ નાસિકે ॥ ૭॥

નેત્રે નારાયણઃ પાતુ લલાટં ગરુડધ્વજઃ ।
કપોલં કેશવઃ પાતુ ચક્રપાણિઃ શિરસ્તથા ॥ ૮॥

પ્રભાતે માધવઃ પાતુ મધ્યાહ્ને મધુસૂદનઃ ।
દિનાન્તે દૈત્યનાશશ્ચ રાત્રૌ રક્ષતુ ચન્દ્રમાઃ ॥ ૯॥

પૂર્વસ્યાં પુણ્ડરીકાક્ષો વાયવ્યાં ચ જનાર્દનઃ ।
ઇતિ તે કથિતં વત્સ સર્વમન્ત્રૌઘવિગ્રહમ્ ॥ ૧૦॥

તવ સ્નેહાન્મયાઽઽખ્યાતં ન વક્તવ્યં તુ કસ્યચિત્ ।
કવચં ધારયેદ્યસ્તુ સાધકો દક્ષિણે ભુજે ॥ ૧૧॥

દેવા મનુષ્યા ગન્ધર્વા યજ્ઞાસ્તસ્ય ન સંશયઃ ।
યોષિદ્વામભુજે ચૈવ પુરુષો દક્ષિણે ભુજે ॥ ૧૨॥

નિભૃયાત્કવચં પુણ્યં સર્વસિદ્ધિયુતો ભવેત્ ।
કણ્ઠે યો ધારયેદેતત્ કવચં મત્સ્વરૂપિણમ્ ॥ ૧૩॥

યુદ્ધે જયમવાપ્નોતિ દ્યૂતે વાદે ચ સાધકઃ ।
સર્વથા જયમાપ્નોતિ નિશ્ચિતં જન્મજન્મનિ ॥ ૧૪॥

અપુત્રો લભતે પુત્રં રોગનાશસ્તથા ભવેત્ ।
સર્વતાપપ્રમુક્તશ્ચ વિષ્ણુલોકં સ ગચ્છતિ ॥ ૧૫॥

॥ ઇતિ બ્રહ્મસંહિતોક્તં શ્રીગોપાલાક્ષયકવચં સમ્પૂર્ણમ્ ॥