ଶ୍ରୀ ସୁବ୍ରହ୍ମଣ୍ଯ ହୃଦଯ ସ୍ତୋତ୍ରମ୍

ଅସ୍ଯ ଶ୍ରୀସୁବ୍ରହ୍ମଣ୍ଯହୃଦଯସ୍ତୋତ୍ରମହାମନ୍ତ୍ରସ୍ଯ, ଅଗସ୍ତ୍ଯୋ ଭଗଵାନ୍ ଋଷିଃ, ଅନୁଷ୍ଟୁପ୍ଛନ୍ଦଃ, ଶ୍ରୀସୁବ୍ରହ୍ମଣ୍ଯୋ ଦେଵତା, ସୌଂ ବୀଜଂ, ସ୍ଵାହା ଶକ୍ତିଃ, ଶ୍ରୀଂ କୀଲକଂ, ଶ୍ରୀସୁବ୍ରହ୍ମଣ୍ଯ ପ୍ରସାଦସିଦ୍ଧ୍ଯର୍ଥେ ଜପେ ଵିନିଯୋଗଃ ॥
କରନ୍ଯାସଃ –
ସୁବ୍ରହ୍ମଣ୍ଯାଯ ଅଙ୍ଗୁଷ୍ଠାଭ୍ଯାଂ ନମଃ ।
ଷଣ୍ମୁଖାଯ ତର୍ଜନୀଭ୍ଯାଂ ନମଃ ।
ଶକ୍ତିଧରାଯ ମଧ୍ଯମାଭ୍ଯାଂ ନମଃ ।
ଷଟ୍କୋଣସଂସ୍ଥିତାଯ ଅନାମିକାଭ୍ଯାଂ ନମଃ ।
ସର୍ଵତୋମୁଖାଯ କନିଷ୍ଠିକାଭ୍ଯାଂ ନମଃ ।
ତାରକାନ୍ତକାଯ କରତଲକରପୃଷ୍ଠାଭ୍ଯାଂ ନମଃ ॥
ହୃଦଯାଦି ନ୍ଯାସଃ –
ସୁବ୍ରହ୍ମଣ୍ଯାଯ ହୃଦଯାଯ ନମଃ ।
ଷଣ୍ମୁଖାଯ ଶିରସେ ସ୍ଵାହା ।
ଶକ୍ତିଧରାଯ ଶିଖାଯୈ ଵଷଟ୍ ।
ଷଟ୍କୋଣସଂସ୍ଥିତାଯ କଵଚାଯ ହୁମ୍ ।
ସର୍ଵତୋମୁଖାଯ ନେତ୍ରତ୍ରଯାଯ ଵୌଷଟ୍ ।
ତାରକାନ୍ତକାଯ ଅସ୍ତ୍ରାଯ ଫଟ୍ ।
ଭୂର୍ଭୁଵସ୍ସୁଵରୋମିତି ଦିଗ୍ବନ୍ଧଃ ॥
ଧ୍ଯାନମ୍ ।
ଷଡ୍ଵକ୍ତ୍ରଂ ଶିଖିଵାହନଂ ତ୍ରିନଯନଂ ଚିତ୍ରାମ୍ବରାଲଙ୍କୃତଂ
ଵଜ୍ରଂ ଶକ୍ତିମସିଂ ତ୍ରିଶୂଲମଭଯଂ ଖେଟଂ ଧନୁଶ୍ଚକ୍ରକମ୍ ।
ପାଶଂ କୁକ୍କୁଟମଙ୍କୁଶଂ ଚ ଵରଦଂ ଦୋର୍ଭିର୍ଦଧାନଂ ସଦା
ଧ୍ଯାଯାମୀପ୍ସିତ ସିଦ୍ଧିଦଂ ଶିଵସୁତଂ ଶ୍ରୀଦ୍ଵାଦଶାକ୍ଷଂ ଗୁହମ୍ ॥
ଲମିତ୍ଯାଦି ପଞ୍ଚପୂଜାଂ କୁର୍ଯାତ୍ ।
ପୀଠିକା ।
ସତ୍ଯଲୋକେ ସଦାନନ୍ଦେ ମୁନିଭିଃ ପରିଵେଷ୍ଟିତମ୍ ।
ପପ୍ରଚ୍ଛୁର୍ମୁନଯଃ ସର୍ଵେ ବ୍ରହ୍ମାଣଂ ଜଗତାଂ ଗୁରୁମ୍ ॥ 1 ॥

