ಶ್ರೀ ತ್ರಿಪುರಸುನ್ದರೀ ದಣ್ಡಕಮ್

ಜಯತಿ ನಿಜಸುಧಾಮ್ಭಃ ಸಮ್ಭವಾ ವಾಗ್ಭವಶ್ರೀಃ
ಅಥ ಸರಸ ಸಮುದ್ಯತ್ ಕಾಮತತ್ತ್ವಾನುಭಾವಾ ।
ತದನು ಪರಮಧಾಮ ಧ್ಯಾನಸಂಲಕ್ಷ್ಯ ಮೋಕ್ಷಾ
ರವಿ ಶಶಿ ಶಿಖಿರೂಪಾ ತ್ರೈಪುರೀ ಮನ್ತ್ರಶಕ್ತಿಃ ॥ ೧ ॥

ಜಯ ಜಯ ಜಗದೇಕಮಾತರ್ನಮಶ್ಚನ್ದ್ರ ಚೂಡೇನ್ದ್ರ ಸೋಪೇನ್ದ್ರ ಪದ್ಮೋದ್ಭವೋಷ್ಣಾಂಶು ಶೀತಾಂಶು ಶಿಖಿ ಪವನ ಯಮ ಧನದ ದನುಜೇನ್ದ್ರಪತಿ ವರುಣಪ್ರಮುಖ ಸಕಲ ಸುರ ಮುಕುಟಮಣಿ ನಿಚಯಕರ ನಿಕರ ಪರಿಜನಿತ ಪುರ ವಿವಿಧ ರುಚಿರುಚಿರ ಕುಸುಮಚಯ ಬುದ್ಧಿಲುಬ್ಧ ಭ್ರಮದ್ಭ್ರಮರಮಾಲಾ ನಿನಾದಾನುಗತ ಮಞ್ಜುಶಿಞ್ಜಾನ ಮಞ್ಜೀರಕಲ ಕನಕಮಯ ಕಿಙ್ಕಿಣೀ ಕ್ವಾಣಯನ್ ನೃತ್ಯದುದ್ದಾಮ ನಿಭೃತಪದಲಲಿತ ಕಿಙ್ಕರಾಲಙ್ಕೃತ ಸುಚಙ್ಕ್ರಮಣ ಲೀಲೇ ಸುಲೀಲೇ, ಸ್ಥಲಾಮ್ಭೋಜ ನಿಭಚರಣ ನಖರತ್ನ ಕಾನ್ತಿಚ್ಛಲೇನ ಹರನಯನ ಹವ್ಯಾಶನಪ್ರತಿಕೃತಾನಙ್ಗ ವಿಜಯಶ್ರಿಯಾ ಅಸೌ ಭವತ್ಯಾ ಭವ ಇವ ಶರಣಾಗತಃ ಪಾದಮೂಲೇ ಸಮಾಲೀನ ಇವಾಲಕ್ಷ್ಯತೇ ಸುಲಕ್ಷ್ಯತೇ, ಲಲಿತ ಲಾವಣ್ಯತರು ಕನ್ದಲೀ ಸುಭಗ ಜಙ್ಘಾಲತೇ ಚಿಲ್ಲತೇ ॥ ೨ ॥

ಗಲಿತ ಕಲಧೌತ ಪ್ರಭೋರುದ್ಯುತೇ ಸುದ್ಯುತೇ ವಿದ್ಯುದುದ್ಯೋತ ಮಾಣಿಕ್ಯ ಬನ್ಧೋಜ್ಜ್ವಲಾನರ್ಘ ಕಾಞ್ಚೀ
ಕಲಾಪಾನುಸಮ್ಯಮಿತ ಸುನಿತಮ್ಬ ಬಿಮ್ಬಸ್ಥಲೇ ಸುಸ್ಥಲೇ ॥ ೩ ॥

