শ্রী ত্রিপুরসুন্দরী দণ্ডকম্

জযতি নিজসুধাম্ভঃ সম্ভবা বাগ্ভবশ্রীঃ
অথ সরস সমুদ্যত্ কামতত্ত্বানুভাবা ।
তদনু পরমধাম ধ্যানসংলক্ষ্য মোক্ষা
রবি শশি শিখিরূপা ত্রৈপুরী মন্ত্রশক্তিঃ ॥ ১ ॥

জয জয জগদেকমাতর্নমশ্চন্দ্র চূডেন্দ্র সোপেন্দ্র পদ্মোদ্ভবোষ্ণাংশু শীতাংশু শিখি পবন যম ধনদ দনুজেন্দ্রপতি বরুণপ্রমুখ সকল সুর মুকুটমণি নিচযকর নিকর পরিজনিত পুর বিবিধ রুচিরুচির কুসুমচয বুদ্ধিলুব্ধ ভ্রমদ্ভ্রমরমালা নিনাদানুগত মঞ্জুশিঞ্জান মঞ্জীরকল কনকময কিঙ্কিণী ক্বাণযন্ নৃত্যদুদ্দাম নিভৃতপদললিত কিঙ্করালঙ্কৃত সুচঙ্ক্রমণ লীলে সুলীলে, স্থলাম্ভোজ নিভচরণ নখরত্ন কান্তিচ্ছলেন হরনযন হব্যাশনপ্রতিকৃতানঙ্গ বিজযশ্রিযা অসৌ ভবত্যা ভব ইব শরণাগতঃ পাদমূলে সমালীন ইবালক্ষ্যতে সুলক্ষ্যতে, ললিত লাবণ্যতরু কন্দলী সুভগ জঙ্ঘালতে চিল্লতে ॥ ২ ॥

গলিত কলধৌত প্রভোরুদ্যুতে সুদ্যুতে বিদ্যুদুদ্যোত মাণিক্য বন্ধোজ্জ্বলানর্ঘ কাঞ্চী
কলাপানুসম্যমিত সুনিতম্ব বিম্বস্থলে সুস্থলে ॥ ৩ ॥

স্মরদ্বিরদ পরিরচিত নবরোমরাজ্যঙ্কুশে নিরঙ্কুশে ॥ ৪ ॥

দক্ষিণাবর্ত নাভিভ্রমত্রিবলিতট পরিলুঠিত ললিত লাবণ্যরস সুরনিম্নগা ভূষিত সুমধ্য দেশে সুদেশে, স্ফুরত্তার হারাবলী গগন গঙ্গাতরঙ্গ ব্রজালিঙ্গিতোত্তুঙ্গ নিবিডস্তন সৌবর্ণ
গিরিশিখর যুগ্মে অযুগ্মে উমে ॥ ৫ ॥

মুরারিকর কম্বুরেখানুগত কণ্ঠপীঠে সুপীঠে, লসত্ সরল সবিলাস ভুজযুগল পরিহসিত
নবকোমল মৃণালে সুনালে ॥ ৬ ॥

মহার্হমণিবলযজ মযূখচয মাংসল করকমল নখরত্ন কিরণে জিতরণে সুকরণে সুশরণে ॥ ৭ ॥

স্ফুরত্ পদ্মরাগেন্দ্র মণিকুণ্ডলোল্লসিত কান্তিচ্ছটোচ্ছুরিত গণ্ডস্থলী রচিত কস্তূরিকা পত্ররেখা সমুদ্ঘাত সুনাসীর গাণ্ডীব শোভে সুশোভে ॥ ৮ ॥

মহাসিদ্ধ গন্ধর্বগণ কিন্নরী তুম্বুরু প্রমুখ বররচিত বরবিবিধ পদমঙ্গলানঙ্গ সঙ্গীত সুখশ্রবণ সম্পূর্ণকর্ণে জয স্বামিনি ॥ ৯ ॥

