ଶ୍ରୀ ତ୍ରିପୁରସୁନ୍ଦରୀ ଦଣ୍ଡକମ୍

ଜଯତି ନିଜସୁଧାମ୍ଭଃ ସମ୍ଭଵା ଵାଗ୍ଭଵଶ୍ରୀଃ
ଅଥ ସରସ ସମୁଦ୍ଯତ୍ କାମତତ୍ତ୍ଵାନୁଭାଵା ।
ତଦନୁ ପରମଧାମ ଧ୍ଯାନସଂଲକ୍ଷ୍ଯ ମୋକ୍ଷା
ରଵି ଶଶି ଶିଖିରୂପା ତ୍ରୈପୁରୀ ମନ୍ତ୍ରଶକ୍ତିଃ ॥ ୧ ॥

ଜଯ ଜଯ ଜଗଦେକମାତର୍ନମଶ୍ଚନ୍ଦ୍ର ଚୂଡେନ୍ଦ୍ର ସୋପେନ୍ଦ୍ର ପଦ୍ମୋଦ୍ଭଵୋଷ୍ଣାଂଶୁ ଶୀତାଂଶୁ ଶିଖି ପଵନ ଯମ ଧନଦ ଦନୁଜେନ୍ଦ୍ରପତି ଵରୁଣପ୍ରମୁଖ ସକଲ ସୁର ମୁକୁଟମଣି ନିଚଯକର ନିକର ପରିଜନିତ ପୁର ଵିଵିଧ ରୁଚିରୁଚିର କୁସୁମଚଯ ବୁଦ୍ଧିଲୁବ୍ଧ ଭ୍ରମଦ୍ଭ୍ରମରମାଲା ନିନାଦାନୁଗତ ମଞ୍ଜୁଶିଞ୍ଜାନ ମଞ୍ଜୀରକଲ କନକମଯ କିଙ୍କିଣୀ କ୍ଵାଣଯନ୍ ନୃତ୍ଯଦୁଦ୍ଦାମ ନିଭୃତପଦଲଲିତ କିଙ୍କରାଲଙ୍କୃତ ସୁଚଙ୍କ୍ରମଣ ଲୀଲେ ସୁଲୀଲେ, ସ୍ଥଲାମ୍ଭୋଜ ନିଭଚରଣ ନଖରତ୍ନ କାନ୍ତିଚ୍ଛଲେନ ହରନଯନ ହଵ୍ଯାଶନପ୍ରତିକୃତାନଙ୍ଗ ଵିଜଯଶ୍ରିଯା ଅସୌ ଭଵତ୍ଯା ଭଵ ଇଵ ଶରଣାଗତଃ ପାଦମୂଲେ ସମାଲୀନ ଇଵାଲକ୍ଷ୍ଯତେ ସୁଲକ୍ଷ୍ଯତେ, ଲଲିତ ଲାଵଣ୍ଯତରୁ କନ୍ଦଲୀ ସୁଭଗ ଜଙ୍ଘାଲତେ ଚିଲ୍ଲତେ ॥ ୨ ॥

ଗଲିତ କଲଧୌତ ପ୍ରଭୋରୁଦ୍ଯୁତେ ସୁଦ୍ଯୁତେ ଵିଦ୍ଯୁଦୁଦ୍ଯୋତ ମାଣିକ୍ଯ ବନ୍ଧୋଜ୍ଜ୍ଵଲାନର୍ଘ କାଞ୍ଚୀ
କଲାପାନୁସମ୍ଯମିତ ସୁନିତମ୍ବ ବିମ୍ବସ୍ଥଲେ ସୁସ୍ଥଲେ ॥ ୩ ॥

ସ୍ମରଦ୍ଵିରଦ ପରିରଚିତ ନଵରୋମରାଜ୍ଯଙ୍କୁଶେ ନିରଙ୍କୁଶେ ॥ ୪ ॥

ଦକ୍ଷିଣାଵର୍ତ ନାଭିଭ୍ରମତ୍ରିଵଲିତଟ ପରିଲୁଠିତ ଲଲିତ ଲାଵଣ୍ଯରସ ସୁରନିମ୍ନଗା ଭୂଷିତ ସୁମଧ୍ଯ ଦେଶେ ସୁଦେଶେ, ସ୍ଫୁରତ୍ତାର ହାରାଵଲୀ ଗଗନ ଗଙ୍ଗାତରଙ୍ଗ ଵ୍ରଜାଲିଙ୍ଗିତୋତ୍ତୁଙ୍ଗ ନିବିଡସ୍ତନ ସୌଵର୍ଣ
ଗିରିଶିଖର ଯୁଗ୍ମେ ଅଯୁଗ୍ମେ ଉମେ ॥ ୫ ॥