ಸ್ಮರದ್ವಿರದ ಪರಿರಚಿತ ನವರೋಮರಾಜ್ಯಙ್ಕುಶೇ ನಿರಙ್ಕುಶೇ ॥ ೪ ॥

ದಕ್ಷಿಣಾವರ್ತ ನಾಭಿಭ್ರಮತ್ರಿವಲಿತಟ ಪರಿಲುಠಿತ ಲಲಿತ ಲಾವಣ್ಯರಸ ಸುರನಿಮ್ನಗಾ ಭೂಷಿತ ಸುಮಧ್ಯ ದೇಶೇ ಸುದೇಶೇ, ಸ್ಫುರತ್ತಾರ ಹಾರಾವಲೀ ಗಗನ ಗಙ್ಗಾತರಙ್ಗ ವ್ರಜಾಲಿಙ್ಗಿತೋತ್ತುಙ್ಗ ನಿಬಿಡಸ್ತನ ಸೌವರ್ಣ
ಗಿರಿಶಿಖರ ಯುಗ್ಮೇ ಅಯುಗ್ಮೇ ಉಮೇ ॥ ೫ ॥

ಮುರಾರಿಕರ ಕಮ್ಬುರೇಖಾನುಗತ ಕಣ್ಠಪೀಠೇ ಸುಪೀಠೇ, ಲಸತ್ ಸರಲ ಸವಿಲಾಸ ಭುಜಯುಗಲ ಪರಿಹಸಿತ
ನವಕೋಮಲ ಮೃಣಾಲೇ ಸುನಾಲೇ ॥ ೬ ॥

ಮಹಾರ್ಹಮಣಿವಲಯಜ ಮಯೂಖಚಯ ಮಾಂಸಲ ಕರಕಮಲ ನಖರತ್ನ ಕಿರಣೇ ಜಿತರಣೇ ಸುಕರಣೇ ಸುಶರಣೇ ॥ ೭ ॥

ಸ್ಫುರತ್ ಪದ್ಮರಾಗೇನ್ದ್ರ ಮಣಿಕುಣ್ಡಲೋಲ್ಲಸಿತ ಕಾನ್ತಿಚ್ಛಟೋಚ್ಛುರಿತ ಗಣ್ಡಸ್ಥಲೀ ರಚಿತ ಕಸ್ತೂರಿಕಾ ಪತ್ರರೇಖಾ ಸಮುದ್ಘಾತ ಸುನಾಸೀರ ಗಾಣ್ಡೀವ ಶೋಭೇ ಸುಶೋಭೇ ॥ ೮ ॥

ಮಹಾಸಿದ್ಧ ಗನ್ಧರ್ವಗಣ ಕಿನ್ನರೀ ತುಮ್ಬುರು ಪ್ರಮುಖ ವರರಚಿತ ವರವಿವಿಧ ಪದಮಙ್ಗಲಾನಙ್ಗ ಸಙ್ಗೀತ ಸುಖಶ್ರವಣ ಸಮ್ಪೂರ್ಣಕರ್ಣೇ ಜಯ ಸ್ವಾಮಿನಿ ॥ ೯ ॥

ಶಶಿ ಶಕಲ ಸುಗನ್ಧಿ ತಾಮ್ಬೂಲ ಪರಿಪೂರ್ಣಮುಖಿ ಸುಮುಖಿ ॥ ೧೦ ॥

ಬಾಲಪ್ರವಾಲ ಪ್ರಭಾಧರ ದಲೋಪಾನ್ತ ವಿಶ್ರಾನ್ತ ದನ್ತದ್ಯುತಿ ದ್ಯೋತಿತಾಶೋಕ ನವಪಲ್ಲವಾಸಕ್ತ ಶರದಿನ್ದು ಕರನಿಕರ ಸಾನ್ದ್ರಪ್ರಭೇ ಸುಪ್ರಭೇ ದೇವಿ ॥ ೧೧ ॥

