ଗୀତଗୋଵିନ୍ଦଂ ତୃତୀଯଃ ସର୍ଗଃ - ମୁଗ୍ଧ ମଧୁସୂଦନଃ

॥ ମୁଗ୍ଧମଧୁସୂଦନଃ ॥
କଂସାରିରପି ସଂସାରଵାସନାବନ୍ଧଶୃଙ୍ଖଲାମ୍ ।
ରାଧାମାଧାଯ ହୃଦଯେ ତତ୍ଯାଜ ଵ୍ରଜସୁନ୍ଦରୀଃ ॥ 18 ॥

ଇତସ୍ତତସ୍ତାମନୁସୃତ୍ଯ ରାଧିକା-ମନଙ୍ଗବାଣଵ୍ରଣଖିନ୍ନମାନସଃ ।
କୃତାନୁତାପଃ ସ କଲିନ୍ଦନନ୍ଦିନୀ-ତଟାନ୍ତକୁଞ୍ଜେ ଵିଷସାଦ ମାଧଵଃ ॥ 19 ॥
॥ ଗୀତଂ 7 ॥
ମାମିଯଂ ଚଲିତା ଵିଲୋକ୍ଯ ଵୃତଂ ଵଧୂନିଚଯେନ ।
ସାପରାଧତଯା ମଯାପି ନ ଵାରିତାତିଭଯେନ ॥
ହରି ହରି ହତାଦରତଯା ଗତା ସା କୁପିତେଵ ॥ 1 ॥
କିଂ କରିଷ୍ଯତି କିଂ ଵଦିଷ୍ଯତି ସା ଚିରଂ ଵିରହେଣ ।
କିଂ ଧନେନ ଜନେନ କିଂ ମମ ଜୀଵନେନ ଗୃହେଣ ॥ 2 ॥
ଚିନ୍ତଯାମି ତଦାନନଂ କୁଟିଲଭ୍ରୁ କୋପଭରେଣ ।
ଶୋଣପଦ୍ମମିଵୋପରି ଭ୍ରମତାକୁଲଂ ଭ୍ରମରେଣ ॥ 3 ॥
ତାମହଂ ହୃଦି ସଙ୍ଗତାମନିଶଂ ଭୃଶଂ ରମଯାମି ।
କିଂ ଵନେଽନୁସରାମି ତାମିହ କିଂ ଵୃଥା ଵିଲପାମି ॥ 4 ॥
ତନ୍ଵି ଖିନ୍ନମସୂଯଯା ହୃଦଯଂ ତଵାକଲଯାମି ।
ତନ୍ନ ଵେଦ୍ମି କୁତୋ ଗତାସି ନ ତେନ ତେଽନୁନଯାମି ॥ 5 ॥
ଦୃଶ୍ଯତେ ପୁରତୋ ଗତାଗତମେଵ ମେ ଵିଦଧାସି ।
କିଂ ପୁରେଵ ସସମ୍ଭ୍ରମଂ ପରିରମ୍ଭଣଂ ନ ଦଦାସି ॥ 6 ॥
କ୍ଷମ୍ଯତାମପରଂ କଦାପି ତଵେଦୃଶଂ ନ କରୋମି ।
ଦେହି ସୁନ୍ଦରି ଦର୍ଶନଂ ମମ ମନ୍ମଥେନ ଦୁନୋମି ॥ 7 ॥
ଵର୍ଣିତଂ ଜଯଦେଵକେନ ହରେରିଦଂ ପ୍ରଵଣେନ ।
କିନ୍ଦୁବିଲ୍ଵସମୁଦ୍ରସମ୍ଭଵରୋହିଣୀରମଣେନ ॥ 8 ॥
ହୃଦି ବିସଲତାହାରୋ ନାଯଂ ଭୁଜଙ୍ଗମନାଯକଃ କୁଵଲଯଦଲଶ୍ରେଣୀ କଣ୍ଠେ ନ ସା ଗରଲଦ୍ଯୁତିଃ ।