ମୁରାରିକର କମ୍ବୁରେଖାନୁଗତ କଣ୍ଠପୀଠେ ସୁପୀଠେ, ଲସତ୍ ସରଲ ସଵିଲାସ ଭୁଜଯୁଗଲ ପରିହସିତ
ନଵକୋମଲ ମୃଣାଲେ ସୁନାଲେ ॥ ୬ ॥

ମହାର୍ହମଣିଵଲଯଜ ମଯୂଖଚଯ ମାଂସଲ କରକମଲ ନଖରତ୍ନ କିରଣେ ଜିତରଣେ ସୁକରଣେ ସୁଶରଣେ ॥ ୭ ॥

ସ୍ଫୁରତ୍ ପଦ୍ମରାଗେନ୍ଦ୍ର ମଣିକୁଣ୍ଡଲୋଲ୍ଲସିତ କାନ୍ତିଚ୍ଛଟୋଚ୍ଛୁରିତ ଗଣ୍ଡସ୍ଥଲୀ ରଚିତ କସ୍ତୂରିକା ପତ୍ରରେଖା ସମୁଦ୍ଘାତ ସୁନାସୀର ଗାଣ୍ଡୀଵ ଶୋଭେ ସୁଶୋଭେ ॥ ୮ ॥

ମହାସିଦ୍ଧ ଗନ୍ଧର୍ଵଗଣ କିନ୍ନରୀ ତୁମ୍ବୁରୁ ପ୍ରମୁଖ ଵରରଚିତ ଵରଵିଵିଧ ପଦମଙ୍ଗଲାନଙ୍ଗ ସଙ୍ଗୀତ ସୁଖଶ୍ରଵଣ ସମ୍ପୂର୍ଣକର୍ଣେ ଜଯ ସ୍ଵାମିନି ॥ ୯ ॥

ଶଶି ଶକଲ ସୁଗନ୍ଧି ତାମ୍ବୂଲ ପରିପୂର୍ଣମୁଖି ସୁମୁଖି ॥ ୧୦ ॥

ବାଲପ୍ରଵାଲ ପ୍ରଭାଧର ଦଲୋପାନ୍ତ ଵିଶ୍ରାନ୍ତ ଦନ୍ତଦ୍ଯୁତି ଦ୍ଯୋତିତାଶୋକ ନଵପଲ୍ଲଵାସକ୍ତ ଶରଦିନ୍ଦୁ କରନିକର ସାନ୍ଦ୍ରପ୍ରଭେ ସୁପ୍ରଭେ ଦେଵି ॥ ୧୧ ॥

ଵିଶ୍ଵକର୍ମାଦି ନିର୍ମାଣ ଵିଧି ସୂତ୍ର ସୁସ୍ପଷ୍ଟ ନାସାଗ୍ର ରେଖେ ସୁରେଖେ ॥ ୧୨ ॥

କପୋଲତଲ କାନ୍ତିଵିଭଵେନ ନ ଵିଭାନ୍ତି ନଶ୍ଯନ୍ତି ଯାନ୍ତି ଧାଵନ୍ତି ତେଜାଂସି ଚ ତମାଂସି ଚ ଵିମଲତର ତରଲତର ତାରକାନଙ୍ଗ ଲୀଲା ଵିଲାସୋଲ୍ଲସତ୍ କର୍ଣମୂଲାନ୍ତ ଵିଶ୍ରାନ୍ତ ଵିପୁଲେକ୍ଷଣାକ୍ଷେପ ଵିକ୍ଷିପ୍ତ
ରୁଚିରଚିତ ନଵକୁନ୍ଦ ନୀଲାମ୍ବୁଜପ୍ରକର ପରିଭୂଷିତାଶାଵକାଶେ ସୁକାଶେ ॥ ୧୩ ॥