ವಿಶ್ವಕರ್ಮಾದಿ ನಿರ್ಮಾಣ ವಿಧಿ ಸೂತ್ರ ಸುಸ್ಪಷ್ಟ ನಾಸಾಗ್ರ ರೇಖೇ ಸುರೇಖೇ ॥ ೧೨ ॥

ಕಪೋಲತಲ ಕಾನ್ತಿವಿಭವೇನ ನ ವಿಭಾನ್ತಿ ನಶ್ಯನ್ತಿ ಯಾನ್ತಿ ಧಾವನ್ತಿ ತೇಜಾಂಸಿ ಚ ತಮಾಂಸಿ ಚ ವಿಮಲತರ ತರಲತರ ತಾರಕಾನಙ್ಗ ಲೀಲಾ ವಿಲಾಸೋಲ್ಲಸತ್ ಕರ್ಣಮೂಲಾನ್ತ ವಿಶ್ರಾನ್ತ ವಿಪುಲೇಕ್ಷಣಾಕ್ಷೇಪ ವಿಕ್ಷಿಪ್ತ
ರುಚಿರಚಿತ ನವಕುನ್ದ ನೀಲಾಮ್ಬುಜಪ್ರಕರ ಪರಿಭೂಷಿತಾಶಾವಕಾಶೇ ಸುಕಾಶೇ ॥ ೧೩ ॥

ಚಲದ್ಭ್ರೂಲತಾ ವಿಜಿತ ಕನ್ದರ್ಪಕೋದಣ್ಡ ಭಙ್ಗೇ ಸುಭಙ್ಗೇ ॥ ೧೪ ॥

ಮಿಲನ್ಮಧ್ಯಮೃಗನಾಭಿಮಯ ಬಿನ್ದುಪದ ಚನ್ದ್ರತಿಲಕಾಯಮಾನೇಕ್ಷಣಾಲಙ್ಕೃತಾರ್ಧೇನ್ದು ರೋಚಿಲ್ಲಲಾಟೇ ಸುಲಾಟೇ ॥ ೧೫ ॥

ಲಸದ್ವಂಶಮಣಿ ಜಾಲಕಾನ್ತರಿತ ವರ ಚಲತ್ ಕುನ್ತಲಾನ್ತಾನುಗತ ಕುನ್ದಮಾಲಾನುಷಕ್ತ ಭ್ರಮದ್ಭ್ರಮರ ಪಙ್ಕ್ತೇ ಸುಪಙ್ಕ್ತೇ ॥ ೧೬ ॥

ವಹದ್ಬಹಲ ಪರಿಮಲ ಮನೋಹಾರಿ ನವಮಾಲಿಕಾ ಮಲ್ಲಿಕಾ ಮಾಲತೀ ಕೇತಕೀ ಚಮ್ಪಕೇನ್ದೀವರೋದಾರ ಮನ್ದಾರ ಮಾಲಾನು ಸಙ್ಗ್ರಥಿತ ಧಮ್ಮಿಲ್ಲಮೂರ್ಧಾವನದ್ಧೇನ್ದು ಕರಸಞ್ಚಯೋಯಂ ಗಗನತಲ ಸಞ್ಚರೋಯಂ ಯಶಶ್ಚತ್ರ ರೂಪಃ
ಸದಾ ದೃಶ್ಯತೇ ತೇ ಶಿವೇ ॥ ೧೭ ॥

ಯಸ್ಯ ಮಧುರಸ್ಮಿತ ಜ್ಯೋತಿಷಾ ಪೂರ್ಣಹರಿಣಾಙ್ಕಲಕ್ಷ್ಮೀಃ ಕ್ಷಣಾಕ್ಷೇಪ ವಿಕ್ಷಿಪ್ಯತೇ ತಸ್ಯ ಮುಖಪುಣ್ಡರೀಕಸ್ಯ ಕವಿಭಿಃ ಕದಾ ಕೋಪಮಾ ಕೇನ ಕಸ್ಮಿನ್ ಕಥಂ ದೀಯತೇ ॥ ೧೮ ॥