ଭଗଵନ୍ ସର୍ଵଲୋକେଶ ସର୍ଵଜ୍ଞ କମଲାସନ ।
ସଦାନନ୍ଦ ଜ୍ଞାନମୂର୍ତେ ସର୍ଵଭୂତହିତେ ରତ ॥ 2 ॥

ବହୁଧା ପ୍ରୋକ୍ତମେତସ୍ଯ ଗୁହସ୍ଯ ଚରିତଂ ମହତ୍ ।
ହୃଦଯଂ ଶ୍ରୋତୁମିଚ୍ଛାମଃ ତସ୍ଯୈଵ କ୍ରୌଞ୍ଚଭେଦିନଃ ॥ 3 ॥

ବ୍ରହ୍ମୋଵାଚ ।
ଶୃଣ୍ଵନ୍ତୁ ମୁନଯଃ ସର୍ଵେ ଗୁହ୍ଯାଦ୍ଗୁହ୍ଯତରଂ ମହତ୍ ।
ସୁବ୍ରହ୍ମଣ୍ଯସ୍ଯ ହୃଦଯଂ ସର୍ଵଭୂତହିତୋଦଯମ୍ ॥ 4 ॥

ସର୍ଵାର୍ଥସିଦ୍ଧିଦଂ ପୁଣ୍ଯଂ ସର୍ଵକାର୍ଯୈକ ସାଧନମ୍ ।
ଧର୍ମାର୍ଥକାମଦଂ ଗୁହ୍ଯଂ ଧନଧାନ୍ଯପ୍ରଵର୍ଧନମ୍ ॥ 5 ॥

ରହସ୍ଯମେତଦ୍ଦେଵାନାଂ ଅଦେଯଂ ଯସ୍ଯ କସ୍ଯଚିତ୍ ।
ସର୍ଵମିତ୍ରକରଂ ଗୋପ୍ଯଂ ତେଜୋବଲସମନ୍ଵିତମ୍ ॥ 6 ॥

ପ୍ରଵକ୍ଷ୍ଯାମି ହିତାର୍ଥଂ ଵଃ ପରିତୁଷ୍ଟେନ ଚେତସା ।
ହୃତ୍ପଦ୍ମକର୍ଣିକାମଧ୍ଯେ ଧ୍ଯାଯେତ୍ସର୍ଵମନୋହରମ୍ ॥ 7 ॥

ଅଥ ହୃଦଯମ୍ ।
ସୁଵର୍ଣମଣ୍ଡପଂ ଦିଵ୍ଯଂ ରତ୍ନତୋରଣରାଜିତମ୍ ।
ରତ୍ନସ୍ତମ୍ଭସହସ୍ରୈଶ୍ଚ ଶୋଭିତଂ ପରମାଦ୍ଭୁତମ୍ ॥ 8 ॥

ପରମାନନ୍ଦନିଲଯଂ ଭାସ୍ଵତ୍ସୂର୍ଯସମପ୍ରଭମ୍ ।
ଦେଵଦାନଵଗନ୍ଧର୍ଵଗରୁଡୈର୍ଯକ୍ଷକିନ୍ନରୈଃ । ॥ 9 ॥

ସେଵାର୍ଥମାଗତୈଃ ସିଦ୍ଧୈଃ ସାଧ୍ଯୈରଧ୍ଯୁଷିତଂ ସଦା ।
ମହାଯୋଗୀନ୍ଦ୍ରସଂସେଵ୍ଯଂ ମନ୍ଦାରତରୁମଣ୍ଡିତମ୍ ॥ 10 ॥

ମଣିଵିଦ୍ରୁମଵେଦୀଭିର୍ମହତୀଭିରୁଦଞ୍ଚିତମ୍ ।
ତନ୍ମଧ୍ଯେଽନନ୍ତରତ୍ନ ଶ୍ରୀଚ୍ଛଟାମଣ୍ଡଲଶୋଭିତମ୍ ॥ 11 ॥

ରତ୍ନସିଂହାସନଂ ଦିଵ୍ଯଂ ରଵିକୋଟିସମପ୍ରଭମ୍ ।
ସର୍ଵାଶ୍ଚର୍ଯମଯଂ ପୁଣ୍ଯଂ ସର୍ଵତଃ ସୁପରିଷ୍କୃତମ୍ ॥ 12 ॥

ତନ୍ମଧ୍ଯେଽଷ୍ଟଦଲଂ ପଦ୍ମଂ ଉଦ୍ଯଦର୍କପ୍ରଭୋଦଯମ୍ ।
ନିଗମାଗମରୋଲମ୍ବଲମ୍ବିତଂ ଚିନ୍ମଯୋଦଯମ୍ ॥ 13 ॥