ଚଲଦ୍ଭ୍ରୂଲତା ଵିଜିତ କନ୍ଦର୍ପକୋଦଣ୍ଡ ଭଙ୍ଗେ ସୁଭଙ୍ଗେ ॥ ୧୪ ॥

ମିଲନ୍ମଧ୍ଯମୃଗନାଭିମଯ ବିନ୍ଦୁପଦ ଚନ୍ଦ୍ରତିଲକାଯମାନେକ୍ଷଣାଲଙ୍କୃତାର୍ଧେନ୍ଦୁ ରୋଚିଲ୍ଲଲାଟେ ସୁଲାଟେ ॥ ୧୫ ॥

ଲସଦ୍ଵଂଶମଣି ଜାଲକାନ୍ତରିତ ଵର ଚଲତ୍ କୁନ୍ତଲାନ୍ତାନୁଗତ କୁନ୍ଦମାଲାନୁଷକ୍ତ ଭ୍ରମଦ୍ଭ୍ରମର ପଙ୍କ୍ତେ ସୁପଙ୍କ୍ତେ ॥ ୧୬ ॥

ଵହଦ୍ବହଲ ପରିମଲ ମନୋହାରି ନଵମାଲିକା ମଲ୍ଲିକା ମାଲତୀ କେତକୀ ଚମ୍ପକେନ୍ଦୀଵରୋଦାର ମନ୍ଦାର ମାଲାନୁ ସଙ୍ଗ୍ରଥିତ ଧମ୍ମିଲ୍ଲମୂର୍ଧାଵନଦ୍ଧେନ୍ଦୁ କରସଞ୍ଚଯୋଯଂ ଗଗନତଲ ସଞ୍ଚରୋଯଂ ଯଶଶ୍ଚତ୍ର ରୂପଃ
ସଦା ଦୃଶ୍ଯତେ ତେ ଶିଵେ ॥ ୧୭ ॥

ଯସ୍ଯ ମଧୁରସ୍ମିତ ଜ୍ଯୋତିଷା ପୂର୍ଣହରିଣାଙ୍କଲକ୍ଷ୍ମୀଃ କ୍ଷଣାକ୍ଷେପ ଵିକ୍ଷିପ୍ଯତେ ତସ୍ଯ ମୁଖପୁଣ୍ଡରୀକସ୍ଯ କଵିଭିଃ କଦା କୋପମା କେନ କସ୍ମିନ୍ କଥଂ ଦୀଯତେ ॥ ୧୮ ॥

ସ୍ଫୁଟ ସ୍ଫଟିକ ଘଟିତାକ୍ଷସୂତ୍ର ନକ୍ଷତ୍ରଚଯ ଚକ୍ରପରିଵର୍ତନ ଵିନୋଦ ସନ୍ଦର୍ଶିତ ନିଶାସମଯଚାରେ ସୁଚାରେ, ମହାଜ୍ଞାନମଯ ପୁସ୍ତକଂ ହସ୍ତପଦ୍ମେ ଅତ୍ର ଵାମେ ଦଧତ୍ଯା ଭଵତ୍ଯା ତଦା ସୁସ୍ଫୁଟଂ ଵାମମାର୍ଗସ୍ଯ ସର୍ଵୋତ୍ତମତ୍ତ୍ଵଂ ସମୁପଦିଷ୍ଯତେ ॥ ୧୯ ॥

ଦିଵ୍ଯମୁଖସୌରଭେ ଯୋଗପର୍ଯଙ୍କ ବଦ୍ଧାସନେ ସୁଵଦନେ ସୁରସନେ ସୁଦର୍ଶନେ ସୁମଦନେ ସୁହସନେ ସୁରେଶି ଜନନି ତୁଭ୍ଯଂ ନମୋ ଜଯ ଜନନି ତୁଭ୍ଯଂ ନମୋ ଜଯ ଜନନି ତୁଭ୍ଯଂ ନମଃ ॥ ୨୦ ॥