ಸ್ಫುಟ ಸ್ಫಟಿಕ ಘಟಿತಾಕ್ಷಸೂತ್ರ ನಕ್ಷತ್ರಚಯ ಚಕ್ರಪರಿವರ್ತನ ವಿನೋದ ಸನ್ದರ್ಶಿತ ನಿಶಾಸಮಯಚಾರೇ ಸುಚಾರೇ, ಮಹಾಜ್ಞಾನಮಯ ಪುಸ್ತಕಂ ಹಸ್ತಪದ್ಮೇ ಅತ್ರ ವಾಮೇ ದಧತ್ಯಾ ಭವತ್ಯಾ ತದಾ ಸುಸ್ಫುಟಂ ವಾಮಮಾರ್ಗಸ್ಯ ಸರ್ವೋತ್ತಮತ್ತ್ವಂ ಸಮುಪದಿಷ್ಯತೇ ॥ ೧೯ ॥

ದಿವ್ಯಮುಖಸೌರಭೇ ಯೋಗಪರ್ಯಙ್ಕ ಬದ್ಧಾಸನೇ ಸುವದನೇ ಸುರಸನೇ ಸುದರ್ಶನೇ ಸುಮದನೇ ಸುಹಸನೇ ಸುರೇಶಿ ಜನನಿ ತುಭ್ಯಂ ನಮೋ ಜಯ ಜನನಿ ತುಭ್ಯಂ ನಮೋ ಜಯ ಜನನಿ ತುಭ್ಯಂ ನಮಃ ॥ ೨೦ ॥

ಅ ಇ ಉ ಋ ಲು* ಇತಿ ಲಘುತಯಾ ತದನು ದೈರ್ಘ್ಯೇಣ ಪಞ್ಚೈವ ಯೋನಿಸ್ತಥಾ ವಾಗ್ಭವಂ ಪ್ರಣವ ಔ ಬಿನ್ದುರಃ, ಕ ಖ ಗ ಘ ಙ ಚ ಛ ಜ ಝ ಞ ಟ ಠ ಡ ಢ ಣ ತ ಥ ದ ಧ ನ ಪ ಫ ಬ ಭ ಮ ಯ ರ ಲ ವ ಶ ಷ ಸ ಹ ಲ ಇತಿ ಸುಬದ್ಧ ರುದ್ರಾತ್ಮಿಕಾಂ ಅಮೃತಕರ ಕಿರಣಗಣ ವರ್ಷಿಣೀಂ ಮಾತೃಕಾಂ ಉದ್ಗಿರನ್ತೀ ಹಸನ್ತೀ ಲಸನ್ತೀ ವಸನ್ತೀ ತದಾ ತತ್ರ ಕಮಲವನ ಭವನಭೂಮೌ ಭವನ್ತೀ ಭವಭೇದಿನೀ ಭಯಭಞ್ಜಿನೀ ಸಭೂರ್ಭುವಃಸ್ವರ್ಭುವನಮೂರ್ತಿ ಭವ್ಯೇ ಸುಭವ್ಯೇ ಸುಕಾವ್ಯೇ ॥ ೨೧ ॥

ಸುಕೃತಿನಾ ಯೇನ ಸಮ್ಭಾವ್ಯಸೇ ತಸ್ಯ ಜರ್ಜರಿತ ಜರಸೋವಿರಜಸೋಽಪಿ ಪುತ್ರೀಕೃತಾರ್ಕಸ್ಯ ಸತ್ತರ್ಕ ಪದವಾಕ್ಯ ಆಗಮ ವೇದ ವೇದಾಙ್ಗ ವೇದಾನ್ತ ಸಿದ್ಧಾನ್ತ ಸೌರ ಶೈವಾದಿ ವೈಷ್ಣವ ಪುರಾಣೇತಿಹಾಸ ಸ್ಮೃತಿ ಗಾರುಡ ಭೂತತನ್ತ್ರ ಸ್ವರೋದಯ ಜ್ಯೋತಿಷಾಯುರ್ವೇದ ನಾನಾಖ್ಯಾನ ಪಾತಾಲಶಾಸ್ತ್ರಾರ್ಥ ಮನ್ತ್ರಶಿಕ್ಷಾದಿಕಂ ವಿವಿಧ ವಿದ್ಯಾಕುಲಂ ಲಿಖಿತ ಪದಗುಮ್ಫ ಸಮ್ಬನ್ಧ ರಸ ಸತ್ಕಾನ್ತಿ ಸೋದಾರ ಭಣಿತ ಪ್ರಬನ್ಧ ಪ್ರಭೂತಾರ್ಥ
ಸಮಾಲಙ್ಕೃತಾಶೇಷ ಭಾಷಾ ಮಹಾಕಾವ್ಯ ಲೀಲೋದಯಾಸಿದ್ಧಿ ರೂಪಯಾತಿ ಸದ್ಯ ಅಮ್ಬಿಕೇ ॥ ೨೨ ॥