শশি শকল সুগন্ধি তাম্বূল পরিপূর্ণমুখি সুমুখি ॥ ১০ ॥

বালপ্রবাল প্রভাধর দলোপান্ত বিশ্রান্ত দন্তদ্যুতি দ্যোতিতাশোক নবপল্লবাসক্ত শরদিন্দু করনিকর সান্দ্রপ্রভে সুপ্রভে দেবি ॥ ১১ ॥

বিশ্বকর্মাদি নির্মাণ বিধি সূত্র সুস্পষ্ট নাসাগ্র রেখে সুরেখে ॥ ১২ ॥

কপোলতল কান্তিবিভবেন ন বিভান্তি নশ্যন্তি যান্তি ধাবন্তি তেজাংসি চ তমাংসি চ বিমলতর তরলতর তারকানঙ্গ লীলা বিলাসোল্লসত্ কর্ণমূলান্ত বিশ্রান্ত বিপুলেক্ষণাক্ষেপ বিক্ষিপ্ত
রুচিরচিত নবকুন্দ নীলাম্বুজপ্রকর পরিভূষিতাশাবকাশে সুকাশে ॥ ১৩ ॥

চলদ্ভ্রূলতা বিজিত কন্দর্পকোদণ্ড ভঙ্গে সুভঙ্গে ॥ ১৪ ॥

মিলন্মধ্যমৃগনাভিময বিন্দুপদ চন্দ্রতিলকাযমানেক্ষণালঙ্কৃতার্ধেন্দু রোচিল্ললাটে সুলাটে ॥ ১৫ ॥

লসদ্বংশমণি জালকান্তরিত বর চলত্ কুন্তলান্তানুগত কুন্দমালানুষক্ত ভ্রমদ্ভ্রমর পঙ্ক্তে সুপঙ্ক্তে ॥ ১৬ ॥

বহদ্বহল পরিমল মনোহারি নবমালিকা মল্লিকা মালতী কেতকী চম্পকেন্দীবরোদার মন্দার মালানু সঙ্গ্রথিত ধম্মিল্লমূর্ধাবনদ্ধেন্দু করসঞ্চযোযং গগনতল সঞ্চরোযং যশশ্চত্র রূপঃ
সদা দৃশ্যতে তে শিবে ॥ ১৭ ॥

যস্য মধুরস্মিত জ্যোতিষা পূর্ণহরিণাঙ্কলক্ষ্মীঃ ক্ষণাক্ষেপ বিক্ষিপ্যতে তস্য মুখপুণ্ডরীকস্য কবিভিঃ কদা কোপমা কেন কস্মিন্ কথং দীযতে ॥ ১৮ ॥

স্ফুট স্ফটিক ঘটিতাক্ষসূত্র নক্ষত্রচয চক্রপরিবর্তন বিনোদ সন্দর্শিত নিশাসমযচারে সুচারে, মহাজ্ঞানময পুস্তকং হস্তপদ্মে অত্র বামে দধত্যা ভবত্যা তদা সুস্ফুটং বামমার্গস্য সর্বোত্তমত্ত্বং সমুপদিষ্যতে ॥ ১৯ ॥

দিব্যমুখসৌরভে যোগপর্যঙ্ক বদ্ধাসনে সুবদনে সুরসনে সুদর্শনে সুমদনে সুহসনে সুরেশি জননি তুভ্যং নমো জয জননি তুভ্যং নমো জয জননি তুভ্যং নমঃ ॥ ২০ ॥