ଅ ଇ ଉ ଋ ଲୁ* ଇତି ଲଘୁତଯା ତଦନୁ ଦୈର୍ଘ୍ଯେଣ ପଞ୍ଚୈଵ ଯୋନିସ୍ତଥା ଵାଗ୍ଭଵଂ ପ୍ରଣଵ ଔ ବିନ୍ଦୁରଃ, କ ଖ ଗ ଘ ଙ ଚ ଛ ଜ ଝ ଞ ଟ ଠ ଡ ଢ ଣ ତ ଥ ଦ ଧ ନ ପ ଫ ବ ଭ ମ ଯ ର ଲ ଵ ଶ ଷ ସ ହ ଲ ଇତି ସୁବଦ୍ଧ ରୁଦ୍ରାତ୍ମିକାଂ ଅମୃତକର କିରଣଗଣ ଵର୍ଷିଣୀଂ ମାତୃକାଂ ଉଦ୍ଗିରନ୍ତୀ ହସନ୍ତୀ ଲସନ୍ତୀ ଵସନ୍ତୀ ତଦା ତତ୍ର କମଲଵନ ଭଵନଭୂମୌ ଭଵନ୍ତୀ ଭଵଭେଦିନୀ ଭଯଭଞ୍ଜିନୀ ସଭୂର୍ଭୁଵଃସ୍ଵର୍ଭୁଵନମୂର୍ତି ଭଵ୍ଯେ ସୁଭଵ୍ଯେ ସୁକାଵ୍ଯେ ॥ ୨୧ ॥

ସୁକୃତିନା ଯେନ ସମ୍ଭାଵ୍ଯସେ ତସ୍ଯ ଜର୍ଜରିତ ଜରସୋଵିରଜସୋଽପି ପୁତ୍ରୀକୃତାର୍କସ୍ଯ ସତ୍ତର୍କ ପଦଵାକ୍ଯ ଆଗମ ଵେଦ ଵେଦାଙ୍ଗ ଵେଦାନ୍ତ ସିଦ୍ଧାନ୍ତ ସୌର ଶୈଵାଦି ଵୈଷ୍ଣଵ ପୁରାଣେତିହାସ ସ୍ମୃତି ଗାରୁଡ ଭୂତତନ୍ତ୍ର ସ୍ଵରୋଦଯ ଜ୍ଯୋତିଷାଯୁର୍ଵେଦ ନାନାଖ୍ଯାନ ପାତାଲଶାସ୍ତ୍ରାର୍ଥ ମନ୍ତ୍ରଶିକ୍ଷାଦିକଂ ଵିଵିଧ ଵିଦ୍ଯାକୁଲଂ ଲିଖିତ ପଦଗୁମ୍ଫ ସମ୍ବନ୍ଧ ରସ ସତ୍କାନ୍ତି ସୋଦାର ଭଣିତ ପ୍ରବନ୍ଧ ପ୍ରଭୂତାର୍ଥ
ସମାଲଙ୍କୃତାଶେଷ ଭାଷା ମହାକାଵ୍ଯ ଲୀଲୋଦଯାସିଦ୍ଧି ରୂପଯାତି ସଦ୍ଯ ଅମ୍ବିକେ ॥ ୨୨ ॥

ଵାଗ୍ଭଵେନୈକେନ ଵାଗ୍ଦେଵି ଵାଗୀଶ୍ଵରୋ ଜାଯତେ କିନ୍ନୁକିଲ କାମାକ୍ଷରେଣ ସକୃଦୁଚ୍ଚରିତେନୈଵ ତଵ ସାଧକୋ ବାଧକୋ ଭଵତି ଭୁଵି ସର୍ଵ ଶୃଙ୍ଗାରିଣାଂ ତନ୍ନଯନପଥ ପତିତ ନେତ୍ରନୀଲୋତ୍ପଲା ଝଟିତି ଯଦି
ସିଦ୍ଧ ଗନ୍ଧର୍ଵଗଣ ସୁନ୍ଦରୀ ଲଲିତଵରଵିଦ୍ଯାଧରୀ ଵା ସୁରୀଵାମରୀଵା ମହୀନାଥନାଥାଙ୍ଗନା ଵା
ଜ୍ଵଲନ୍ମଦନ ଶରନିକର ଦଲିତ ସଙ୍କ୍ଷୋଭିତା ନିଗଡିତେଵ ଜ୍ଵଲିତେଵ ସ୍ଖଲିତେଵ ମୁଷିତେଵ ସମ୍ପଦ୍ଯତେ, ଶକ୍ତିବୀଜୈକ ସନ୍ଧ୍ଯାଯିନାଂ ଯୋଗିନାଂ ଭୋଗିନାଂ ଵୈନତେଯାଯତେ ଦାହିନାଂ ଅମୃତମେଘାଯତେ ଦୁସ୍ସହଵିଷାଣାଂ ନିଶାନାଥଚୂଡାଯତେ ଧ୍ଯାଯତେ ଧାର୍ଯତେ ଯେନବୀଜତ୍ରଯଂ ତସ୍ଯନାମ୍ନୈଵ ପଶୁପାଶମଲପଞ୍ଜରଂ ତୃଟ୍ଯତି ତଦାଜ୍ଞଯା ସିଦ୍ଧ୍ଯତି ଚ ଗୁଣାଷ୍ଟକଂ ଭକ୍ତିଭାଜାଂ ମହାଭୈରଵି କଵଲିତ ସକଲତତ୍ତ୍ଵାତ୍ମିକେ ସୁସ୍ଵରୂପେ ସୁରୂପେ ପରିଣତଶିଵାଯଂ ତ୍ଵାଯି ତଦା କଃ ପରଃ ଶିଷ୍ଯତେ, କା କ୍ରିଯା ଶିଷ୍ଯତେ ଯଦି ତ୍ଵଦ୍ଭକ୍ତିହୀନସ୍ଯ ତତ୍ଵସ୍ଯ କା ଅର୍ଥକ୍ରିଯା କାରିତା ତଦିତି ତସ୍ମିନ୍ ଵିଧୌ ତସ୍ଯ କିଂ ଧାମ କିଂ ନାମ କିଂ କର୍ମ କିଂ ଶର୍ମ କିଂ ନର୍ମ କିଂ ଵର୍ମ କିଂ ଧର୍ମ କା ଗତିଃ କା ରତିଃ କା ମତିଃ କିଂ ଵର୍ଜନୀଯଂ ଚ ॥ ୨୩ ॥