ವಾಗ್ಭವೇನೈಕೇನ ವಾಗ್ದೇವಿ ವಾಗೀಶ್ವರೋ ಜಾಯತೇ ಕಿನ್ನುಕಿಲ ಕಾಮಾಕ್ಷರೇಣ ಸಕೃದುಚ್ಚರಿತೇನೈವ ತವ ಸಾಧಕೋ ಬಾಧಕೋ ಭವತಿ ಭುವಿ ಸರ್ವ ಶೃಙ್ಗಾರಿಣಾಂ ತನ್ನಯನಪಥ ಪತಿತ ನೇತ್ರನೀಲೋತ್ಪಲಾ ಝಟಿತಿ ಯದಿ
ಸಿದ್ಧ ಗನ್ಧರ್ವಗಣ ಸುನ್ದರೀ ಲಲಿತವರವಿದ್ಯಾಧರೀ ವಾ ಸುರೀವಾಮರೀವಾ ಮಹೀನಾಥನಾಥಾಙ್ಗನಾ ವಾ
ಜ್ವಲನ್ಮದನ ಶರನಿಕರ ದಲಿತ ಸಙ್ಕ್ಷೋಭಿತಾ ನಿಗಡಿತೇವ ಜ್ವಲಿತೇವ ಸ್ಖಲಿತೇವ ಮುಷಿತೇವ ಸಮ್ಪದ್ಯತೇ, ಶಕ್ತಿಬೀಜೈಕ ಸನ್ಧ್ಯಾಯಿನಾಂ ಯೋಗಿನಾಂ ಭೋಗಿನಾಂ ವೈನತೇಯಾಯತೇ ದಾಹಿನಾಂ ಅಮೃತಮೇಘಾಯತೇ ದುಸ್ಸಹವಿಷಾಣಾಂ ನಿಶಾನಾಥಚೂಡಾಯತೇ ಧ್ಯಾಯತೇ ಧಾರ್ಯತೇ ಯೇನಬೀಜತ್ರಯಂ ತಸ್ಯನಾಮ್ನೈವ ಪಶುಪಾಶಮಲಪಞ್ಜರಂ ತೃಟ್ಯತಿ ತದಾಜ್ಞಯಾ ಸಿದ್ಧ್ಯತಿ ಚ ಗುಣಾಷ್ಟಕಂ ಭಕ್ತಿಭಾಜಾಂ ಮಹಾಭೈರವಿ ಕವಲಿತ ಸಕಲತತ್ತ್ವಾತ್ಮಿಕೇ ಸುಸ್ವರೂಪೇ ಸುರೂಪೇ ಪರಿಣತಶಿವಾಯಂ ತ್ವಾಯಿ ತದಾ ಕಃ ಪರಃ ಶಿಷ್ಯತೇ, ಕಾ ಕ್ರಿಯಾ ಶಿಷ್ಯತೇ ಯದಿ ತ್ವದ್ಭಕ್ತಿಹೀನಸ್ಯ ತತ್ವಸ್ಯ ಕಾ ಅರ್ಥಕ್ರಿಯಾ ಕಾರಿತಾ ತದಿತಿ ತಸ್ಮಿನ್ ವಿಧೌ ತಸ್ಯ ಕಿಂ ಧಾಮ ಕಿಂ ನಾಮ ಕಿಂ ಕರ್ಮ ಕಿಂ ಶರ್ಮ ಕಿಂ ನರ್ಮ ಕಿಂ ವರ್ಮ ಕಿಂ ಧರ್ಮ ಕಾ ಗತಿಃ ಕಾ ರತಿಃ ಕಾ ಮತಿಃ ಕಿಂ ವರ್ಜನೀಯಂ ಚ ॥ ೨೩ ॥

