শ্রী সুব্রহ্মণ্য হৃদয স্তোত্রম্

অস্য শ্রীসুব্রহ্মণ্যহৃদযস্তোত্রমহামন্ত্রস্য, অগস্ত্যো ভগবান্ ঋষিঃ, অনুষ্টুপ্ছন্দঃ, শ্রীসুব্রহ্মণ্যো দেবতা, সৌং বীজং, স্বাহা শক্তিঃ, শ্রীং কীলকং, শ্রীসুব্রহ্মণ্য প্রসাদসিদ্ধ্যর্থে জপে বিনিযোগঃ ॥
করন্যাসঃ –
সুব্রহ্মণ্যায অঙ্গুষ্ঠাভ্যাং নমঃ ।
ষণ্মুখায তর্জনীভ্যাং নমঃ ।
শক্তিধরায মধ্যমাভ্যাং নমঃ ।
ষট্কোণসংস্থিতায অনামিকাভ্যাং নমঃ ।
সর্বতোমুখায কনিষ্ঠিকাভ্যাং নমঃ ।
তারকান্তকায করতলকরপৃষ্ঠাভ্যাং নমঃ ॥
হৃদযাদি ন্যাসঃ –
সুব্রহ্মণ্যায হৃদযায নমঃ ।
ষণ্মুখায শিরসে স্বাহা ।
শক্তিধরায শিখাযৈ বষট্ ।
ষট্কোণসংস্থিতায কবচায হুম্ ।
সর্বতোমুখায নেত্রত্রযায বৌষট্ ।
তারকান্তকায অস্ত্রায ফট্ ।
ভূর্ভুবস্সুবরোমিতি দিগ্বন্ধঃ ॥
ধ্যানম্ ।
ষড্বক্ত্রং শিখিবাহনং ত্রিনযনং চিত্রাম্বরালঙ্কৃতং
বজ্রং শক্তিমসিং ত্রিশূলমভযং খেটং ধনুশ্চক্রকম্ ।
পাশং কুক্কুটমঙ্কুশং চ বরদং দোর্ভির্দধানং সদা
ধ্যাযামীপ্সিত সিদ্ধিদং শিবসুতং শ্রীদ্বাদশাক্ষং গুহম্ ॥
লমিত্যাদি পঞ্চপূজাং কুর্যাত্ ।
পীঠিকা ।
সত্যলোকে সদানন্দে মুনিভিঃ পরিবেষ্টিতম্ ।
পপ্রচ্ছুর্মুনযঃ সর্বে ব্রহ্মাণং জগতাং গুরুম্ ॥ 1 ॥

ভগবন্ সর্বলোকেশ সর্বজ্ঞ কমলাসন ।
সদানন্দ জ্ঞানমূর্তে সর্বভূতহিতে রত ॥ 2 ॥

বহুধা প্রোক্তমেতস্য গুহস্য চরিতং মহত্ ।
হৃদযং শ্রোতুমিচ্ছামঃ তস্যৈব ক্রৌঞ্চভেদিনঃ ॥ 3 ॥

ব্রহ্মোবাচ ।
শৃণ্বন্তু মুনযঃ সর্বে গুহ্যাদ্গুহ্যতরং মহত্ ।
সুব্রহ্মণ্যস্য হৃদযং সর্বভূতহিতোদযম্ ॥ 4 ॥

সর্বার্থসিদ্ধিদং পুণ্যং সর্বকার্যৈক সাধনম্ ।
ধর্মার্থকামদং গুহ্যং ধনধান্যপ্রবর্ধনম্ ॥ 5 ॥

রহস্যমেতদ্দেবানাং অদেযং যস্য কস্যচিত্ ।
সর্বমিত্রকরং গোপ্যং তেজোবলসমন্বিতম্ ॥ 6 ॥

প্রবক্ষ্যামি হিতার্থং বঃ পরিতুষ্টেন চেতসা ।
হৃত্পদ্মকর্ণিকামধ্যে ধ্যাযেত্সর্বমনোহরম্ ॥ 7 ॥

অথ হৃদযম্ ।
সুবর্ণমণ্ডপং দিব্যং রত্নতোরণরাজিতম্ ।
রত্নস্তম্ভসহস্রৈশ্চ শোভিতং পরমাদ্ভুতম্ ॥ 8 ॥

পরমানন্দনিলযং ভাস্বত্সূর্যসমপ্রভম্ ।
দেবদানবগন্ধর্বগরুডৈর্যক্ষকিন্নরৈঃ । ॥ 9 ॥

সেবার্থমাগতৈঃ সিদ্ধৈঃ সাধ্যৈরধ্যুষিতং সদা ।
মহাযোগীন্দ্রসংসেব্যং মন্দারতরুমণ্ডিতম্ ॥ 10 ॥

মণিবিদ্রুমবেদীভির্মহতীভিরুদঞ্চিতম্ ।
তন্মধ্যেঽনন্তরত্ন শ্রীচ্ছটামণ্ডলশোভিতম্ ॥ 11 ॥

রত্নসিংহাসনং দিব্যং রবিকোটিসমপ্রভম্ ।
সর্বাশ্চর্যমযং পুণ্যং সর্বতঃ সুপরিষ্কৃতম্ ॥ 12 ॥

তন্মধ্যেঽষ্টদলং পদ্মং উদ্যদর্কপ্রভোদযম্ ।
নিগমাগমরোলম্বলম্বিতং চিন্মযোদযম্ ॥ 13 ॥

দিব্যং তেজোমযং দিব্যং দেবতাভির্নমস্কৃতম্ ।
দেদীপ্যমানং রুচিভির্বিশালং সুমনোহরম্ ॥ 14 ॥