ଝଟିତି ଯଦି ସର୍ଵଶୂନ୍ଯାନ୍ତର୍ଭୂମୌ ନିଜେଚ୍ଛା ସମୁନ୍ମେଷ ସମଯଂ ସମାସାଦ୍ଯ ବାଲାର୍କ କୋଟ୍ଯଂଶରୂପା ଵିଗର୍ଭୀକୃତାଶେଷ ସଂସାର ବୀଜାଽନୁବଦ୍ଧାସି କନ୍ଦଂ ତଦା ତ୍ଵଂ ଅମ୍ବିକା ଗୀଯସେ ତଦନୁ ପରିଜନିତ କୁଟିଲାଗ୍ର ତେଜୋଽଙ୍କୁରା ଜନନି ଵାମେତି ସଂସ୍ତୂଯସେ, ତତଃ ବଦ୍ଧ ସୁସ୍ପଷ୍ଟ ରେଖା ଶିଖା ଜ୍ଯେଷ୍ଠେତି ସମ୍ଭାଵ୍ଯସେ, ସୈଵ ଶୃଙ୍ଗାଟକାକାରତାଂ ଆଗତା ତଦା ରୌଦ୍ରୀତି ଵିଖ୍ଯାପ୍ଯସେ ॥ ୨୪ ॥

ତାଶ୍ଚ ଵାମାଦିକାସ୍ଵତ୍ କଲାସ୍ତ୍ରୀନ୍ ଗୁଣାନ୍ ସନ୍ଦଧତ୍ଯଃ କ୍ରିଯା ଜ୍ଞାନଚଯ ଵାଞ୍ଛା ସ୍ଵରୂପାଃ କ୍ରମାତ୍ ତାମରସଜନ୍ମ ମଧୁମଥନ ପୁରଵୈରିଣାଂ ବୀଜଭାଵଂ ଭଜନ୍ତ୍ଯଃ ସୃଜନ୍ତ୍ଯସ୍ତ୍ରିଭୁଵନଂ ତ୍ରିପୁରସୁନ୍ଦରୀ ଇତି ତେନ ସଙ୍କୀର୍ତ୍ଯସେ ॥ ୨୫ ॥