ଦିଵ୍ଯଂ ତେଜୋମଯଂ ଦିଵ୍ଯଂ ଦେଵତାଭିର୍ନମସ୍କୃତମ୍ ।
ଦେଦୀପ୍ଯମାନଂ ରୁଚିଭିର୍ଵିଶାଲଂ ସୁମନୋହରମ୍ ॥ 14 ॥

ତନ୍ମଧ୍ଯେ ସର୍ଵଲୋକେଶଂ ଧ୍ଯାଯେତ୍ସର୍ଵାଙ୍ଗସୁନ୍ଦରମ୍ ।
ଅନନ୍ତାଦିତ୍ଯସଙ୍କାଶଂ ଆଶ୍ରିତାଭୀଷ୍ଟଦାଯକମ୍ ॥ 15 ॥

ଅଚିନ୍ତ୍ଯଜ୍ଞାନଵିଜ୍ଞାନତେଜୋବଲସମନ୍ଵିତମ୍ ।
ସର୍ଵାଯୁଧଧରଂ ଦିଵ୍ଯଂ ସର୍ଵାଶ୍ଚର୍ଯମଯଂ ଗୁହମ୍ ॥ 16 ॥

ମହାର୍ହ ରତ୍ନଖଚିତ ଷଟ୍କିରୀଟଵିରାଜିତମ୍ ।
ଶଶାଙ୍କାର୍ଧକଲାରମ୍ଯ ସମୁଦ୍ଯନ୍ମୌଲିଭୂଷଣମ୍ ॥ 17 ॥

ମଦନୋଜ୍ଜ୍ଵଲକୋଦଣ୍ଡମଙ୍ଗଲଭ୍ରୂଵିରାଜିତମ୍ ।
ଵିସ୍ତୀର୍ଣାରୁଣପଦ୍ମଶ୍ରୀ ଵିଲସଦ୍ଦ୍ଵାଦଶେକ୍ଷଣମ୍ ॥ 18 ॥

ଚାରୁଶ୍ରୀଵର୍ଣସମ୍ପୂର୍ଣମୁଖଶୋଭାଵିଭାସୁରମ୍ ।
ମଣିପ୍ରଭାସମଗ୍ରଶ୍ରୀସ୍ଫୁରନ୍ମକରକୁଣ୍ଡଲମ୍ ॥ 19 ॥

ଲସଦ୍ଦର୍ପଣଦର୍ପାଢ୍ଯ ଗଣ୍ଡସ୍ଥଲଵିରାଜିତମ୍ ।
ଦିଵ୍ଯକାଞ୍ଚନପୁଷ୍ପଶ୍ରୀନାସାପୁଟଵିରାଜିତମ୍ ॥ 20 ॥

ମନ୍ଦହାସପ୍ରଭାଜାଲମଧୁରାଧର ଶୋଭିତମ୍ ।
ସର୍ଵଲକ୍ଷଣଲକ୍ଷ୍ମୀଭୃତ୍କମ୍ବୁକନ୍ଧର ସୁନ୍ଦରମ୍ ॥ 21 ॥

ମହାନର୍ଘମହାରତ୍ନଦିଵ୍ଯହାରଵିରାଜିତମ୍ ।
ସମଗ୍ରନାଗକେଯୂରସନ୍ନଦ୍ଧଭୁଜମଣ୍ଡଲମ୍ ॥ 22 ॥

ରତ୍ନକଙ୍କଣସମ୍ଭାସ୍ଵତ୍କରାଗ୍ର ଶ୍ରୀମହୋଜ୍ଜ୍ଵଲମ୍ ।
ମହାମଣିକଵାଟାଭଵକ୍ଷଃସ୍ଥଲଵିରାଜିତମ୍ ॥ 23 ॥

ଅତିଗାମ୍ଭୀର୍ଯସମ୍ଭାଵ୍ଯନାଭୀନଵସରୋରୁହମ୍ ।
ରତ୍ନଶ୍ରୀକଲିତାବଦ୍ଧଲସନ୍ମଧ୍ଯପ୍ରଦେଶକମ୍ ॥ 24 ॥

ସ୍ଫୁରତ୍କନକସଂଵୀତପୀତାମ୍ବରସମାଵୃତମ୍ ।
ଶୃଙ୍ଗାରରସସମ୍ପୂର୍ଣ ରତ୍ନସ୍ତମ୍ଭୋପମୋରୁକମ୍ ॥ 25 ॥

ସ୍ଵର୍ଣକାହଲରୋଚିଷ୍ଣୁ ଜଙ୍ଘାଯୁଗଲମଣ୍ଡଲମ୍ ।
ରତ୍ନମଞ୍ଜୀରସନ୍ନଦ୍ଧ ରମଣୀଯ ପଦାମ୍ବୁଜମ୍ ॥ 26 ॥

ଭକ୍ତାଭୀଷ୍ଟପ୍ରଦଂ ଦେଵଂ ବ୍ରହ୍ମଵିଷ୍ଣ୍ଵାଦିସଂସ୍ତୁତମ୍ ।
କଟାକ୍ଷୈଃ କରୁଣାଦକ୍ଷୈସ୍ତୋଷଯନ୍ତଂ ଜଗତ୍ପତିମ୍ ॥ 27 ॥