অ ই উ ঋ লু* ইতি লঘুতযা তদনু দৈর্ঘ্যেণ পঞ্চৈব যোনিস্তথা বাগ্ভবং প্রণব ঔ বিন্দুরঃ, ক খ গ ঘ ঙ চ ছ জ ঝ ঞ ট ঠ ড ঢ ণ ত থ দ ধ ন প ফ ব ভ ম য র ল ব শ ষ স হ ল ইতি সুবদ্ধ রুদ্রাত্মিকাং অমৃতকর কিরণগণ বর্ষিণীং মাতৃকাং উদ্গিরন্তী হসন্তী লসন্তী বসন্তী তদা তত্র কমলবন ভবনভূমৌ ভবন্তী ভবভেদিনী ভযভঞ্জিনী সভূর্ভুবঃস্বর্ভুবনমূর্তি ভব্যে সুভব্যে সুকাব্যে ॥ ২১ ॥

সুকৃতিনা যেন সম্ভাব্যসে তস্য জর্জরিত জরসোবিরজসোঽপি পুত্রীকৃতার্কস্য সত্তর্ক পদবাক্য আগম বেদ বেদাঙ্গ বেদান্ত সিদ্ধান্ত সৌর শৈবাদি বৈষ্ণব পুরাণেতিহাস স্মৃতি গারুড ভূততন্ত্র স্বরোদয জ্যোতিষাযুর্বেদ নানাখ্যান পাতালশাস্ত্রার্থ মন্ত্রশিক্ষাদিকং বিবিধ বিদ্যাকুলং লিখিত পদগুম্ফ সম্বন্ধ রস সত্কান্তি সোদার ভণিত প্রবন্ধ প্রভূতার্থ
সমালঙ্কৃতাশেষ ভাষা মহাকাব্য লীলোদযাসিদ্ধি রূপযাতি সদ্য অম্বিকে ॥ ২২ ॥

বাগ্ভবেনৈকেন বাগ্দেবি বাগীশ্বরো জাযতে কিন্নুকিল কামাক্ষরেণ সকৃদুচ্চরিতেনৈব তব সাধকো বাধকো ভবতি ভুবি সর্ব শৃঙ্গারিণাং তন্নযনপথ পতিত নেত্রনীলোত্পলা ঝটিতি যদি
সিদ্ধ গন্ধর্বগণ সুন্দরী ললিতবরবিদ্যাধরী বা সুরীবামরীবা মহীনাথনাথাঙ্গনা বা
জ্বলন্মদন শরনিকর দলিত সঙ্ক্ষোভিতা নিগডিতেব জ্বলিতেব স্খলিতেব মুষিতেব সম্পদ্যতে, শক্তিবীজৈক সন্ধ্যাযিনাং যোগিনাং ভোগিনাং বৈনতেযাযতে দাহিনাং অমৃতমেঘাযতে দুস্সহবিষাণাং নিশানাথচূডাযতে ধ্যাযতে ধার্যতে যেনবীজত্রযং তস্যনাম্নৈব পশুপাশমলপঞ্জরং তৃট্যতি তদাজ্ঞযা সিদ্ধ্যতি চ গুণাষ্টকং ভক্তিভাজাং মহাভৈরবি কবলিত সকলতত্ত্বাত্মিকে সুস্বরূপে সুরূপে পরিণতশিবাযং ত্বাযি তদা কঃ পরঃ শিষ্যতে, কা ক্রিযা শিষ্যতে যদি ত্বদ্ভক্তিহীনস্য তত্বস্য কা অর্থক্রিযা কারিতা তদিতি তস্মিন্ বিধৌ তস্য কিং ধাম কিং নাম কিং কর্ম কিং শর্ম কিং নর্ম কিং বর্ম কিং ধর্ম কা গতিঃ কা রতিঃ কা মতিঃ কিং বর্জনীযং চ ॥ ২৩ ॥