ಝಟಿತಿ ಯದಿ ಸರ್ವಶೂನ್ಯಾನ್ತರ್ಭೂಮೌ ನಿಜೇಚ್ಛಾ ಸಮುನ್ಮೇಷ ಸಮಯಂ ಸಮಾಸಾದ್ಯ ಬಾಲಾರ್ಕ ಕೋಟ್ಯಂಶರೂಪಾ ವಿಗರ್ಭೀಕೃತಾಶೇಷ ಸಂಸಾರ ಬೀಜಾಽನುಬದ್ಧಾಸಿ ಕನ್ದಂ ತದಾ ತ್ವಂ ಅಮ್ಬಿಕಾ ಗೀಯಸೇ ತದನು ಪರಿಜನಿತ ಕುಟಿಲಾಗ್ರ ತೇಜೋಽಙ್ಕುರಾ ಜನನಿ ವಾಮೇತಿ ಸಂಸ್ತೂಯಸೇ, ತತಃ ಬದ್ಧ ಸುಸ್ಪಷ್ಟ ರೇಖಾ ಶಿಖಾ ಜ್ಯೇಷ್ಠೇತಿ ಸಮ್ಭಾವ್ಯಸೇ, ಸೈವ ಶೃಙ್ಗಾಟಕಾಕಾರತಾಂ ಆಗತಾ ತದಾ ರೌದ್ರೀತಿ ವಿಖ್ಯಾಪ್ಯಸೇ ॥ ೨೪ ॥

ತಾಶ್ಚ ವಾಮಾದಿಕಾಸ್ವತ್ ಕಲಾಸ್ತ್ರೀನ್ ಗುಣಾನ್ ಸನ್ದಧತ್ಯಃ ಕ್ರಿಯಾ ಜ್ಞಾನಚಯ ವಾಞ್ಛಾ ಸ್ವರೂಪಾಃ ಕ್ರಮಾತ್ ತಾಮರಸಜನ್ಮ ಮಧುಮಥನ ಪುರವೈರಿಣಾಂ ಬೀಜಭಾವಂ ಭಜನ್ತ್ಯಃ ಸೃಜನ್ತ್ಯಸ್ತ್ರಿಭುವನಂ ತ್ರಿಪುರಸುನ್ದರೀ ಇತಿ ತೇನ ಸಙ್ಕೀರ್ತ್ಯಸೇ ॥ ೨೫ ॥