ଚିଦାନନ୍ଦଜ୍ଞାନମୂର୍ତିଂ ସର୍ଵଲୋକପ୍ରିଯଙ୍କରମ୍ ।
ଶଙ୍କରସ୍ଯାତ୍ମଜଂ ଦେଵଂ ଧ୍ଯାଯେଚ୍ଛରଵଣୋଦ୍ଭଵମ୍ ॥ 28 ॥

ଅନନ୍ତାଦିତ୍ଯଚନ୍ଦ୍ରାଗ୍ନି ତେଜଃ ସମ୍ପୂର୍ଣଵିଗ୍ରହମ୍ ।
ସର୍ଵଲୋକୈକଵରଦଂ ସର୍ଵଵିଦ୍ଯାର୍ଥତତ୍ତ୍ଵକମ୍ ॥ 29 ॥

ସର୍ଵେଶ୍ଵରଂ ସର୍ଵଵିଭୁଂ ସର୍ଵଭୂତହିତେ ରତମ୍ ।
ଏଵଂ ଧ୍ଯାତ୍ଵା ତୁ ହୃଦଯଂ ଷଣ୍ମୁଖସ୍ଯ ମହାତ୍ମନଃ ॥ 30 ॥

ସର୍ଵାନ୍କାମାନଵାପ୍ନୋତି ସମ୍ଯକ୍ ଜ୍ଞାନଂ ଚ ଵିନ୍ଦତି ।
ଶୁଚୌ ଦେଶେ ସମାସୀନଃ ଶୁଦ୍ଧାତ୍ମା ଚରିତାହ୍ନିକଃ ॥ 31 ॥

ପ୍ରାଙ୍ମୁଖୋ ଯତଚିତ୍ତଶ୍ଚ ଜପେଦ୍ଧୃଦଯମୁତ୍ତମମ୍ ।
ସକୃଦେଵ ମନୁଂ ଜପ୍ତ୍ଵା ସମ୍ପ୍ରାପ୍ନୋତ୍ଯଖିଲଂ ଶୁଭମ୍ ॥ 32 ॥

ଇଦଂ ସର୍ଵାଘହରଣଂ ମୃତ୍ଯୁଦାରିଦ୍ର୍ଯନାଶନମ୍ ।
ସର୍ଵସମ୍ପତ୍କରଂ ପୁଣ୍ଯଂ ସର୍ଵରୋଗନିଵାରଣମ୍ ॥ 33 ॥

ସର୍ଵକାମକରଂ ଦିଵ୍ଯଂ ସର୍ଵାଭୀଷ୍ଟପ୍ରଦାଯକମ୍ ।
ପ୍ରଜାକରଂ ରାଜ୍ଯକରଂ ଭାଗ୍ଯଦଂ ବହୁପୁଣ୍ଯଦମ୍ ॥ 34 ॥

ଗୁହ୍ଯାଦ୍ଗୁହ୍ଯତରଂ ଭୂଯୋ ଦେଵାନାମପି ଦୁର୍ଲଭମ୍ ।
ଇଦଂ ତୁ ନାତପସ୍କାଯ ନାଭକ୍ତାଯ କଦାଚନ ॥ 35 ॥

ନ ଚାଶୁଶ୍ରୂଷଵେ ଦେଯଂ ନ ମଦାନ୍ଧାଯ କର୍ହିଚିତ୍ ।
ସଚ୍ଛିଷ୍ଯାଯ କୁଲୀନାଯ ସ୍କନ୍ଦଭକ୍ତିରତାଯ ଚ ॥ 36 ॥

ସତାମଭିମତାଯେଦଂ ଦାତଵ୍ଯଂ ଧର୍ମଵର୍ଧନମ୍ ।
ଯ ଇଦଂ ପରମଂ ପୁଣ୍ଯଂ ନିତ୍ଯଂ ଜପତି ମାନଵଃ ।
ତସ୍ଯ ଶ୍ରୀ ଭଗଵାନ୍ ସ୍କନ୍ଦଃ ପ୍ରସନ୍ନୋ ଭଵତି ଧ୍ରୁଵମ୍ ॥ 37 ॥