ମଲଯଜରଜୋ ନେଦଂ ଭସ୍ମ ପ୍ରିଯାରହିତେ ମଯି ପ୍ରହର ନ ହରଭ୍ରାନ୍ତ୍ଯାନଙ୍ଗ କ୍ରୁଧା କିମୁ ଧାଵସି ॥ 20 ॥
ପାଣୌ ମା କୁରୁ ଚୂତସାଯକମମୁଂ ମା ଚାପମାରୋପଯ କ୍ରୀଡାନିର୍ଜିତଵିଶ୍ଵ ମୂର୍ଛିତଜନାଘାତେନ କିଂ ପୌରୁଷମ୍ ।
ତସ୍ଯା ଏଵ ମୃଗୀଦୃଶୋ ମନସିଜପ୍ରେଙ୍ଖତ୍କଟାକ୍ଷାଶୁଗ-ଶ୍ରେଣୀଜର୍ଜରିତଂ ମନାଗପି ମନୋ ନାଦ୍ଯାପି ସନ୍ଧୁକ୍ଷତେ ॥ 21 ॥
ଭ୍ରୂଚାପେ ନିହିତଃ କଟାକ୍ଷଵିଶିଖୋ ନିର୍ମାତୁ ମର୍ମଵ୍ଯଥାଂ ଶ୍ଯାମାତ୍ମା କୁଟିଲଃ କରୋତୁ କବରୀଭାରୋଽପି ମାରୋଦ୍ଯମମ୍ ।
ମୋହଂ ତାଵଦଯଂ ଚ ତନ୍ଵି ତନୁତାଂ ବିମ୍ବାଦରୋ ରାଗଵାନ୍ ସଦ୍ଵୃତ୍ତସ୍ତନମଣ୍ଦଲସ୍ତଵ କଥଂ ପ୍ରାଣୈର୍ମମ କ୍ରୀଡତି ॥ 22 ॥
ତାନି ସ୍ପର୍ଶସୁଖାନି ତେ ଚ ତରଲାଃ ସ୍ନିଗ୍ଧା ଦୃଶୋର୍ଵିଭ୍ରମା-ସ୍ତଦ୍ଵକ୍ତ୍ରାମ୍ବୁଜସୌରଭଂ ସ ଚ ସୁଧାସ୍ଯନ୍ଦୀ ଗିରାଂ ଵକ୍ରିମା ।
ସା ବିମ୍ବାଧରମାଧୁରୀତି ଵିଷଯାସଙ୍ଗେଽପି ଚେନ୍ମାନସଂ ତସ୍ଯାଂ ଲଗ୍ନସମାଧି ହନ୍ତ ଵିରହଵ୍ଯାଧିଃ କଥଂ ଵର୍ଧତେ ॥ 23 ॥
ଭ୍ରୂପଲ୍ଲଵଂ ଧନୁରପାଙ୍ଗତରଙ୍ଗିତାନି ବାଣାଃ ଗୁଣଃ ଶ୍ରଵଣପାଲିରିତି ସ୍ମରେଣ ।
ତସ୍ଯାମନଙ୍ଗଜଯଜଙ୍ଗମଦେଵତାଯାଂ ଅସ୍ତ୍ରାଣି ନିର୍ଜିତଜଗନ୍ତି କିମର୍ପିତାନି ॥ 24 ॥
[ଏଷଃ ଶ୍ଲୋକଃ କେଷୁଚନ ସଂସ୍କରଣେଷୁ ଵିଦ୍ଯତେ]
ତିର୍ଯକ୍କଣ୍ଠ ଵିଲୋଲ ମୌଲି ତରଲୋତ୍ତଂ ସସ୍ଯ ଵଂଶୋଚ୍ଚରଦ୍-
ଦୀପ୍ତିସ୍ଥାନ କୃତାଵଧାନ ଲଲନା ଲକ୍ଷୈର୍ନ ସଂଲକ୍ଷିତାଃ ।
ସମ୍ମୁଗ୍ଧେ ମଧୁସୂଦନସ୍ଯ ମଧୁରେ ରାଧାମୁଖେନ୍ଦୌ ସୁଧା-
ସାରେ କନ୍ଦଲିତାଶ୍ଚିରଂ ଦଧତୁ ଵଃ କ୍ଷେମଂ କଟାକ୍ଷୋର୍ମ୍ମଯ ॥ (25) ॥