ಗೋಪಾಲ ಅಕ್ಷಯ ಕವಚಮ್

ಶ್ರೀ ಗಣೇಶಾಯ ನಮಃ ।
ಶ್ರೀ ನಾರದ ಉವಾಚ।
ಇನ್ದ್ರಾದ್ಯಮರವರ್ಗೇಷು ಬ್ರಹ್ಮನ್ಯತ್ಪರಮಾಽದ್ಭುತಮ್ ।
ಅಕ್ಷಯಂ ಕವಚಂ ನಾಮ ಕಥಯಸ್ವ ಮಮ ಪ್ರಭೋ ॥ ೧॥

ಯದ್ಧೃತ್ವಾಽಽಕರ್ಣ್ಯ ವೀರಸ್ತು ತ್ರೈಲೋಕ್ಯ ವಿಜಯೀ ಭವೇತ್ । ಬ್ರಹ್ಮೋವಾಚ ।
ಶೃಣು ಪುತ್ರ ಮುನಿಶ್ರೇಷ್ಠ ಕವಚಂ ಪರಮಾದ್ಭುತಮ್ ॥ ೨॥

ಇನ್ದ್ರಾದಿದೇವವೃನ್ದೈಶ್ಚ ನಾರಾಯಣಮುಖಾಚ್ಛ್ರತಮ್ ।
ತ್ರೈಲೋಕ್ಯವಿಜಯಸ್ಯಾಸ್ಯ ಕವಚಸ್ಯ ಪ್ರಜಾಪತಿಃ ॥ ೩॥

ಋಷಿಶ್ಛನ್ದೋ ದೇವತಾ ಚ ಸದಾ ನಾರಾಯಣಃ ಪ್ರಭುಃ ।
ಅಸ್ಯ ಶ್ರೀತ್ರೈಲೋಕ್ಯವಿಜಯಾಕ್ಷಯಕವಚಸ್ಯ ಪ್ರಜಾಪತಿಋರ್ಷಿಃ।
ಅನುಷ್ಟುಪ್ಛನ್ದಃ।, ಶ್ರೀನಾರಾಯಣಃ ಪರಮಾತ್ಮಾ ದೇವತಾ।
ಧರ್ಮಾರ್ಥಕಾಮಮೋಕ್ಷಾರ್ಥೇ ಜಪೇ ವಿನಿಯೋಗಃ ।
ಪಾದೌ ರಕ್ಷತು ಗೋವಿನ್ದೋ ಜಙ್ಘೇ ಪಾತು ಜಗತ್ಪ್ರಭುಃ ॥ ೪॥

ಊರೂ ದ್ವೌ ಕೇಶವಃ ಪಾತು ಕಟೀ ದಾಮೋದರಸ್ತತಃ ।
ವದನಂ ಶ್ರೀಹರಿಃ ಪಾತು ನಾಡೀದೇಶಂ ಚ ಮೇಽಚ್ಯುತಃ ॥ ೫॥

ವಾಮಪಾರ್ಶ್ವಂ ತಥಾ ವಿಷ್ಣುರ್ದಕ್ಷಿಣಂ ಚ ಸುದರ್ಶನಃ ।
ಬಾಹುಮೂಲೇ ವಾಸುದೇವೋ ಹೃದಯಂ ಚ ಜನಾರ್ದನಃ ॥ ೬॥

ಕಣ್ಠಂ ಪಾತು ವರಾಹಶ್ಚ ಕೃಷ್ಣಶ್ಚ ಮುಖಮಣ್ಡಲಮ್ ।
ಕರ್ಣೌ ಮೇ ಮಾಧವಃ ಪಾತು ಹೃಷೀಕೇಶಶ್ಚ ನಾಸಿಕೇ ॥ ೭॥

ನೇತ್ರೇ ನಾರಾಯಣಃ ಪಾತು ಲಲಾಟಂ ಗರುಡಧ್ವಜಃ ।
ಕಪೋಲಂ ಕೇಶವಃ ಪಾತು ಚಕ್ರಪಾಣಿಃ ಶಿರಸ್ತಥಾ ॥ ೮॥

ಪ್ರಭಾತೇ ಮಾಧವಃ ಪಾತು ಮಧ್ಯಾಹ್ನೇ ಮಧುಸೂದನಃ ।
ದಿನಾನ್ತೇ ದೈತ್ಯನಾಶಶ್ಚ ರಾತ್ರೌ ರಕ್ಷತು ಚನ್ದ್ರಮಾಃ ॥ ೯॥

ಪೂರ್ವಸ್ಯಾಂ ಪುಣ್ಡರೀಕಾಕ್ಷೋ ವಾಯವ್ಯಾಂ ಚ ಜನಾರ್ದನಃ ।
ಇತಿ ತೇ ಕಥಿತಂ ವತ್ಸ ಸರ್ವಮನ್ತ್ರೌಘವಿಗ್ರಹಮ್ ॥ ೧೦॥

ತವ ಸ್ನೇಹಾನ್ಮಯಾಽಽಖ್ಯಾತಂ ನ ವಕ್ತವ್ಯಂ ತು ಕಸ್ಯಚಿತ್ ।
ಕವಚಂ ಧಾರಯೇದ್ಯಸ್ತು ಸಾಧಕೋ ದಕ್ಷಿಣೇ ಭುಜೇ ॥ ೧೧॥

ದೇವಾ ಮನುಷ್ಯಾ ಗನ್ಧರ್ವಾ ಯಜ್ಞಾಸ್ತಸ್ಯ ನ ಸಂಶಯಃ ।
ಯೋಷಿದ್ವಾಮಭುಜೇ ಚೈವ ಪುರುಷೋ ದಕ್ಷಿಣೇ ಭುಜೇ ॥ ೧೨॥

ನಿಭೃಯಾತ್ಕವಚಂ ಪುಣ್ಯಂ ಸರ್ವಸಿದ್ಧಿಯುತೋ ಭವೇತ್ ।
ಕಣ್ಠೇ ಯೋ ಧಾರಯೇದೇತತ್ ಕವಚಂ ಮತ್ಸ್ವರೂಪಿಣಮ್ ॥ ೧೩॥

ಯುದ್ಧೇ ಜಯಮವಾಪ್ನೋತಿ ದ್ಯೂತೇ ವಾದೇ ಚ ಸಾಧಕಃ ।
ಸರ್ವಥಾ ಜಯಮಾಪ್ನೋತಿ ನಿಶ್ಚಿತಂ ಜನ್ಮಜನ್ಮನಿ ॥ ೧೪॥

ಅಪುತ್ರೋ ಲಭತೇ ಪುತ್ರಂ ರೋಗನಾಶಸ್ತಥಾ ಭವೇತ್ ।
ಸರ್ವತಾಪಪ್ರಮುಕ್ತಶ್ಚ ವಿಷ್ಣುಲೋಕಂ ಸ ಗಚ್ಛತಿ ॥ ೧೫॥

॥ ಇತಿ ಬ್ರಹ್ಮಸಂಹಿತೋಕ್ತಂ ಶ್ರೀಗೋಪಾಲಾಕ್ಷಯಕವಚಂ ಸಮ್ಪೂರ್ಣಮ್ ॥