శ్రీ సుబ్రహ్మణ్య హృదయ స్తోత్రమ్

అస్య శ్రీసుబ్రహ్మణ్యహృదయస్తోత్రమహామన్త్రస్య, అగస్త్యో భగవాన్ ఋషిః, అనుష్టుప్ఛన్దః, శ్రీసుబ్రహ్మణ్యో దేవతా, సౌం బీజం, స్వాహా శక్తిః, శ్రీం కీలకం, శ్రీసుబ్రహ్మణ్య ప్రసాదసిద్ధ్యర్థే జపే వినియోగః ॥
కరన్యాసః –
సుబ్రహ్మణ్యాయ అఙ్గుష్ఠాభ్యాం నమః ।
షణ్ముఖాయ తర్జనీభ్యాం నమః ।
శక్తిధరాయ మధ్యమాభ్యాం నమః ।
షట్కోణసంస్థితాయ అనామికాభ్యాం నమః ।
సర్వతోముఖాయ కనిష్ఠికాభ్యాం నమః ।
తారకాన్తకాయ కరతలకరపృష్ఠాభ్యాం నమః ॥
హృదయాది న్యాసః –
సుబ్రహ్మణ్యాయ హృదయాయ నమః ।
షణ్ముఖాయ శిరసే స్వాహా ।
శక్తిధరాయ శిఖాయై వషట్ ।
షట్కోణసంస్థితాయ కవచాయ హుమ్ ।
సర్వతోముఖాయ నేత్రత్రయాయ వౌషట్ ।
తారకాన్తకాయ అస్త్రాయ ఫట్ ।
భూర్భువస్సువరోమితి దిగ్బన్ధః ॥
ధ్యానమ్ ।
షడ్వక్త్రం శిఖివాహనం త్రినయనం చిత్రామ్బరాలఙ్కృతం
వజ్రం శక్తిమసిం త్రిశూలమభయం ఖేటం ధనుశ్చక్రకమ్ ।
పాశం కుక్కుటమఙ్కుశం చ వరదం దోర్భిర్దధానం సదా
ధ్యాయామీప్సిత సిద్ధిదం శివసుతం శ్రీద్వాదశాక్షం గుహమ్ ॥
లమిత్యాది పఞ్చపూజాం కుర్యాత్ ।
పీఠికా ।
సత్యలోకే సదానన్దే మునిభిః పరివేష్టితమ్ ।
పప్రచ్ఛుర్మునయః సర్వే బ్రహ్మాణం జగతాం గురుమ్ ॥ 1 ॥

భగవన్ సర్వలోకేశ సర్వజ్ఞ కమలాసన ।
సదానన్ద జ్ఞానమూర్తే సర్వభూతహితే రత ॥ 2 ॥

బహుధా ప్రోక్తమేతస్య గుహస్య చరితం మహత్ ।
హృదయం శ్రోతుమిచ్ఛామః తస్యైవ క్రౌఞ్చభేదినః ॥ 3 ॥

బ్రహ్మోవాచ ।
శృణ్వన్తు మునయః సర్వే గుహ్యాద్గుహ్యతరం మహత్ ।
సుబ్రహ్మణ్యస్య హృదయం సర్వభూతహితోదయమ్ ॥ 4 ॥

సర్వార్థసిద్ధిదం పుణ్యం సర్వకార్యైక సాధనమ్ ।
ధర్మార్థకామదం గుహ్యం ధనధాన్యప్రవర్ధనమ్ ॥ 5 ॥

రహస్యమేతద్దేవానాం అదేయం యస్య కస్యచిత్ ।
సర్వమిత్రకరం గోప్యం తేజోబలసమన్వితమ్ ॥ 6 ॥

ప్రవక్ష్యామి హితార్థం వః పరితుష్టేన చేతసా ।
హృత్పద్మకర్ణికామధ్యే ధ్యాయేత్సర్వమనోహరమ్ ॥ 7 ॥

అథ హృదయమ్ ।
సువర్ణమణ్డపం దివ్యం రత్నతోరణరాజితమ్ ।
రత్నస్తమ్భసహస్రైశ్చ శోభితం పరమాద్భుతమ్ ॥ 8 ॥

పరమానన్దనిలయం భాస్వత్సూర్యసమప్రభమ్ ।
దేవదానవగన్ధర్వగరుడైర్యక్షకిన్నరైః । ॥ 9 ॥

సేవార్థమాగతైః సిద్ధైః సాధ్యైరధ్యుషితం సదా ।
మహాయోగీన్ద్రసంసేవ్యం మన్దారతరుమణ్డితమ్ ॥ 10 ॥

మణివిద్రుమవేదీభిర్మహతీభిరుదఞ్చితమ్ ।
తన్మధ్యేఽనన్తరత్న శ్రీచ్ఛటామణ్డలశోభితమ్ ॥ 11 ॥

రత్నసింహాసనం దివ్యం రవికోటిసమప్రభమ్ ।
సర్వాశ్చర్యమయం పుణ్యం సర్వతః సుపరిష్కృతమ్ ॥ 12 ॥

తన్మధ్యేఽష్టదలం పద్మం ఉద్యదర్కప్రభోదయమ్ ।
నిగమాగమరోలమ్బలమ్బితం చిన్మయోదయమ్ ॥ 13 ॥

దివ్యం తేజోమయం దివ్యం దేవతాభిర్నమస్కృతమ్ ।
దేదీప్యమానం రుచిభిర్విశాలం సుమనోహరమ్ ॥ 14 ॥