ତତ୍ର ଶୃଙ୍ଗାଟପୀଠୋଲ୍ଲସତ୍ କୁଣ୍ଡଲାକାର ତେଜୋ କୁଲାତ୍ ପ୍ରୋଲ୍ଲସନ୍ତୀ ସଗନ୍ଧୀ ଶିଵାର୍କଂ ସମାସ୍କନ୍ଦ୍ଯ ଚାନ୍ଦ୍ରଂ ମହାମଣ୍ଡଲଂ ଦ୍ରାଵଯନ୍ତୀ ପିବନ୍ତୀ ସୁଧାଂ କୁଲଵଧୂଃ କୁଲଂ ପରିତ୍ଯଜ୍ଯ ପରପୁରୁଷ କୁଲୀନମଵଲମ୍ବ୍ଯ ଵିଶ୍ଵଂ ପରିଭ୍ରାମ୍ଯ ସର୍ଵସ୍ଵମାକ୍ରମ୍ଯ ତେନୈଵ ମାର୍ଗେଣ ନିଜକୁଲନିଵାସଂ ସମାଗତ୍ଯ ସନ୍ତୁଷ୍ଯସୀତି ପ୍ରିଯଃ କଃ ପତିଃ କଃ ପ୍ରଭୁଃ କୋଽସ୍ତୁ ତେନୈଵ ଜାନୀମହେ ହେ ମହେଶାନି ରମସେ ଚ କାମେଶ୍ଵରୀ କାମଗିର୍ଯାଲଯେଽନଙ୍ଗକୁସୁମାଦିଭିଃ ସେଵିତା ତଦୁପରି ଜାଲନ୍ଧରପୀଠେ ଵଜ୍ରପୀଠେଷୁ ଵଜ୍ରେଶ୍ଵରୀ ପରିଜନାନ୍ନଟଯସି ପୁନଃ ପୂର୍ଣଗିରିଗହ୍ଵରେ ନଗ୍ନଵସନାର୍ଚିତେ ଭଗମାଲିନୀ ଵିଲସସି ଦେଵି ଜ୍ଵଲନ୍ମମଦନ ଶରନିକର ମଧୁ ଵିକସିତ ସମଦ ମଧୁକର କଦମ୍ବ ଵିପିନ ଵିଭଵେ ଭଗଵତି
ଶ୍ରୀ ତ୍ରିପୁରସୁନ୍ଦରି ଶ୍ରୀ ଓଡ୍ଯାଣପୀଠେ ନମସ୍ତେ ନମସ୍ତେ ନମସ୍ତେ ନମସ୍ତେ ଶିଵେ ॥ ୨୬ ॥

ଇତି ଶ୍ରୀତ୍ରିପୁରସୁନ୍ଦରୀଚରଣ କିଙ୍କିଣୀଶିଞ୍ଜିତଂ
ମହାପ୍ରଣତି ଦୀପକଂ ତ୍ରିପୁରସୁନ୍ଦରୀଦଣ୍ଡକମ୍ ।
ଇମଂ ଭଜତି ଭକ୍ତିମାନ୍ ପଠତି ଯଃ ସୁଧୀଃ ସାଧକଃ
ସ ଚାଷ୍ଟଗୁଣ ସମ୍ପଦାଂ ଭଵତୁ ଭାଜନଂ ସର୍ଵଦା ॥ ୨୭ ॥

ସୌଧାମ୍ବୁଧାଵରୁଣପୋତ ସୁଵର୍ଣଶୈଲ
କାଦମ୍ବ ଦିଵ୍ଯଵନ ମଧ୍ଯମ ଵର୍ଣଭୂମୌ ।
ଭାସ୍ଵତ୍ ଵିଚିତ୍ରମଣି ମଣ୍ଡପ ଦିଵ୍ଯପୀଠ-
-ମଧ୍ଯସ୍ଥିତାଂ ଭୁଵନମାତରମାଶ୍ରଯାମି ॥ ୨୮ ॥

ବ୍ରହ୍ମେନ୍ଦ୍ର ରୁଦ୍ର ହରି ଚନ୍ଦ୍ର ସହସ୍ରରଶ୍ମି-
-ସ୍କନ୍ଦ ଦ୍ଵିପାନନ ହୁତାଶନ ଵନ୍ଦିତାଯୈ ।
ଵାଗୀଶ୍ଵରି ତ୍ରିଭୁଵନେଶ୍ଵରି ଵିଶ୍ଵମାତ-
-ରନ୍ତର୍ବହିଶ୍ଚ କୃତ ସଂସ୍ଥିତଯେ ନମସ୍ତେ ॥ ୨୯ ॥

ଇତି ଶ୍ରୀଦୀପକନାଥସିଦ୍ଧ ଵିରଚିତଂ ଶ୍ରୀ ତ୍ରିପୁରସୁନ୍ଦରୀ ଦଣ୍ଡକମ୍ ।