ತತ್ರ ಶೃಙ್ಗಾಟಪೀಠೋಲ್ಲಸತ್ ಕುಣ್ಡಲಾಕಾರ ತೇಜೋ ಕುಲಾತ್ ಪ್ರೋಲ್ಲಸನ್ತೀ ಸಗನ್ಧೀ ಶಿವಾರ್ಕಂ ಸಮಾಸ್ಕನ್ದ್ಯ ಚಾನ್ದ್ರಂ ಮಹಾಮಣ್ಡಲಂ ದ್ರಾವಯನ್ತೀ ಪಿಬನ್ತೀ ಸುಧಾಂ ಕುಲವಧೂಃ ಕುಲಂ ಪರಿತ್ಯಜ್ಯ ಪರಪುರುಷ ಕುಲೀನಮವಲಮ್ಬ್ಯ ವಿಶ್ವಂ ಪರಿಭ್ರಾಮ್ಯ ಸರ್ವಸ್ವಮಾಕ್ರಮ್ಯ ತೇನೈವ ಮಾರ್ಗೇಣ ನಿಜಕುಲನಿವಾಸಂ ಸಮಾಗತ್ಯ ಸನ್ತುಷ್ಯಸೀತಿ ಪ್ರಿಯಃ ಕಃ ಪತಿಃ ಕಃ ಪ್ರಭುಃ ಕೋಽಸ್ತು ತೇನೈವ ಜಾನೀಮಹೇ ಹೇ ಮಹೇಶಾನಿ ರಮಸೇ ಚ ಕಾಮೇಶ್ವರೀ ಕಾಮಗಿರ್ಯಾಲಯೇಽನಙ್ಗಕುಸುಮಾದಿಭಿಃ ಸೇವಿತಾ ತದುಪರಿ ಜಾಲನ್ಧರಪೀಠೇ ವಜ್ರಪೀಠೇಷು ವಜ್ರೇಶ್ವರೀ ಪರಿಜನಾನ್ನಟಯಸಿ ಪುನಃ ಪೂರ್ಣಗಿರಿಗಹ್ವರೇ ನಗ್ನವಸನಾರ್ಚಿತೇ ಭಗಮಾಲಿನೀ ವಿಲಸಸಿ ದೇವಿ ಜ್ವಲನ್ಮಮದನ ಶರನಿಕರ ಮಧು ವಿಕಸಿತ ಸಮದ ಮಧುಕರ ಕದಮ್ಬ ವಿಪಿನ ವಿಭವೇ ಭಗವತಿ
ಶ್ರೀ ತ್ರಿಪುರಸುನ್ದರಿ ಶ್ರೀ ಓಡ್ಯಾಣಪೀಠೇ ನಮಸ್ತೇ ನಮಸ್ತೇ ನಮಸ್ತೇ ನಮಸ್ತೇ ಶಿವೇ ॥ ೨೬ ॥

ಇತಿ ಶ್ರೀತ್ರಿಪುರಸುನ್ದರೀಚರಣ ಕಿಙ್ಕಿಣೀಶಿಞ್ಜಿತಂ
ಮಹಾಪ್ರಣತಿ ದೀಪಕಂ ತ್ರಿಪುರಸುನ್ದರೀದಣ್ಡಕಮ್ ।
ಇಮಂ ಭಜತಿ ಭಕ್ತಿಮಾನ್ ಪಠತಿ ಯಃ ಸುಧೀಃ ಸಾಧಕಃ
ಸ ಚಾಷ್ಟಗುಣ ಸಮ್ಪದಾಂ ಭವತು ಭಾಜನಂ ಸರ್ವದಾ ॥ ೨೭ ॥

ಸೌಧಾಮ್ಬುಧಾವರುಣಪೋತ ಸುವರ್ಣಶೈಲ
ಕಾದಮ್ಬ ದಿವ್ಯವನ ಮಧ್ಯಮ ವರ್ಣಭೂಮೌ ।
ಭಾಸ್ವತ್ ವಿಚಿತ್ರಮಣಿ ಮಣ್ಡಪ ದಿವ್ಯಪೀಠ-
-ಮಧ್ಯಸ್ಥಿತಾಂ ಭುವನಮಾತರಮಾಶ್ರಯಾಮಿ ॥ ೨೮ ॥

ಬ್ರಹ್ಮೇನ್ದ್ರ ರುದ್ರ ಹರಿ ಚನ್ದ್ರ ಸಹಸ್ರರಶ್ಮಿ-
-ಸ್ಕನ್ದ ದ್ವಿಪಾನನ ಹುತಾಶನ ವನ್ದಿತಾಯೈ ।
ವಾಗೀಶ್ವರಿ ತ್ರಿಭುವನೇಶ್ವರಿ ವಿಶ್ವಮಾತ-
-ರನ್ತರ್ಬಹಿಶ್ಚ ಕೃತ ಸಂಸ್ಥಿತಯೇ ನಮಸ್ತೇ ॥ ೨೯ ॥

ಇತಿ ಶ್ರೀದೀಪಕನಾಥಸಿದ್ಧ ವಿರಚಿತಂ ಶ್ರೀ ತ್ರಿಪುರಸುನ್ದರೀ ದಣ್ಡಕಮ್ ।