ঝটিতি যদি সর্বশূন্যান্তর্ভূমৌ নিজেচ্ছা সমুন্মেষ সমযং সমাসাদ্য বালার্ক কোট্যংশরূপা বিগর্ভীকৃতাশেষ সংসার বীজাঽনুবদ্ধাসি কন্দং তদা ত্বং অম্বিকা গীযসে তদনু পরিজনিত কুটিলাগ্র তেজোঽঙ্কুরা জননি বামেতি সংস্তূযসে, ততঃ বদ্ধ সুস্পষ্ট রেখা শিখা জ্যেষ্ঠেতি সম্ভাব্যসে, সৈব শৃঙ্গাটকাকারতাং আগতা তদা রৌদ্রীতি বিখ্যাপ্যসে ॥ ২৪ ॥

তাশ্চ বামাদিকাস্বত্ কলাস্ত্রীন্ গুণান্ সন্দধত্যঃ ক্রিযা জ্ঞানচয বাঞ্ছা স্বরূপাঃ ক্রমাত্ তামরসজন্ম মধুমথন পুরবৈরিণাং বীজভাবং ভজন্ত্যঃ সৃজন্ত্যস্ত্রিভুবনং ত্রিপুরসুন্দরী ইতি তেন সঙ্কীর্ত্যসে ॥ ২৫ ॥

তত্র শৃঙ্গাটপীঠোল্লসত্ কুণ্ডলাকার তেজো কুলাত্ প্রোল্লসন্তী সগন্ধী শিবার্কং সমাস্কন্দ্য চান্দ্রং মহামণ্ডলং দ্রাবযন্তী পিবন্তী সুধাং কুলবধূঃ কুলং পরিত্যজ্য পরপুরুষ কুলীনমবলম্ব্য বিশ্বং পরিভ্রাম্য সর্বস্বমাক্রম্য তেনৈব মার্গেণ নিজকুলনিবাসং সমাগত্য সন্তুষ্যসীতি প্রিযঃ কঃ পতিঃ কঃ প্রভুঃ কোঽস্তু তেনৈব জানীমহে হে মহেশানি রমসে চ কামেশ্বরী কামগির্যালযেঽনঙ্গকুসুমাদিভিঃ সেবিতা তদুপরি জালন্ধরপীঠে বজ্রপীঠেষু বজ্রেশ্বরী পরিজনান্নটযসি পুনঃ পূর্ণগিরিগহ্বরে নগ্নবসনার্চিতে ভগমালিনী বিলসসি দেবি জ্বলন্মমদন শরনিকর মধু বিকসিত সমদ মধুকর কদম্ব বিপিন বিভবে ভগবতি
শ্রী ত্রিপুরসুন্দরি শ্রী ওড্যাণপীঠে নমস্তে নমস্তে নমস্তে নমস্তে শিবে ॥ ২৬ ॥

ইতি শ্রীত্রিপুরসুন্দরীচরণ কিঙ্কিণীশিঞ্জিতং
মহাপ্রণতি দীপকং ত্রিপুরসুন্দরীদণ্ডকম্ ।
ইমং ভজতি ভক্তিমান্ পঠতি যঃ সুধীঃ সাধকঃ
স চাষ্টগুণ সম্পদাং ভবতু ভাজনং সর্বদা ॥ ২৭ ॥

সৌধাম্বুধাবরুণপোত সুবর্ণশৈল
কাদম্ব দিব্যবন মধ্যম বর্ণভূমৌ ।
ভাস্বত্ বিচিত্রমণি মণ্ডপ দিব্যপীঠ-
-মধ্যস্থিতাং ভুবনমাতরমাশ্রযামি ॥ ২৮ ॥

ব্রহ্মেন্দ্র রুদ্র হরি চন্দ্র সহস্ররশ্মি-
-স্কন্দ দ্বিপানন হুতাশন বন্দিতাযৈ ।
বাগীশ্বরি ত্রিভুবনেশ্বরি বিশ্বমাত-
-রন্তর্বহিশ্চ কৃত সংস্থিতযে নমস্তে ॥ ২৯ ॥

ইতি শ্রীদীপকনাথসিদ্ধ বিরচিতং শ্রী ত্রিপুরসুন্দরী দণ্ডকম্ ।