తన్మధ్యే సర్వలోకేశం ధ్యాయేత్సర్వాఙ్గసున్దరమ్ ।
అనన్తాదిత్యసఙ్కాశం ఆశ్రితాభీష్టదాయకమ్ ॥ 15 ॥

అచిన్త్యజ్ఞానవిజ్ఞానతేజోబలసమన్వితమ్ ।
సర్వాయుధధరం దివ్యం సర్వాశ్చర్యమయం గుహమ్ ॥ 16 ॥

మహార్హ రత్నఖచిత షట్కిరీటవిరాజితమ్ ।
శశాఙ్కార్ధకలారమ్య సముద్యన్మౌలిభూషణమ్ ॥ 17 ॥

మదనోజ్జ్వలకోదణ్డమఙ్గలభ్రూవిరాజితమ్ ।
విస్తీర్ణారుణపద్మశ్రీ విలసద్ద్వాదశేక్షణమ్ ॥ 18 ॥

చారుశ్రీవర్ణసమ్పూర్ణముఖశోభావిభాసురమ్ ।
మణిప్రభాసమగ్రశ్రీస్ఫురన్మకరకుణ్డలమ్ ॥ 19 ॥

లసద్దర్పణదర్పాఢ్య గణ్డస్థలవిరాజితమ్ ।
దివ్యకాఞ్చనపుష్పశ్రీనాసాపుటవిరాజితమ్ ॥ 20 ॥

మన్దహాసప్రభాజాలమధురాధర శోభితమ్ ।
సర్వలక్షణలక్ష్మీభృత్కమ్బుకన్ధర సున్దరమ్ ॥ 21 ॥

మహానర్ఘమహారత్నదివ్యహారవిరాజితమ్ ।
సమగ్రనాగకేయూరసన్నద్ధభుజమణ్డలమ్ ॥ 22 ॥

రత్నకఙ్కణసమ్భాస్వత్కరాగ్ర శ్రీమహోజ్జ్వలమ్ ।
మహామణికవాటాభవక్షఃస్థలవిరాజితమ్ ॥ 23 ॥

అతిగామ్భీర్యసమ్భావ్యనాభీనవసరోరుహమ్ ।
రత్నశ్రీకలితాబద్ధలసన్మధ్యప్రదేశకమ్ ॥ 24 ॥

స్ఫురత్కనకసంవీతపీతామ్బరసమావృతమ్ ।
శృఙ్గారరససమ్పూర్ణ రత్నస్తమ్భోపమోరుకమ్ ॥ 25 ॥

స్వర్ణకాహలరోచిష్ణు జఙ్ఘాయుగలమణ్డలమ్ ।
రత్నమఞ్జీరసన్నద్ధ రమణీయ పదామ్బుజమ్ ॥ 26 ॥

భక్తాభీష్టప్రదం దేవం బ్రహ్మవిష్ణ్వాదిసంస్తుతమ్ ।
కటాక్షైః కరుణాదక్షైస్తోషయన్తం జగత్పతిమ్ ॥ 27 ॥

చిదానన్దజ్ఞానమూర్తిం సర్వలోకప్రియఙ్కరమ్ ।
శఙ్కరస్యాత్మజం దేవం ధ్యాయేచ్ఛరవణోద్భవమ్ ॥ 28 ॥

అనన్తాదిత్యచన్ద్రాగ్ని తేజః సమ్పూర్ణవిగ్రహమ్ ।
సర్వలోకైకవరదం సర్వవిద్యార్థతత్త్వకమ్ ॥ 29 ॥

సర్వేశ్వరం సర్వవిభుం సర్వభూతహితే రతమ్ ।
ఏవం ధ్యాత్వా తు హృదయం షణ్ముఖస్య మహాత్మనః ॥ 30 ॥

సర్వాన్కామానవాప్నోతి సమ్యక్ జ్ఞానం చ విన్దతి ।
శుచౌ దేశే సమాసీనః శుద్ధాత్మా చరితాహ్నికః ॥ 31 ॥

ప్రాఙ్ముఖో యతచిత్తశ్చ జపేద్ధృదయముత్తమమ్ ।
సకృదేవ మనుం జప్త్వా సమ్ప్రాప్నోత్యఖిలం శుభమ్ ॥ 32 ॥

ఇదం సర్వాఘహరణం మృత్యుదారిద్ర్యనాశనమ్ ।
సర్వసమ్పత్కరం పుణ్యం సర్వరోగనివారణమ్ ॥ 33 ॥

సర్వకామకరం దివ్యం సర్వాభీష్టప్రదాయకమ్ ।
ప్రజాకరం రాజ్యకరం భాగ్యదం బహుపుణ్యదమ్ ॥ 34 ॥

గుహ్యాద్గుహ్యతరం భూయో దేవానామపి దుర్లభమ్ ।
ఇదం తు నాతపస్కాయ నాభక్తాయ కదాచన ॥ 35 ॥

న చాశుశ్రూషవే దేయం న మదాన్ధాయ కర్హిచిత్ ।
సచ్ఛిష్యాయ కులీనాయ స్కన్దభక్తిరతాయ చ ॥ 36 ॥

సతామభిమతాయేదం దాతవ్యం ధర్మవర్ధనమ్ ।
య ఇదం పరమం పుణ్యం నిత్యం జపతి మానవః ।
తస్య శ్రీ భగవాన్ స్కన్దః ప్రసన్నో భవతి ధ్రువమ్ ॥ 37 ॥