তন্মধ্যে সর্বলোকেশং ধ্যাযেত্সর্বাঙ্গসুন্দরম্ ।
অনন্তাদিত্যসঙ্কাশং আশ্রিতাভীষ্টদাযকম্ ॥ 15 ॥

অচিন্ত্যজ্ঞানবিজ্ঞানতেজোবলসমন্বিতম্ ।
সর্বাযুধধরং দিব্যং সর্বাশ্চর্যমযং গুহম্ ॥ 16 ॥

মহার্হ রত্নখচিত ষট্কিরীটবিরাজিতম্ ।
শশাঙ্কার্ধকলারম্য সমুদ্যন্মৌলিভূষণম্ ॥ 17 ॥

মদনোজ্জ্বলকোদণ্ডমঙ্গলভ্রূবিরাজিতম্ ।
বিস্তীর্ণারুণপদ্মশ্রী বিলসদ্দ্বাদশেক্ষণম্ ॥ 18 ॥

চারুশ্রীবর্ণসম্পূর্ণমুখশোভাবিভাসুরম্ ।
মণিপ্রভাসমগ্রশ্রীস্ফুরন্মকরকুণ্ডলম্ ॥ 19 ॥

লসদ্দর্পণদর্পাঢ্য গণ্ডস্থলবিরাজিতম্ ।
দিব্যকাঞ্চনপুষ্পশ্রীনাসাপুটবিরাজিতম্ ॥ 20 ॥

মন্দহাসপ্রভাজালমধুরাধর শোভিতম্ ।
সর্বলক্ষণলক্ষ্মীভৃত্কম্বুকন্ধর সুন্দরম্ ॥ 21 ॥

মহানর্ঘমহারত্নদিব্যহারবিরাজিতম্ ।
সমগ্রনাগকেযূরসন্নদ্ধভুজমণ্ডলম্ ॥ 22 ॥

রত্নকঙ্কণসম্ভাস্বত্করাগ্র শ্রীমহোজ্জ্বলম্ ।
মহামণিকবাটাভবক্ষঃস্থলবিরাজিতম্ ॥ 23 ॥

অতিগাম্ভীর্যসম্ভাব্যনাভীনবসরোরুহম্ ।
রত্নশ্রীকলিতাবদ্ধলসন্মধ্যপ্রদেশকম্ ॥ 24 ॥

স্ফুরত্কনকসংবীতপীতাম্বরসমাবৃতম্ ।
শৃঙ্গাররসসম্পূর্ণ রত্নস্তম্ভোপমোরুকম্ ॥ 25 ॥

স্বর্ণকাহলরোচিষ্ণু জঙ্ঘাযুগলমণ্ডলম্ ।
রত্নমঞ্জীরসন্নদ্ধ রমণীয পদাম্বুজম্ ॥ 26 ॥

ভক্তাভীষ্টপ্রদং দেবং ব্রহ্মবিষ্ণ্বাদিসংস্তুতম্ ।
কটাক্ষৈঃ করুণাদক্ষৈস্তোষযন্তং জগত্পতিম্ ॥ 27 ॥

চিদানন্দজ্ঞানমূর্তিং সর্বলোকপ্রিযঙ্করম্ ।
শঙ্করস্যাত্মজং দেবং ধ্যাযেচ্ছরবণোদ্ভবম্ ॥ 28 ॥

অনন্তাদিত্যচন্দ্রাগ্নি তেজঃ সম্পূর্ণবিগ্রহম্ ।
সর্বলোকৈকবরদং সর্ববিদ্যার্থতত্ত্বকম্ ॥ 29 ॥

সর্বেশ্বরং সর্ববিভুং সর্বভূতহিতে রতম্ ।
এবং ধ্যাত্বা তু হৃদযং ষণ্মুখস্য মহাত্মনঃ ॥ 30 ॥

সর্বান্কামানবাপ্নোতি সম্যক্ জ্ঞানং চ বিন্দতি ।
শুচৌ দেশে সমাসীনঃ শুদ্ধাত্মা চরিতাহ্নিকঃ ॥ 31 ॥

প্রাঙ্মুখো যতচিত্তশ্চ জপেদ্ধৃদযমুত্তমম্ ।
সকৃদেব মনুং জপ্ত্বা সম্প্রাপ্নোত্যখিলং শুভম্ ॥ 32 ॥

ইদং সর্বাঘহরণং মৃত্যুদারিদ্র্যনাশনম্ ।
সর্বসম্পত্করং পুণ্যং সর্বরোগনিবারণম্ ॥ 33 ॥

সর্বকামকরং দিব্যং সর্বাভীষ্টপ্রদাযকম্ ।
প্রজাকরং রাজ্যকরং ভাগ্যদং বহুপুণ্যদম্ ॥ 34 ॥

গুহ্যাদ্গুহ্যতরং ভূযো দেবানামপি দুর্লভম্ ।
ইদং তু নাতপস্কায নাভক্তায কদাচন ॥ 35 ॥

ন চাশুশ্রূষবে দেযং ন মদান্ধায কর্হিচিত্ ।
সচ্ছিষ্যায কুলীনায স্কন্দভক্তিরতায চ ॥ 36 ॥

সতামভিমতাযেদং দাতব্যং ধর্মবর্ধনম্ ।
য ইদং পরমং পুণ্যং নিত্যং জপতি মানবঃ ।
তস্য শ্রী ভগবান্ স্কন্দঃ প্রসন্নো ভবতি ধ্রুবম্ ॥ 37 ॥